AGPAMPANNURAY NGA IL-ILI

Babassit nga ili iti arubayan ti dakdakkel nga ili wenno siudad. Ti kabesera wenno kangrunaan a siudad ti maysa a distrito isu ti metropolis, wenno “ina” a siudad, kas iti 1 Cronicas 18:1: “Ti Gat ken dagiti agpampannuray nga ilina “ (iti literal, “Ti Gat ken ti annakna a babbai”). Ti Tiro naawagan “anak a babai” ti Sidon, siudad a nabatad a dadaan ngem Tiro, nga agparang a sigud a kolonia ti Sidon. (Isa 23:8, 12; Ge 10:19; Jos 11:8) Ti il-ili ti Juda agpampannuray idi iti Jerusalem. (Sal 48:11; 97:8; Un 3:51) Ti dadduma pay nga “ina” a siudad nga addaan agpampannuray nga il-ili ket Samaria ken Sodoma (Eze 16:53), Rabba ti Ammon (Jer 49:3), Kenat (Nu 32:42), Ekron (Jos 15:45), Asdod ken Gaza (Jos 15:47), Bet-sean, Ibleam, Dor, En-dor, Taanac, ken Megiddo (Jos 17:11).

Ti “anak a babai” nga il-ili mabalin a nagtaud wenno agpampannuray iti “ina” a siudad mainaig iti politika, ekonomia, ken no dadduma iti relihion. Iti sumagmamano a kaso, ti agpampannuray nga il-ili di napaderan wenno nakapkapuy ti pannakasarikedkedda, ket dagiti agnanaed agkamangda iti “ina” a siudad kadagiti tiempo ti pannakalakub.​—Jer 4:5; 8:14.

Ti kadaanan a siudad ti Jerusalem kas “ina” ti agpampannuray nga il-ili ti Juda ket simboliko a naaramat a mangiladawan iti “nailangitan a Jerusalem,” ti Mesianiko a Pagarian ni Jehova babaen ken Jesu-Kristo, nga iti dayta dagidiay agbirbirok iti kinalinteg makasarakdanto iti pagkamangan iti “aldaw ni Jehova maibusor kadagiti amin a nasion.”​—Heb 12:22, 28; Abd 15, 17; Sal 48:11-13; Joe 2:32.

Ti Babilonia a Dakkel nailadawan iti Apocalipsis, kapitulo 17, kas balangkantis a babai ken kas siudad, nga addaan annak a babbai. Dagitoy ket organisasion a nagtaud iti ina nga organisasion. Marbadanto a madadael a maikanunong kenkuana ta agpampannurayda kenkuana.​—Kitaenyo ti SIUDAD.