Papigsaen ni Jehova ti Nabannog

“[Ni Jehova] ti mangpapigsa iti nakapuy: ken iti daydiay awan ti kabaelanna isu pawadwadenna iti pigsa.”​—ISAIAS 40:29.

1. Iyilustraryo ti bileg nga adda kadagiti pinarsua ti Dios.

AWAN pagpatinggaan ti pannakabalin ni Jehova. Ken anian a dinamiko nga enerhia ti adda kadagiti pinarsuana! Ti atomo​—ti mismo a mangbukel iti amin a banag​—ket nagbassit nga uray la naglaon ti sangkatedted a danum iti sangagasut a bilion a bilion nga atomo.a Agpannuray ti amin a sibibiag ditoy daga iti enerhia a patauden dagiti reaksion ti atomo iti init. Ngem kasano kaadu nga enerhia ti init ti kasapulan tapno masustiner ti biag ditoy daga? Nagbassit a kapaset ti amin nga enerhia a patpatauden ti init ti dumandanon iti daga. Nupay kasta, ti nakabasbassit a paset ti enerhia ti init a dumandanon iti daga ket nabilbileg nga amang ngem ti amin nga enerhia a maus-usar kadagiti industria ditoy lubong.

2. No anagen, ania ti kuna ti Isaias 40:26 maipapan iti pannakabalin ni Jehova?

² Panunotentay man ti atomo wenno imatangantayo ti naglawa nga uniberso, pagamangaennatayo ti nakaskasdaaw a pannakabalin ni Jehova. Di pakasdaawan a maikunana: “Itangadyo dagiti matayo idiay ngato, ket kitaenyo no asino ti namarsua kadagitoy, a babaen ti panangbilang isu iruarna dagiti buybuyotda; isu inagananna ida amin; gapu iti kinadakkel unay ti kinamaingelna [“dinamiko nga enerhia,” NW], ken agsipud ta napigsa iti pannakabalin, awan ti agkurang uray no maysa”! (Isaias 40:26) Wen, ni Jehova “napigsa iti pannakabalin,” ket isu ti Gubuayan ti “dinamiko nga enerhia” a nausar iti pannakaparsua ti intero nga uniberso.

Kasapulan ti Di Gagangay a Pannakabalin

3, 4. (a) Ania ti dadduma kadagiti banag a mabalin a mangibus iti pigsatayo? (b) Ania a saludsod ti nasken nga usigentayo?

³ Awan pagpatinggaan ti pannakabalin ti Dios, idinto ta maibus ti pigsa dagiti tattao. Sadinoman ti papanantayo, makakitatayo kadagiti tattao a nabannog. Agriingda nga aglaladut, mapanda agtrabaho wenno ageskuela nga aglaladut, agawidda a nabannog, ken maturogda a saan laeng a nabannog no di ket napaksuyan. Kayat ti dadduma ti agbakasion tapno makainanada bassit. Kas ad-adipen ni Jehova, mabannogtayo met, ta ti panagbiagtayo a buyogen ti nadiosan a debosion kalikagumanna ti napinget a panagtrabaho. (Marcos 6:30, 31; Lucas 13:24; 1 Timoteo 4:8) Ken adu pay dagiti banag a mangibus iti pigsatayo.

⁴ Uray no Kristianotayo, ditay maliklikan dagiti parikut a mapaspasaran ti kaaduan a tattao. (Job 14:1) Makapaupay ken makapakapsut ti panagsakit, pinansial a parikut, wenno dadduma pay a pakarigatan a gagangay iti biag. Mainayon kadagitoy a problema dagiti suot a mapasaran dagidiay maidadanes gapu iti kinalinteg. (2 Timoteo 3:12; 1 Pedro 3:14) Gapu iti inaldaw a pakarigatan nga iyeg ti lubong ken ibubusor iti trabahotayo a panangikasaba iti Pagarian, mabalin a mautoyan ti dadduma kadatayo nga uray la mariknatayo a kasla guminginadtayon nga agserbi ken Jehova. Maysa pay, us-usaren ni Satanas a Diablo ti amin a pamay-an a mangdadael iti kinatarnawtayo iti Dios. Kasanotay ngarud a magun-od ti naespirituan a bileg a kasapulantayo tapno saantay a mabannog ken sumardeng?

5. Apay a saan laeng a natauan a bileg ti kasapulan tapno maitungpal ti Nakristianuan a ministerio?

⁵ Tapno magun-od ti naespirituan a bileg, nasken nga agpannuraytayo ken Jehova, ti mannakabalin-amin a Namarsua. Impakita ni apostol Pablo a saan laeng a ti gagangay a bileg dagiti imperpekto a tattao ti kasapulan iti Nakristianuan a ministerio. Insuratna: “Addaankami itoy a gameng kadagiti dinamili a basehas, tapno ti pannakabalin a nalablabes ngem ti gagangay biang koma ti Dios ket saan nga iti bagbagimi.” (2 Corinto 4:7) Itungtungpal dagiti napulotan a Kristiano ti “ministerio ti pannakikappia” iti tulong dagiti kakaduada nga addaan naindagaan a namnama. (2 Corinto 5:18; Juan 10:16; Apocalipsis 7:9) Yantangay ar-aramidentayo ti trabaho ti Dios iti laksid ti pannakaidadanes, saantay a maaramid dayta iti bukodtayo a pigsa kas imperpekto a tattao. Tulongannatayo ni Jehova babaen ti nasantuan nga espirituna, ket iti kasta iti kinakapsuttayo ad-adda a maiparangarang ti pannakabalinna. Ken anian a makaliwliwa kadatayo ti pammatalged a “ni Jehova saranayenna dagiti sililinteg”!​—Salmo 37:17.

‘Ni Jehova Isu ti Kiredtayo’

6. Kasano nga ipatalged kadatayo ti Kasuratan a ni Jehova ti Gubuayan ti bileg?

⁶ “Napigsa iti pannakabalin” ti nailangitan nga Amatayo ken nalakanatayo a mapabileg. Kinapudnona, naikuna kadatayo: “[Ni Jehova] ti mangpapigsa iti nakapuy: ken iti daydiay awan ti kabaelanna isu pawadwadenna iti pigsa. Uray pay dagiti ubbing kumapuydanto ken mabannogdanto, ken dagiti agtutubo matuangdanto a matalipupos: ngem dagiti agpannuray ken ni Jehova pabaruendanto ti pigsada; agpangatodanto a sipapayak a kas la agila; agtaraydanto, ket dida mabannog; magnadanto, ket dida agkapuy.” (Isaias 40:29-31) Gapu iti umad-adu a pakarigatan, no dadduma mabalin a mariknatayo a kaslatay maysa a napaksuyan a tumataray a saanen a makaaddang pay. Ngem asidegen ti pagpatinggaan ti lumba maipaay iti biag, ket masapul a ditay sumardeng. (2 Cronicas 29:11) Agdakdakiwas ti Diablo a Kabusortayo a “kasla leon a ngumerngernger,” ken kayatnatay a pasardengen. (1 Pedro 5:8) Laglagipentay koma a ni ‘Jehova ti bileg ken kalasagtayo,’ ket nangipaay iti nawadwad a probision ‘a mangpapigsa iti nakapuy.’​—Salmo 28:7.

7, 8. Ania ti mangpaneknek a pinabileg ni Jehova da David, Habacuc, ken ni Pablo?

⁷ Inikkan idi ni Jehova ni David iti bileg a kasapulanna tapno makapagibtur iti baet dagiti nakaro a tubeng. Gapuna, napnuan pammati ken panagtalek nga insurat ni David: “Gapu iti Dios agaramidtayto a simamaingel [“makagun-odtayo iti kired,” NW]; ta isu ti mangibaddekto kadagiti kabusortayo.” (Salmo 60:12) Pinakired met ni Jehova ni Habacuc tapno mairingpasna ti annongenna kas propeta. Kuna ti Habacuc 3:19: “Ni Jehova, nga Apo, isu ti pigsak: ket aramidenna dagiti saksakak a kas saksaka ti ugsa a ludlodan. Ket aramidennakto a magna iti rabaw dagiti nangato a dissok.” Naisangsangayan met nga ehemplo ni Pablo, a nangisurat iti kastoy: “Ta kadagiti amin a bambanag addaanak iti bileg gapu iti [Dios a] mangted kaniak iti pannakabalin.”​—Filipos 4:13.

⁸ Kas kada David, Habacuc, ken ni Pablo, agtalektay koma iti kabaelan ti Dios a mangpabileg ken iti pannakabalinna a mangisalakan kadatayo. Yantangay ammotayo a ni Soberano nga Apo Jehova ti Gubuayan ti ‘kiredtayo,’ usigentay ita ti sumagmamano a pamay-an no kasanotay a makagun-od iti naespirituan a kired kadagiti aglaplapusanan a probision nga ipapaay ti Dios.

Dagiti Naespirituan a Probision a Mangpakired Kadatayo

9. Ania ti paset dagiti Nakristianuan a publikasion iti pannakapabilegtayo?

⁹ Mapakired ken masustinernatayo ti naanep a panagadal iti Kasuratan iti tulong dagiti Nakristianuan a publikasion. Inkanta ti salmista: “Nagasat ti tao a . . . ti pakaragsakanna adda iti linteg ni Jehova; ket iti lintegna imutektekanna iti aldaw ken rabii. Ket isu kaslanto iti maysa a kayo a naimula iti sibay dagiti ay-ayus ti danum, nga ipaltuadna ti bungana iti karbenganna, a ti bulongna met saan a malaylay; ket isu amin nga aramidna rumang-ayto.” (Salmo 1:1-3) No kasano a nasken a mangantayo tapno agtalinaedtayo a napigsa iti pisikal, masapul a mangipaunegtayo iti naespirituan a taraon nga ipapaay ti Dios babaen ti Saona ken dagiti Nakristianuan a publikasion tapno agtalinaedtayo a napigsa iti naespirituan. Gapuna, nasken ti napasnek a panagadal ken panagmennamenna.

10. Kaanotay a maiwayaan ti agbasa ken agmennamenna?

¹⁰ Pudno a makagunggona a mennamennaen dagiti “nauneg a bambanag ti Dios.” (1 Corinto 2:10) Ngem kaanotayo nga agmennamenna? Ni Isaac nga anak ni Abraham ‘napan nagpanunot iti away idi tagtagilinneken ti init.’ (Genesis 24:63-67) Ni salmista a David ‘pinampanunotna ti Dios kadagiti panagpuyat iti rabii.’ (Salmo 63:6) Mabalintay nga adalen ken mennamennaen ti Sao ti Dios iti agsapa, sardam, rabii​—iti kinapudnona, iti aniaman a tiempo. Mangiturong ti kasta a panagadal ken panagmennamenna iti maysa pay kadagiti probision ni Jehova a makapabileg iti naespirituan​—kararag.

11. Apay nga ipategtay koma unay ti regular a panagkararag?

¹¹ Mapakirednatayo ti regular a panagkararag iti Dios. Gapuna, ‘reggetantayo [koma] ti agkararag.’ (Roma 12:12) No dadduma, nasken nga espesipiko a dumawattayo iti sirib ken kired a kasapulan tapno masarangettayo ti suot. (Santiago 1:5-8) Pagyamanan ken idaydayawtayo met ti Dios no makitatayo ti pannakatungpal dagiti panggepna wenno ti panangpabilegna kadatayo nga agtultuloy nga agserbi kenkuana. (Filipos 4:6, 7) No agtalinaedtayo a nasinged ken ni Jehova babaen ti kararag, pulos a dinatay baybay-an. “Adtoy,” inkanta ni David, “ti Dios isu ti katulongak.”​—Salmo 54:4.

12. Apay a rumbeng a dumawattayo iti nasantuan nga espiritu ti Dios?

¹² Pakirden ken papigsaennatayo ti nailangitan nga Amatayo babaen ti nasantuan nga espiritu, wenno aktibo a puersana. Insurat ni Pablo: “Agparintumengak iti Ama . . . iti panggep nga ipaayna koma kadakayo maitunos iti kinabaknang ti dayagna a mapabilegkayo iti kinataoyo iti uneg buyogen ti pannakabalin babaen ti espirituna.” (Efeso 3:14-16) Rumbeng a dumawattayo iti nasantuan nga espiritu, nga agtalektayo nga ited ni Jehova dayta kadatayo. Kinuna ni Jesus: No dumawat ti maysa nga ubing iti ikan, mangted kadi ti naayat nga ama iti uleg? Siempre saan. Iti kasta, kinunana: “No dakayo, nupay [managbasol ket iti kasta maikuna a] nadangkeskayo, ammoyo no kasano ti mangted iti naimbag a sagsagut kadagiti annakyo, anianto pay a nangnangruna a kasta a ti Ama idiay langit mangted iti nasantuan nga espiritu kadagidiay agdawdawat kenkuana!” (Lucas 11:11-13) Agkararagtayo buyogen ti kasta a kompiansa ken kanayon a laglagipentayo a dagiti matalek nga adipen ti Dios “mapapigsada” babaen ti espirituna.

Makapabileg ti Kongregasion

13. Kasano koma ti panangmatmattayo kadagiti Nakristianuan a gimong?

¹³ Pakpakirdennatayo ni Jehova babaen kadagiti gimong ti kongregasion Kristiano. Kinuna ni Jesus: “No sadino nga adda dua wenno tallo a naguurnong iti naganko, sadiay addaak iti nagtengngaanda.” (Mateo 18:20) Idi inkari dayta ni Jesus, sarsaritaenna dagiti banag a nasken nga asikasuen dagidiay mangidadaulo iti kongregasion. (Mateo 18:15-19) Nupay kasta, agaplikar ti prinsipio dagiti saona kadagiti amin a gimong, asamblea, ken kombensiontayo, a maluktan ken maserraan babaen ti kararag iti naganna. (Juan 14:14) Isu a maysa a pribilehio ti tumabuno kadagita a Nakristianuan a taripnong, manmano man wenno rinibu ti tumabuno. Gapuna, pagyamanantay koma dagitoy nga okasion a nairanta a mangpabileg kadatayo iti naespirituan ken manggutugot kadatayo iti ayat ken kadagiti naimbag nga aramid.​—Hebreo 10:24, 25.

14. Kasanotayo a mabenepisiaran iti panagbannog dagiti Kristiano a panglakayen?

¹⁴ Mangipapaay dagiti Kristiano a panglakayen iti naespirituan a tulong ken pammaregta. (1 Pedro 5:2, 3) Tinulongan ken pinaregta ni Pablo dagiti kongregasion a nagserbianna, kas iti ar-aramiden dagiti agdaldaliasat a manangaywan iti tiempotayo. Kinapudnona, il-iliwenna idi a makalangen dagiti kapammatianna tapno makapagpipinnaregtada. (Aramid 14:19-22; Roma 1:11, 12) Sapay koma ta ipategtayo a kankanayon dagiti panglakayen iti kongregasiontayo ken ti dadduma pay a Kristiano a manangaywan, a dakkel ti maar-aramidanda a mangpabileg kadatayo iti naespirituan.

15. Kasano a “makapabileg a tulong” dagiti kapammatiantayo iti kongregasion?

¹⁵ “Makapabileg a tulong” dagiti kapammatiantayo a mangbukel iti kongregasion a nakaitimpuyogantayo. (Colosas 4:10, 11) Kas ‘pudno a kakadua,’ matulongandatayo iti tiempo ti rigat. (Proverbio 17:17, NW) Kas pagarigan, idi nawayawayaan ti 220 nga adipen ti Dios iti kampo konsentrasion idiay Sachsenhausen idi 1945, nagdaliasatda iti 200 kilometro bayat a bambantayan ida dagiti Nazi tapno saanda a makalibas. Sangkakuyogda a nagdaliasat, ket dagiti napigsa ti nangguyod iti sumagmamano a babassit a kareson a nagluganan dagiti nakapsut. Ti resultana? Iti death march a nakatayan ti nasurok a 10,000 a balud manipud kadagiti kampo konsentrasion, awan a pulos ti natay kadagiti Saksi ni Jehova. Dagiti kasta a salaysay nga agparang kadagiti publikasion ti Watch Tower, a pakairamanan ti Yearbook of Jehovah’s Witnesses ken Dagiti Saksi ni Jehova​—Manangiwaragawag iti Pagarian ti Dios, paneknekanda a pabilgen ti Dios dagiti tattaona tapno saanda a sumuko.​—Galacia 6:9.b

Makapabileg ti Ministeriotayo iti Tay-ak

16. Kasano a mapabilegnatayo iti naespirituan ti regular a pannakiraman iti ministerio?

¹⁶ Pabilgennatayo iti naespirituan ti regular a pannakiraman iti trabaho a panangikasaba iti Pagarian. Ti kasta a trabaho tulongannatayo a mangyun-una iti Pagarian ti Dios ken mangpampanunot kadagiti agnanayon a bendision iti masanguanan. (Judas 20, 21) Dagiti Nainkasuratan a kari nga ipakpakaammotayo iti ministeriotayo ikkandatay iti namnama ken pagbalinendatayo a determinado kas ken propeta Mikias, a nagkuna iti kastoy: “Magnatayto iti nagan ni Jehova a Diostayo iti agnanayon nga awan inggana.”​—Mikias 4:5.

17. Ania dagiti naipaay a singasing maipapan iti panagadal iti Biblia iti pagtaengan?

¹⁷ Bumileg ti relasiontayo ken Jehova no ad-adda nga usarentayo ti Kasuratan a mangisuro kadagiti sabsabali. Kas pagarigan, no mangyad-adal iti Biblia iti tulong ti libro a Pannakaammo a Mangiturong iti Biag nga Agnanayon, nainsiriban a basaen ken pagsaritaan ti sumagmamano kadagiti nadakamat a teksto. Makatulong daytoy iti estudiante ken paunegenna ti mismo a naespirituan a pannakaawattayo. No marigatan ti estudiante a mangtarus iti maysa a sursuro ti Biblia wenno iti maysa nga ilustrasion, mabalin a saan a mamimpinsan laeng nga adalen ti maysa a kapitulo iti libro a Pannakaammo. Anian a ragsaktayo nga agsagana a naimbag ken agregget a tumulong kadagiti sabsabali nga umadani iti Dios!

18. Iyilustraryo no kasano a sieepektibo a maus-usar ti libro a Pannakaammo.

¹⁸ Kada tawen, sieepektibo a maus-usar ti libro a Pannakaammo a pangtulong kadagiti rinibu nga agbalin a dedikado nga ad-adipen ni Jehova, ket ramanen daytoy ti adu nga awan a pulos ti ammoda maipapan iti Biblia. Kas pagarigan, idi ubing pay laeng, naallingag ti maysa a lalaki a Hindu idiay Sri Lanka ti maysa a Saksi a mangisarsarita ti maipapan iti Paraiso. Sumagmamano a tawen kalpasanna, inasitganna ti Saksi, ket di nagbayag nakipagadal iti Biblia iti asawa ti Saksi. Kinapudnona, inaldaw nga umay makiadal daytoy nga agtutubo, ket apagbiit la a naileppasna ti libro a Pannakaammo. Rinugianna ti tumabuno iti amin a gimong, immikkat iti sigud a relihionna, ket nagbalin nga agibumbunannag iti Pagarian. Idi nabautisaran, adda maysa a kaam-ammona nga iyad-adalannan iti Biblia.

19. No iyun-unatayo ti Pagarian, ania ti masiguradotayo?

¹⁹ Makapabileg ken makaparagsak ti panangbirok nga umuna iti Pagarian. (Mateo 6:33) Nupay nadumaduma a suot ti mapaspasarantayo, agtultuloy a siraragsak ken sireregta nga iwaragawagtayo ti naimbag a damag. (Tito 2: 14) Adu kadatayo ti agserserbi iti amin a tiempo kas payunir, ket agserserbi ti dadduma kadagiti lugar nga ad-adda nga agkasapulan kadagiti ebanghelisador. Siraragsak man nga itantandudotayo ti intereses ti Pagarian kadagitoy wenno iti dadduma pay a pamay-an, agtalektayo a dinto lipaten ni Jehova ti aramidtayo ken ti ayat nga ipakpakitatayo maipaay iti naganna.​—Hebreo 6:10-12.

Agtultuloy Babaen ti Bileg nga Aggapu ken Jehova

20. Kasanotay a maipakita nga agpannuraytayo iti bileg nga aggapu ken Jehova?

²⁰ Sitatallugod ken naimpusuan nga agtalektay koma ken ni Jehova ken agpannuray iti bilegna. Maaramidtay dayta babaen ti naan-anay a panangaprobetsar kadagiti naespirituan a probision nga ipapaayna babaen ti ‘matalek nga adipen.’ (Mateo 24:45) Ti personal ken kongregasional a panagadal iti Sao ti Dios babaen ti tulong dagiti Nakristianuan a publikasion, naimpusuan a panagkararag, naespirituan a tulong dagiti panglakayen, nasayaat nga ulidan dagiti matalek a kapammatian, ken regular a pannakiraman iti ministerio ket karaman kadagiti probision a mangpabileg iti relasiontayo ken ni Jehova ken mangpakired kadatayo nga agtultuloy iti sagrado a panagserbi kenkuana.

21. Kasano nga inyebkas da apostol Pedro ken Pablo ti panagpannurayda iti bileg nga aggapu iti Dios?

²¹ Iti baet ti kinalap-ittayo kas tattao, pabilgennatayo ni Jehova a mangaramid iti pagayatanna no agpannuraytayo iti tulongna. Tangay ammona a kasapulan ti kasta a tulong, insurat ni apostol Pedro: “No ti asinoman agserbi, agserbi koma a kas agpampannuray iti bileg nga ipaay ti Dios.” (1 Pedro 4:11) Impakita ni Pablo ti panagtalekna iti bileg nga aggapu iti Dios idi kinunana: “Pagragsakak dagiti kinakapuy, dagiti pannakainsulto, dagiti kaso ti panagkasapulan, dagiti pannakaidadanes ken pakarigatan, maipaay ken Kristo. Ta inton nakapuyak, iti kasta nabilegak.” (2 Corinto 12:10) Sapay koma ta ipakitatayo ti umasping a determinasion ken idaydayawtayo ni Soberano nga Apo Jehova, a mangpabileg iti nabannog.​—Isaias 12:2.

[Footnotes]

Kasanoyo a Sungbatan?

• Apay a kasapulan dagiti tattao ni Jehova ti di gagangay a pannakabalin?

• Ania ti adda a Nainkasuratan a pammaneknek a pabilgen ti Dios dagiti adipenna?

• Ania ti dadduma kadagiti naespirituan a probision nga impaay ni Jehova a mangpabileg kadatayo?

• Kasanotay a maipakita nga agpannuraytayo iti bileg nga aggapu iti Dios?

[Ladawan iti panid 12]

Bumileg ti relasiontayo ken Jehova no usarentayo ti Biblia a mangisuro kadagiti sabsabali