Panangpabaro ti Pigsatayo, a Di Mabannog

“Isu ti mangpapigsa iti nakapuy; ket iti daydiay awan iti dinamiko a pigsana isu pawadwadenna ti kabaelanna.”​—ISAIAS 40:29.

1, 2. Kasanoyo nga iyilustrar a dagiti Kristiano maipadada kadagiti mannakilumba iti marathon?

ITI maysa nga agsapa ti Oktubre idi 1984, maysa a natauan a baybay ti agarup 16,000 a mannakisalip ti naggarasugas kadagiti lansangan a maipaay iti panangrugi ti New York City Marathon. Ti pagpatinggaan ket agangay 26.2 milias (42.2 km) ti kaadayona. Dayta di naintiempuan a nabara nga aldaw ti otonio ti nangikuyog iti dayta iti makapakapsut a pudot ken nangato a kinasalimuot nga isu ti nangibus ti pigsa dagiti tumataray ken nangsuot iti panagandorda. Ti lumba ket makabannog a pannakisaranget uray pay iti kalaingan kadagiti atleta. Adu a mannakilumba ti nabannogan ket simmardengda; ngangngani 2,000 ti di nakaleppas. Dagidiay nakaileppas pinarmekda ti karirigatan a kasasaad.

² Uray met dagiti Kristiano, addada iti maysa a lumba. Ti gunggona? Biag nga agnanayon. Ket umas-asping iti daydiay mannakilumba iti marathon, masapul a makisarangetda agingga idiay pagpatinggaan. Kasapulan ti panagandor. Masapul a mataginayon ti pigsa ken liklikan ti pannakabannog. Ti lumbatayo a maipaay iti biag saan nga ababa laeng a panagtaray, no di ket, maysa nga atiddog a panagtaray. Kuna ni Pablo kadagiti padana a Kristiano idiay Corinto: “Saanyo nga ammo nga iti paglulumbaan agtarayda amin, ngem maymaysa laeng ti umawat ti gunggona? Agtaraykayo met iti kasta, tapno magun-odanyo.” (1 Corinto 9:24) Ti panagtaray dagiti Kristiano ket buyogen ti panagregget a sipipigsa.​—Lucas 13:24.

3. Kasano laeng a masalimetmetan dagiti Kristiano ti kapartakda aginggana a malpasda ti lumba?

³ Ngem mabalin a pampanunotenyo: ‘Siasino ti makapagtultuloy iti dayta a kapartak agingga iti pagpatinggaan ti lumba?’ Awan ti makabalin iti dayta iti kabukbukodantayo a pigsa. Tapno magunggonaan, masapul a kumpettayo iti mismo a gubuayan ti dinamiko a bileg, ni Jehova a Dios.​—Job 36:22; Salmo 108:13.

Ni Jehova​—Ti Gubuayan ti Dinamiko a Bileg

4. Sigun ken mammadto Isaias, apay a makapagtalektayo iti abilidad ni Jehova a mangsustento kadagiti ad-adipenna?

⁴ Awan duadua a masustentuan ni Jehova dagiti ad-adipenna. Iti ngiwat ni mammadtona nga Isaias, nagsao ti Mannakabalin-amin maipapan iti kinaawan pagpatpatinggaan ti abilidadna ken ti awan pakaiyaspinganna a nabileg nga ar-aramidna. “Itangadyo dagiti matayo idiay ngato ket kitaenyo,” Kunana. “Asino ti namarsua kadagitoy a bambanag? Isu Daydiay babaen iti panangbilang iruarna dagiti buybuyotda, isu inagananna ida amin. Gapu iti kinaaglaplapusanan ti dinamiko a bilegna, isu met ti napigsa iti pannakabalin, awan ti agkurang uray maysa kadakuada. . . . Dika aya naammuan wenno dika aya nangngeg? Ni Jehova, ti Namarsua kadagiti pungto ti daga, ket Dios iti panawen a di nakedngan. Isut’ saan a kumapuy ket di met mabannog. Awan ti makasukimat iti pannakaawatna.”​—Isaias 40:26-28.

5, 6. Mangted kadagiti pangarigan a pammaneknek iti dinamiko nga enerhia ni Jehova.

⁵ Manipud iti adda inggana agingga iti kinaawan inggana, ti pannakaiparangarang ti pannakabalin ti panamarsua ni Jehova ti nakaskasdaaw! Kas pangarigan, usigenyo dagiti bloke a pagbangon nga isut’ nakaibangonan amin dagiti bambanag,​—dagiti atomo. Babassiusitda unay a ti sangatedted a danum naglaon iti 100 a bilion a bilion nga atomo (Sistema a panangbilang ti Americano). Ngem, nakaskasdaaw unay, naurnong iti nucleus wenno sentro dagiti atomo ti umdas a bileg, ti maysa a kaso, iti panagbettak a nakapigpigsa unay a mangkutkot iti abut iti daga a 32 grados ti kaunegna ken kakapat ti maysa a milia ti kalawana.

⁶ Idiay sabali nga ungto ti proporsion ti kadakkel, usigenyo ti init. Daytoy nagdakkelan a nuklear nga urno ti mangpappapudot iti sistema solartayo. Dayta ti masungsungrodan iti enerhia nga aggapgapu kadagiti babassiusit nga atomo. Nupay amin a biag ditoy daga​—dagiti mula, dagiti an-animal ken dagiti tattao​—agpannurayda iti enerhia nga ipapaay dayta nagdakkelan a nailangitan a planta ti pigsa, nagbassitan laeng a kantidad ti enerhia ti init ti aktual a dumandanon iti daga. Kaskasdi, supisiente daytan a mangsuportar iti biag. Iti librona nga Astronomy, ni astronomo a Fred Hoyle ti nagsurat: “Ti nagbassitan nga enerhia iti init nga agtinnag iti Daga​—a napattapatta a 5 a paset iti sangagasut milion a milion​—ket agarup 100,000 a daras a dakdakkel ngem amin nga enerhia a maus-usar kadagiti industria iti lubong.”

7. Kasanot’ panagriknatayo maipapan ken Jehova kalpasan iti panangusig iti pannakabalin a naiparangarang iti sangaparsuaanna?

⁷ Nupay kasta, ti init ket maysa laeng kadagiti binilbilion a bitbituen a mangbukel ti Milky Way a galaksitayo​—ket dayta maysa laeng a kalalainganna ti kadakkel a bituen. Mainayon pay pinattapatta dagiti astronomo nga adda agarup 100,000,000,000 a galaksi iti pagaammo nga uniberso. Daytoy ti makapakintayeg a pampanunoten, saan kadi? Isu met laeng a ni Job, kalpasan ti panangpanunotna no kasano a ni Jehova ‘inyukradna a maymaysa dagiti langlangit,’ kunana a ti Dios ket, “mangaramid kadagiti dadakkel a bambanag a di matukod, wen, bambanag a nakaskasdaaw a saan a mabilang.”​—Job 9:8-10.

Mabalin a Papigsaennakay ni Jehova

8. (a) Asino laeng ti makagun-od a naan-anay iti pannakabalin ni Jehova, ken apay? (b) Kasano a makapabileg iti pammati ti kari idiay Isaias 40:29-31?

⁸ Dagiti pudno a managdaydayaw ken Jehova mabalinda a siwayawaya nga agadaw a naan-anay manipud iti daytoy Ubbog ti dinamiko nga enerhia a nangparsua ken mangsussustiner iti uniberso. Dagiti ad-adipen ni Jehova ‘mabalin a mapapigsada iti pannakabalin babaen iti nasantuan nga espirituna,’ a di agbuteng a maibusandanto iti pannakabalin. (Efeso 3:16; Salmo 84:4, 5) Pudno unay, ti panangabaktayo iti lumba nga agpaay iti biag agpannuray iti naan-anay a panagtalek a ti nabileg nga ima ti Dios ti mangilabes kadatayo idiay uged a pagpatinggaan. Mapapigsanatayo. Kas kinuna ni mammadto nga Isaias maipapan ken Jehova: “Isu ti mangpapigsa iti nakapuy; ket iti daydiay awan ti kabaelanna isu pawadwadenna iti pigsa. Uray pay dagiti ubbing kumapuydanto ken mabannogdanto, ket dagiti agtutubo a lallaki matuangdanto a matalipupos, ngem dagiti agpannuray ken ni Jehova pabaruendanto ti pigsada. Agpangatodanto a sipapayak a kasla agila. Agtaraydanto ket dida mabannog; magnadanto ket dida agkapuy.” (Isaias 40:29-31) Apay, ti basta panangbasa kadagidiay a sasao isut’ makapapudot iti espiritutayo!

9. Kasano a matulongannakayo ni Jehova kadagiti ‘kasla bantay’ a parparikutyo?

⁹ No maipasangotayo kadagiti kasla dadakkel a parikut a kasla manglapped iti regtayo iti pudno a panagdayaw, mabalin a pagarupenyo a nagbassitan ken awan kaes-eskanyo. Dikay koma maladingitan. Agturongkayo iti mannakabalin a nailangitan nga Amayo. Pabilgenna ‘amin dagidiay agpannuray kenkuana.’ Di aya ti Namarsua iti atomo mapunnuanna dagiti tattaona iti dinamiko nga enerhia nga umdas a mangiyalis kadagidiay a ‘bambantay’? Pudno a mabalinanna!​—Marcos 11:23.

10. (a) Ania dagiti bambanag a makapakapuy kadagiti Kristiano a mannakilumba? (b) Aniat’ kayat ni Satanas nga aramiden kadakayo?

¹⁰ Iti kasumbangirna, mabalin a dadduma kadagiti Kristiano ti napaksuyan unayen manipud iti inaldaw-aldaw a pannakidangadang a maibusor kadagiti rigrigat iti a lubong a pagpampannakkelna ti dida panangikankano kadagiti Nakristianuan a prinsipio a gapu itoy kasla kayatda ti agsarimadeng wenno agsardeng payen iti lumba a maipaay iti biag. Ti sakit, dagiti pakarigatan a pinansial, parparikut ti pamilia, panagliday, wenno dadduma pay a rigrigat ti makapataud met iti pannakaupay. Ket ti pannakaupay dagdagus a dadaelenna ti pigsa ti maysa a Kristiano, no kasano ti silalaka a panangibus ti maysa a napudot nga aldaw iti pigsa manipud iti maysa a mannakilumba iti marathon. Ti naindaklan a Kabusor, ni Satanas a Diablo, ti mangus-usar kadagita a bambanag tapno tungdayenna ti kinatarnawyo kas adipen ni Jehova. (1 Pedro 5:8) Dikay palubosan nga aramiden dayta ti Diablo! Kumitatayo iti Namarsua kadagidiay mangnibinibi a nailangitan a galaksi a mangpabaro iti naespirituan a pigsayo. Masuportarannakayo ni Jehova.​—Salmo 37:17; 54:4.

11. Aniat’ maadaltayo iti pamay-an a panangsango ni David kadagiti lapped?

¹¹ No naipasango kadagiti lapped, ni David ti kanayon a makasapul ken ni Jehova a gubuayan ti baro a pigsana. Gaput’ napapigsa manen babaen iti nasantuan nga espiritu, nabaelan manen ni David a ‘lagtuen’ ti aniaman nga ibubusor. Kinunana: “Ta gapu kenka duklosek ti sangabuyotan; ket gapu iti Diosko lagtuek ti maysa a bakud.” Kinuna pay met ni David: “Gapu iti Dios makagun-odtayto iti pigsa, ta isu ti mangibaddekto kadagiti kabusortayo.” (Salmo 18:29; 60:12) Maaramidan met ni Jehova dayta kadakayo.

Parmekenyo ti Naespirituan a Panagkapuy

12. (a) Apay a masapul a maasikaso nga insigida ti naespirituan a panagkapuy? (b) Ania dagiti sintomas iti naespirituan a panagkapuy? (c) Ania dagiti inaramid ni Jehova a sagana tapno mapapigsa dagidiay nabannogan iti naespirituan?

¹² Masapul a nasiglattay koma a makailasin kadagiti pagilasinan ti naespirituan a panagkapuy ken nasiglattay koma met a mangparmek kadagita. Apay? Agsipud ta dagidiay laeng bassit nga ‘agregget a sipipigsa a sumrek iti ruangan a nailet,’ wenno dagidiay mannakilumba a lumagpas iti pagpatinggaan ti makagun-od iti gunggona ti biag nga awan inggana. (Lucas 13:24; Filipos 3:12, 13) Sukimatenyo ti naipakuyog a kahon a napauluan “Ti Sumagmamano a Pamay-an a Panangparmek ti Naespirituan a Panagkapuy.” Mailasinyo aya ti sumagmamano kadagiti sintomas iti bagiyo wenno iti kameng ti pamiliayo? No kasta, agtignaykayo a dagus tapno makapagbalbaliw. Papigsaenyo ti espiritualidadyo babaen ti panangaon ti pigsa kadagiti nailista a sagana ni Jehova.

13, 14. (a) Ania dagiti ulidan a makatulong a mangpabaro iti naespirituan a pigsatayo? (b) Kasano a ti patigmaan manipud iti maysa a nabayagen nga adipen ni Jehova tulongannatayo nga agtalinaed iti lumba?

¹³ Mabalinyo a parmeken dagiti tendensia ti panagkapuy babaen ti panangtulad kadagiti ulidan dagiti naballigi nga ad-adipen ti Dios nga adda iti rekord ti Biblia. Nagaduda, a lallaki ken babbai, agtutubo ken natataengan, a nakapagibtur agingga iti panungpalan. Basaenyo kadagiti kasuratan a kas idiay Hebreo 11:4-40. Kasta met, iti moderno a tiempo adu kadagiti ingungotentay a kakabsat a lallaki ken babbai ti nagtultuloy a nagserbi ken Jehova a di kimmapkapuy.

¹⁴ Ni George, nga aggigian idiay umabagatan a paset ti Estados Unidos, ket maysa nga ulidan iti Kristiano a mannakilumba a di pulos kimmapuy. Kalpasan ti nasurok a 50 años iti pannakilumbana a maipaay iti biag nga awan inggana, isu pay laeng ti adda a sipipigsa nga agtartaray. Ania a pammagbaga ti maitedna kadatayo?

“Ipaganetgetko a sipipigsa, kumpetkayo iti organisasion. Laglagipenyo a ni Jesu-Kristo, kas Daydiay Dinutokan ni Jehova, isu ti mangipatpataray ti organisasion. Gapuna dikay maupay no adda nasinged unay kadakayo a di matalek. No adda dikay matarusan a naan-anay wenno narigatyo nga akseptaren, agtalekkayo a kalpasan ti sumagmamano a panawen daytat’ malawlawaganto. Ti organisasion ni Jehova ti nangiyeg kadatayon iti daytoy a paset. Agtalekkayo nga iwanwannatayo nga agturong idiay Baro a Sistema.”​—Juan 6:66-68.

15. No dagiti nasasayaat nga ulidan ti mangpabaro ti espiritutayo, aniat’ masapul nga aramidentayo?

¹⁵ Mabalin nga addada dagiti sumagmamano kadagitoy a nasusudi a tattao iti kongregasionyo, wenno mabalin a makitayo ida kadagiti asamblea sirkito. Makisaokayo kadakuada, agadalkayo kadakuada. Mainayon pay, dagiti ulidan dagiti dadduma a matalek ti masarakan idiay Yearbook, ken Ti Pagwanawanan, agraman dadduma a publikasion ti Watch Tower Society. Basaenyo dagitoy a salaysay. Kitaenyo no makasakdokayo ti pigsa kadagidiay a kapadasan.

Papanglakayen​—Agbalinkayo a ‘Badang a Makapabileg’

16. (a) Kasano a makatulong dagiti panglakayen kadagiti padada a Kristiano a mangpabaro iti pigsada? (b) Aniat’ masapul nga annadan dagiti panglakayen no mangparparegta ken mangbalbalakadda?

¹⁶ Dagiti panglakayen iti kongregasion ti nangnangruna nga alistoda koma a mangbadang kadagiti kamkameng a mangipakpakita kadagiti pagilasinan iti panagsarimadeng. Ituktukon ti Isaias 35:3 ti nagsayaat a balakad babaen ti panagkunana: “Patibkerenyo dagiti napaksuyan nga im-ima, ket pakirdenyo dagiti nakapuy a tumtumeng.” Ngem kasanoyo kas papanglakayen nga aramiden ti pasetyo iti dayta? Ti maysa, managpaliiwkay koma. Usigenyo ti pudpudno a makagapu iti kasta a panagkapuyda. Mangipaaykayo kadagiti praktikal, Nainkasuratan a suhestion a maibagay iti dayta a tao. Naannadkay koma. Kayatyo ti mangparegta, saan a mangupay, kadagiti kakabsatyo.a Gapuna, dikayo ipapilit ti konsiensiayo iti sabali, wenno piliten ti maysa a tao a mangsurot iti solusionyo, wenno isut’ awagan kas maysa a di nataengan a Kristiano nga isut’ agduadua a mangsurot iti personal a panangmatmatyo. Masapul nga ibatay dagiti panglakayen ti balakad ken pammaregtada iti Biblia. Dida kayat a kumapuy dagiti padada a mannakilumba babaen ti panangbuntonda kadakuada kadagiti di kasapulan a pagalagadan ti kongregasion​—Idilig ti Mateo 11:28, 29 iti Mateo 23:2-4.

17. Kasano a masumbra dagiti panglakayen dagiti taktika ni Satanas a nairanta a mangpabannayat kadagiti padada a Kristiano?

¹⁷ Mangipakpakita dagiti panglakayen ti nasasayaat nga ulidan kas paspasurot ni Kristo babaen ti panagbalinda a nasiglat a mangkomendar kadagiti kamkameng ti kongregasion. Ipariknayo kadakuada a sipapasnek a pagay-ayatda ken kasapulan ida! Ti sistema ni Satanas ti kanayon nga ad-adda pay ngem basta sisasagana a pagbalinen nga agrikna dagiti Kristiano a kasla adda pagkuranganda. Iti daytoy a punto iti lumbada a maipaay iti biag, kasapulan dagiti kakabsattayo saan a dagiti kritiko, no di ket dagiti gagayyem a mangparagsak kadakuada nga agturong iti panagballigi. Kas pangarigan, idi maysa a kabsat a babai nga agedad iti nasurok a kuarenta (middle aged) ti masapul nga agsardeng iti panagpayunirna, bumara ti pusona iti panagtarigagay a makapagsubli iti amin-tiempo a serbisio. Ngem dina mabalin gapu kadagiti pinansial a kasasaad. Numan pay nasayaat ti panggepna, isut’ sinaludsodan ti maysa a panglakayen iti medio makababalaw a pamay-an: “Kaanoka nga agpayunir manen?” Ti ababa a direkta a sungbatna ti nangkellaat iti panglakayen: “Inton mabayadanen ni lakayko ti abang.” Ti di naawatan ti panglakayen, ngem naammuanna met laeng iti kamaudiananna, a ta ti panagpaypayunirna ti gasgastuan kangrunaanna ti masapsapulan ti lakayna. Ngem idi a ti amona ti nangnayon a nangnayon iti trabaho a mapagduaduaan para iti maysa a Kristiano, ti konsiensia ni lakayna ti nangtignay kenkuana nga agsapul kadagiti dadduma a panggedan. Ngem iti edadna, saanen a nalaka a masapulan dagiti panggedan. Gapuna isut’ nangged kadagiti nababbaba ti pasueldona; gapuna, nasken ti panagtrabaho ni baketna iti amin a tiempo.

18. Iti ania a pamay-an a dagiti panglakayen maysada a “katulongan a mangpabileg”?

¹⁸ Manipud iti kaisalsalaysay a kapadasan, tarusantay aya a dagiti panglakayen rebbeng nga agalikakada wenno agsarimadeng a mangbalakad kadagiti padada a Kristiano? Saan. Imbes ketdi, no kasapulan ti balakad wenno pammaregta, masapul a dagiti panglakayen mannakaawatda koma kadagiti aktual a kasasaad dagiti kakabsatda ket saan laeng a matmatan ti pammarang a langa. (Santiago 2:15, 16) Iti daytoy a pamay-an, dagiti panglakayen makapagbalinda a “katulongan a mangpapigsa” iti kongregasionda.​—Colosas 4:11.

19. Aniat’ maaramidanyo a makatulong kadagiti payunir a di mabannog?

¹⁹ Maysa a dumakdakkel a bilang dagiti agibubunannag ti Pagarian ti pimmartak manen ti panagaddangda ket regular payunirdan. Ti ariwawa dagiti adu a tattao ti mabalin a makaparegta kadagiti mannakilumba iti marathon a mangpabaro ti pigsada. Gapuna ania ti ar-aramidenyo a mangparagsak kadagiti payunir iti kongregasionyo nga agtultuloy iti panagballigi? Ni Doug ken Joanne pinagbalinda ti amin-tiempo a serbisio kas karera iti panagbiagda. Mabalin a makapaupay no dadduma isaludsodda kadakuada, “Kaanokayo a maaddaan iti annak?” wenno, “Kaanonto ti panagpirmiyo iti balay?” Nupay kasta, aniat’ mapasamak no dagiti padada a Saksi ti mangted moral a panangsuportar babaen ti panagkunada kadakuada, “Itultuloyyo ti nagsayaat nga aramidyo. Maragsakankami a maaddaan kadakayo kas payunir iti kongregasiontayo”? Apay, saanda laeng a maliklikan ti naespirituan a panagkapuy, no di ket matulonganda pay met nga agtayab kas agila iti serbisioda a panagpayunir!​—Idiligyo iti Isaias 40:31.

No Kasano a Mapabaro dagiti Payunir ti Pigsada

20, 21. Kasano a napabaro dagiti dadduma nga adda iti amin-tiempo a serbisio ti pigsada?

²⁰ Dumngegkayo iti daytoy a pagassawaan, ni Frederick ken ni Marian. Ammoda no kasano ti panangpabaro iti pigsada. Isuda a dua ti misionero nga agserserbi iti maysa a pagilian iti Central America, ket addadan iti tawenda a 70. Rinugian ti asawa a lalaki ti serbisiona kas misionero idi 1946, ti babai idi 1950. Aniat’ nakatulong kadakuada nga agtultuloy iti serbisio ni Jehova? Sumungbat ni Frederick: “Mainayon iti panagayat ken Jehova ken panangtulong kadagiti dadduma a tattao, ket isu ti kanayon a panangpampanunot iti kalat ti biag nga agnanayon.” Sumungbat ni baketna a ‘dagiti karkari ti Dios ti tumultulong iti inkam panagtultuloy.’ Kasanot’ panagtalinaedda a saan a kumapuy? “Aniaman ti naituding kadakayo,” ibalakadna, “agbalinkay nga okupado iti dayta.” Irekomendar ti asawa a babai ti “panagtultuloy iti teokratiko a trabaho,” ket sana innayon: “Bayat a lumaklakay wenno bumakbaketkayo, dikay mabalin nga aramidenen amin a kayatyo nga aramiden. Dayta ti mangparurod kaniak, ngem pakisaritaak dayta ken Jehova iti kararag.” Nagpatingga ni Frederick babaen iti daytoy nagsayaat a pammagbaga: “Agkarkararagkami iti kada rabii ket dawdawatenmi ti panangtulong ni Jehova kadakami.”​—1 Pedro 4:7.

²¹ Ni Lavonia ket 67 añosnan ket maysa a regular a payunir iti napalabasen a 20 años. Iti uneg ti napalabas a makatawen, nangbusbos iti 15 nga aldaw idiay ospital ket agdama pay laeng nga agag-agas gapu iti pusona. Ti ipapatay dagiti sumagmamano a kameng ti pamilia, agraman ni lakayna ken ti amana, ti pudno a nangibus iti emosion kenkuana. Kaskasdi isu pay laeng ti agregregget a sipipigsa. Kasano ti pannakapabaro ti pigsana? “Ti innak pannakipaspaset a naan-anay iti trabaho a panangaskasaba ti aktual a dakkel a tulong,” kunana, “agsipud ta no makisarsaritaak kadagiti dadduma maipapan ken Jehova daytat’ mangipanaw iti isipko manipud kadagiti parparikutko ket mangted talna ti isipko ken rag-o a mamagbalin a maikari pay met laeng iti panagbiag.” Dina plano nga isardeng ti panagpayunirna no di ket kunana: “Ti pannakakitak kadagiti dadduma a makaammo ken ni Jehova ken kadagiti engrande a pangpanggepna ti mangparagsak kaniak a diak unay pampanunoten ti panangisardengko iti panagpayunirko.”​—Aramid 20:35.

22. Tapno mangabak iti lumba a maipaay iti biag nga agnanayon, aniat’ masapul nga itultuloytay nga aramiden?

²² Makapagreggettayo man a sipipigsa kas payunir iti daytoy a paset ti panagbiag wenno saan, mabalintay amin ti agtalinaed a nasinged iti Gubuayan ti dinamiko nga enerhia, ni Jehova, ken iti organisasionna. Agtultuloytay koma a mangpabaro ti pigsatayo babaen ti sisusungdo a panagserserbi iti Diostayo. Iti kasta, kas ken Habacuc, maikunatayo: “Ni Jehova ti Soberano nga Apo isu ti pigsak; ket aramidenna dagiti saksakak a kas saksaka ti ugsa a dutdutan.” (Habacuc 3:19) Iti kasta ditayto mabannog wenno agkapuy. Laglagipenyo a ti lumba ket ngangnganin malpas. Asidegtayon iti kalat!

[Dagiti Footnote]

Salsaludsod a Pangrepaso

◻ Asino laeng ti siwayawaya a makagun-od iti dinamiko nga enerhia ni Jehova?

◻ Ania dagiti sumagmamano a pagilasinan ti naespirituan a panagkapuy?

◻ Ania dagiti sagana ni Jehova a makatulong kadatayo a mangpabaro ti pigsatayo?

◻ Kasano a dagiti panglakayen ken ti dadduma idiay kongregasion matulonganda dagiti payunir nga agtalinaed iti “lumba”?

[Kahon iti panid 19]

Ti Sumagmamano a Pamay-an a Panangparmek iti Naespirituan a Panagkapuy

Dagiti Sintomas iti Panagkapuy

◻ Kinaawan panagteppel iti pannangan, panaginum, ken panangsapul ti ragragsak

◻ Pannakapukaw ti regta a maipaay iti kinapudno, aleng-aleng nga espiritu

◻ Panagimula kadagiti serioso ken mabayag a panagduadua

◻ Liway iti pannakilangenlangen kadagiti panaggigimong iti kongregasion

◻ Kinakurang ti regta ken rag-o iti ministerio iti tay-ak

◻ Aglablabes a panangbabalaw kadagiti panglakayen ken iti organisasion

Dagiti Katulongan iti Panagibtor

◻ Panangikararag ti tulong babaen ti nasantuan nga espiritu​—Lucas 11:13; Galacia 5:22, 23; 1 Pedro 4:7

◻ Personal a panagadal​—Salmo 1:1, 2

◻ Panagmennamenna kadagiti Nainkasuratan a bambanag​—Salmo 77:12

◻ Regular nga itatabuno iti panaggigimong ken kadagiti asamblea​—Nehemias 8:1-3, 8, 11; Hebreo 10:23-25

◻ Regular a pannakipaset iti tay-ak ti serbisio​—Aramid 20:18-21

◻ Naespirituan a tulong manipud kadagiti panglakayen ti kongregasion, dagiti agdaldaliasat a manangaywan​—Roma 1:11, 12; Hebreo 13:17

[Dagiti ladawan iti panid 17]

Ni Jehova, ti Namarsua iti uniberso, tultulonganna dagiti saksina a mangpabaro ti pigsada

[Credit Line]

Ladawan ti NASA