MANOA
Maysa a lalaki a Danita nga agnanaed iti ili ti Zora nga adda iti Sefela (Jos 15:33) ken ama ni Ukom Samson. Ni Manoa ket napasnek a managdaydayaw ken Jehova.
Maysa nga aldaw nagparang ti maysa nga anghel iti lupes nga asawa ni Manoa, ket impakaammona a mangipasngayto iti anak a lalaki nga agbalin a Nazareo ti Dios. Idi naibaga daytoy ken Manoa, immararaw ken Jehova, a kiniddawna nga ibaonna manen ti mensahero tapno isurona kadakuada no kasano ti panangpadakkelda iti ubing. Sinungbatan ni Jehova ti kararag ni Manoa ket imbaonna ti anghel iti maikadua a gundaway. Idi intukon ni Manoa nga idasaranna iti makan ti mensahero, naibaga kenkuana a mangidatag laengen iti daton a mapuoran nga agpaay ken Jehova, ket inaramidna dayta. Idi immulin daytoy a mensahero iti gil-ayab nga agpangpangato manipud iti altar, iti daydi laeng a nailasin ni Manoa a daytoy ket anghel ni Jehova. Gapu iti daytoy a kapadasan, nagbuteng ni Manoa amangan no matayda nga agassawa. Ngem pinagkalma ti asawana ti panagdanag ni Manoa iti panangikunana: “No naragsakan laeng ni Jehova a papatayennata, saan koma a nangawat iti daton a mapuoran ken iti daton a bukbukel manipud iti imata, ken saanna koma nga impakita kadata amin dagitoy a banag, ken saanna koma nga impangngeg kadata a kas ita ti aniaman a banag a kas itoy.”—Uk 13:2-23.
Tawtawen kalpasanna, saan nga immanamong da Manoa ken ti asawana iti tarigagay ni Samson a mangasawa iti babai a Filisteo a taga Timna gapu ta “saanda nga ammo a nagtaud dayta ken Jehova.” (Uk 14:1-4; idiligyo ti De 7:3, 4.) Idi agangay, ni Samson ket kinuyog dagitoy nga agassawa a mapan idiay Timna, nupay saanda a kimmuyog kenkuana nga agingga iti pagtaengan ti babai a Filisteo. Isu a saanda a nasaksian ti panangpapatay ni Samson iti urbon a leon babaen kadagiti imana laeng. Iti sabali pay a gundaway, gapu ta kayatna nga iyawid ti babai a Filisteo, napan manen ni Samson idiay Timna a kaduana dagiti nagannakna. Simmina idi magmagnada tapno kitaenna ti bangkay ti leon a pinapatayna idi ket nasarakanna iti dayta ti pangen dagiti uyokan ken diro. Idi nagsublin a kimmuyog kadagiti nagannakna inikkanna ida iti diro a kinaruyna iti bangkay ti leon, ket kinnanda. Kalpasan dayta, nalawag a nagtultuloy ti pamilia iti panagdaliasatda ket nabatad nga adda dagiti nagannak ni Samson iti bangkete nga insaganana idiay Timna.—Uk 14:5-10.
Immun-una a natay ni Manoa ngem ti anakna, ta naitabon ni Samson iti lugar a nakaitabonan ni Manoa nga adda iti nagbaetan ti Zora ken Estaol.—Uk 16:31.