PRISCA

[Baket]; Priscila [Bassit a Baket].

Masarakan ti ab-ababa a porma dayta a nagan kadagiti surat ni Pablo, ti at-atiddog a porma iti surat ni Lucas. Ti kasta a panagduduma ket gagangay idi kadagiti Romano a nagan.

Ni Priscila isu ti asawa a babai ni Aquila, a kaduana a kanayon a madakamat. Nangipakita dagitoy a dua kadagiti nagsasayaat a Nakristianuan nga aramid ken kinamanagpadagus saan laeng a kadagiti indibidual no di ket kasta met iti kongregasion babaen ti pannakaaramat ti pagtaenganda a pakaangayan dagiti gimong ti kongregasion agpadpada idiay Roma ken Efeso.

Gapu iti pammilin ni Emperador Claudio, pimmanaw ni Aquila ken ti asawana idiay Roma ket napanda idiay Corinto idi agarup 50 K.P. Di nagbayag kalpasan ti idadatengda sadiay, nakikadua kadakuada ni Pablo iti panagaramid iti tolda. (Ara 18:2, 3) Nagdaliasatda a kadua ni Pablo nga agturong idiay Efeso, nagtalinaedda sadiay iti apagbiit, ket nakatulongda iti ‘ad-adda a siuumiso a pannakaibinsabinsa ti dalan ti Dios’ iti nalaing nga agbitla a ni Apolos. (Ara 18:18, 19, 24-28; 1Co 16:19) Nagsublida idiay Roma iti sumagmamano a tiempo (Ro 16:3-5), ngem idi agangay nagdaliasatda nga agsubli idiay Efeso. (2Ti 4:19; 1Ti 1:3) Pimmaut ti personal a pannakilangenda ken Pablo manipud agarup 50 K.P. agingga iti ipapatay ni Pablo, aganay a 15 a tawen kalpasanna, a bayat dayta a panagkakadua ‘inrisgoda dagiti bukodda a tengnged’ maipaay iti kararua ti apostol.​—Ro 16:3, 4; kitaenyo ti AQUILA.