Itan ti Aldaw ti Pannakaisalakan!

“Adtoy! Itan ti nangnangruna a makaay-ayo a tiempo. Adtoy! Itan ti aldaw ti pannakaisalakan.”​—2 CORINTO 6:2.

1. Ania ti kasapulan tapno anamongandatayo ti Dios ken ni Kristo?

NANGITUDING ni Jehova iti aldaw a panangukomna iti sangatauan. (Aramid 17:31) Tapno maisalakantayto iti dayta nga aldaw, masapul nga addaantayo iti naanamongan a takder iti imatangna ken iti dinutokanna nga Ukom ni Jesu-Kristo. (Juan 5:22) Ti kasta a takder kalikagumanna ti kababalin a maitunos iti Sao ti Dios ken ti pammati a manggutugot kadatayo a tumulong kadagiti sabsabali nga agbalin a pudno nga ad-adalan ni Jesus.

2. Apay a naisina iti Dios ti lubong ti sangatauan?

² Gapu iti natawid a basol, naisina iti Dios ti lubong ti sangatauan. (Roma 5:12; Efeso 4:17, 18) Gapuna, maisalakan laeng dagidiay kasabaantayo no maikappiada kenkuana. Imbatad daytoy ni apostol Pablo iti suratna kadagiti Kristiano idiay Corinto. Usigentayo ti 2 Corinto 5:10–6:10 tapno makitatayo no ania ti kinuna ni Pablo maipapan iti panangukom, pannakikappia iti Dios, ken pannakaisalakan.

“Itultuloymi a Guyugoyen Dagiti Tattao”

3. Kasano nga ‘intultuloy [ni Pablo] a ginuyugoy dagiti tattao,’ ket apay a rebbeng nga aramidentay daytoy ita?

³ Innaig ni Pablo ti panangukom iti panangasaba idi insuratna: “Masapul a maiparangarangtayo amin iti sanguanan ti pagtugawan a pangukoman ni Kristo, tapno tunggal maysa magun-odna ti gunggonana maipaay kadagiti bambanag a naaramidan babaen ti bagi, sigun kadagiti bambanag nga inannurotna, uray naimbag wenno nakadakdakes. Gapuna, yantangay ammomi ti panagbuteng iti Apo, itultuloymi a guyugoyen dagiti tattao.” (2 Corinto 5:10, 11) ‘Intultuloy [ti apostol] a ginuyugoy dagiti tattao’ babaen ti panangikasabana iti naimbag a damag. Datayo ngay? Tangay sangsanguentayo ti panungpalan daytoy dakes a sistema ti bambanag, rebbengna nga ikagumaantayo a guyugoyen dagiti sabsabali a mangaramid kadagiti addang a kasapulan tapno magun-odda ti paborable a panangukom ni Jesus ken ti anamong ti Gubuayan ti pannakaisalakan, ni Jehova a Dios.

4, 5. (a) Apay a ditay koma ipasindayag dagiti gapuanantayo iti panagserbi ken Jehova? (b) Kasano a nagpasindayag ni Pablo “maipaay iti Dios”?

⁴ Nupay kasta, no binendisionan ti Dios ti ministeriotayo, ditay koma agpalangguad. Idiay Corinto, adda idi dagidiay nangipannakkel iti bagbagida wenno kadagiti tattao, a pakaigapuan ti panaglalasin iti kongregasion. (1 Corinto 1:10-13; 3:3, 4) Mainaig iti daytoy a kasasaad, insurat ni Pablo: “Saanmi nga irekrekomenda manen ti bagbagimi kadakayo, no di ket ipapaayandakayo iti pakagutugotan iti panagpasindayag no maipapan kadakami, tapno maaddaankayo iti isungbat kadagidiay mangipaspasindayag iti makinruar a langa ngem saan nga iti puso. Ta no napukawmi koma ti nakemmi, maipaay dayta iti Dios; no nasimbeng ti panagpampanunotmi, maipaay dayta kadakayo.” (2 Corinto 5:12, 13) Saan a maseknan dagiti napasindayag iti panagkaykaysa ken naespirituan a pagimbagan ti kongregasion. Kayatda nga ipasindayag dagiti makinruar a langa imbes a tulonganda koma dagiti kapammatianda a mangpatanor iti naimbag a puso iti imatang ti Dios. Gapuna, tinubngar ni Pablo ti kongregasion ket iti ud-udina, kinunana: “Ti agpasindayag, agpasindayag koma ken Jehova.”​—2 Corinto 10:17.

⁵ Saan aya a nagpasindayag ni Pablo a mismo? Nalabit a kasta ti ipagarup dagiti dadduma gapu iti imbagana maipapan iti kinaapostolna. Ngem nasken idi nga agpasindayag “maipaay iti Dios.” Impasindayagna dagiti gapuananna a kas apostol, tapno dagiti taga Corinto saanda a paglikudan ni Jehova. Inaramid daytoy ni Pablo tapno pagsublienna ida iti Dios agsipud ta iturturong ida dagiti sinan-apostol iti di umiso a direksion. (2 Corinto 11:16-21; 12:11, 12, 19-21; 13:10) Ngem, saan nga ugali ni Pablo ti mangipannakkel kadagiti gapuananna tapno dayawen dagiti sabsabali.​—Proverbio 21:4.

Tigtignayennakay Kadi ti Ayat ni Kristo?

6. Kasanonatay koma nga apektaran ti ayat ni Kristo?

⁶ Kas pudno nga apostol, insuro ni Pablo dagiti sabsabali maipapan iti daton a panubbot ni Jesus. Adda epekto dayta iti biag ni Pablo, ta insuratna: “Ti ayat nga adda ken Kristo pilitennakami, agsipud ta isu daytoy ti impatomi, a ti maysa a tao natay maipaay iti isuamin; no kasta, ngarud, natay ti isuamin; ket isu natay maipaay iti isuamin tapno dagidiay nga agbiag saanda koman nga agbiag nga agpaay iti bagbagida, no di ket agpaay kenkuana a natay maipaay kadakuada ken napagungar.” (2 Corinto 5:14, 15) Anian nga ayat ti impakita ni Jesus iti panangidatonna iti biagna gapu kadatayo! Wen, dayta koma ti mangtignay a puersa iti biagtayo. Ti panagyaman ken Jesus iti panangidatonna iti biagna maipuon kadatayo tignayennatay koma a sireregta a mangiwaragawag iti naimbag a damag maipapan iti pannakaisalakan nga impaay ni Jehova babaen ti dungdungnguenna nga Anak. (Juan 3:16; idiligyo ti Salmo 96:2.) Tigtignayennakay kadi “ti ayat nga adda ken Kristo” a sireregta a mangikasaba iti Pagarian ken mangaramid kadagiti adalan?​—Mateo 28:19, 20.

7. Ania ti kayat a sawen ti “awanen ti ammomi a tao sigun iti lasag”?

⁷ Babaen ti panagbiagda iti wagas a mangipakita iti panagyaman iti inaramid ni Kristo maipaay kadakuada, dagiti napulotan ‘saandan nga agbiag nga agpaay iti bagbagida, no di ket agpaay kenkuana.’ “Iti kasta,” kinuna ni Pablo, “manipud ita awanen ti ammomi a tao sigun iti lasag. Uray pay no naammuanmi ni Kristo sigun iti lasag, pudno nga ita saanen a kasta ti pannakaammomi kenkuana.” (2 Corinto 5:16) Masapul a dagiti Kristiano saanda a matmatan dagiti tattao iti nailasagan a wagas, a nalabit isaluminada dagiti Judio kadagiti Gentil wenno dagiti nabaknang kadagiti napanglaw. Dagiti napulotan ‘awan ti ammoda a tao sigun iti lasag,’ ta ti napateg isu ti naespirituan a pannakainaigda kadagiti kapammatianda. Dagidiay ‘nakaammo ken Kristo sigun iti lasag’ ket saan laeng a dagiti tattao a nakakita ken Jesus idi adda ditoy daga. Uray no dagiti dadduma a nangnamnama iti Mesias binigbigda idi ni Kristo kas tao, saanen a kasta ti pangibilanganda kenkuana. Inyawatna ti bagina kas subbot ket napagungar kas maysa nga espiritu a mangted iti biag. Dagiti dadduma a mapagungar iti nailangitan a biag iwaksida ti nailasagan a bagida a saanda man la a nakita ni Jesu-Kristo a naglasag.​—1 Corinto 15:45, 50; 2 Corinto 5:1-5.

8. Kasano a dagiti indibidual ‘maikaykaysada ken Kristo’?

⁸ Kinuna pay ni Pablo kadagiti napulotan: “No ti asinoman naikaykaysa ken Kristo, isu maysa a baro a parsua; naglabasen dagiti daan a bambanag, adtoy! napaaddan dagiti baro a bambanag.” (2 Corinto 5:17) Ti ‘pannakaikaykaysa ken Kristo’ kaipapananna ti pannakipagmaymaysa kenkuana. (Juan 17:21) Mabukel daytoy a relasion no ti maysa a tao ket inyadani ni Jehova iti Anakna ken pinulotanna iti nasantuan nga espiritu. Kas anak ti Dios a napulotan iti espiritu, isu ket maysa a “baro a parsua” a makipagturay ken Kristo iti nailangitan a Pagarian. (Juan 3:3-8; 6:44; Galacia 4:6, 7) Naikkan dagiti kasta a napulotan a Kristiano iti naindaklan a pribilehio iti serbisio.

“Makikappiakayo iti Dios”

9. Ania ti inaramid ti Dios tapno agbalin a posible ti pannakikappia kenkuana?

⁹ Pudno a pinaraburan ni Jehova ti “baro a parsua”! Kuna ni Pablo: “Isuamin a bambanag naggapuda iti Dios, a nangikappia kadatayo iti bagina babaen ken Kristo ken nangted kadakami iti ministerio ti pannakikappia, nga awan sabali, a ti Dios pinakikappiana ti lubong iti bagina a mismo babaen ken Kristo, saanna nga insingir kadakuada dagiti labsingda, ket intalekna ti sao ti pannakikappia kadakami.” (2 Corinto 5:18, 19) Naisina ti sangatauan iti Dios manipud idi nagbasol ni Adan. Ngem siaayat a linuktan ni Jehova ti dalan iti pannakikappia babaen ti daton ni Jesus.​—Roma 5:6-12.

10. Siasino ti nangikumitan ni Jehova iti ministerio a panangikappia, ket ania ti inaramidda tapno maitungpalda dayta?

¹⁰ Intalek ni Jehova kadagiti napulotan ti ministerio a panangikappia, isut’ gapuna a naikuna ni Pablo: “Dakami ngarud ket embahador a mangisunsuno ken Kristo, a kasla agpakpakaasi ti Dios babaen kadakami. Kas dagiti suno ni Kristo ipakaasimi: ‘Makikappiakayo iti Dios.’” (2 Corinto 5:20) Idi un-unana a panawen, maibaon dagiti embahador kangrunaanna kadagiti tiempo ti panagbinnusor tapno maammuan no malapdan ti gubat. (Lucas 14:31, 32) Tangay naisina iti Dios ti managbasol a lubong ti sangatauan, imbaonna dagiti napulotan nga embahadorna tapno ipakaammoda kadagiti tattao dagiti kondisionna iti pannakikappia. Kas suno ni Kristo, ipakpakaasi dagiti napulotan: “Makikappiakayo iti Dios.” Daytoy a dawat ket naasi a panangidagadag kadagiti tattao a makikappia iti Dios ket awatenda ti pannakaisalakan nga ipaayna babaen ken Kristo.

11. Babaen ti pammati iti subbot, siasino dagiti makagun-od iti nalinteg a takder iti imatang ti Dios?

¹¹ Mabalin a maikappia iti Dios dagiti amin a tao a mamati iti subbot. (Juan 3:36) Kuna ni Pablo: “Daydiay [ni Jesus] saan a nakaammo iti basol inaramidna [ni Jehova] a basol maipaay kadakami, tapno agbalinkami koma a kinalinteg ti Dios babaen kenkuana.” (2 Corinto 5:21) Ti perpekto a tao a ni Jesus ti daton a maigapu iti basol dagiti amin nga annak ni Adan a naisalakan iti natawid a basol. Agbalinda a “kinalinteg ti Dios” babaen ken Jesus. Dagiti 144,000 a makipagtawid ken Kristo ti umuna a pakaipaayan daytoy a kinalinteg, wenno nalinteg a takder iti imatang ti Dios. Bayat ti Sangaribu a Tawen a Panagturayna, maaddaanto iti nalinteg a takder kas perpekto a tattao dagiti naindagaan nga annak ti Agnanayon nga Ama, ni Jesu-Kristo. Aonennanto ida nga iturong iti nalinteg ken perpekto a kasasaad tapno maaddaanda iti gundaway a mangipaneknek iti kinamatalekda iti Dios ket awatenda ti sagut a biag nga agnanayon.​—Isaias 9:6; Apocalipsis 14:1; 20:4-6, 11-15.

“Ti Nangnangruna a Makaay-ayo a Tiempo”

12. Ania a napateg a ministerio ti itungtungpal dagiti embahador ken babaonen ni Jehova?

¹² Tapno maisalakantayo, masapul nga agtignaytayo a mayannurot kadagitoy a sasao ni Pablo: “Yantangay makipagtartrabahokami a sangsangkamaysa kenkuana [ni Jehova], ipakaasimi met kadakayo a saanyo nga awaten ti di kaikarian a kinamanangaasi ti Dios ket maikapiskayo iti panggepna. Ta kunana: ‘Iti maysa a makaay-ayo a tiempo dinengngegka, ken iti maysa nga aldaw ti pannakaisalakan tinulonganka.’ Adtoy! Itan ti nangnangruna a makaay-ayo a tiempo. Adtoy! Itan ti aldaw ti pannakaisalakan.” (2 Corinto 6:1, 2) Dagiti napulotan nga embahador ni Jehova ken dagiti babaonenna, dagiti “sabsabali a karnero,” saanda nga awaten ti di kaikarian a kinamanangngaasi ti nailangitan nga Amada ket maikapisda iti panggepna. (Juan 10:16) Babaen ti nalinteg a panagbiag ken naregta a ministerioda iti daytoy “makaay-ayo a tiempo,” ikagkagumaanda a gun-oden ti anamong ti Dios ken ipakpakaammoda kadagiti agnaed iti daga nga itan “ti aldaw ti pannakaisalakan.”

13. Ania ti kababagas ti Isaias 49:8, ket kasano ti damo a pannakatungpalna?

¹³ Inadaw ni Pablo ti Isaias 49:8, a kunana: “Kastoy ti kuna ni Jehova, ‘Iti panawen a maitutop sinungbatanka, ken iti aldaw ti pannakaisalakan binadanganka; ket igagakanto, ken itedkanto a maipaay a tulag kadagiti tattao, a mamangon iti daga, ken mamagtawid kadagiti nalangalang a tawid.’” Damo a natungpal daytoy a padto idi a nawayawayaan dagiti Israelita idiay Babilonia a nakakayawanda ket idi agangay nagsublida iti dagada a langalang.​—Isaias 49:3, 9.

14. Kasano a natungpal ken Jesus ti Isaias 49:8?

¹⁴ Kas kanayonan a kaitungpalan ti padto ni Isaias, inted ni Jehova ti ‘adipenna’ a ni Jesus kas ‘silaw kadagiti Gentil, tapno makapagbalin a pangisalakan [ti Dios] agingga iti ungto ti daga.’ (Isaias 49:6, 8; idiligyo ti Isaias 42:1-4, 6, 7; Mateo 12:18-21.) Ti “panawen a maitutop,” wenno “makaay-ayo a tiempo,” ket nabatad a natungpal ken Jesus idi adda ditoy daga. Nagkararag, ket ‘sinungbatan’ ti Dios. “Aldaw [idi dayta] ti pannakaisalakan” para ken Jesus agsipud ta sinalimetmetanna a naan-anay ti kinatarnawna ket iti kasta “nagbalin a makinrebbeng iti agnanayon a pannakaisalakan amin dagidiay agtultulnog kenkuana.”​—Hebreo 5:7, 9; Juan 12:27, 28.

15. Manipud kaano nga inkagumaan a pinaneknekan dagiti naespirituan nga Israelita a maikarida iti di kaikarian a kinamanangngaasi ti Dios, ken iti ania a panggep?

¹⁵ Inyaplikar ni Pablo ti Isaias 49:8 kadagiti napulotan a Kristiano, nga indawatna kadakuada a ‘saanda koma a maikapis iti panggep ti di kaikarian a kinamanangngaasi ti Dios’ babaen ti saanda a pananggun-od iti paraburna iti “makaay-ayo a tiempo” ken iti “aldaw ti pannakaisalakan” nga ipaayna. Kinuna pay ni Pablo: “Adtoy! Itan ti nangnangruna a makaay-ayo a tiempo. Adtoy! Itan ti aldaw ti pannakaisalakan.” (2 Corinto 6:2) Nanipud idi Pentecostes 33 K.P., inkagumaan a pinaneknekan dagiti naespirituan nga Israelita a maikarida iti di kaikarian a kinamanangngaasi ti Dios tapno ti “makaay-ayo a tiempo” ket “aldaw ti pannakaisalakan” para kadakuada.

‘Panangirekomenda iti Bagbagitayo kas Ministro ti Dios’

16. Kadagiti ania a narigat a kasasaad nga impaneknek ni Pablo nga isu ket maikari kas ministro ti Dios?

¹⁶ Adda idi dagiti lallaki a naikameng iti kongregasion sadi Corinto a mangipakpakita a saanda a maikari iti di kaikarian a kinamanangngaasi ti Dios. Pinardayada ni Pablo iti panangikagumaanda a mangdadael iti autoridadna kas apostol, nupay liniklikanna ti ‘mangted iti aniaman a pakaigapuan ti pannakaitibkol.’ Nalawag nga impakitana nga isu ket maikari kas ministro ti Dios “babaen ti panagibtur iti kasta unay, babaen kadagiti rigat, babaen kadagiti kaso iti panagkasapulan, babaen kadagiti pakarigatan, babaen kadagiti pannakababaot, babaen kadagiti pannakaibalud, babaen kadagiti riribuk, babaen kadagiti panagbannog, babaen kadagiti rabii nga awanan pannaturog, babaen kadagiti tiempo a kaawan taraon.” (2 Corinto 6:3-5) Iti ud-udina, inkalintegan ni Pablo a no ministro dagiti bumusbusor kenkuana, isu ket ‘ad-adda a naisangsangayan’ agsipud ta ad-adu ti sinagabana a pannakaibalud, pannakababaot, peggad, ken pakarigatan.​—2 Corinto 11:23-27.

17. (a) Babaen ti panangipakita kadagiti ania a galad a maipaneknektayo a maikaritayo kas ministro ti Dios? (b) Ania dagiti “igam ti kinalinteg”?

¹⁷ Kas ken Pablo ken dagiti kakaduana, mabalintay nga irekomenda ti bagbagitayo kas ministro ti Dios. Kasano? “Babaen ti kinadalus,” wenno kinasin-aw, ken babaen ti panagbiag a maitunos iti umiso a pannakaammo iti Biblia. Mairekomendatayo ti bagbagitayo “babaen ti mabayag a panagitured,” a siaanus nga ibturantayo ti dakes wenno makaparurod a kasasaad, ken “babaen ti kinamanangaasi” iti panangtulong kadagiti sabsabali. Maysa pay, mairekomendatayo ti bagbagitayo kas ministro ti Dios babaen ti panagpaidalan iti espirituna, panangipakita iti “ayat a siwayawaya manipud panaginsisingpet,” panagsao iti pudno, ken panagpannuray iti bileg nga itdenna tapno maitungpaltayo ti ministeriotayo. Makapainteres ta pinaneknekan met ni Pablo ti kinaministrona “babaen kadagiti igam ti kinalinteg iti makannawan nga ima ken iti makannigid.” Kadagiti gubat idi ugma, kadawyanna a ti makannawan nga ima ti agiggem iti kampilan ket ti makannigid ti mangiggem iti kalasag. Iti naespirituan a pannakigubatna kadagiti ulbod a mannursuro, saan a nagaramat ni Pablo kadagiti igam ti managbasol a lasag​—kinasikap, panangallilaw, panagulbod. (2 Corinto 6:6, 7; 11:12-14; Proverbio 3:32) Inusarna dagiti nalinteg nga “igam,” wenno pamay-an, a nangitandudo iti pudno a panagdayaw. Kastatay met koma.

18. No ministronatayo ti Dios, kasano ti panagtignaytayo?

¹⁸ No ministronatayo ti Dios, agtignaytayo a kas iti panagtignay ni Pablo ken dagiti katrabahuanna. Agtignaytayo a kas Kristiano, raemendatay man wenno umsiendatayo. Uray no padaksendatayo, ditay sumardeng a mangasaba. Ditay met agpasindayag no naimbag ti maipadpadamag maipapan kadatayo. Sawentayo ti pudno ket nalabit padayawandatayo gapu kadagiti nadiosan nga aramidtayo. No agpeggad ti biagtayo gapu iti panangranggas dagiti kabusor, agtalektayo ken Jehova. Ken siyayaman nga awatentayo ti disiplina.​—2 Corinto 6:8, 9.

19. Kasano a ‘mapabaknangtayo dagiti adu’ iti naespirituan?

¹⁹ Iti paggibusan ti panangsalaysayna iti ministerio a panangikappia, dineskribir ni Pablo ti bagina ken dagiti kakaduana “kas agladladingit ngem agnanayon nga agragrag-o, kas napanglaw ngem mangpabpabaknang kadagiti adu, kas awanan iti aniaman ngem kaskasdi a mangtagtagikua iti isuamin a bambanag.” (2 Corinto 6:10) Nupay adda panggapuan dagitoy a ministro nga agladingit gapu kadagiti sagsagabaenda, naragsakda latta. Napanglawda, ngem ‘adu ti pinabaknangda’ iti naespirituan. Kinapudnona, ‘tinagikuada amin a banag’ gapu ta ti pammatida pinabaknangna ida iti naespirituan​—naaddaanda pay ketdi iti namnama nga agbalin a nailangitan nga annak ti Dios. Maysa pay, nabunga ken naragsak ti panagbiagda kas Kristiano a ministro. (Aramid 20:35) Kas kadakuada, ‘adu ti mapabaknangtayo’ babaen ti pannakiraman itan iti ministerio a panangikappia​—iti daytoy nga aldaw ti pannakaisalakan!

Agtalekkayo iti Panangisalakan ni Jehova

20. (a) Ania ti napasnek a tarigagay ni Pablo, ket apay a saan idi a panawen ti panagpamayan? (b) Ania ti mangipamatmat nga agbibiagtayon iti aldaw ti pannakaisalakan?

²⁰ Idi inaramid ni Pablo ti maikadua a suratna kadagiti taga Corinto idi agarup 55 K.P., 15 a tawen laeng idin ti natda sakbay nga agpatingga ti Judio a sistema ti bambanag. Sipapasnek a kayat ti apostol a maikappia dagiti Judio ken Gentil iti Dios babaen ken Kristo. Aldaw daydi ti pannakaisalakan, ket bassit laengen idi ti natda a tiempo. Bueno, agbibiagtayo met iti panungpalan ti sistema ti bambanag sipud idi 1914. Ti sangalubongan a pannakaikaskasaba ti Pagarian ita ipamatmatna nga itan ti aldaw ti pannakaisalakan.

21. (a) Ania ti napili a teksto para iti tawen 1999? (b) Ania ti rebbengna koma nga ar-aramidentayo iti daytoy aldaw ti pannakaisalakan?

²¹ Masapul a maammuan dagiti tattao iti amin a nasion ti maipapan iti probision ti Dios iti pannakaisalakan babaen ken Jesu-Kristo. Saan daytoy a panawen ti panagpamayan. Insurat ni Pablo: “Adtoy! Itan ti aldaw ti pannakaisalakan.” Dagita a sasao ti 2 Corinto 6:2 ti teksto dagiti Saksi ni Jehova iti tawen 1999. Anian a maikanatad dayta, ta adda sangsanguentayo nga adayo a nakarkaro ngem ti pannakadadael ti Jerusalem ken ti templona! Asidegen nga agpatingga daytoy intero a sistema ti bambanag, a pakairamanan ti isuamin ditoy daga. Itan​—saan nga inton bigat​—ti panawen ti panagtignay. No mamatitayo a ti pannakaisalakan maipabiang ken Jehova, no isu ket ay-ayatentayo, ken no napateg kadatayo ti biag nga agnanayon, saantay nga ipalubos a maikapistayo iti panggep ti di kaikarian a kinamanangngaasi ti Dios. Buyogen ti naimpusuan a tarigagay a mangidaydayaw ken Jehova, paneknekantayo babaen ti sao ken aramid a saan a barengbareng ti panangikunatayo iti: “Adtoy! Itan ti aldaw ti pannakaisalakan.”

Kasanoyo a Sungbatan?

◻ Apay a nagpateg ti pannakikappia iti Dios?

◻ Siasino dagiti embahador ken babaonen a makiramraman iti ministerio a panangikappia?

◻ Kasanotay a maipaneknek a maikaritayo nga agbalin a ministro ti Dios?

◻ Ania ti kaipapananna kadakayo ti teksto dagiti Saksi ni Jehova para iti tawen 1999?

[Dagiti Ladawan iti panid 17]

Kas ken Pablo, sireregtakay kadi a mangaskasaba ken tumultulong kadagiti sabsabali a makikappia iti Dios?

Estados Unidos

Francia

Côte d’Ivoire

[Ladawan iti panid 18]

Iti daytoy aldaw ti pannakaisalakan, maysakayo kadi kadagiti umariwekwek a maikapkappia ken ni Jehova a Dios?