Apay Masapul ti Gubat ti Armagedon
“TI DIOS ISU TI AYAT.” Saan laeng a ti Dios mangipakpakita ti ayat, kuna ni apostol Juan, no di ket isu ti ayat—ti naan-anay a pannakaiyebkas ti ayat.—1 Juan 4:8.
Ngem kaskasdi, daytoy met laeng a Dios ti ayat ti masansan iladladawan dagiti dadduma kas manangibales a Dios a mangyeg ti narungsot a panangdusa kadagidiay maawan iti paborna. Gapu itoy, adu dagiti nakapukaw iti pammatida iti Dios wenno lalaisenda ti Biblia, a kunada a daytat’ di namunganay iti kasta a Dios. Nangnangruna a dagiti paset ti libro ti Apocalipsis ti immay iti panangkondenarda a sadiay dagiti panangukom ti Dios kadagiti managdakdakes ti nailadawan, a namingga dayta iti gubat ti Armagedon.
Kas pangarigan, ni Joseph Wheless nagsurat iti librona nga Is It God’s Word?: “Pudno ti naalumamay a managbasa saanna a maibturan ti apocaliptiko a sirmata a mangiparparangarang ti naragsak a managbabawi a kararua a nairaman kadagiti nakaay-ay-ay a managbasol (uray iti orihinal wenno ti mortal a basol), nga addada a ‘matutuok iti apuy ken asupre iti imatang dagiti nasantuan nga anghel, ken iti imatang ti Kordero,’ nga agbuybuya nga aleng-aleng laeng bayat a ‘ti asuk ti pannakatutuokda ket agpangato iti agnanayon: ken awan inanada iti aldaw wenno rabii’ manipud iti kinarungsot ti pungtot ti Dios a Mannakabalin-amin (Apoc. xiv, 10, 11). Daytoy ti naipaltiing a sirmata ti Dios iti amin nga ayat.”
Nagsao met a maibusor iti salaysay ti Apocalipsis, ni Propesor Gerald A. Larue iti University of Southern California iti nabiit pay nagsurat iti magasin a Free Inquiry: “Dagiti di manamati maipalladawda iti mangliwengliweng nga abut nga agsagsagaba a daytat’ mamagkintayeg iti kapanunotan. Ti dusa ket saan nga isu ti lex talionis, ti kinahustisia a mata por mata; wenno daytat’ maipada iti panangibales a kinahustisia, a ti interamente a grupo ti mabalin a matalipupos (cf. Genesis 4:23, [24]; Jos. 6; kdp). Ti dusa naan-anay. Awan asi, dusa nga awan patpatinggana. Awan pannakapakawan, ti laeng dusa a mailibak ti talna iti pannakaikisap a naan-anay. Daytoy saan a kapanunotan a naanus ken naemma a Jesus.” Kalpasanna, iti panangadawna iti Apocalipsis 14:9-11, intuloyna: “Ditoy awan ti panangisarang iti bangir a pingping—no di ti narungsot, nauyong a pammales a ti kinarungsotna pagbalinenna dagiti panangparparigat dagiti Nazi nga agparang a nakaam-amo no idilig.”
Kaawatan, dagiti kapanunotan iti nadawel unay a panagsagsagaba bayat a dagiti managbasol ti maparparigat iti agnanayon ti mangpataud kadagiti salsaludsod maipapan iti ‘Dios ti ayat.’ Ngem ti kasta a kapanunotan ti naibatay iti di umiso a pannakaawat iti Biblia ken dagiti simbolismo a nausar sadiay. Ni kaanoman awan idiay Biblia ti panangisursuro a ti kararua ket di matay. Imbes ketdi, itudo dagiti Kasuratan a “ti supapak ti basol isu ni patay”—saan a ti agnanayon a pannakatutuok—ket iti ipapatay dagiti rikrikna ti maysa, agraman ti abilidadda nga agrikna iti ut-ot ket maawanen.—Roma 6:23; Eclesiastes 9:5, 10.
Daydiay dusa, saan a ti panangdusa, ti agnanayon—ta dagiti managdakdakes matalipuposda a naan-anay idiay “danaw ti apuy,” a maysa a simbolo ti naan-anay a pannakadadael. (Apocalipsis 20:14, 15; 21:8) Kaskasdi, ti gubat ti Armagedon ti mangyegto ti di mailadawan a panagsagaba ken rigat iti sangatauan ket isunto ti nadara unay a gubat a mapagdadangadangan. (Mateo 24:21, 22; Apocalipsis 14:20; 19:17, 18) Aggapu kadi dayta manipud ‘ti Dios ti ayat?’ Iyegto kadi ti Dios ti kasta a gubat?
Maysa nga Ebkas ti Ayat ti Dios
Kinaagpasuanna, gapu ngamin ti ayat ti Dios a masapul a maaramid ti gubat ti Armagedon. Ti panggep ni Jehova a Dios iti daga isu ti panangisublina iti dayta iti orihinal a paraiso a kasasaadna ken tapno agbiag ti sangatauan iti kinatalna ken kinaperpekto nga “awanto ti mangpabuteng kadakuada.” (Ezequiel 34:28; Mikias 4:3, 4; Apocalipsis 21:4) Ngarud, anianto, ti maaramidan kadagidiay a gapu iti krimen ken kinaranggasda, dadaelenda ti kinatalged ti naisublin a Paraiso? Awan pay sistema a naparnuay ti tao a sibaballigi a nakataming iti kasta a parikut. Ti kakaisuna a pamay-an a mangisiguro ti perpekto a kinatalna ket isu ti panangparmek uray pay ti pammutbuteng ti kinadakes. Wen, masapul a dadaelen ti Dios dagiti napeklanen iti kinadakesda a maipaay kadagidiay kayatda ti agaramid ti nalinteg. Gaput’ ayatna isut’ agtignay a mangdalus iti daga kadagidiay mangdaddadael iti dayta.—Apocalipsis 11:18.
Ngem awan asinoman a kasapulan a matay. “[Ti Dios] kayatna nga isuamin a kita dagiti tattao maisalakanda koma,” insurat ni apostol Pablo. (1 Timoteo 2:4) Ket ni Pedro a nagsurat met iti sidong ti pannakaipaltiing, ti nagkuna: “Dina kayat a mapukaw ti uray siasino no di ket agturongda koma amin iti panagbabawi.” (2 Pedro 3:9) Inyurnos ti Dios a ti “naimbag a damag ti pagarian” ti maiwaragawag tapno tunggal indibidual maaddaanda ti gundaway a mangitrabaho iti kabukbukodanda a pannakaisalakan. (Mateo 24:14; Filipos 2:12; Galacia 6:5) Mabalinyo met ti agbiag nga agnanayon iti kinaperpekto ti maysa a paraiso a daga. Ti panagpili adda kadakayo. (Roma 2:5-9; Ezequiel 18:23, 32) Saan aya nga isu dayta ti namnamaenyo manipud iti maysa a Dios ti ayat?
Ti Isyu ti Kinasoberano
Tapno maipasiguro ti naan-anay a kinatalna ken kinaulimek, addanto laeng maymaysa a gobierno nga agturay iti intero a daga—ti Pagarian ti Dios. Saan kadi a dagiti nakaad-adu a natauan a gobierno, pagregreggetanda dagiti kabukbukodanda a naagum a nasionalistiko a gunggona, ti nangpataud ti kasta unay a kinagulo ken pannakaibukbok ti dara iti intero a daga? Dagitoy a gobierno ti masapul a maikkat tapno maiwayaan ti nalinteg a turay ti Pagarian ti Dios iti babaen ni Kristo. (Daniel 2:44) Ikarkararagyo dayta a nailangitan a gobierno no ul-ulitenyo ti modelo a kararag nga inted ni Jesus kadagiti adalanna: “Umay koma ti pagariam. Maaramid koma ti pagayatam, kas sadi langit, kasta met ditoy daga.”—Mateo 6:10.
Ngem ania a gobierno ti ammoyo a situtulok a mangtallikud ti kinasoberanona ket paiturayan a naan-anay iti Pagarian ti Dios? Saan kadi nga ad-adda a dagiti gobierno kumpetda a sipipigsa kadagiti kabukbukodanda a kinasoberano, nga agtultuloy a birbirukenda a pasaknapen ti impluensiada a maibusor iti naipasdeken a Pagarian ti Dios? (Salmo 2:1-9) Adda kadi aniaman a mangipamatmat a dagiti nasnasion ibbatanda ti kinaturayda iti Dios ken ni Kristo? Ti kinakapuy ti organisasion ti Naciones Unidas kas instrumento a maipaay iti sangalubongan a talna ipakpakitana ti di panagtulok dagiti nasnasion nga agtignay sadinoman a dagiti naagum a nasional nga intereses ti mairaman ket agpaiturayda iti maymaysa nga autoridad. Dagiti nasnasion determinadoda a mangitultuloy kadagiti ar-aramid ti daga iti kabukbukodanda a pamay-an. (Apocalipsis 17:13, 14; 19:19) Gapuna ti gubat ti Armagedon masapul a maaramid tapno burakenna daytoy kasasaad nga awan ti maar-aramid ket ibanagnanton a naan-anay a maipaay iti agnanayonen ti isyu a no asino ti addaan ti kalintegan a mangituray iti daga.
Tapno Penken dagiti Kasapulan ti Tao
Ti panagtignay ni Jehova inton Armagedon mabuyoganto iti pananglagipna iti kasayaatan a paginteresan ti sangatauan. Agpanunotkayo. Kasanot’ panagriknayo maipapan kadagiti agdama a kasasaad ti lubong? Kayatyo kadi ida a kasta? Adda aya panagriknayo ti kinatalged iti sidong ti pammutbuteng ti nuklear a pannakaikisap? Agkintayegkayo aya a makakitkita ti ilalanlan ti kinaranggas, a ti mismo a sangakaarrubaanyo ket kanayon nga agbalbalin a saanen a natalged? Agbutengkayo aya a maipaay kadagiti annakyo ken ti masanguananda? Ania a makabang-ar ti makitkitayo? Adda aya aniaman a gobierno a nakaipakita a makaiyegda ti talna ken kinarang-ay iti isuamin a sangatauan? Adda kadi asinoman a nabalinandan ti nangparmek iti sakit wenno ipapatay manipud iti dayta? Imbes ketdi, saan kadi a dumakdakes a kanayon dagiti kasasaad ti intero a lubong agpapan pay iti irarang-ay ti teknolohia ti tao, ket masansan gapu kadagiti kasta a panagrang-ay? Ti laeng nalinteg a Pagarian ti Dios ti naan-anayto a makapennek kadagiti kasapulan ti sangatauan. Babaen laeng iti dayta a ti pudpudno a talna agsaknapto iti intero a daga. Ti gubat ti Armagedon ti masapul a maaramid!
Ngem kasano ngay dagiti panagsagaba ti tao ken ti rigrigat a maibungananto inton agtignayen ti Dios a mangdalus ti daga? Kanayon a dagitoy ti bungbunga ti gubat. Dagitoyto ti mapasamak inton Armagedon laeng gapu ta dagiti nasnasion timmangkendan iti ibubusorda iti nateokratikuan a kinaturay. Determinadoda a lumaban ken agtukiad. (Salmo 2:2, 3) Saan a basol ti Dios dayta. Inikkanna ida iti umiso a pakdaar: “Ita ngarud, O dakayo nga ar-ari, agmasiribkayo; masursuruankayo, dakayo uk-ukom ditoy daga. Agserbikayo iti Apo a sibubuteng, ket agragsakkayo; sikikintayeg nga agrukbabkayo kenkuana, di la ket ta isu ti makapungtot ket mapukawkayo iti dalan, inton giddato a sumken ti pungtotna. Naragsak amin dagidiay a kumamang kenkuana!”—Salmo 2:10, 11, The New American Bible.
Ita panunotenyo. Ania koma ti kasasaad ti lubong no ti Dios agkitakit a bumallaet tapno palintegenna dagiti ar-aramid ti lubong? Saan aya a dagiti gubgubat, kinaranggas, ken panaggiginnura ti agtultuloy a di agsarsardeng kas iti mapaspasamak kadagiti adun a siglo iti natauan a kinaturay? Saan kadi nga agingga ita dumegdeg a dumegdeg ti pungtot a ti intero a sangatauan ti agpegpeggad iti pammutbuteng ti nuklear a gubat ken ti panangsabidong ti radiasion? Ti Armagedon kinapudnona isut’ kasayaatan a banag a mapasamakto iti globotayo! Daytat’ mamagpatingga kadagiti inaagum nga agbekbekkelan a kurso dagiti nasnasion. Daytanto ti mangdalus iti sistema a nangyeg ti rigrigat iti sangatauan ket wayaannanto ti maipaay iti pudpudno a nalinteg a sistema dagiti bambanag a sadiay aminton dagiti aramid-tao a sennaay, ut-ot, ken ipapatay maikkatton nga agnanayon. Kalpasanna ‘dagiti immuna a bambanag napalabasdanton,’ sigun iti kari ti Dios.—Apocalipsis 21:4; 2 Pedro 3:13.
Masapul a laglagipentayo a ti Dios iti kinasiribna ammona no ania ti kasayaatan agpaay iti sangatauan ken no ania ti kasapulan a mangragpat iti dayta. Uray pay dagiti natauan a gobierno ti nangpanggep ken napanda nakigubat tapno palintegen ti aniaman a kunada a kinaulpit wenno makidangadangda a maipaay iti pagarupenda a natakneng a pakaigappuan. Ngem ti laeng Dios ti addaan ti kinasirib a makidangadang iti pudpudno a nalinteg a gubat. Isu laeng ti mabalinna ti makidangadang iti pudpudno a manangpili a gubat a sadiay dagiti nalinteg panagpuspusona a tattao, sadino man ti ayanda ditoy daga, maispaldanto. (Mateo 24:40, 41; Apocalipsis 7:9, 10, 13-17) Ket ti laeng Dios ti addaan kalintegan a mangipapilit ti kinasoberanona iti intero a daga, ta daytat’ parsuana. Wen, tapno maikkat amin a pakakitaan ti kinadakes iti agnanayon, a mamagpatingga iti kinaulpit, ti manangirurumen nga ulbod a panagdayaw, agraman ti naggapuan ti basol, ken tapno masantipikar ken maalangon a naan-anay ti nasantuan a nagan ti Dios—masapul a maaramid ti Armagedon. Daytanto ti maaramid, ta “ti Dios isu ti ayat!”
[Ladawan iti panid 6, 7]
ARMAGEDON . . . . . . wayaannanto ti dalan nga agturong iti talna