Papigsaen ni Jehova ti Nabannog

“Dagiti agpannuray ken ni Jehova pabaruendanto ti pigsada. Agpangatodanto a sipapayak a kas la agila.”​—ISAIAS 40:31.

1, 2. Ania ti ipaay ni Jehova kadagidiay agtalek kenkuana, ken aniat’ usigentay ita?

MAIRAMAN dagiti agila kadagiti kabibilgan a tumatayab iti tangatang. Makapagampayagda iti nawatiwat uray no saanda nga agpayakpak. Addaan kadagiti payak a makapagukrad iti nasurok a dua metro, “ti Ari dagiti Billit,” ti golden eagle, ket “maysa kadagiti nakaskasdaaw unay kadagiti amin nga agila; agtayab iti ngatuen dagiti turod ken tanap, agalimpayag iti sumagmamano nga oras iti ngatuen ti sumagmamano a bantay, kalpasanna agrikus nga agpangato agingga nga agparang a maysa laengen a bassit a nangisit a banag iti tangatang.”​—The Audubon Society Encyclopedia of North American Birds.

² Sipapanunot iti kabaelan ti agila nga agtayab, insurat ni Isaias: “[Ni Jehova] ti mangpapigsa iti nakapuy; ken iti daydiay awan kabaelanna isu pawadwadenna iti pigsa. Uray pay dagiti ubbing kumapuydanto ken mabannogdanto, ken dagiti agtutubo matuangdanto a matalipupos, ngem dagiti agpannuray ken ni Jehova pabaruendanto ti pigsada. Agpangatodanto a sipapayak a kas la agila. Agtaraydanto ket dida mabannog; magnadanto ket dida agkapuy.” (Isaias 40:29-31) Anian a makaliwliwa a maammuan nga ikkan ni Jehova dagidiay agtalek kenkuana iti pigsa tapno makapagtultuloyda, a kas man la ikkanna ida kadagiti kasla di mabannog a payak ti agam-ampayag nga agila! Ita, usigentayo ti sumagmamano kadagiti probision nga inaramidna tapno pumigsa daydiay nabannog.

Ti Bileg ti Kararag

3, 4. (a) Aniat’ indagadag ni Jesus nga aramiden dagiti adalanna? (b) Aniat’ manamnamatayo nga aramiden ni Jehova kas sungbat dagiti kararagtayo?

³ Indagadag ni Jesus kadagiti adalanna a ‘kanayon nga agkararagda ken di sumuko.’ (Lucas 18:1) Pudno kadi a ti panangibukbok iti linaon ti pusotayo ken Jehova ket makatulong kadatayo a mangpabaro iti pigsa ken tapno ditay sumuko no agparang a marigatantay unayen gapu kadagiti parikut iti biag? Wen, ngem adda sumagmamano a banag a masapul a laglagipentayo.

⁴ Masapul nga agbalintay a napudno iti namnamaentayo nga aramiden ni Jehova kas sungbat dagiti kararagtayo. Kinuna idi kamaudiananna ti maysa a Kristiano a nagsagaba iti nakaro a liday: “Kas kadagiti dadduma a sakit, saan nga agaramid ni Jehova kadagiti milagro kadagitoy a tiempo. Ngem tulongannatay a sumaranget ken agpaimbag agingga iti kabaelantayo iti daytoy a sistema.” Iti panangilawlawagna no apay a napateg dagiti kararagna, kinunana pay: “Mabalinko ti dumawat iti nasantuan nga espiritu ni Jehova iti 24-oras kada aldaw.” No kasta, saannatay a salakniban ni Jehova kadagiti pakarigatan iti biag a mabalin a mangpakapuy kadatayo, ngem “mangted iti nasantuan nga espiritu kadagidiay agdawdawat kenkuana!” (Lucas 11:13; Salmo 88:1-3) Dayta nga espiritu tulongannatayo a mangsaranget iti aniaman a suot wenno rigat a maipasango kadatayo. (1 Corinto 10:13) No kasapulan, ikkannatay iti “pannakabalin a nalablabes ngem ti gagangay” tapno makapagibtur agingga nga ikkaten ti Pagarian ti Dios amin a makariribuk a parikut iti baro a lubong a nakaas-asidegen.​—2 Corinto 4:7.

5. (a) Tapno epektibo dagiti kararagtayo, ania a dua a banag ti kasapulan? (b) Kasano komat’ panagkararagtayo no makidangdangadangtay iti maysa a pagkapuyan ti lasag? (c) Aniat’ ipakitana ken Jehova dagiti naregget ken espesipiko a kararagtayo?

⁵ Nupay kasta, tapno epektibo dagiti kararagtayo, masapul a ditay agsarday, ken masapul nga agbalintayo nga espesipiko. (Roma 12:12) Kas pagarigan, no maupaykay no dadduma gapu ta makidangdangadangkay iti maysa a pagkapuyan ti lasag, iti rugi pay laeng ti tunggal aldaw, umararawkayon ken Jehova a tulongannakay a mangsaranget iti dayta a partikular a pagkapuyan iti las-ud dayta nga aldaw. Kasta met laeng ti ikararagyo iti agmalmalem ken sakbay a maturogkayo iti kada rabii. No napaaykayo, agpakpakaasikayo a pakawanennakay ni Jehova, ngem ibagayo met kenkuana ti makagapu no apay a naaramidyo manen ken no aniat’ mabalinyo nga aramiden tapno maliklikanyo dagidiay a kasasaad iti masanguanan. Ti kakasta a napinget ken espesipiko a kararag ipakitana iti “Dumngeg iti kararag” ti kinapasnek ti tarigagayyo nga agballigi iti dangadang.​—Salmo 65:2; Lucas 11:5-13.

6. Apay a siuumiso a manamnamatay ken Jehova a dumngeg kadagiti kararagtayo uray no mariknatayo a ditay maikari nga agkararag?

⁶ Nupay kasta, no dadduma, marikna dagidiay maup-upay a saandan a maikari nga agkararag. Kinuna kamaudiananna ti maysa a Kristiano a babai a nakarikna iti kasta: “Napeggad unay dayta a panagpampanunot agsipud ta kaipapananna nga uk-ukomentayon a mismo ti bagitayo, ngem saantay a karbengan dayta.” Kinapudnona, “ti Dios isu ti Ukom met laeng.” (Salmo 50:6) Ipatalged ti Biblia kadatayo a nupay adda “pangkondenaran kadatayo dagiti pusotayo . . . , ti Dios dakdakkel ngem kadagiti pusotayo ket ammona ti isuamin a bambanag.” (1 Juan 3:20) Anian a makaliwliwa a maammuan a no agduyostayo a mangukom iti bagitayo a di maikari nga agkararag, mabalin a saan a kasta ti panagrikna ni Jehova kadatayo! ‘Ammona ti amin’ maipapan kadatayo, agraman ti kasasaadtayo iti biag a mabalin a makagapu iti pannakariknatayo iti di pannakaikari. (Salmo 103:10-14) Ti asi ken kinauneg ti pannakaawatna ti mangtignay kenkuana a dumngeg kadagiti kararag a nagtaud iti “nadudog ken sibababawi a puso.” (Salmo 51:17) Kasano nga agkedked a dumngeg kadagiti ararawtayo no isu a mismo kondenarenna ti “siasinoman a mangapput kadagiti lapayagna iti ikkis ti napanglaw”?​—Proverbio 21:13.

Ti Kinabara ti Panagkakabsat

7. (a) Ania ti sabali pay a probision nga inaramid ni Jehova tapno matulongantayo a mangpabaro iti pigsatayo? (b) Mangpabileg kadatayo ti pannakaammo iti ania maipapan iti panagkakabsattayo?

⁷ Ti sabali pay a probision nga impaay ni Jehova tapno matulongannatay a mangpabaro iti pigsa isut’ Nakristianuan a panagkakabsattayo. Anian a nagpateg a pribilehio ti agbalin a paset ti maysa a sangalubongan a pamilia dagiti agkakabsat! (1 Pedro 2:17) No pakapuyennatay dagiti pakarigatan iti biag, matulongannatay ti kinabara ti panagkakabsattayo a mangpabaro iti pigsatayo. Kasano? Ti pannakaammo a saantay nga agmaymaysa iti panangsango kadagiti narikut a karit ket makapabilegen a mismo. Awan duadua a kadagiti kakabsattayo, adda sumagmamano a naipasango kadagiti umasping a pakarigatan wenno suot ken nagpasar kadagiti rikna nga umasping la unay kadatayo. (1 Pedro 5:9) Makaliwliwa a maammuan a gagangay laeng ti sagsagabaen ken marikriknatayo.

8. (a) Ania dagiti pagarigan a mangipakita no kasanotay a makasarak iti kasapulan unay a tulong ken liwliwa iti panagkakabsattayo? (b) Iti ania a pamay-an a personal a natulongan wenno naliwliwanakayo ti “maysa a pudno a gayyem”?

⁸ Iti kinabara ti panagkakabsat makasaraktayo kadagiti ‘pudno a gagayyem’ a makaipaay iti kasapulan a tulong ken liwliwa no addatayo iti pakarigatan. (Proverbio 17:17) Masansan, ti laeng kasapulan isut’ naasi a sasao wenno mannakipagrikna a tignay. Malagip ti maysa a Kristiano a nakarikna idi iti kinaawan-pateg: “Adda gagayyem a makisarita kaniak maipapan kadagiti positibo a banag maipanggep kaniak tapno maparmekko dagiti negatibo a pampanunotko.” (Proverbio 15:23) Kalpasan ti ipapatay ti balasitangna, narikna ti maysa a kabsat a babai a narigat idi damo ti agkanta kadagiti kanta ti Pagarian kadagiti gimong ti kongregasion, nangruna kadagiti kanta a mangdakamat iti panagungar. “Naminsan,” malagipna, “nakitanak nga aglulua ti maysa a kabsat a babai a nakatugaw iti sabali a benneg. Immasideg, sinallabaynak, ken dinanggayannak nga agkanta iti nabatbati a paset ti kanta. Kasta laengen ti nariknak nga ayat kadagiti kakabsat ken anian a ragsakmi a tumabuno kadagiti gimong, ta ammomi nga adda sadiay ti tulong a kasapulanmi, sadiay Kingdom Hall.”

9, 10. (a) Kasanotay a maparayray ti kinabara ti panagkakabsattayo? (b) Siasino ti nangnangruna a makasapul iti makapabileg a panagtitimpuyog? (c) Aniat’ maaramidantayo tapno matulongan dagidiay makasapul iti pammaregta?

⁹ Siempre, adda rebbengen ti tunggal maysa kadatayo a mangnayon iti kinabara ti Nakristianuan a panagkakabsat. Gapuna, rebbengna a “lumawa” ti pusotayo tapno mairaman amin a kakabsattayo. (2 Corinto 6:13) Anian a nakalkaldaang para kadagidiay maup-upay a makarikna a limmamiisen ti ayat dagiti kakabsat kadakuada! Kaskasdi, kuna ti sumagmamano a Kristiano a malmaldayda ken maliwliwayan ida. Impakpakaasi ti maysa a kabsat a babai a ni lakayna ket bumusbusor iti kinapudno: “Siasino ti di agtarigagay ken makasapul kadagiti makapabileg a panaggagayyem, pammaregta, ken naayat a panagtitimpuyog? Pangngaasiyo ta ipalagipyo kadagiti kakabsattayo a kasapulanmi ida!” Wen, nangnangruna a kasapulan dagidiay madagdagsenan gapu iti kasasaadda iti biag​—dagidiay addaan iti di manamati nga asawa, agsolsolo a nagannak, dagidiay addaan nakaro a parikut iti salun-at, lallakay/babbaket, ken dadduma pay​—ti makapabileg a panagtitimpuyog. Kasapulan kadi a maipalagip dayta a banag iti dadduma kadatayo?

¹⁰ Aniat’ maaramidantayo tapno tumulong? Lumawatay koma iti panangyebkas iti ayattayo. No mangsangailitayo, ditay koma liplipatan dagidiay makasapul iti pammaregta. (Lucas 14:12-14; Hebreo 13:2) Imbes a panunotentayo nga agkedkedda gapu iti kasasaadda, apay a ditay ketdi awisen ida? Kalpasanna bay-antay ida a mangeddeng. Uray no saanda a patgan, awan duadua a maparegtada a makaammo nga ikabkabilangan ida dagiti dadduma. Mabalin a dayta laeng ti kasapulanda tapno mapabaro ti pigsada.

11. Mabalin a kasapulan dagidiay madagdagsenan ti tulong kadagiti ania a pamay-an?

¹¹ Mabalin a kasapulan dagidiay madagdagsenan ti tulong iti dadduma a pamay-an. Kas pagarigan, mabalin a kasapulan ti agsolsolo nga ina ti maysa a nataengan a kabsat a lalaki a mangipakita iti interes iti anakna a lalaki nga ulila iti ama. (Santiago 1:27) Mabalin a kasapulan ti kabsat a lalaki wenno babai nga addaan nakaro a parikut iti salun-at ti tulong iti pannakitienda wenno kadagiti trabaho iti balay. Mabalin nga agtarigagay ti maysa a lakay/baket kadagiti kakadua wenno agkasapulan iti tulong tapno makaruar iti tay-ak ti ministerio. No adda agdama a panagkasapulan iti kasta a tulong, maysa daytoy a pudpudno a ‘pakasubokan ti kinapudno ti ayattayo.’ (2 Corinto 8:8) Imbes nga umikay kadagiti agkasapulan gapu iti panawen ken bannog a nairaman, sapay koma ta maipaneknektayo ti Nakristianuan nga ayattayo babaen ti pannakipagrikna ken panangtulong kadagiti sabsabali iti pakasapulanda.

Ti Bileg ti Sao ti Dios

12. Kasanonatay a matulongan ti Sao ti Dios a mangpabaro iti pigsatayo?

¹² Ti tao nga agsardeng a mangan ket di agbayag maawanan iti pigsa, wenno bileg. Kasta met, ti sabali pay a wagas a ni Jehova mangipaay kadatayo iti pigsa nga agtultuloy isut’ panangsiguradona a matartaraonantayo a naimbag iti naespirituan. (Isaias 65:13, 14) Ania a naespirituan a taraon ti impaayna? Kangrunaan iti amin, ti Saona, ti Biblia. (Mateo 4:4; idiligyo ti Hebreo 4:12.) Kasano a makatulong dayta kadatayo a mangpabaro iti pigsatayo? No mangrugi a maibus ti pigsatayo gapu kadagiti pakarigatan ken parikut a maipasango kadatayo, makagun-odtay iti pigsa iti panagbasa maipapan kadagiti rikna ken pudpudno a pannakidangadang dagiti matalek a lallaki ken babbai idi panawen ti Biblia. Nupay naisangsangayanda nga ulidan iti kinatarnaw, tattaoda nga “addaan rikna a kas kadatayo.” (Santiago 5:17; Aramid 14:15) Naipasangoda kadagiti suot ken rigat a kas iti mapaspasarantayo. Usigenyo ti sumagmamano a pagarigan.

13. Aniada a Nainkasuratan a pagarigan ti mangipakita nga addaan dagiti matalek a lallaki ken babbai idi panawen ti Biblia iti rikrikna ken kapadasan nga umasping unay kadatay itatta?

¹³ Kasta unay ti ladingit ni patriarka Abraham idi natay ni baketna nupay addaan pammati iti panagungar. (Genesis 23:2; idiligyo ti Hebreo 11:8-10, 17-19.) Narikna ni managbabawi a David nga isut’ di maikari nga agserbi ken Jehova gapu kadagiti basolna. (Salmo 51:11) Nakarikna ni Moises iti kinaawan kabaelan. (Exodo 4:10) Nagleddaang ni Epafrodito idi nagdinamag a limitadon ti maaramidanna iti “trabaho ti Apo” gapu iti nakaro a sakit. (Filipos 2:25-30) Masapul a sarangten ni Pablo ti managbasol a lasag. (Roma 7:21-25) Da Eudias ken Sintique, dua a napulotan a kakabsat a babbai iti kongregasion iti Filipos, ket nalawag a narigatanda a makilangen iti maysa ken maysa. (Filipos 1:1; 4:2, 3) Anian a makaparegta a maammuan a dagitoy a matalek ket addaan kadagiti rikna ken kapadasan a kas kadatayo, ngem saanda a simmuko! Saan met a binaybay-an ida ni Jehova.

14. (a) Ania nga instrumento ti ar-aramaten ni Jehova a tumulong kadatayo a gumun-od iti pigsa manipud iti Saona? (b) Apay a naglaon dagiti magasin a Pagwanawanan ken Agriingkayo! kadagiti artikulo maipapan kadagiti isyu ti sosial, pamilia, ken emosion?

¹⁴ Tapno matulongantay a makagun-od iti pigsa manipud iti Saona, ar-aramaten ni Jehova ti klase matalek ken masirib nga adipen tapno agtultuloy a maipaayantayo iti “taraon iti umiso a tiempo.” (Mateo 24:45) Nabayagen nga ar-aramaten ti matalek nga adipen dagiti magasin a Pagwanawanan ken Agriingkayo! a mangidepensa iti kinapudno ti Biblia ken mangiwaragawag iti Pagarian ti Dios kas kakaisuna a namnama ti tao. Nangnangruna kadagiti napalabas a sumagmamano a dekada, nangipaay dagitoy a magasin kadagiti naintiempuan a Nainkasuratan nga artikulo maipapan kadagiti karit iti sosial, pamilia, ken emosion a maipasango uray kadagiti tattao ti Dios. Iti ania a panggep a naipablaak ti kasta nga impormasion? Awan duadua tapno matulongan dagidiay agpaspasar kadagitoy a karit a gumun-od iti pigsa ken pammaregta manipud iti Sao ti Dios. Ngem makatulong met kadatay amin ti kakasta nga artikulo a maaddaan iti nalawlawag a pannakaawat iti mabalin a sagsagabaen ti sumagmamano kadagiti kakabsattayo. Iti kasta ad-adda a masursuruantayo a mangipangag iti sasao ni Pablo: “Agsaokayo iti makaliwliwa kadagiti malmaldaangan a kararua, saranayenyo dagiti nakapuy, maaddaankayo iti mabayag a panagitured iti isuamin.”​—1 Tesalonica 5:14.

Dagiti Panglakayen a “Maysa a Paglemmengan no Agangin”

15. Aniat’ impadto ni Isaias maipapan kadagidiay agserserbi kas panglakayen, ken ania a pagrebbengan ti ipabaklay daytoy kadakuada?

¹⁵ Adda pay impaay ni Jehova a makatulong kadatayo no maupaytayo​—dagiti panglakayen iti kongregasion. Maipanggep kadagitoy, insurat ni mammadto Isaias: “Tunggal maysa ket masapul a mapaneknekan a kas maysa a paglemmengan no agangin, ken maysa a paglinongan no agbagio, kas ay-ayus dagiti danum iti disso a namaga, kasla linong ti maysa a dakkel a bato iti daga a napaksuyan.” (Isaias 32:1, 2) No kasta, masapul a makapudno dagiti panglakayen iti impakpakauna ni Jehova maipanggep kadakuada. “Masapul a mapaneknekan[da]” a gubuayan ti liwliwa ken bang-ar kadagiti sabsabali ken sisasaganada a ‘mangawit kadagiti pakadagsenan [wenno, “makariribuk a bambanag”; iti literal, “dagiti nadagsen a bambanag”] ti maysa ken maysa.’ (Galacia 6:2, footnote [iti Ingles]) Kasanoda a maaramidan daytoy?

16. Aniat’ maaramidan dagiti panglakayen tapno matulongan daydiay makarikna a di maikari nga agkararag?

¹⁶ Kas nadakamaten, no dadduma marikna ti tao a maup-upay nga isu ket di maikari nga agkararag. Aniat’ maaramidan dagiti panglakayen? Mabalindat’ agkararag a kadua ken ikararagan dayta a tao. (Santiago 5:14) Ti laengen iyaararaw ken Jehova, bayat a mangmangngeg ti maup-upay, a tulonganna daytoy a mangtarus nga isu ket ipatpateg unay ni Jehova ken dagiti sabsabali ket awan duadua a makaliwliwa. Ti pannakangngeg iti napasnek, naimpusuan a kararag ti maysa a panglakayen mabalin a makatulong a mangpatibker iti panagtalek ti malmalday a tao. Mabalin a matulongan nga agrason a no agtalek dagiti panglakayen nga ipangag ni Jehova dagiti kararag a maipaay iti dayta a maysa, makapagtalek met ngarud.

17. Apay a masapul a dumngeg dagiti panglakayen a buyogen ti pannakipagrikna?

¹⁷ “Tunggal tao masapul a nasiglat koma maipapan iti panagdengngeg, nainayad maipapan iti panagsao,” kuna ti Santiago 1:19. Tapno matulongan dagiti maup-upay a mangpabaro iti pigsada, masapul met a dumngeg dagiti panglakayen a buyogen ti pannakipagrikna. Iti sumagmamano a kaso mabalin a makidangdangadang dagiti kameng ti kongregasion kadagiti parikut wenno pakarigatan a saan a marisut iti daytoy a sistema dagiti bambanag. No kasta, mabalin a ti kasapulanda ket saan a solusion tapno “marisut” ti parikutda no di ket pannakisarita laeng iti maysa a nalaing a dumngeg​—maysa a tao a saan a mangibaga kadakuada no kasanot’ rumbeng a panagriknada no di ket dumngeg a saan a mangukom.​—Lucas 6:37; Roma 14:13.

18, 19. (a) Kasano a makatulong iti maysa a panglakayen ti panagbalin a nasiglat a dumngeg tapno maliklikan ti ad-adda a panangpadagsen iti awit ti maysa a maup-upay? (b) Aniat’ ibungana no mangipakita dagiti panglakayen iti “pannakipagmaymaysa ti rikna”?

¹⁸ Dakayo a papanglakayen, makatulong kadakayo ti panagbalin a nasiglat a dumngeg tapno maliklikanyo ti di ginagara nga ad-adda a panangpadagsen iti awit ti maysa a maup-upay. Kas pagarigan, no limmangan ti maysa a kabsat kadagiti gimong wenno bimmannayat iti tay-ak ti ministerio, talaga kadi a kasapulanna ti balakad maipapan iti panagaramid iti ad-adu pay iti ministerio wenno panagbalin nga ad-adda a regular kadagiti gimong? Nalabit. Ngem ammoyo kadi a naan-anay ti kasasaad? Adda kadi kumarkaro a parikutna iti salun-at? Nagbalbaliw kadi itay nabiit dagiti rebbengenna iti pamilia? Adda kadi dadduma pay a kasasaad wenno pakarigatan a mangpakpakapuy kenkuana? Laglagipenyo, mabalin a mariribukan unayen dayta a tao gapu ta saan a makaaramid iti ad-adu pay.

¹⁹ Ngarud, kasanoyo a matulongan dayta a kabsat? Sakbay a mangaramidkayo iti konklusion ken mangbalakad, dumngegkayo! (Proverbio 18:13) Babaen kadagiti mannakaawat a saludsod, ‘aonenyo’ dagiti rikna iti puso dayta a tao. (Proverbio 20:5) Saanyo nga iyaleng-aleng dagitoy a rikna​—bigbigenyo ida. Mabalin a kasapulan ti maup-upay ti pammatalged a maseknan ni Jehova kadatayo ken maawatanna a no dadduma lapdannatay ti kasasaadtayo. (1 Pedro 5:7) No mangipakita dagiti panglakayen iti kasta a “pannakipagmaymaysa ti rikna,” dagiti maup-upay ‘makasarakdanto iti bang-ar a maipaay kadagiti kararuada.’ (1 Pedro 3:8; Mateo 11:28-30) No makasarakda iti kasta a bang-ar, saanen a masapul a maibaga kadakuada nga agaramidda iti ad-adu pay; tignayen ida ti pusoda a mangaramid iti amin a nainkalintegan a kabaelanda iti panagserbi ken Jehova.​—Idiligyo ti 2 Corinto 8:12; 9:7.

20. Tangay nakaas-asidegen ti panungpalan daytoy dakes a kaputotan, aniat’ rumbeng a determinado nga aramidentayo?

²⁰ Pudno nga agbibiagtayo iti karirigatan a panawen iti intero a pakasaritaan ti tao. Kumarkaro dagiti pakarigatan iti biag iti lubong ni Satanas bayat nga umas-asidegtayo iti panawen ti panungpalan. Laglagipentayo, kas iti maysa a leon nga agan-anup, ur-urayen ti Diablo a maupay ken sumukotayo tapno magundawayannatayo a kas nalaka a mabiktima. Anian a yamantayo ta papigsaen ni Jehova daydiay nabannog! Sapay koma ta naan-anay a gundawayantayo dagiti probision nga inaramidna tapno maipaayantayo iti bileg nga agtultuloy, a kas man la ik-ikkannatay kadagiti nabileg a payak ti maysa nga agam-ampayag nga agila. Yantangay nakaas-asidegen ti panungpalan daytoy dakes a kaputotan, saan daytoy a panawen ti panagsardeng nga agtaray iti pannakilumbatayo maipaay iti gunggona​—biag nga agnanayon.​—Hebreo 12:1.

Ania ti Sungbatyo?

◻ Aniat’ manamnamatayo nga aramiden ni Jehova kas sungbat dagiti kararagtayo?

◻ Kadagiti ania a pamay-an a makagun-odtayo ti pigsa iti Nakristianuan a panagkakabsattayo?

◻ Kasanonatay a matulongan ti Sao ti Dios a mangpabaro iti pigsatayo?

◻ Aniat’ maaramidan dagiti panglakayen tapno matulongan dagidiay maup-upay a mangpabaro iti pigsada?

[Ladawan iti panid 17]

No mangsangailitayo, ditay liplipatan dagidiay makasapul iti pammaregta

[Ladawan iti panid 18]

Mabalin dagiti panglakayen ti umararaw ken Jehova a tulonganna dagidiay maup-upay a mangtarus a pudpudno a maipatpategda