Mabalinyo Kadi ti Agsagana Itan iti Pannakaidadanes?
“No indadanesdak, idadanesdakayto met.”—JUAN 15:20.
1, 2. Ania a di ninamnama a panagtignay ti innala dagiti sumagmamano a gobierno maibusor kadagiti Saksi ni Jehova?
PAMPANUNOTENYO ti bagiyo nga agin-inana iti katre a nakasapsapa iti maysa a bigat. Medio agdudungsakay pay laeng a pampanunotenyo no bumangonkayon nga insigida wenno ibaybayagyo pay bassit ti aginana iti sumagmamano a kanito. Ngem umuna, linuktanyo ti radio a maipaay iti nasapa a damdamag. Pagammuan latta, ta kinellaatnakayo ti agipadpadamag a namagriing a naan-anay kadakayo. Inyanunsiona: “Sigun iti maysa a pangngeddeng ti maysa a gobierno, ti sekta a pagaammo a dagiti Saksi ni Jehova ti naparitanen iti intero a pagilian.” Naawanen ti panagin-inana para kadakayo!
2 Daytoy, wenno banag nga umas-asping iti dayta, ti nagbalin a kapadasan dagiti Kristiano kadagiti sumagmamano a pagilian kadagiti moderno a tiempo. Masansan, addada dagiti pakdaar no ania ti mapasamak. Ngem no maminsan dagiti panangiparit ti interamente a di ninamnama. Rebbeng aya a daytoy ti mangkellaat kadatayo?
3. Ania a mamagdilig a kapkapadasan ti naadda ken Kristo idi 33 K.P.?
3 Saan. Dagiti umas-asping a banag ti napaspasamaken idi umuna a siglo. Laglagipenyo no kasano a ni Apo Jesu-Kristo, idi karrugi ti primavera idi 33 K.P., simrek idiay Jerusalem a sisasakay iti maysa nga asno. Dagiti tattao ti siraragsak a nangpadayaw kenkuana, nga inyaplagda dagiti pagan-anayda iti dalan nga adda iti masanguananna. Ngem aniat’ napasamak sumagmamano nga aldaw iti kamaudiananna? Naukom ni Jesus iti saklang ni Poncio Pilato, ket maysa a managderraaw iti dayta met laeng a siudad ti mawawan iti dara nga inyik-ikkisda: “Mailansa koma! . . . Mailansa koma!” (Mateo 21:6-9; 27:22, 23) Ti kasasaad ti bigla a nagbalbaliw.
4. Kas paspasurot ni Jesus, ania a pannakatrato ti rebbeng a namnamaentayo?
4 Gapuna, ditay koma makelkellaat, no kadagiti dadduma a dagdaga itatta agbalbaliw met dagiti kasasaad ket rumsua ti pannakaidadanes a di ninamnama. Laglagipenyo, a no pudpudno a datayo ti paspasurot ni Jesus, rebbengna a namnamaentayo ti pannakaidadanes. (Juan 15:20) Daytoy ti mangipaganetget ti kinapateg ti sasao ni Jesus, “Agsalukagkayo ngarud.”—Mateo 24:42.
5. Ania a salsaludsod ti maikari ti panangusigtayo?
5 Kasanotay a maaramidan daytoy? Adda aya aniaman a pamay-an a makapagsaganatayo, no kaspangarigan mapasamak ti kadaksanna?
Isaganayo ti Isip ken Pusoyo
6, 7. (a) Apay a narigat ti panagaramid kadagiti pisikal a panagsagana a maipaay iti pannakaidadanes? (b) Aniat’ ad-adda a napatpateg a panagsagana a maipaay iti pannakaidadanes ti mabalin a maaramidan?
6 Narigat ti panagaramid kadagiti pisikal a panagsagana a maipaay iti pannakaidadanes agsipud ta dikay ammo no anianto ti agbalin a kasasaad. Agingga a daytat’ aktual a mapasamak, dikay ammo no ti panangiparit ti nainget unay wenno silulukay laeng a maipaalagad, wenno anianto ti maiparit. Nalabit ti laeng panangaskasaba iti binalaybalay ti maiparit, wenno mabalin a dagiti narelihiusuan a panaggigimong. No maminsan ti legal nga organisasion dagiti Saksi ni Jehova ti burakenda, wenno sumagmamano nga indibidual ti insigida nga ibaludda. Mabalintay a pampanunoten dagiti nadumaduma a disso a mabalin a pakailemmengan dagiti literatura no kasapulan. Ngem malaksid iti dayta, bassit laeng ti maaramidantayo no maipapan iti pisikal a panagsagana.
7 Nupay kasta, mabalinyo nga isagana ti isip ken pusoyo, ket daytoy ti ad-adda a napatpateg. Imulayo iti isipyo no apay a mapalubosan ti pannakaidadanes ken no apay a dakayo ti maisango kadagiti agtuturay. “Maipaay a pammaneknek,” kuna ni Jesus. (Mateo 10:16-19) No ti pusoyo ti sisasagana a naan-anay nga agtalinaed a matalek uray aniat’ mapasamak, ipanayag ni Jehova ti nainsiriban a panagtignay no tumanor ti pakasapulan. Gapuna, kasanotay a maisagana ti bagitayo iti naespirituan a maipaay iti pannakaidadanes?
Kasano ti Pannakilangenyo kadagiti Tattao?
8. Apay a maikuna ni Pablo nga isu ‘ti adda pannakapnekna iti pannakauy-uyaw’?
8 Kuna ni apostol Pablo: “Gapuna mapnekak kadagiti kinakapuy, kadagiti pannakauy-uyaw, kadagiti pakasapulan, pannakaidadanes ken kadagiti rigrigat, gapu ken Kristo.” (2 Corinto 12:10) Tinagiragsak kadi ni Pablo ti pannakauy-uyaw? Siempre saan. Ngem masansan ti pannakaidadanes ramanenna ti pannakauy-uyaw wenno pannakainsulto, ket no daytoy ti mapasamak tapno mangyeg dayaw iti nagan ti Dios, no kasta maragsakan ni Pablo a mangibtor iti dayta.
9. Kasano ti pannakapagsaganatay itan a mangibtor kadagiti “pannakauy-uyaw . . . gapu ken Kristo”?
9 Datayo, met, makasigurotayo nga addanto tiempo a masapul nga ibturantayo “dagiti pannakauy-uyaw . . . gapu ken Kristo.” Mabalin a datayo ti abusarenda babaen iti sasao, wenno mabalin pay nga iti pisikal. Agibturtayto aya? Bueno, kasano ti panangmatmatmattayo iti bagitayo itatta? Nalabes aya ti panangipappapantayo iti bagitayo ken dagus nga agtignay kadagiti pudpudno wenno ipagpagarup laeng a pannakauyaw? No kasta, apay a ditay pagreggetan a parang-ayen ti “mabayag a panagitured, . . . kinaemma, panagteppel”? (Galacia 5:22, 23) Daytoy ti nagsayaatan unay a panagsanay a maipaay kadagiti Kristiano nga agbibiag ita, ket mabalin a daytat’ mangispal iti biagyo kadagiti panawen iti pannakaidadanes.
Kasanot’ Panangmatmatyo iti Serbisio ti Tay-ak?
10. Ania ti maiyanatop a Nainkasuratan a panagrikna no maiparit ti trabahotayo a panangaskasaba?
10 Masansan, ti umuna a banag a malapdan iti sidong ti pannakaiparit isu panangikaskasaba ti “naimbag a damag” iti publiko. Kaskasdi nasken unay ti panangikasaba ken ti panangaramid adalan kadagitoy maudi nga al-aldaw. Kasano pay ngay a maammuan dagiti tattao ti maipapan iti Pagarian ti Dios? Gapuna, ti umiso a tignay iti kasta a panangiparit isu daydiay inyebkas dagiti apostol, idi a pinadpadas a lapdan dagiti relihiuso a papangulo a Judio ti trabahoda a panangaskasaba. (Aramid 5:28, 29) Iti sidong dagiti pannakaiparit, mabalin a dadduma a pamay-an ti panangasaba ti maserraan. Ngem, nupay kasta, rebbeng a maaramid dayta a trabaho. Addaankayto aya iti bileg a mangitultuloy ti panangasaba iti sidong iti panangparigat ti pannakaidadanes?
11, 12. Kasanoyo a maikeddeng no addaankay ti bileg a kasapulan a makapagtultuloy iti panangaskasaba no maidadanes?
11 Bueno, kasanot’ panangmatmatyo ita iti trabaho a panangasaba? Palpalubosanyo aya uray dagiti babassit laeng a lapped a mangsinga ken pagbalinennakayo nga iregular iti tay-ak ti serbisio? No kasta, ania ngay ti aramidenyo no adda ti pannakaiparit? Agbutbutengkayo aya kadagiti tattao itatta? Mabalinanyo aya ti mangaskasaba iti balaybalay iti mismo a kalye wenno lansangan a pagtataenganyo? Mabutengkayo aya nga agtrabaho nga agmaymaysa? Kadagiti dadduma a dagdaga, masansan a makaawis ti atension ti dua a tattao nga agtartrabaho nga agkadua. Gapuna, idiay natalged iti panangaramid iti dayta, apay a dikay sagpaminsan nga agtrabaho nga agmaymaysa? Daytat’ naimbag a panagsanay.
12 Makiramramankayo aya iti trabaho a panagiwaras ti magasin iti lansangan? Addaankayo aya iti tured ken iti pinget a mangpataud kadagiti gundaway a maipaay iti di pormal a panangaskasaba? Tartrabahuenyo aya dagiti teritoria ti negosio? Mabutengkayo aya nga umasideg kadagiti nababaknang wenno tattao nga adda impluensiana? No makiramramankay laeng kadagiti dadduma a kita ti panangasaba, aniat’ aramidenyo ngay no, iti sidong ti pannakaiparit, dayta a kita ti panangaskasaba ket saanen a posible?
13. Ania ti mabalinyo a maaramidan itan maipapan iti ministerioyo tapno nasaysayaat ti pannakaisaganayo a mangaskasaba no panawen ti pannakaidadanes?
13 Bigbigenyo aya nga addaankay iti pagkapuyan iti sumagmamano a paset? Itan ti tiempo a panangparmek iti dayta. Adalenyo ti agpannuray ken ni Jehova ket agbalin nga ad-adda a kualipikado kas ministro. Iti kasta nasaysayaatto ti pannakakabalyo a mangaskasaba itan ken nasaysayaat ti panagsaganayo nga agibtor iti panawen ti pannakaidadanes.
Mapagtalkankay Aya?
14, 15. (a) Ania a kita iti umuna a siglo a Kristiano ti mabalin a nagbalin a nagsayaat a mamatibker nga impluensia idi bimtak ti pannakaidadanes? (b) Kasano a mabalinan met dagiti agdama nga ad-adipen ni Jehova ti agbalin a kas kadagidiay natitibker nga immuna a Kristiano?
14 Iti intero a Kristiano a Griego a Kasuratan, nadakamat dagiti indibidual nga isuda ti sadiri ti pigsa ti kongregasion. Kas pangarigan, ni Onesiforo ti situtured a nangtulong ken Pablo idi isut’ naibalud idiay Roma. (2 Timoteo 1:16) Ni Febe nairekomendar met gapu iti kinagagetna idiay kongregasion sadi Cencreas. (Roma 16:1, 2) Awan duadua dagita a lallaki ken babbai ti nagsasayaat nga impluensia a mamatibker idi a bimtak dagiti pannakaidadanes. Isuda ‘managsalukagda, nagtalinaedda a sititibker iti pammati, nagbiagda a simamaingel, nagbalinda a napigsa.’—1 Corinto 16:13.
15 Amin dagiti Kristiano, nangnangruna kadagiti panglakayen, pagreggetanda koma ti rumang-ay ken agbalin a kas kadagiti natitibker nga immuna a Kristiano. (1 Timoteo 4:15) Adalenyo ti panangsalimetmetmet a kompidensial kadagiti bambanag a pribado ken agaramid kadagiti desision a naibatay kadagiti Nainkasuratan a prinsipio. Sanayenyo dagiti bagbagiyo a makakita kadagiti Nakristianuan a kualidad kadagiti dadduma tapno maammuanyo no siasino dagiti mapagtalkan iti sidong dagiti pannakaparigat. Agtrabahokayo, a buyogen iti pigsa ni Jehova, nga agbalin kas sadiri iti kongregasionyo, maysa a tao a makatulong kadagiti dadduma imbes ketdi a daydiay kanayon a makasapul iti tulong.—Galacia 6:5.
Kasano ti Pannakitunosyo kadagiti Tattao?
16, 17. Kasano a ti panangiyaplikar ti Colosas 3:12, 13 matulongannakayo itan nga agsagana a maipaay iti pannakaidadanes?
16 Paregtaennatayo ni apostol Pablo: “Agkaweskayo iti maysa a puso a naasi, iti kinaimbag ti nakem, iti kinapakumbaba, iti kinaemma, ken iti mabayag a panagiturtured. Agiinnanuskayo ken agpipinnakawankayo.” (Colosas 3:12, 13) Nalaka aya daytoy para kadakayo? Wenno dagiti kadi kinaimperpekto dagiti dadduma a tattao ti makapaalipunget unay kadakayo? Daguskayo kadi nga agsentir wenno maupay? No kasta, adtoy manen ti sabali pay a banag a mabalinyo a pangaramidan iti panagsagana.
17 Kadagiti dagdaga a sadiay maparitan dagiti panaggigimong, regular nga agtataripnong dagiti Kristiano kadagiti babassit a bilang. Kadagita a kasasaad, ad-adda manen a nalaka a makita dagiti pagkurkuranganda. Gapuna apay a dikay sanayen ti bagiyo ita nga anusan dagiti pagkapuyan dagiti dadduma, kas awan duadua a panagan-anusda met kadagiti mismo a pagkapuyanyo? Dikay koma nalabes a manangbabalaw kadagiti dadduma ket iti kasta dayta ti dakkel a pakaupayanda? Kasta met, sanayenyo ti bagiyo ken dagiti annakyo a pagraeman ti sanikua dagiti dadduma a tattao bayat a tumabtabunokayo kadagiti Panagadal iti Libro iti Kongregasion. Iti sidong dagiti pannakaidadanes, ti kasta a panangrespeto ti mamataud ti natalna a pannakirelasion.
Managusisakayo Aya?
18. Apay a no maminsan nataltalged ti panangammo laeng iti daydiay kasapulan nga intay maammuan?
18 Nainkasigudan, dadduma kadatayo ti managusisa unay. Ditay matngelan ti di agbalin a “mannakaammo.” Kastakayo aya? No kasta, panunotenyo daytoy: No maminsan, no maparitan ti trabaho dagiti Saksi ni Jehova, padpadasen dagiti agtuturay nga ammuen dagiti urnos ti organisasion ken ti nagnagan dagiti responsable a manangaywan. No maysakayo kadagidiay makaammo kadagitoy a bambanag, mabalin a maikabilkayo iti pisikal a pannakaabuso tapno pilitendakayo a mangipanayag kadagitoy kadakuada. Ket no impanayagyo ida, mabalin a maapektaran unay ti trabaho dagiti kakabsat. Gapuna, no maminsan nataltalged iti pannakaammo laeng iti bassit a daydiay laeng rebbeng a maammuanyo ket awanen.
19. Ania itan ti makatulong kadakayo tapno maliklikan ti panangipanayag kadagiti kompidensial a bambanag no maidadanes?
19 Mabalinanyo kadi ti agsanayen a maipaay iti dayta? Wen. Kas pangarigan, no adda ti maysa a kaso ti mangukom a komite iti kongregasion, rebbengna a mapnek koman dagiti indibidual iti daydiay makita dagiti panglakayen a maiyanatop laeng a sawen ken ibaga ket di koma palpalutpotenen dagiti dadduma a mangsapul pay kadagiti dadduma a detalye. Di koma padpadasen dagiti assawa a babbai ken annak dagiti panglakayen a piliten ida a mangipanayag kadagiti kompidensial wenno nalimed a bambanag. Iti isuamin a pamay-an, rebbengna nga adalentayo ti ‘di makibibiang kadagiti bambanag a ditay pakaseknan.’—2 Tesalonica 3:11.
Maysakayo Aya nga Estudiante iti Biblia?
20, 21. Kasano a ti nagaget a panagadal ti Biblia itan tulongannakayo no ti trabaho naikabil iti pannakaiparit?
20 Ti Biblia isu ti pakaibatayan ti espiritual a pigsa ti maysa a Kristiano. Daytat’ mangted kenkuana kadagiti sungbat dagiti kaaduan a napapateg a salsaludsod ken mangted iti pamay-an iti pannakagun-od iti kinasirib ti Dios a mismo. (2 Timoteo 3:14-16) Bigbigen amin dagiti Kristiano daytoy iti prinsipio, ngem ania a paset ti talaga nga ar-aramiden ti Biblia iti biagyo? Ad-adalenyo aya a regular dayta ket palpalubosanyo dayta a mangiwanwan iti isuamin nga ar-aramidenyo?—Salmo 119:105.
21 Masansan, ti iyaadani kadagiti literaturatayo iti Biblia ti malapdan unay no ti trabaho ti adda iti pannakaiparit. No maminsan, narigat pay a makasarak kadagiti Biblia. Kadagita a kasasaad, ti nasantuan nga espiritu ti mangipalagip kadakayo kadagiti bambanag a naad-adalyo iti napalabas. Ngem daytat’ di makaipalagip kadakayo kadagiti bambanag a dikay inadal! Gapuna, no ad-adda ti panagadal itatta, ad-adda met ti maipempenyo iti isip ken pusoyo nga isunto ti iruar ti nasantuan nga espiritu no panawen ti pannakasapulyo.—Marcos 13:11.
Agkarkararagkayo Aya?
22. Kasano a ti ‘panagtalinaed iti panagkarkararag’ napaneknekan a makatulong iti panagsagana a maipaay iti pannakaidadanes?
22 Napateg a saludsod daytoy no pampanunotentayo ti pannakaidadanes. Ibalakad ti Biblia: “Managtalinaed iti panagkararag.” (Roma 12:12) Ti kararag ket isu ti direkta a komunikasion ken ni Jehova a Dios. Babaen iti dayta mabalintayo ti dumawat iti pigsa a mangibtor kadagiti rigrigat ken makapagaramid kadagiti umiso a pangngeddeng, agraman mangpabileg iti personal a pannakirelasion ken ni Jehova a Dios. Uray pay no maiyadayo dagiti bumusbusor kadagiti literaturatayo, dagiti Bibliatayo, ken ti pannakilanglangentayo kadagiti dadduma a Kristiano, didanto pulos maikkat ti pribilehiotayo iti panagkararag. Idiay kaiirutan a pagbaludan, mabalinan ti maysa a Kristiano ti makiuman iti Dios. Ti pananggundaway a naan-anay iti pribilehio ti panagkararag, ngarud, ket isut’ nagsayaatan a pamay-an a panagsagana iti aniaman nga adda iti masanguanan.
Adda Aya Talekyo iti Kinaturay?
23. Apay nga intay pabilgen ti panagtalektayo kadagiti nadutokan a panglakayen ken iti “matalek ken naannad nga adipen”?
23 Ti panangpapigsa iti daytoy a panagtalek ket nasken met. Dagiti panglakayen iti kongregasion ket isudat’ paset ti sagana ti Dios a mangsalaknib kadatayo. Masapul a dagiti panglakayen agtignayda koma iti pamay-an a maikari iti dayta a talek, ket dagiti dadduma nga adda iti kongregasion masapul nga adalenda met nga ited kadakuada ti panagtalekda. (Isaias 32:1, 2; Hebreo 13:7, 17) Ti ad-adda pay a napateg, rebbengna nga adalentayo ti agtalek “iti matalek ken naannad nga adipen.”—Mateo 24:45-47.
24. Aniat’ maaramidan tapno makapagsagana a maparukma ti iraraut dagiti kabusor babaen iti panagulbod iti ili ni Jehova?
24 Mabalin nga agisaknap dagiti kabusor iti kinaulbod maipapan iti organisasion ti Dios. (1 Timoteo 4:1, 2) Iti maysa a pagilian, dadduma kadagiti Kristiano naallilawda a namati a ti Manarawidwid a Bagi dagiti Saksi ni Jehova ket tinallikudandan ti Kinakristiano, idinto nga isuda pay ti kaskasdi a nagtalinaed a simamatalek iti dayta. Ti kasayaatan a pamay-an a panagsagana a mangparmek kadagiti iraraut a kas iti daytoy isut’ panangpabileg iti napigsa a panagayat kadagiti kakabsattayo ken adalen ti agtalek iti urnos ni Jehova a maipaay kadagiti bambanag.—1 Juan 3:11.
Mabalinyo ti Agballigi
25. Aniat’ makatulong kadatayo nga agbalin a naballigi no maidadanes?
25 Ti lakayen nga apostol Juan, kalpasan ti panagsagabana iti pannakaidadanes, kunaenna kadatayo: “Ta ti aniaman a mabukel iti Dios, parukmaenna ti lubong. Ket daytoy ti panagballigi a pangparukma iti lubong, isu ti pammatitayo.” (1 Juan 5:4) Dikay mabalin ti mangparukma iti kabukbukodanyo a pigsa. Napigpigsa ni Satanas ken ti lubongna ngem dakayo. Ngem saanda a napigpigsa ngem ni Jehova a Dios. Gapuna, no agtulnogtayo iti bilbilin ti Dios, ikararag ti espirituna a mangtulong kadatayo ken agpannuray kenkuana a naan-anay iti bileg tapno makapagandor, iti kasta mabalin nga agballigitayo.—Habacuc 3:13, 18; Apocalipsis 15:2; 1 Corinto 15:57.
26. Uray pay no saankay nga agsagsagaba iti pannakaidadanes ita, aniat’ rebbeng nga aramidenyo?
26 Iti isuamin a daga, addada sumagmamano a Kristiano a maidaddadanes, a mabalin a babaen iti panangbusor dagiti assawada wenno kadagiti dadduma pay a pamay-an. Iti dadduma a dagdaga amin dagiti ad-adipen ti Dios ti agsagsagaba gapu iti opisial a tignay ti lokal a gobierno. Ngem uray pay no, itattan, ket dikay personal nga agsagsagaba iti ibubusor wenno ti naisalsalumina a rigat, laglagipenyo a daytat’ mabalin a mapasamak iti uray ania a kanito. Kuna ni Jesus a ti pannakaidadanes dagiti Kristiano ket maysa a paset ti pagilasinan iti panawen ti panungpalan. Gapuna, rebbengna a kanayon a namnamaentay dayta. (Mateo 24:9) Gapuna apay a dikay agsagana iti dayta itan? Agbalinkay a determinado nga, aniaman ti adda iti masanguanan, ti koma kababalinyo ti kanayon a mangidayaw iti nailangitan nga Amayo, ni Jehova a Dios.—Proverbio 27:11.
Ania dagiti Sungbatyo?
◻ Ania a kita dagiti panagsagana a maipaay ti pannakaidadanes ti mabalinyo nga aramiden itan?
◻ Ania ti mabalinyo nga aramiden itan tapno mapatanoryo ti pammigsa a kasapulan a makapagtultuloy a mangaskasaba no maidadanes?
◻ Kasano a ti panangiyaplikar iti Colosas 3:12, 13 itan makatulong no dumteng ti pannakaidadanes?
◻ Apay a pabilgenyo ti panagtalekyo kadagiti nadutokan a panglakayen ken “ti matalek ken naannad nga adipen”?
◻ Kasano a makapagballigikayo no maidadanes?