FEATURE
Imperio ti Roma
TI Roma ket nailadawan iti padto ti Biblia kas animal a “nakabutbuteng ken nakaam-ames ken di gagangay ti pigsana,” nga addaan iti ngipngipen a landok. (Da 7:7) Daytoy idi nga imperio ti pinalubosan ni Jehova a mangdadael iti Jerusalem idi 70 K.P.
Pinanuynoyan ti Roma ti gistay aniaman a kita ti narelihiosuan nga aramid, no la ket dagidiay mamati iti dayta makipasetda met iti panagdaydayaw iti emperador. Naibilang ti kasta a panagdaydayaw iti emperador kas napateg a pamay-an tapno agkaykaysa ti imperio. Gapuna asinoman a nagkitakit a makipaset iti dayta ket naibilang a kabusor ti estado. Saan a nakiraman dagiti Kristiano iti kasta a panagdaydayaw. Ngarud, nupay napudno nga umili dagiti Kristiano, masansan a nagbalin a puntiria ida ti nadamsak a panangidadanes. Karaman kadagidiay nangisungsong iti kasta a panangidadanes isu da Emperador Nero, Domitian, Marcus Aurelius, ken Diocletian. Ti maysa a Romano a gobernador ti Judea nga isu ni Poncio Pilato, imbilinna ti pannakapapatay ni Jesu-Kristo idi pinilit ti papanguluen ti relihion dagiti Judio, nga inaramidna ti kasta maipaay iti napolitikaan a pagimbagan.
MAPA: Imperio ti Roma
Ni Augusto Cesar. Nayanak ni Jesus bayat ti panagturayna
Ni Tiberio Cesar, kas nailadawan iti maysa a sinsilio. Ti pannakapapatay ni Jesus ket napasamak bayat ti panagturay ni Tiberio
Ni Claudio Cesar, pinagtalawna dagiti Judio manipud Roma
Ni Cesar Nero, nausig ni apostol Pablo iti saklangna
Ni Vespasian. Bayat ti panagturayna, nadadael ti Jerusalem ken ti templo dayta
Ni Tito, anak ni Vespasian, kas naipakita iti sinsilio ti Roma. Siam a tawen kalpasan ti panangdadaelna iti Jerusalem, isu nagbalin nga emperador
Ni Domitian. Bayat ti panagturayna, nakaro unay ti pannakaidadanes dagiti Kristiano, a nabatad a nangibunga iti pannakaidestiero ni apostol Juan
Rebrebba ti kalasugan ti danum ti Roma idiay Cesarea. Daytoy a sasangladan a siudad, nga im- bangon ni Herodes a Dakkel, ket opisial a pagtaengan dagiti Romano a prokurador a nangituray iti Judea
Dagitoy nga adigi iti disso ti kadaanan a Samaria paneknekanda ti kaadda ti Romano nga impluensia sadiay
Ladawan ti Torre ti Antonia. Naibangon daytoy a torre iti makin-amianan a laud a suli ti paraangan ti templo ti Jerusalem ket inusar idi dagiti Romano a pangsiputan iti ar-aramid iti lugar ti templo
Modelo ti paglulumbaan ti kabalio a naibangon idiay Jerusalem, nabatad nga imbangon ni Herodes a Dakkel. Napasamak ditoy ti lumba dagiti karuahe iti pamay-an dagiti Romano, ket dagiti nakondenar a tattao mailabanda kadagiti atap nga animal
Ti Arko ni Tito idiay Roma ipalagipna ti panagballigi ti Roma maibusor iti Jerusalem idi 70 K.P.
Arko ni Tito. Ti maysa a timmambukor a kitikit ipakitana dagiti Romano a soldado a mangipampanaw kadagiti sagrado a basehas manipud iti templo
Rebrebba ti Colosseum idiay Roma. Agserbi a mangipalagip iti naulpit a paglinglingayan a nalatak iti kadaanan a Roma
Altar a naaramat iti panagdaydayaw ken Cesar. Gapu ta saan nga agpuor dagiti Kristiano iti insienso maipaay iti emperador, nagbalinda a puntiria ti nadamsak a panangidadanes