PEKOD

Nalawag a nagan ti maysa a lugar a kaparanget ti Babilonia. Dagiti lallaki ti Pekod ket karaman kadagiti puersa militar a mangipakat iti panangukom ni Jehova iti di matalek a Jerusalem. (Eze 23:4, 22-26) Idi agangay, naikeddeng met a madadael ti Pekod.​—Jer 50:21.

Gagangay a maikunkuna a ti Pekod ket isu ti Puqudu a nadakamat kadagiti Asirio a kitikit. Iti Nimrud a Kitikit ni Tiglat-pileser III, nadakamat a nainayon ti Pekod iti Imperio ti Asiria ken adda iti kaparanget ti Elam. (Records of the Past: Ancient Monuments of Egypt and Western Asia, inurnos ni A. Sayce, London,1891, Tomo V, p. 120, 121) Gapuna, no isu met laeng ti Puqudu, agparang a ti Pekod ket masarakan iti daya ti Tigris ken iti amianan ti disso a pagsabatan dagiti karayan a Tigris ken Karkheh.

Naikuna a ti awag a “Pekod” (a kas iti Merataim) iti Jeremias 50:21 ket mabalin a naindaniwan a nagan ti Babilonia. Makapainteres a ti maysa a kitikit a naaramid idi tiempo ni Nabucodonosor ipakitana a ti Puqudu ket iturturayan ti Babilonia. Gapuna, idi naabak ti Babilonia kadagiti Medo ken Persiano, sigurado a naapektaran met ti Pekod.