CAPADOCIA
Idi kaaldawan dagiti apostol, ti Capadocia ket nalawa a rehion iti makindaya a paset ti Asia Menor, a kaaduanna nga addaan nalamiis a klima ken narasay a kakaykaywan. Adda dayta iti nangato a lantag a ti kaaduan a pasetna ket addaan iti kangato a 900 m (3,000 pie). Nupay nagbaliwbaliw dagiti beddengna iti intero a pakasaritaanna, kadawyanna a dagitoy ti Ponto iti amianan, Galacia ken Licaonia iti laud, Cilicia ken Bambantay ti Taurus iti abagatan, ken ti Armenia ken makinngato a Karayan Eufrates iti daya. Nasaknap idi sadiay ti panagpastor iti karkarnero, ket naruay met ti bakbaka ken nasayaat a kabkabalio. Trigo idi ti kangrunaan a maapit a bukel.
Ti Capadocia ket napagbalin a paset ti Imperio ti Persia iti sidong ni Ciro ket ti orihinal a rehion napagbalin a dua a teritoria nga iturayan ti satrapa, ti Ponto ken Capadocia. Bayat ti Seleucido a dinastia ti Siria, napalubosan nga agturay dagiti ari nga agbaybayad iti impuesto. Pinagpatingga daytoy ti Romano nga Emperador Tiberio idi 17 K.P., ket ti Capadocia nagbalin a probinsia ti Roma iti sidong ti panangaywan ti maysa a prokurador. Pinalawa ni Vespasian ti probinsia idi 70 K.P., nga intiponna dayta iti Armenia, iti kasta nabukel ti probinsia a nagbalin a kangrunaan a beddeng iti Daya. Nagsayaat ti lugar nga ayan ti Capadocia gapu kadagiti kalsada a lumasat iti dayta a rehion, a ti maysa kadagitoy ket mangrugi iti Tarso iti Mediteraneo, lumasat iti giwang iti Kabambantayan ti Taurus a pagaammo kas Ruruangan ti Cilicia, bumallasiw iti Capadocia nga agturong iti probinsia ti Ponto, ken agturong kadagiti puerto iti Nangisit a Baybay.
Dagiti mismo nga umili ti Capadocia ket nabatad nga Aryano a nagtaud kadagiti kaputotan ni Jafet, ngem adda pammaneknek a nagnanaed sadiay dagiti Judio idi maikadua a siglo K.K.P. Sumagmamano a Judio manipud Capadocia ti adda idiay Jerusalem idi Pentecostes ti 33 K.P. (Ara 2:9) Mabalin a nangibunga daytoy iti nasapa a panagsaknap ti Nakristianuan a sursuro idiay Capadocia, ket karaman dagiti Kristiano a taga Capadocia kadagidiay nangiturongan ni Pedro iti umuna a suratna.—1Pe 1:1.