SARDIO

Nasin-aw ken lumabaga a kayumanggi a kita ti mineral a kalsedonia a maus-usar kas bato ti alahas. Sigun ken Pliny a Laklakay, nayawag iti dayta a bato ti nagan ti siudad a Sardis idiay Lidia, a damo a naammuan iti dayta a paset ti lubong. Nupay kasta, naikuna a namunganay ti nagan iti Persiano a sao a sered, a kaipapananna ti “nakusnig a nalabaga,” ken naipanagan dayta iti bato a nagtaud idiay Persia. Ti sardio ket naawagan met iti “sardo,” “sardino,” ken “sardona.” Gapu ta napintas, nalagda, nalaka a makitikitan, ken mapasileng iti kasta unay, maysa dayta a kalatakan a bato kadagiti nalaing nga agaramid iti alahas. Mabalin nga iti Peninsula ti Arabia ti nangalaan dagiti Hebreo kadagiti sardio a batoda.

Natukoy ti sardio iti Apocalipsis 4:3, a nadakamat sadiay a ti “langa” Daydiay situtugaw iti nangayed a nailangitan a tronona ket “umasping . . . iti napateg a nalabaga ti marisna a bato [“maysa a sardio,” Rbi8 ftn].” “Ti nasantuan a siudad, ti Baro a Jerusalem,” ket nadeskribir nga addaan iti pader a “naarkosan iti tunggal kita ti napateg a bato” dagiti pamuonna, a ti maikanem ket sardio.​—Apo 21:2, 19, 20.