Panangipaay ti Lawag iti Nasipngetan a Daga

“Adtoy! ti kinasipnget abbungotanna ti daga, ket ti napuskol a kinasipnget kadagiti il-ili; ngem ni Jehova lumtuadto kenka, ket ti dayagna makitanto iti rabaw.”​—ISAIAS 60:2.

1. Ania a positibo a sungbat ti maited kadagiti salsaludsod a napataud ditoy?

PUDNO a dagitoyen dagiti nadayag nga al-aldaw a pagbiagan! ‘Nadayag nga al-aldaw?’ mabalin a maisaludsod ti maysa. ‘Kasano a maikunayo dayta, idinto a ti intero a lubong ti agar-arikap iti napolitikaan, ekonomiko, narelihiusuan a pannakasinasina, iti tengnga iti kinasipnget ti panawen nuklear a nangabbungot kadagiti nasnasion?’ Ngem dagitoyen dagiti nadayag nga al-aldaw​—agsipud ta ti naimbag a damag ti maiwarwaragawagen iti intero a daga, a manglawlawag kadagiti mabisin iti kinapudno a tattao maipapan iti kaipapanan dagiti panawentayo ket ti naragsak a panginanamaan dagiti nadaydayag pay nga al-aldaw a mabalin addadanto pay a sibibiag a makakita!

2. (a) Aniada a sasao ti pammaregta ti inted ni Jehova idiay Isaias kapitulo 45 ken 60? (b) Siasino ti “babai” a kukua ti Dios?

² Ti Gubuayan ti nakaskasdaaw a namnamatayo awan sabali no di ti Soberano nga Apo Jehova, ti naindaklan a Namarsua ti langit ken daga. (Isaias 45:12, 18) Isu ti nangted ti bilin a nailanad idiay Isaias 60, bersikulo 1: “Tumakderka, O babai, agraniagka, ta ti lawagmo umay ket ti dayag ni Jehova lumgak kenka.” Asino daytoy a babai”? Isut’ saan a daydiay awan-biagna nga Statue of Liberty; wenno asinoman a nailasagan a babai nga agkamkampania a maipaay iti wayawaya dagiti babbai. Imbes ketdi, isu ti dinamiko, narang-ay, nailangitan nga organisasion ni Jehova a Dios, ti debosionado a katulonganna a buklen dagiti linaksalaksa a nasungdo nga angheles ken itan ramanenna dagiti napagungaren a “sasanto”​—dagidiay a napaneknekanda ti bagbagida a matalek agingga ken patay kas dagiti napulotan a Kristiano ditoy daga.​—Apocalipsis 11:18; 2:10.

3. Kasano a ti babai a kukua ti Dios (a) ‘timmakder,’ ken (b) “nagraniag”?

³ “Tumakderka, O babai,” imbilin ni Jehova. Situtulnog, ti nailangitan nga organisasion ti Dios ti timmakder manipud iti siniglo-siglo ti kabayagnan a kinalupesna, ti langalang a kasasaad a nagturong iti maysa a kasasaad iti kinabunga. Idi 1914 impasngayna ti Mesianiko a Pagarian. (Apocalipsis 12:1-5) Nanipud 1919 inyegnan dagiti natda kadagiti napulotan nga annakna ditoy daga iti maysa a “daga,” wenno kasasaad, ti nadayag a naespirituan a kinanaan-anay. (Isaias 66:8) Mainayon pay, ti nailangitan nga organisasion ti Dios ti “limgak” kadagiti nakaskasdaaw a padpadto ti Pagarian. Dagiti nagadun nga annakna “nasursuruandan ken Jehova.”​—Isaias 54:1, 13.

Ti Lawag iti Tengnga ti Napuskol a Kinasipnget

4. Ania a panamaggiddiat ti imbaga ni Jehova iti nagbaetan ti ili ti Dios ken dagiti nasnasion ti daga?

⁴ “Ta ti lawagmo umay,” kuna ni Jehova. Pudno unay, “ti dayag ni Jehova lumgak” iti nailangitan nga organisasionna, ket daytoy ti insilnag ti nakaskasdaaw a pamay-an ti naisublin nga ili ni Jehova ditoy daga. Nupay kasta, ni Jehova nangaramid iti sumaganad iti mamagsupadi, a kunkunana: “Adtoy! ti kinasipnget abbungotanna ti daga, ket ti napuskol a kinasipnget kadagiti il-ili.” (Isaias 60:2) Saan kadi a nagsayaat ti panangiladawan dayta iti sangalubongan a kasasaad nanipud 1914?

5. Apay nga awan ti solusion a makita ti ulbod a relihion kadagiti parparikut iti panawen nuklear?

⁵ Ti Kakristianuan nangnangruna ti nangilaksid iti naimpadtuan a ‘pagilasinan ti kaadda ni Jesus ken ti panungpalan toy sistema dagiti bambanag.’ Gapuna, isut’ maitibtibkol iti nakapuspuskol a naespirituan a kinasipnget. Dagiti relrelihion iti Kakristianuan impakitada dagiti bagbagida a kapaset ti sangalubongan nga imperio ti ulbod a relihion, ti Babilonia a Dakkel​—a nakaad-adayo, wen nakaad-adayo ti pannakaipanawnan manipud lawag ti kinapudno. (Mateo 24:3-14; Apocalipsis 17:3-6) Dagiti relrelihion ti lubong awan maipaayda a solusion kadagiti parparikut daytoy a panawen nuklear, ket saanda met a maiwaksi ti napuskol a kinasipnget, ti makapakapsut a kinaawan namnama, a nangabbungot ti sangatauan. Ti pannakairaman dagiti ulbod a relihion kadagiti ar-aramid dagiti napolitikaan a nasnasion ti mangiturongto iti kamaudiananna iti mismo a pannakadadaelna.​—Apocalipsis 17:16, 17.

6, 7. (a) Kasano a ti dayag ni Jehova “nagraniag” bayat dagiti tawtawen 1919-31? (b) Ania ti kangitingitan a nagteng daytoy idi 1931?

⁶ Maisupadi iti dayta, intuloy a kinuna ni Jehova maipapan iti nailangitan nga organisasionna: “Ngem ni Jehova lumtuadto kenka, ket ti dayagna makitanto iti rabaw.” (Isaias 60:2) Daytoy a dayag ti maisilnag kadagiti napulotan a Kristiano ditoy daga, tapno isuda met ‘pagsilnagenda ti silawda iti sanguanan dagiti tao.’ (Mateo 5:16) Dagiti tawtawen 1919 agingga iti 1931 ket nadayagda a tawtawen a maipaay iti panangisilnag ti lawag ti Pagarian, a ti ili ti Dios inwaksidan a naan-anay dagiti natda pay a kadena dagiti Binababilonia a doktrina, panagpampanunot, ken ug-ugali. Bayat dagidiay a tawtawen, ti bassit a natda dagiti pudno a Kristiano nangrugidan a mangted iti positibo a sungbat iti saludsod nga “ASINO TI MANGIDAYAW KEN NI JEHOVA?”​—a daytoy ti paulo ti artikulo a pagadalan idi Enero 1, 1926, a ruar ti The Watch Tower.

⁷ Sa, idi 1931, ti dayag ni Jehova ti ad-adda pay a nakita kadagiti “ad-adipenna,” idi inawatda ti nagan nga isu a mismo ti nangted kadakuada​—DAGITI SAKSI NI JEHOVA. (Isaias 43:10, 12.) Bayat dagiti 12 a nabunga, napunno-ti-panagtignay a tawtawen agingga iti 1931, rimmang-ay dagiti manangiwaragawag iti Pagarian manipud iti sumagmamano laeng agingga iti pinulpullo a ribo dagiti naregta a saksi.

Ti Kanayonan Pay a ‘Panagraniag’

8, 9. (a) Idi 1931, ania a sabali a grupo ti inyeg iti The Watch Tower iti atensiontayo? (b) Sigun kadagiti Kasuratan, kasano a ‘natandaan’ dagitoy?

⁸ Nupay kasta, ni Jehova kadi “agraniag”laeng a maipaay kadagiti napulotan ti ‘bassit nga ipastoran dagiti makipagtawid iti Pagarian’? (Lucas 12:32) Saan, ta kadagiti tawtawen 1931 agingga iti 1938 napaneknekan kas engrande a panawen iti kanayonan pay a pannakalawlawag bayat a rinugian ti The Watch Tower nga isentro a silalawag ti sabali pay a grupo. Ti pagadalan nga artikulo iti ruarna iti Setiembre 1, 1931, ti napauluan “LALAKI NGA ADDA PAGTINTIRUAN TI MANNURAT,” a naibatay daytoy iti Ezequiel 9:1-11. Kalpasan iti panangipakaammona iti ‘mannurat’ kas ti napulotan a natda, inaramid ti The Watch Tower daytoy a komento:

⁹ “Naited ti bilin a ‘markaan ti mugmuging dagiti tattao a nasingpet, ken agsangit, gapu kadagiti isuamin a kinarimon a maar-aramid iti tengnga’ ti Kakristianuan . . . Imbaga ti Apo ti maipapan ti maysa a klase dagiti tattao nga ‘ispalennanto inton aldaw ti riribuk ket taripatuennanto a sibibiag ket bendisionannanto ditoy rabaw ti daga.’ (Sal. 41:1, 2) Mabalin nga isu daytoy ti klase dagiti tattao a masansan a mailadladawan kas ti ‘minilmilion nga agbibiag itan a dinton matay’.” Itatta, makaparagsak ti aktual a pannakakita kadagiti minilmilion kadagitoy a mamarmarkaanen a maipaay iti pannakaisalakan, bayat nga isusuotdan ti pudno a Nakristianuan a personalidad, iti maysa a dedikado a pannakirelasion ken Jehova baeten ken Kristo Jesus.​—Genesis 22:15-18; Sofonias 2:1-3; Efeso 4:24.

10, 11. (a) Kasano a ni Jehu inladawanna ni Jesus? (b) Asinoda dagiti moderno a “Jehonadab.”

¹⁰ Nangnangruna a di maliplipatan dagiti artikulo a pagadalan iti ruar ti Watchtower ti Hulio 1, agingga iti Agosto 1, 1932. Iti panangdakamatna iti Maikadua Ar-ari kapitulo 9 ken 10, impakita dagitoy no kasano a ni Ari Jehu inladawanna ti Manangikisap ni Jehova, ti Ari a Jesus-Kristo, a nairepresentar ditoy daga babaen iti napulotan a natda, a mangpakpakdaar kadagiti dadduma maipapan iti umay a panangukom ni Jehova. Ngem asino ti iladladawan ti kadua ni Jehu, ni Jehonadab? Sumungbat ti The Watchtower:

¹¹ “Ni Jehonadab inrepresentarna wenno inladawanna ti klase dagiti tattao nga adda ditoy rabaw ti daga ita bayat ti panawen a ti trabaho ni Jehu ket maar-aramid . . . a saandan a makituntunos iti organisasion ni Satanas, nga innaladan ti panagtakderda iti dasig ti kinalinteg, ken isuda dagiti ispalento ti Apo bayat ti tiempo ti Armagedon, nga ilasatnanto ida iti dayta a riribuk, ket ikkannanto ida ti biag nga agnanayon ditoy daga.” Sumaganad impakita ti The Watchtower a dagitoy isuda dagidiay ‘binendisionan ti Ama’ idiay pangngarig ni Jesus maipapan ‘ti karnero ken dagiti kalding.’ (Mateo 25:31-46) Kuna dayta: “Dagitoy buklenda ti klase ‘karnero’ a mangpabor ti napulotan nga ili ti Dios, agsipud ta ti pinulotan ti Apo ar-aramidenda ti trabaho ti Apo.”

12. Ania a nakaay-ayat a panangipanayag ti nasantuan a kinapudno ti naaramid idi 1935?

¹² Dagitoy a managsilnag iti naimpadtuan a lawag ti nangisagana ti pagsaadan ti historiko a palawag maipapan “Ti Umariwekwek,” a naited idi Mayo 31, 1935, babaen iti presidente ti Watch Tower Society, ni J. F. Rutherford, idiay Washington, D.C., a kumbension dagiti Saksi ni Jehova. Anian a pannakaipanayag ti nadiosan a kinapudno dayta! Iti dayta naidatag ti natibker a pammaneknek a mangilaslasin a ti “dakkel a bunggoy” idiay Apocalipsis 7:9 ti kadua ti “sabsabali a karnero” ti Apo iti Juan 10:16, ti klase Jehonadab, dagidiay a namarkaan iti muging a maipaay iti pannakaisalakan, dagiti minilion nga agbibiag itan a saanen a matay, ken “dagiti karnero” a naisina manipud “kadagiti kalding” ket agtawiddanto iti biag nga agnanayon iti naindagaan a sakop ti Pagarian ti Dios. Amin dagitoy ti nasaklaw idiay The Watchtower, nga Agosto 1 ken 15, 1935.

13. Ania ti kanayonan a singasing a naaramid idi 1938?

¹³ Kadagiti tawtawen a simmaruno, nagtultuloy ti organisasion ti Dios a nangted ti adu nga atension iti “dakkel a bunggoy” ken ti naindaklan a namnamada a makalasat nga agturongto iti naisubli a Paraiso a daga. Bayat ti Setiembre 9-11, 1938 nagtataripnong dagiti Saksi ni Jehova idiay Londres, Inglatera, dua a kangrunaan a palawag ti naiyallatiw babaen iti direkta a panangisilpo iti telepono kadagiti dadduma a pagkumbensionan iti intero a lubong. Maibatay kadagiti napalabas a bilin a naited kadagitoy a tattao, maysa kadagitoy a palawag a napauluan “Punnuenyo ti Daga,” isingasingna a dagiti “Jonadabs” a makalasat iti dakkel a rigat mabalinda, iti ababa a tiempo, ti mangasawa ken agpasngaydanto kadagiti annak idiay Baro nga Urnos kalpasan ti Armagedon.​—Genesis 1:28; 9:1, 7; kitaenyo ti The Watchtower, Oktubre 15 ken Nobiembre 1, 1938.

14. Kasano a pinarang-ay ni Jehova ti ilina bayat dagidiay a tawtawen?

¹⁴ Bayat dagitoy a tawtawen, “ti Apo iti panagani,” ni Jehova a Dios, nangurnong ken nangibaon kadagiti ad-adu pay a managani. Gapuna dagiti agibumbunannag iti tay-ak ti immadu iti agarup 50,000 idi 1938.​—Mateo 9:37, 38.

“Dagiti Ar-ari” ken “Dagiti Nasnasion”

15, 16. Kasano a nakiraman dagiti “ar-ari” iti kaitungpalan ti Isaias 60:3-10 (a) idi ugma, ken (b) kadagiti moderno a tiempo? (c) Kasano a dagiti “ganggannaet” agserserbida itan a kadua dagiti “ar-ari”?

¹⁵ Daytoy trabaho a panangurnong nagpintas ti pannakailadawanna iti Isaias kapitulo 60, bersikulo 3 agingga ti 10. Sadiay nagsao ni Jehova maipapan kadagiti “ar-ari” nga agparang a maitunos iti “panagraniag” ti Sion ken agserbidanto iti dayta kas asawa nga organisasion. Idi ti ili ti Dios idi ugma nagsublida manipud pannakakayawda idiay Babilonia, ni Ari Dario a Medo ken ni Ari Ciro ti Persia nangidauloda ti pannangted ti probision a maipaay iti pannakaisubli ti panagdaydayaw ken Jehova idiay Jerusalem. (Daniel 5:30, 31; 9:1; Esdras 1:1-3) Iti daytoy, apagpag-isu ti panangiladawanna iti Mannakabalin-amin nga Ari, ni Jehova, ken ti katulongna nga Ari, ni Jesus, a nangiturong iti pannakaisubli ti pudno a panagdayaw iti ili ni Jehova iti moderno a panawen. (Apocalipsis 11:15, 17) Mainayon pay, ti napulotan a natda dagiti pudno a managdaydayaw​—dagiti mainanama nga “ar-ari,” “dagiti makipagtawid ken Kristo”​—isuda ti mangidadaulo iti moderno-aldaw a trabaho a panangasaba. Makipagserserbi a kaduada isuda dagiti “ganggannaet”​—dagidiay saan a kameng iti naespirituan nga Israel, ngem agbalindanto a naindagaan nga iturayan ti Pagarian ken makiranranudda itan iti panangibangon iti nateokratikuan nga ar-aramid iti intero a daga.​—Roma 8:17; idiligyo ti Isaias 61:5, 6.

¹⁶ Ni Jehova a mismo aw-awisennatayo: “Itangadmo dagita matam iti aglikmut ket kumitaka!” Dagiti naurnongen a makipagtawid iti Pagarian ti pakikadkaduaanen dayta “dakkel a bunggoy . . . a naggapu iti amin a nasnasion”! (Apocalipsis 7:9; Zacarias 8:23; Isaias 2:2, 3) ‘Dagiti daydayaw ken Jehova iyanunsiodanto,’ ti naregta a ministerio. Ipaaydanto met dagiti bagbagida kadagiti proyekto kas ti panagbangon kadagiti Kingdom Halls a maipaay a pagdayawan​—a dadduma kadagitoy ti maibangonda iti uneg ti dua-aldaw laeng. “Agserbidanto,” iti naimpusuan a panangsuportar iti sangalubongan a pannakaisaknap dagiti intereses ti Pagarian.​—Isaias 60:4-7.

17, 18. (a) Siraragsak, ania a nakaay-ayat a ‘panagtayab’ ti mapaspasamak itan? (b) Kasano a ti panapanawen a pasamak idiay Palestina maiyanatup nga iyilustrarna daytoy a ‘panagtayab’?

¹⁷ Sumaganad isaludsod ni Jehova daytoy pertinente a saludsod: “Asinoda aya dagitoy nga agtayab a kasla ulep, ken kasla kalkalapati kadagiti tawada?” Ti umuna nga umay ti organisasion ni Jehova isuda dagiti “annakmo a lallaki nga aggapu iti adayo,” nga insinadan dagiti bagbagida a naan-anay manipud kadagiti Binababilonia a relihion. Dagitoy a napulotan iyegda dagiti nasudi a bambanag nga idedikarda amin nga adda kadakuada a maipaay “iti nagan ni Jehova,” ti Diosda. Kas “ti Santo ti Israel,” inkabilna ti naganna kadakuada ket pinapintasna ida babaen iti pribilehio ti panagserbi kenkuana kas dagiti Saksina. Isuda ti mangidadaulo iti panangitan-ok ti nagan ti Soberano nga Apoda, ni Jehova, kas ti naindaklan, ti katatan-okan unay, ti kadadayagan a nagan iti intero nga uniberso.​—Isaias 60:8, 9.

¹⁸ Makaparagsak, ti napulotan a natda saanda a bukbukod iti daytoy. Nagrigat koma no is-isuda! Daytoy lumaklakayen a grupo bumassitda a bumassit, bayat a tunggal maysa mairingringpasdan ti naindagaan a kursoda iti kinatarnaw. Agarup 9,000 laengen ti nabati. Ngem dagiti dadduma, nga agbilang iti minilmilion, agtaytayabda a kas kalapati nga agturong “kadagiti tawada,” wenno “umokda,” nga agsapsapul ti pagkamangan iti organisasion ti Dios. (NW; The New English Bible) Arigda dagiti pangen dagiti kalapati a makitkita idiay Palestina kadagiti dadduma a tiempo​—agtayabda a kasla ulep, a nakapuspuskolda nga aktual a pasipngetenda ti langit.

‘Dagiti Silulukat a Ruruangan’

19. Apay a dagiti “ruangan” iti organisasion ni Jehova agtalinaed a silulukat, ket ania a sungbat ti inaramid dagiti “ar-ari” ken dagiti “ganggannaet”?

¹⁹ Siaasi, inlukat a silalawa ni Jehova dagiti ruruangan ti organisasionna, nga isu ti iyebkasna kadagitoy a sasao: “Dagiti met ruanganmo kankanayondanto a silulukat; didanto marikpan iti aldaw uray iti rabii, tapno dagiti lallaki mabalinda koma nga iyeg kenka ti sanikua dagiti nasnasion.” Kasta a talaga itan bayat a dagiti managayat iti talna a “dakkel a bunggoy” ket rumangrang-ayda iti bilang. Makaparagsak, dagitoy a “ganggannaet” itultulongdan dagiti tiempoda, pigsada, ken sansanikua iti “sagrado a panagserbi iti aldaw ken rabii.” Gunggundawayanda metten ti “dakkel a ruangan nga agturong iti trabaho” ken makiraman a kadua dagiti mainanama nga ar-ari iti panangyeg kadagiti napipintas a daydayaw iti nagan ni Jehova.​—Isaias 60:10, 11; Apocalipsis 7:4, 9, 15; 1 Corinto 16:9.

20. (a) Asinoda dagidiay “marbanto a naan-anay”? (b) Ania a naragsak a panaggiddiat ti intay makita ditoy?

²⁰ Sumaganad, inturong ni Jehova ti panagsaona iti organisasionna, a kunkunana: “A dayta a nasion ken pagarian a dinto agserbi kenka mapukawto; wen, dagidiay a nasnasion marbadanto a naan-anay.” Amin dagiti natangsit a nailubongan a nasnasion ken dagiti dadduma a bumusbusor mapagpakumbabadanto inton Armagedon. Maisupadi iti dayta, ni Jehova papintasenna ti mismo a santuariona iti panagdayaw. Isu ‘padayagennanto ti mismo a pagsaadan ti saksakana,’ ti naindagaan a paraangan ti naindaklan a naespirituan a templona iti panagdayaw, bayat nga ur-urnongenna sadiay ti kanayonen a rumangrang-ay a bilang ti dakkel a bunggoy. Babaen iti sabali pay a mammadto, kinuna ni Jehova: “Pagkintayegekto dagiti amin a nasnasion, ket dagiti napateg a gameng dagiti amin a nasnasion umaydanto; ket pusekekto daytoy a balay iti kinadayag.” (Haggeo 2:7) Ngem dagiti manangidadanes, dagiti apostata, ken dadduma pay nga awan panagraemna a bumusbusor mapilitandanto nga ‘agruknoy’​—bigbigendanto a buyogen ti panagbain a dagiti Saksi ni Jehova ti pudno a mangireprepresentar iti organisasion ti Dios​—“ti siudad ni Jehova, ti Sion iti Santo ti Israel.”​—Isaias 60:12-14.

21, 22. (a) Ania a pammatalged ti inted ni Jehova ditoy? (b) Kasano, kas panangiladawan, a ti ilina susupendanto ti “gatas dagiti nasnasion”? (c) Ania a kanayonan a nakaragragsak a panagadal ti agur-uray kadatayo?

²¹ Nikaanoman dinto idian ni Jehova ti kas asawa a katulonganna numan pay kasano kadakkel ti pananglalais dagiti bumusbusor kadagiti annakna a lallaki ken babbai ditoy daga. Imbes ketdi, ibagananto iti nasungdo nga organisasionna: “Aramidenkanto a maysa a kinadaeg iti panawen a di nakedngan, maysa a ragsak dagiti adu a kaputotan. Sika susopemto ti gatas dagiti nasnasion.” Iti piguratibo a pamay-an dagiti naindagaan a pannakabagi ti organisasion ti Dios usarendanto amin dagiti adda a kinabaknang iti panangparang-ay ti pudno a panagdayaw. Agaramiddanto ti praktikal a panangusar kadagiti moderno a pasilidades ti komunikasion, dagiti transportasion, ken ti panagimprenta tapno maikaskasaba ti naimbag a damag. Ti panangaywan ken panangsalaknib ni Jehova adda kadagiti Saksi ni Jehova iti daytoy a trabaho. Dagitoy met, ti agserserbi a maipaay iti nailangitan nga organisasion ni Jehova, nga agragrag-o iti kaitungpalan ti karina: “Ket sika maammuamto a siak, ni Jehova, ti Manangisalakan kenka, ken Mannubbot kenka, ti Mannakabalin ni Jacob.”​—Isaias 60:15, 16.

²² Ania pay a kanayonan a pammaregta ti inted kadatayo ni Jehova idiay Isaias 60:17-22? Daytanto ti nakaragragsak a tema iti sumaganad a panagadaltayo.

Salsaludsod a Manggupgop

◻ Ania a panaggiddiat ti lawag ken sipnget ti sibabatad itatta?

◻ Ania a narang-ay a ‘panagraniag’ ti adda bayat ti 1919-38?

◻ Kasano a matungtungpalen ti Isaias 60:8 iti moderno a tiempo?

◻ Kasano a dagiti “ar-ari” ken “ganggannaet” simrekdan iti ‘silulukat a ruangan’?

[Kahon iti panid 13]

Dagiti ig-igam a nakabutbuteng ti panangdadaelda maur-urnongda iti pumarpartak a kinaadu. . . . Ti salisal iti armas ita nakagtengdan agingga kadagiti tataaw ti lubong ken agingga iti makinruar a law-ang. Kinapudnona nakaskasdaaw a ti panagurnong kadagiti ig-igam ket maysa kadagiti sumagmamano nga agsaksaknap nga industria iti panawen ti kinarigat ti ekonomia ken kinasipnget.”​—Sekretario Heneral ti NU, Mr. Javier Perez de Cuellar

“Sadiay, iti babaen ti ruangan idiay balay iti napan nga aldaw, adda ti sabali manen kadagiti gagangay a mensahe iti porma ti narelihiusuan a polieto. ‘Umas-asidegtayon aya iti Armagedon?’ kuna dagiti sasao a naipamatmat babaen iti bumabbaba a langit ken ti maysa a kimat a mangtiro kadatayo. Adda tiempo idi a dayta a kita ti mensahe ti mangyeg iti bangbangirna nga is-isem. Ngem giddato, daytat’ saanen a nakakatkatawa.”​—Haynes Johnson, The Washington Post