Ti Doble ti Ragsakna nga Okasion

MARSO 3, 1985, ti maysa a doble ti ragsakna nga okasion, nangnangruna kadagiti 42 nga estudiante ti maika-78 a klase ti Watchtower Bible School of Gilead. Saan laeng nga aldaw ti panagturpos​—a rasonen tapno agragsak​—no di ket isu pay met ti umuna a pannakaangay ti panagturpos ti Gilead idiay baro a Brooklyn Assembly Hall, a naidedikar idi aldaw sakbayna.

Iti alas 10:00 t.b., ti 2,400 a tugaw ti napunnon kadagiti timmabuno a buklen dagiti estudiante nga agturpos, ti pampamilia ken gagayyemda, ken, iti umuna a daras kadagiti adu a tawtawen iti panagturpos ti Gilead, ti intero a pamilia ti Bethel iti Brooklyn. Ti tangatang ti napunno ti dakkel a ragsak. Ket ti panagpapatang ti dinominaran ti panagkomento no maipapan iti kinapintas ti panangretubar dagiti kakabsat iti dayta a pagtataripnongan. Nakabatbatad nga awan uray maysa iti nangigawid ti ragsak ken panagyamanda nga isu ti agliplipyas iti pusoda.

Insigida iti alas 10:00 t.b., ni Theodore Jaracz, tsirman iti dayta nga aldaw pinagsimpana dagiti immay a dumngeg. Naawisna iti kasta unay a panagsipat idi a kinunana: “Nagsayaat iti maadda ditoy, saan aya!” Nalawag, nakulditna ti umiso a panagsungbat kadagitoy a sasao.

Nagparang a ti topiko ti kinaragsak isut’ dakkel unay iti is-isip dagiti nagpalawag iti dayta nga aldaw. Ni George Gangas iti Bagi a Manarawidwid nagsao iti tema a “Tagiragsaken ti Ragsak iti Tay-ak ti Kinamisionero​—Kasano?” Imbagana kadagiti estudiante a nagturpos a no kasanot’ panangusar ni Jehova kadagiti anghel iti napalabas, “usarennakayo met ni Jehova a mangispal kadagiti tattao manipud panangkayaw ti pagbaludan ni Satanas.” Panunotenyo laengen ti ragsak nga iyeg dayta kadakuada! Kalpasanna binagbagaan ni Daniel Sydlik dagiti estudiante nga “ikuyogda kadakuada ti maysa a nasinged a gayyem, inton agturongdan iti nakaitudinganda iti ballasiw taaw. Ti Biblia isu dayta a gayyem. Mabalindat’ agpannuray iti dayta iti oras a pagkasapulanda, imbagana kadakuada. Dayta ti nakapigpigsa nga uray maysa laeng a sentensia, uray maysa laeng a sao, manipud iti dayta no maminsan umdasen a mangtulong iti maysa. Basaenyo dayta ket denggenyo dayta iti inaldaw, binagbagaanna dagiti estudiante, ket tulongan dagiti dadduma a mangaramid met iti kasta.

Iti panangpadakkel pay iti tema ti ragsak, ni Robert Wallen iti Bethel Home Committee ti nangigunamgunam kadagiti estudiante a taginayonenda ti kababalin nga “Adtoyak! Ibaonnak,” ket ni Joel Adams ti Service Department Committee ti nangibaga iti klase: “Tapno tagiragsaken ti ragsak a naan-anay, masapul a debosionadotayo a naan-anay iti panagaramid iti pagayatan ti Dios. Dagiti dua saanda a mabalin ti agsina.”

Dagiti estudiante ti immawat met kadagiti pammakada a balakad manipud iti dua nga instruktorda. Ni Ulysses Glass ti nangipalagip kadakuada a “ti biag ti maysa a misionero ket saan nga agbalin a kanayon a nakaranraniag ken nalawag.” Iti panangsalaysayna iti propetiko a drama da Elias ken Eliseo, ingunamgunamna a tuladenda ti moderno aldaw a klase ni Eliseo ket agtalinaedda iti trabahoda aginggana a mairingpas wenno iti panungpalan. Kinellaat ni Jack Redford ti tunggal maysa babaen ti panagkunana: “Idi napan a tawen adda naam-ammok a tao a di pulos nagbiddut iti las-ud ti 4,000 a tawen.” Tinukoyna ti maysa a mummy ti Egipto iti maysa a museo. Ti punto siempre, dagiti laeng tattao a natay ti di agbiddut. Ngem no naipasangotayo kadagiti bidduttayo, agtigtignaytayo aya a kas ken Saul, a pinadpadasna nga inkalintegan dagiti biddutna, wenno kastay la ken David, a sidadaan a nangadmitir iti basolna? Pudno a mamagpanunot a salsaludsod dagita!

Ti maudi a nagpalawag iti dayta a bigat isu ti presidente ti Watchtower Bible School of Gilead, ni F. W. Franz. Babaen ti panangawagna iti pannakaipasdek ti Gilead School a “maysa a naranga a pagulidanan ti pammati,” sinalaysayna no kasano ti panangiyun-una ti eskuelaan ti trabaho a panangiwaragawag ti naimbag a damag ti Pagarian iti intero a lubong. Itan dagiti 42 nga estudiante ti maika-78 a klase ti addaan met pribilehio a rummuar kadagiti 14 a dagdaga a tumulong iti daytoy naindaklan a trabaho.

Kalpasan panangawatda kadagiti diplomada, maysa kadagiti estudiante, ni Gordon Grant, ti immay iti sanguanan ket binasana ti maysa a surat ti panangapresiar manipud iti klase. “Immaykami kas agkasapulan a lallaki ken babbai, numan pay dikam nabigbig dayta idi,” kinunana. “Itatta, iti panagpatingga iti lima laeng a bulan, pumanawkami a nabaknang ken napunno.” Naikeddengda nga ipakat ti panagsanayda ken dagiti naespirituan a kinabaknangda iti naimbag a pakausaran kadagiti baro a nakaitudinganda.

Ti programa iti malem nangrugi babaen iti pannakiraman dagiti estudiante iti napaababa a Panagadal ti Pagwanawanan nga indauluan ni Calvin Chyke iti Factory Committee. Kalpasanna nangipabuya dagiti estudiante iti naragsak a programa dagiti kapkapadasan ken tuktokar, a nangitampok kadagiti naadalda babaen iti panagpalpaliiw ken pannakilangenlangenda iti pamilia ti Bethel ken kadagiti dadduma pay. Kamaudiananna, impabuyada ti maysa a makatignay a drama ti Biblia, a naibatay iti salaysay ti kabibiag ni Jose ken dagiti kakabsatna. Nagadu ti nabasa a matmata kadagiti nagbuya.

Idi pinagpatinggan ti tsirman ti programa iti dayta nga aldaw, tunggal maysa a timmabuno immanamongda iti amin a pusoda a ti kaaddada sadiay ket pudno a nagsayaat unay. Wen, daytat’ maysa nga aldaw a napunno kadagiti naespirituan a naimbag a bambanag​—ti doble ti ragsakna nga okasion!