SALLUM
[nagtaud iti sao a kaipapananna ti “makikappia; subadan; supapakan”].
1. Maudi a nainaganan nga anak ni Neftali. (1Cr 7:13) Sillem ti naaramat a naganna iti dadduma a teksto.—Ge 46:24; Nu 26:49; kitaenyo ti SILLEM.
2. Anak ni Shaul, apoko ni Simeon, ken ama ni Mibsam.—1Cr 4:24, 25.
3. Anak ni Sismai ken ama ni Jecamias iti Jerameelita a benneg ti kapuonan iti Juda.—1Cr 2:4, 5, 9, 25, 40, 41.
4. Maysa a pannakaulo nga agay-aywan iti ruangan ti santuario nga iti naminsan binantayanna ti ruangan ti ari nga adda iti daya; maysa a kaputotan ni Kore. Nupay kangrunaanna nga agparang ti nagan kadagiti listaan dagidiay nagsubli manipud Babilonia ken nagnaed idiay Jerusalem (1Cr 9:2, 3, 17-19, 31, 34; Esd 2:1, 42; Ne 7:45), ti pannakadakamat ti “siled a panganan ni Maasias nga anak ni Sallum nga agay-aywan iti ruangan” idi tiempo ni Jeremias (Jer 35:4) ket nalabit mangipasimudaag a ti nagan nga agparang kadagiti listaan kalpasan ti pannakaidestiero tumukoy iti maysa a “balay ti amma,” wenno pamilia, dagiti agay-aywan iti ruangan a nagtaud iti maysa nga immun-una a Sallum. Mapatalgedan pay a pudno daytoy no isu met laeng ti Selemias ken Meselemias a nadakamat iti 1 Cronicas 26:1, 2, 9, 14 kas ti agay-aywan iti ruangan iti daya ti santuario bayat ti panagturay ni David.
5. Maikasangapulo ket innem nga ari ti sangapulo-tribu a pagarian; anak ni Jabes. Iti maysa a kumplot, ni Sallum pinapatayna ni Zacarias, ti maudi kadagiti nagturay a kaputotan ni Jehu, ket nagbalin nga ari idiay Samaria iti maysa a lunar a bulan idi agarup 791 K.K.P., ngem pinapatay met laeng ni Menahem.—2Ar 15:8, 10-15.
6. Maysa nga Efraimita a ti anakna a ni Jehizkias ket maysa kadagiti panguluen ti tribu a saan nga immanamong a kautibuenda dagiti kakabsatda manipud Juda.—2Cr 28:12, 13.
7. Maysa a kaputotan ni Aaron iti linia ti nangato a padi. Ni Hilkias nga anak wenno kaputotanna ni Sallum ti nagakem kas nangato a padi bayat ti panagturay ni Josias. (1Cr 6:12, 13; 2Cr 34:9) Nagtaud met kenkuana ni Esdras. (Esd 7:1, 2) Iti dadduma a teksto, isu naawagan iti Mesullam.—1Cr 9:11; Ne 11:11; kitaenyo ti MESULLAM Num. 4.
8. Asawa ni Hulda, ti mammadto a babai a sinarungkaran dagiti pannakabagi ni Ari Josias; anak ni Ticva. Maipagarup nga isu ti “agay-aywan kadagiti kawes” ti papadi wenno ti ari. (2Ar 22:14; 2Cr 34:22) Mabalin nga isu met laeng ti Num. 10.
9. Anak ni Josias; ari ti Juda iti tallo a bulan sakbay nga indestiero ni Faraon Necoh. (1Cr 3:15; 2Ar 23:30-34; Jer 22:11, 12) Iti dadduma a teksto, isu naawagan iti Jehoacaz.—Kitaenyo ti JEHOACAZ Num. 3.
10. Uliteg ni Jeremias iti ama. Idi 608 K.K.P., gimmatang ni Jeremias iti talon manipud iti anak ni Sallum a ni Hanamel. (Jer 32:1, 7-9) Daytoy a periodo ti tiempo ipasimudaagna nga isu met laeng ti Num. 8.
11. Maysa kadagiti agay-aywan iti ruangan nga immanamong a mangpapanaw iti ganggannaet nga assawa ken annakda kalpasan a nagsubli ni Esdras iti Jerusalem. (Esd 10:24, 44) Nalabit nga adda pakainaiganna iti Num. 4.
12. Maysa kadagiti annak ni Binui a nangpapanaw met iti ganggannaet nga assawa ken annakda.—Esd 10:38-42, 44.
13. Maysa a prinsipe ti kagudua ti distrito ti Jerusalem. Isu ken ti annakna a babbai nakiramanda a nangtarimaan iti pader ti Jerusalem. Anak wenno kaputotan ni Halohes.—Ne 3:12.