AQUILA
[manipud Lat., kaipapananna ti “Agila”].
Maysa a nainkasigudan a Judio ken nayanak idiay Ponto iti makin-amianan nga Asia Menor. Ni Priscila nga asawana ken nasungdo a kaduana ket kankanayon a kaduana a madakdakamat. Nagnaedda idiay Corinto gapu ta napagtalawda manipud Roma idi adda bilin ni Emperador Claudio maibusor kadagiti Judio iti maysa a tiempo idi tawen 49 wenno nasapa a paset ti 50 K.P. (Ara 18:1, 2) Idi dimteng sadiay ni Pablo iti otonio ti 50 K.P., siaayat a pinasangbay da Aquila ken Priscila iti pagtaenganda. Napatanorda ti nasinged unay a panaggagayyem bayat a nagkakatrabahuanda iti maymaysa a pagsapulanda a panagaramid iti tolda ken bayat a da Aquila ken Priscila awan duadua a timmulongda ken Pablo a nangpabileg iti kabbaro a kongregasion sadiay.—Ara 18:3.
Idi naglayag ni Pablo nga agturong iti Siria iti panagngudo ti maikadua a panagdaliasatna kas misionero idi primavera ti agarup 52 K.P., kinuyog da Aquila ken Priscila agingga idiay Efeso. (Ara 18:18, 19) Nagtalinaedda pay sadiay nalabit agingga idi a nagsurat ni Pablo kadagiti taga Corinto manipud sadiay idi agarup 55 K.P. Nausar ti pagtaenganda kas paggigimongan ti kongregasion iti dayta a lugar, ket sadiay naaddaanda iti pribilehio a mangtulong iti nalaing nga agbitla a ni Apolos tapno ad-adda nga umiso ti pannakaawatna iti dalan ti Dios. (1Co 16:19; Ara 18:26) Idi tiempo a nagsurat ni Pablo kadagiti taga Roma, agarup 56 K.P., nagpatinggan ti panagturay ni Claudio ket nagsublin da Aquila ken Priscila idiay Roma, ta impaidanon ni Pablo dagiti kablaawna kadakuada, dagiti ‘katrabahuanna.’ (Ro 16:3) Uray met ditoy ti balayda ti nagtataripnongan ti kongregasion. (Ro 16:5) Adda tiempo bayat ti panaggagayyemda kada Pablo, ‘inrisgo da Aquila ken Priscila dagiti bukodda a tengnged’ maigapu ken Pablo, iti kasta maikarida iti panagyaman dagiti amin a kongregasion. (Ro 16:4) Idi agangay nagsublida idiay Efeso, ta bayat ti kaadda ni Pablo idiay Roma sakbay unay a napapatay kas martir (a. 65 K.P.), kiniddawna ken Timoteo nga idanonna dagiti kablaawna kadakuada sadiay.—1Ti 1:3; 2Ti 4:19.