Dikay Makiraman iti Basbasol ti Dadduma
“Saanak a nakikatugaw kadagiti tattao ti kinaulbod; ket diakto met sumrek a makikuyog kadagiti aginsisingpet.”—SALMO 26:4.
1. Apay a binaliwan ni Judas ti panggepna idi nagsurat kadagiti padana a Kristiano?
SANGAPULO ket siam a siglo ti napalabasen, inranta ni adalan a Judas a suratan dagiti kapammatianna maipapan ‘ti pannakaisalakan a sapasap.’ Ngem naduktalanna a nesesita ti panangigunamgunam kadakuada a “makidangadangkayo a sibibileg gapu iti pammati a naminpinsan a naited kadagiti sasanto.” Apay? Agsipud ta sumagmamano a “nadangkes a tattao” ti simrek a di nadnadlaw iti kongregasion ket “pagbalinenda ti di kaikarian a kinamanangngaasi ti Diostayo kas pambar iti kinaderrep.”—Judas 3, 4.
2. Numan pay makapabang-ar a pagsasaritaan ti pannakaisalakan, no maminsan aniat’ masapul nga usigentayo a buyogen ti panagkararag?
2 Anian a makapabang-ar a mapagsasaritaan ti pannakaisalakan a sapasap! Ti panangmennamenna iti dayta a mensahe ti mangyeg iti dakkel a pannakapnek, ket pagragsakantayo ti panangur-uray kadagiti amin a bendision dayta a pannakaisalakan. Nupay kasta, addada tiempo nga, imbes a pagsasaritaan ti maipapan iti pannakaisalakan, maipasangotayo iti pannakasapul iti panangusig kadagiti dadduma pay a serioso a bambanag. No di makorihir, dagitoy ti mabalin a mangdadael iti pammatitayo ket isut’ pakaigapuanan ti pannakapukawtayo iti lumba a maipaay iti biag. No kasano a nagpigsa ken nabileg ti pammakdaar ni Judas a maibusor iti kinadakes, kasta met dagiti Kristiano itatta masapul a buyogen iti panagkararag usigenda dagiti Nainkasuratan a balakad, a direkta iti punto.
Ti Bukodtayo a Basbasol
3. Apay a kasapulantayo ti pannakatubngar, ket kasano ti rebbeng a panangawat iti dayta?
3 Kinuna ni Salmista David: “Adtoy a naiyanakak iti kinadakes, ket iti basol impasngaynak ni inak.” (Salmo 51:5) Amintayo ti naiyanak kas managbasol. (Roma 5:12) Nagsurat ni apostol Juan: “No kunaentayo: ‘Awan basoltayo,’ allilawentayo ti bagitayo met laeng ket ti pudno awan kadatayo.” (1 Juan 1:8) Kas managbasol, addada tiempo a kasapulantayo ti pannakatubngar tapno mapalinteg ti dalantayo. Ti kasta a panangtubngar aggapu ken ni Jehova babaen iti Saona, ti Biblia, ken ti organisasionna. Ti panangtubngarna ti mangpalinteg kadatayo ket tulongannatayo a magna a sililinteg iti sanguananna. Kas kinuna ni apostol Pablo: “Awan ti dusa nga ita maipagarup a pagragsakan, no di ket pagladingitan; ngem kalpasanna pataudenna ti natalna a bunga, ti kinalinteg, a maipaay kadagiti nairuam iti dayta.” (Hebreo 12:11) Gapu iti natalna a bunga ti kasta a panangtubngar, rebbengna ngarud nga awatentay koma dayta a siyayaman.
4. Kaano ti mabalin a pannakaited ti pannakatubngar, ket ania ti mabalin nga epekto dayta?
4 Ti panangtubngar nga aggapu ken Jehova ti mabalin a maited no mangrugrugitay pay laeng iti maysa a kurso a mangiturong iti dakdakkel a panagbasol. (Galacia 6:1) No maminsan, umay ti panangtubngar kalpasan a nakastrektayon a naan-anay iti kinadakes. Ti kasta a panangtubngar ti mabalin a nakaro, kas idi indagadag ni apostol Pablo kadagiti taga Corinto nga agtignayda a maibusor iti maysa a makiab-abig iti kongregasion. (1 Corinto 5:1-5) Iti aniaman a kaso, ti panangtubngar ket naited tapno ti managbasol ket agbabawi, agbalbaliw, ket ibaw-ingna ti kursona nga umadayo manipud kadagiti dakes a tartarigagay nga agturong iti nakarkaro pay a kinadakes. (Idiligyo iti Aramid 3:19.) Agyaman dagiti ad-adipen ni Jehova kadagiti kasta a panangtubngar, kas iti daydiay tao a natubngar idiay kadaanan a Corinto nagunggonaan ket agparang a naisubli iti naayat a pannakitimpuyog manen iti kongregasion.—2 Corinto 2:5-8.
5. Dagiti Kristiano a nairaman iti nakaro a panagbasol ti masansan mangaramid iti ania?
5 Ti kadakkelan a bilang dagidiay dedikado ken ni Jehova ti silalagip iti pannakasapul a magna a sililinteg iti imatang ti Dios. No kas pangarigan mairamanda iti serioso a panagbasol, insigida a pagtalawanda ti dakes a kurso, nga agturongda kadagiti nadutokan a panglakayen, ket mangtedda iti pammaneknek iti pudpudno a panagbabawi. (Santiago 5:13-16) Ti kinapudnona a sumagmamano laeng kadagiti Saksi ni Jehova no iyar-arig ti mailaklaksid iti kada tawen isut’ pammaneknek a kagurada ti dakes ket tarigagayanda ti agaramid iti naimbag.—Salmo 34:14; 45:7.
Ti Basbasol dagiti Dadduma
6, 7. Kasano a padpadasen dagiti dadduma a nakaaramid iti dakes nga impluensiaan dagiti dadduma?
6 Kaskasdi dadduma kadagidiay agayat iti kinalinteg ti kasla pinalubosanda ti puspusoda a mangallilaw kadakuada, nga agparang a kasla saanda a kagura ti dakes. (Salmo 97:10; Amos 5:15) Kas nagbanaganna, nairamanda iti panagaramid kadagiti pagbasolan a bambanag ket saanda a tinaginayon ti pannakidangadang nga agaramid iti naimbag. No maminsan, mabalin nga agturongda pay iti dakdakes, nga iramanda dagiti dadduma iti panagbasolda. Anian a nagpateg nga intayo laksiden dagiti kakasta a panangisingasing!—Idiligyo iti Proverbio 1:10-15.
7 No maminsan dagidiay kasla dida kagura ti dakes ti agsao a silalamuyot a gapu itoy ti panagtarigagay nga agaramid iti dakes ket tumanor met iti puspuso dagiti agdengdengngeg kadakuada. Mabalin a dayta a pammaregta isut’ pannakiraman iti imoralidad wenno ti dadduma nga ar-aramid a mainaig kadagiti kababalin a di anamongan ti Dios. Wenno mabalin a maigunamgunam iti maysa a tao a mairaman iti maysa a kasasaad nga agbalin a napeggad iti naespirituan a pamay-an. Dagidiay mangpadpadas a mangallukoy kadagiti dadduma mabalin a kunada a ni Jehova ket Dios a naayat a siaasi inton agbasoltayo. Ti kasta a kinasikap ti puso ti mabalin a makapataud iti napaut a pakadadaelan. (Jeremias 17:9; Judas 4) Rebbengna a, ‘tenglentayo [koma] dagiti saksakatayo manipud desdesda’!—Proverbio 1:15.
Pannakiraman iti Basbasol dagiti Dadduma
8. Ania a salsaludsod ti makasapul ti panangusig?
8 Ngem kas pagarigan nausigtayo a ti maysa a naisingasing a kurso ti panagtignay ket di umiso? Kaipapananna kadi a ti panangilaksidtay iti dayta winayawayaannatayon iti responsabilidad iti dayta a banag? No ammotayo a dagidiay mangisingsingasing iti kinadakes ken makiramraman iti dayta, aniat’ rebbengtay nga aramiden?
9. Apay a dadduma saanda nga ipakaammo ti basol dagiti dadduma, ngem apay a daytoy ket maysa a serioso a banag?
9 Mabalin nga adda ti pagannayasan dagiti dadduma a makaammo iti dakes nga aramid ti dadduma a didan agtagtagari maipapan iti dayta kadagidiay addaan ti kangrunaan a responsabilidad a mamagtalinaed a nadalus iti kongregasion. Apay? Nalabit dida kayat ti mamatmatan kas managipulong. Wenno, gapu iti palso a panagrikna iti kinasungdo, mabalin nga agtalinaedda a siuulimek wenno agsaoda laeng kadagidiay mangikari a pagtalinaeden met dayta a maysa a sekreto. Serioso unay daytoy. Apay? Agsipud ta daytat’ aktual a mangibunga iti pannakiraman iti basbasol dagiti dadduma.
10, 11. (a) Aniat’ kinuna ni apostol Juan maipapan iti pannakairaman iti basbasol dagiti sabsabali? (b) No adda naammuantayo a basol ti maysa a kameng ti kongregasion, aniat’ mabalin nga isaludsodtay iti bagitayo?
10 Impakita ni apostol Juan a posible iti pannakiraman iti basol ti sabali a tao. Nagsurat: “Siasinoman a gumundaway ket saan nga agtalinaed iti sursuro ni Kristo awan ti Dios kenkuana. . . . No adda umay kadakayo ket saanna nga itugot daytoy a sursuro, dikay awaten iti balayyo ket dikay met kablaawan. Ta ti mangkablaaw kenkuana mairaman kadagiti dakes nga aramidna.” (2 Juan 9-11) Ti nagtallikud manipud “ti sursuro ni Kristo” ket saan nga agbalin a maikari a pakitimpuyogan, ket babaen ti uray di panangkablaaw kenkuana, ti nasungdo a Kristiano maliklikanna ti pannakiraman iti kinadakesna.
11 Yantangay ta pudno dayta iti maysa nga apostata wenno nagtalikud, sigurado a ditay met kayat ti makiraman iti kinadakes dagiti dadduma kadagiti imoral nga ar-aramidda idi nakagteng iti pannakaammotayo. Ania ngaruden, no ammotayo ti maysa a kameng iti kongregasion a nagbalin a maysa a mannanakaw wenno mammartek? No ditay paregtaen dayta a tao a sapulen ti pammakawan ni Jehova ket ipudno ti basolna kadagiti panglakayen, interamente kadi nga awan basoltayo? Saan, ta addaantayo iti maysa a serioso a responsabilidad.
Ti Kinadalus ken Pannalaknib Nasken
12. Apay a mangipakita iti pannakaseknan maipaay iti naespirituan a kinadalus ti kongregasion?
12 Masapul a tunggal maysa kadatayo ipakitana ti pannakaseknan a maipaay iti naespirituan a kinadalus ti kongregasion. Anian a nagsayaat ti pannakaipaganetget daytoy idi dandanin a pumanaw dagiti nakayawan a Judio idiay Babilonia idi maikanem a siglo K.K.P.! Ti inted-Dios a bilin ket: “Pumanawkayo, pumanawkayo, rummuarkayo sadiay, dikayo mangsagid iti aniaman a banag a di nadalus; pumanawkayo iti tengngana [Babilonia], dalusanyo ti bagiyo, dakayo nga agawit kadagiti al-alikamen ni Jehova.”—Isaias 52:11.
13. Kasanot’ panangipakita ni Judas a masapul a maseknantayo iti panangsalaknib iti ili ni Jehova manipud kadagiti managdakdakes?
13 Masapul met a maseknantayo maipapan iti panangsalaknib iti ili ni Jehova manipud kadagidiay mangallukoy kadakuada nga agturong iti kinadakes. Dagiti “nadangkes a tattao” idi kaaldawan ni Judas sapsapulenda a ‘pagbalinen ti di kaikarian a kinamanangngaasi ti Dios kas pambar iti kinalulok,’ ngem nagtignay dagiti nasungdo nga adalan a mangpakdaar kadagiti kapamatianda ket iti kasta masalaknibanda ida. Pinalagipanna ida maipapan kadagiti pammakdaar a pagulidanan nga impaay dagiti di matalek nga Israelitas, dagiti anghel a nasukir, ken dadduma pay. Basaenyo daytoy nasantuan pannakaipaltiingna a surat, ket makitayo a dagiti nasungdo a Kristiano saanda a nagpampamayan idi a ti kinadalus ti kongregasion ket agpegpeggad wenno kasapulan ti ili ti Dios ti pannalaknib manipud kadagiti imoral a tattao nga addaan narurugit a motibo.
14. No ti maysa a managdakdakes dina ipudno dayta kadagiti panglakayen, kasano a ti Salmo 26:4 tulongannatayo a mangdesidir no ania ti aramiden?
14 Ngem, kasano no pinaregtatay ti maysa a managbasol a biruken ti pammakawan ti Dios ken agpudno kadagiti panglakayen, ngem isu itultuloyna nga itantantan daytoy wenno makitana a saanen a kasapulan nga alaen dagitoy nga addang. Mabalintay kadi a basta lipaten lattan dayta a banag? Mabalin nga irason dagiti dadduma a dida kayat ti mairaman. Mabalin a dida kayat nga irisgo ti pannakapukawda iti pannakigayyem iti maysa a nagbiddut. Ket dida kayat a mapampanunot kas tattao a mananggulib babaen ti panangibaga kadagiti panglakayen. Ngem daytoy ti di umiso a panagrason. Kinuna ni salmista David: “Saanak a nakikatugaw kadagiti tattao iti kinaulbod; ket diakto met sumrek a makikuyog kadagiti aginsisingpet.” (Salmo 26:4) Kaawatan ngarud, a ditay met kayat ti agbalin a karaman “dagiti aginsisingpet.”
15. Kasano nga ipakita ti Levitico 5:1 ti responsabilidadtayo kalpasan ti panangted iti tao a nakabasol ti nawadwad a panawen nga umasideg kadagiti panglakayen maipapan iti basolna?
15 Gapuna, kalpasan a naikkantayo daydiay nagbasol nga indibidual ti nainkalintegan a rukod ti panawen nga umasideg kadagiti panglakayen maipapan iti basolna, responsabilidadtayon iti imatang ni Jehova a di makiraman iti basolna. Kasapulan a pakaammuantayo dagiti responsable a manangaywan a ti tao ti addaan kadagiti naipanayag a serioso a basol a maikari iti panangusisada. Maitunos daytoy iti Levitico 5:1, a kunana: “Ket no maysa a tao makabasol iti panangdengngegna iti timek ti panamagsapata, isu a saksi, uray nakitana wenno naammuanna, no dina ibaga, isunto ngarud ti mangawit iti kinadakesna.” Siempre, masapul met a liklikantayo ti agtignay a sidadarasudos gapu laeng iti kasla maysa a panangipato iti dakes nga aramid.
16. Aniat’ dakdakkel ti pategna ngem ti kinasungdo ti maysa a gayyem a dina kayat nga ipanayag ti nadagsen a basolna kadagiti nadutokan a panglakayen?
16 Iti lubong itatta, ti panangabbong iti kinadakes dagiti dadduma ket maysan a pangkaaduan nga aramid. Adu dagiti nakaul-ulimek kas maysa a pader a bato no maipapan iti panangipanayag iti kinadakes dagiti dadduma kadagidiay rebbeng koma a makaammo maipapan kadagita nga ar-aramid. Kasapulanna ti pigsa ti Nakristianuan a personalidad a mangipakaammo kadagiti nadutokan a panglakayen maipapan iti nadagsen a basol ti maysa a kapammatian. Ngem no kayattayo ti maaddaan iti pabor ni Jehova, ditay koma palpalubosan ti personal a pannakigayyem a mangbulsek kadatayo iti kinadakes ti sabali a tao. Ti pannakirelasiontayo iti Dios dakdakkel ti pategna ngem ti kinasungdo iti maysa a gayyem a sibabasol iti maysa a nadagsen a kinadakes ket dina kayat nga ipanayag dayta a banag kadagiti nadutokan a panglakayen.
Maysa a Parikut nga Usigen dagiti Isuamin
17. Aniat’ mangiyilustrar a dadduma nga agtutubo nga adda iti tengngatayo ti kasapulan nga agannad a maibusor iti pannakiraman iti basbasol ti sabsabali?
17 Ti parikut maipapan iti pannakiraman iti basbasol dagiti dadduma no maminsan adda kadagiti dadduma nga agtutubo iti tengngatayo. Mabalin nga agtalinaedda a naulimek ket dida nga ibagbaga kadagidiay rebbeng a mapakaammuan no dagiti dadduma agar-aramidda kadagiti bambanag a mangyeg iti pagdaksan ti kongregasion ket mangibunga ti pannakaikkat iti pabor ni Jehova. Ti panangabbong iti basbasol dagiti dadduma ti gagangayen iti nailubongan a sistema dagiti eskuelaan. Ket no daytoy a panangmatmat agsaknap iti kongregasion, adu dagiti parikut nga ibungana. Addada dagiti damdamagen maipapan kadagiti agtutubo nga agtitimpuyog nga agaramid iti kinadakes bayat nga agsisinnapatada iti maysa ken maysa nga agulimekda tapno dagiti panglakayen ken dagiti nagannak kadakuada dida maammuan dagita nga ar-aramidda. Ti panagpasakopda iti panangpilpilit dagiti kapatadanda ken ti tarigagayda a maakseptar iti dayta a grupo ti namataud iti adu a sennaay kadagitoy nga agtutubo, kadagiti dadakkelda, ken kadagiti dadduma iti kongregasion idi a nasukalan dayta a kinadakes. Masapul a laglagipentayo nga awan ti aniaman a banag a nailimed a dinto maipanayag, ket maysa kadagiti kangrunaan a rebbengentayo iti imatang ni Jehova isut’ itutulong a mangsalimetmet iti kinadalus ti organisasionna.—Lucas 8:17.
18. Dagiti nagannak a Kristiano rebbeng nga aramidenda ti ania no nakaaramid ti kinadakes dagiti annakda?
18 Amin nga ad-adipen ni Jehova rebbeng a nakaan-annadda koma a di makiraman iti basbasol dagiti dadduma. Dadduma a nagannak padpadasenda nga ikalintegan ti basol dagiti annakda, a pagreggetanda a salakniban ida. Ngem di koma tultuladen dagiti Nakristianuan a nagannak ti kababalin a tunggal maysa ket maibusor kadagiti annakda no dagitoy nga agtutubo agaramidda ti kinadakes. Imbes ketdi, dagiti nadiosan a nagannak rebbeng a tulonganda dagiti agbidbiddut nga annakda nga umawat, mangakseptar, ken magunggonaan manipud aniaman a kasapulan a panangdisiplina a naibalabala iti Sao ti Dios.
19. (a) Maipapan kadagiti nadagsen a basbasol, aniat’ masapul a pagannadan dagiti Kristiano a pagassawaan? (b) Aniat’ masapul nga aramiden dagiti panglakayen no maysa kadakuada wenno maysa a ministerial nga adipen ti nakaaramid ti nadagsen a basol?
19 Masapul met nga agannad koma dagiti Kristiano a pagassawaan a dida salsalungasingen ti linlinteg ti Dios babaen ti panangabbongda kadagiti nadagsen a basbasol ti maysa ken maysa. Laglagipen met koma ti kaso da Ananias ken Sapira, a nagkomplotda ngem di naballigi ti panangabbongda iti nakaro unay a basolda. (Aramid 5:1-11) Masapul met koma nga alerto dagiti panglakayen a dida salsalakniban ti maysa ken maysa kadakuada wenno dagiti ministerial nga ad-adipen no maysa kadakuada ti nakaaramid iti nadagsen a basol a mangibunga iti pannakailaksidna. Surotenda koma ti prinsipio nga imbalabala ni Pablo, a nagsurat: “Saanmo nga ipatay dagiti im-ima iti ginaganat iti uray siasino; ket dika met makiraman kadagiti basbasol ti sabali; agtalinaedka a nadalus.”—1 Timoteo 5:22.
Ti Kinasirib ti Panangsalimetmet iti Awan Pakapilawanna
20. Imbes nga abbongan wenno makiraman iti nadagsen a basol dagiti dadduma, aniat’ rebbeng nga aramidentayo?
20 Di koma makiramraman wenno tultuladen dagiti ad-adipen ni Jehova dagiti dakes a pam-pamay-an daytoy a lubong. Idi nagsurat ken Gayo, kuna ni apostol Juan: “Ay-ayatek, dika tuladen ti dakes, no di ket ti naimbag. Ti agaramid iti nasayaat, tao ti Dios. Ti agaramid ti dakes, saanna a nakita ti Dios.” (3 Juan 11) Anian a nagsayaat ti paiwanwan iti sigurado a Sao ti Dios ket iti kasta agaramid ti naimbag! Imbes nga abbongan wenno makiraman kadagiti nakaro a basbasol dagiti dadduma, ngarud, ti koma pangngeddengtayo ket isu ti panaglawag kas ti silsilaw, nga awan koma ti pakababalawan ken natarnaw. (Filipos 2:14, 15) Tunggal adipen ti Dios ti responsable a mangsalimetmet ti kinadalus ti kongregasion, bayat nga agtalinaed met nga isut’ personal nga awan tulawna. (2 Pedro 3:14) Ngem kasanon no mariribukankayo maipapan iti kinaumiso wenno di kinaumiso ti naaramidan iti maysa? Siwayawayakayo koma a makisao kadagiti panglakayen ket dumawat iti panangiturong maipapan iti umiso a kurso a surotenyo.
21. (a) Kasano a ti panagayat ni Kristo iti kongregasionna maysa nga ulidan kadatayo? (b) Maipapan iti kinadakes dagiti dadduma, ania a responsabilidad ti intay ibaklay?
21 Ti panagayattayo iti organisasion ni Jehova rebbeng a tuladenna ti ayat nga impakita ni Jesu-Kristo iti naespirituan a nobiana, ti kongregasion. Isu “inayatna ti kongregasion ket inyawatna ti bagina gapu kenkuana, tapno pagsantaenna, idinto nga inugasanna iti panangbuggo iti danum gapu iti sao, tapno pagparangenna kenkuana met laeng ti kongregasion a nadayag, nga awan ti rugitna wenno karetketna wenno sabali a pakapilawan nga umas-asping, no di ket koma santa ken awan tulawna.” (Efeso 5:25-27) Umas-asping iti dayta, ti ayattayo iti organisasion ni Jehova ti rebbeng a mangtignay kadatayo nga agaramid iti amin a kabaelantayo a mamagtalinaed iti dayta a nadalus. Nikaanoman ditay koma agar-aramid iti aniaman a mangyeg iti pakadadaelan ti dayaw ti Dios wenno ti organisasionna wenno konsentiren ti kinadakes dagiti dadduma iti kongregasion. Imbes ketdi, paregtaentayo dagiti agar-aramid ti kinadakes a palintegen dagiti kababalinda ket sapulen ti tulong dagiti panglakayen. No dida aramiden daytoy iti uneg ti rasonable a panawen, ibaklaytayo koma ti responsabilidadtayo a mangipakaammo kadagiti nadutokan a manangaywan. Iti daytoy a pamay-an, maliklikantayo ti panagbalin a mannakiraman iti basbasol dagiti dadduma ket aw-awitentayo ti responsabilidad iti kinadakesda.
22. (a) Tapno magun-odan ti pannakaisalakan, aniat’ masapul nga aramidentayo? (b) Ania a salsaludsod ti agtalinaed pay nga usigen?
22 Ti pannakaisalakan a sangsangkamaysa a petpetpetantayo ket maysa a gameng nga awan pakaiyaspinganna. Tapno magun-odantay dayta masapul nga agtultuloytayo a magna iti imatang ni Jehova iti nalinteg a pamay-an. Gapuna, tulongantay koma ti maysa ken maysa a mangaramid iti dayta a pulos di makiramraman kadagiti basbasol dagiti dadduma. Siaayat a nangipaay ni Jehova kadagiti organisasional nga urnos a mangtulong kadatayo iti daytoy a panagregget, ket iti daytoy a pamay-an addaan nagpateg a paset dagiti nadutokan a panglakayen. Ngem kasano ti panangtuladda ken Jehova ken ti Anakna, ti Naimbag a Pastor? Ania a tulong ti maited dagiti panglakayen kadatayo iti dalan nga agturong iti biag? Ti sumaganad nga artikulo ti mangsungbat kadagitoy a salsaludsod.
Malagipyo Pay Aya?
◻ Kasanot’ rebbeng a panangmatmatyo iti disiplina?
◻ No kunaen ti maysa a kapammatian kadakayo nga isut’ nakaaramid iti nadagsen a basol, aniat’ igunamgunamyo koma nga aramidenna?
◻ Aniat’ rebbeng nga aramidenyo no naammuanyo a ti nakabasol dina ipudno ti basolna kadagiti nadutokan a panglakayen?
◻ Maysakayo man a panglakayen, maysa nga asawa, wenno anak, kasanotay a maliklikan ti pannakairaman iti basbasol dagiti dadduma?