MARESA(H)
[Disso iti Alimpatok (Tapaw)].
1. Maysa a kaputotan ni Juda; naawagan kas “ama” ni Hebron. (1Cr 2:3, 42) Nupay mabalin nga ipapan a ni Maresah ti inapo dagiti agnanaed iti siudad ti Hebron, imposible daytoy agsipud ta ti Hebron a nadakamat ditoy ket addaan iti annak, ngarud nabatad a maysa a tao.—1Cr 2:43.
2. Maysa a kaputotan ni Juda babaen iti anakna a ni Sela. Natukoy ni Laada kas “ama ni Maresah.” (1Cr 4:21) Nupay posible a daytoy a Maresah (wenno ni amana a Laada) ti nangbangon iti ili ti Maresah, wenno ti met laeng “Maresah” a nadakamat iti ngato, saan a masinunuo no pudno dagitoy a banag.
3. Kameng ti maysa a grupo ti siam a siudad iti Sefela a rehion ti Juda. (Jos 15:44) Nagsaad daytoy iti nagsayaat a lugar iti abay ti maysa kadagiti ginget a nagpaay kas nainkasigudan a ruta a nangrugi iti tanap ti igid ti baybay sa sumang-at iti bambantay ken agturong iti Hebron. Maikunkuna nga isu dayta ti Tell Sandahannah (Tel Maresha), agarup 1.5 km (1 mi) iti abagatan ti Beit Jibrin (Bet Guvrin).
Ni Ari Rehoboam, a nangsuno ken Solomon, sinarikedkedanna ti siudad ti Maresah, iti kasta pimmigsa ti depensa ti Juda maibusor iti iraraut a sumungad iti dayta a ruta. (2Cr 11:5, 8) Ni Zera nga Etiope rimmaut manipud abagatan a kaduana ti nakadakdakkel a puersa militar a buklen ti maysa a milion a lallaki. Idiay Maresah, isu sinabet ti buyot ni Ari Asa ket sadiay a naggugubatda, ngem nagballigi ti Juda babaen ti tulong ti Dios. Kinamat ni Asa ti naabak a puersa dagiti Etiope agarup 35 km (22 mi) nga agturong iti Gerar, iti abagatan a laud ti Maresah. (2Cr 14:9-13) Ti ili ti Maresah, naawagan pay Maresa, ket isu ti lugar ni mammadto Eliezer, a nangipakauna iti natungpal a padto a pannakapaay ti panagaramid iti barko a negosio da Ari Jehosafat ti Juda ken ni Ari Ocozias ti Israel. (2Cr 20:35-37) Espesipiko a natukoy ti Maresah iti padto ni Mikias, nga iti dayta impakdaarna ti umad-adani idin a pannakadusa ti apostata a Juda ken Israel.—Mik 1:15.
Kalpasan ti pannakaidestiero, nagbalin a pagaammo ti Maresah kas Marisa ket nagtultuloy kas nakapatpateg a disso, nupay nagbalin a kolonia ti Sidon ken idi agangay maysa a salindeg ti Idumea. Kamaudiananna, dinadael dayta dagiti Partiano idi 40 K.K.P.