Dagiti Saludsod Manipud Kadagiti Managbasa

◼ Kalpasan ti panagbasol ni David ken ni Batseba, apay a masapul a matay ti anakda, idinto a ti Deuteronomio 24:16 ken Ezequiel 18:20 kunaenna a ti anak a lalaki saanto a matay gapu iti basol ti amana?

Agpadpada a ni David ken ni Batseba ti naasawaan a tattao idi a nakaaramidda ti pannakikamalala ket ti babai nagsikog. Ti pannakikamalalada ket maysa a nadagsen a basol a madusa iti ipapatay iti sidong ti linteg ti Dios. (2 Samuel 11:1-5; Deuteronomio 5:18; 22:22) Gapuna no pinalubosan ti Dios ida a tamingen dagiti tattao iti sidong ti Linteg, ti anak a napataud idiay aanakanna ti natay koma a kadua ti inana. Ngem pinili ni Jehova a tamingen ti kasoda iti naiduma a pamay-an, a “ti Ukom ti amin a daga” ti addaan karbenganna a mangaramid.​—Genesis 18:25.

Idi naipasango iti basolna, inannugot ni David: “Nagbasolak a maikaniwas ken Jehova.” Kalpasanna ti pannakangiwat ti Dios kinunana ken David: “Kasta met, ni Jehova inikkatna ti basolmo. Dikanto matay.” (2 Samuel 12:13) Napakitaan ni David ti asi gapu iti tulag ti Pagarian. Mainayon pay, yantangay mabasa ti Dios dagiti puspuso, mabalin a tiningitingna ti kinapudno ti panagbabawi ni David ket naipatona nga adda ti pakaibatayan ti panangipakita ti asi ken David ken Batseba. Kaskasdi saanda a nalasatan amin a babak ti basbasolda. Naibaga kadakuada: “Nupay kasta, agsipud ta iti daytoy nga aramid nangtedkay ti gapu kadagiti kabusor ni Jehova tapno agtabbaawda, kasta met ti anak a lalaki a maiyanak kenka matayto a di bumurong.”​—2 Samuel 12:14.

Ti Dios ti ‘nangdusa’ iti anakda a saanda a pakaikarian; nagsakit ti ubing ket natay. Mabalin a ti maysa a tao itatta adda pagannayasanna a mangiturong iti panunotna iti ipapatay iti ubing ket mariknana a maysa a nadagsen a dusa ti naipatay. Nupay kasta, nasayaat a laglagipen koma a no koma ti pannakikamalala ti tinaming ken napaneknekan iti imatang dagiti natauan nga uk-ukom nga adda iti sidong ti Linteg, amin dagiti tallo (ni David, Batseba, ken ti anakda a lalaki nga adda iti aanakanna) napukawda koma amin ti biagda. No matmatan iti dayta a lawag, ti panangipalubos ti Dios a dua kadakuada ti agbiag ket kinamanangngaasi. Mainayon pay, iti daytoy maudin a petsa awan kadatay amin dagiti kinapudno, kas iti impormasion maipapan iti salun-at ti maladaga kalpasan ti pannakaiyanakna. Nupay kasta, mabalintayo nga awaten ti panangtaming ti Dios kadagiti bambanag, a simamatalek a ti inaramidna ket awan panangidumdumana, masirib, ken nalinteg. Uray pay iti kamaudiananna binigbig ni David: “No maipapan iti pudno a Dios, awan ti pagkurangan ti dalanna.”​—2 Samuel 22:31; idiligyo iti Job 34:12; Isaias 55:11.

Daytat’ maitunos iti rikna ni David kalpasan a nangngegna ti pangngeddeng ti Dios. Bayat a masakit ti ubing, ni David ti nagladingit ken nagayunar. Ngem idi a natayen, inapresiar ni David dayta a banag a nagpatinggan. (2 Samuel 12:22, 23) Gapuna, babaen ti panagtalek iti panangukom ti Dios, ni David ti nangliwliwa ken ni Batseba (nga isu itan ti legal nga asawana), nga impasigurona a ti panagasawada ket agtultuloyen. Kamaudiananna naiyanak kadakuada ni Salomon ket nagbalin a suno ni David.

Ti panangtaming ti Dios iti dayta a kaso ti di koma matmatan a maisuppiat iti Deuteronomio 24:16 wenno Ezequiel 18:20.

Kas paset iti Linteg, inkeddeng ti Dios: “Dagiti amma didanto mapapatay gapu kadagiti annak, wenno dagiti annak didanto mapapatay gapu kadagiti amma. Tunggal tao mapapatayto gapu iti basolna met laeng.” (Deuteronomio 24:16) Dagitoy a pagannurotan ket agpaay kadagiti uk-ukom nga Israelita a mangtaming kadagiti legal a kaskaso. Saan a mabasa dagiti uk-ukom dagiti puspuso. Masapul a tamingenda ti tunggal tao a maibatay kadagiti kabukbukodanda a kababalin kas naipasdek dagiti adda a kinapudno.

Umasping pay, kuna ti Ezequiel 18:20: “Ti anak a lalaki dinanto awiten ti kinadangkes ti ama, ket ti ama dinanto met awiten ti kinadangkes ti anak a lalaki. Ti kinalinteg ti nalinteg addanto kenkuana ket ti kinadakes ti managdakdakes addanto kenkuana.” Daytoy ti nangnangruna a mangtuktukoy kadagiti nataengan. Sarsaritaen ti konteksto ti maysa nga anak a lalaki a nakakita iti kinadakes ni amana ngem dina kayat ti makiraman iti dayta, imbes ketdi inannurot ti anak a lalaki ti pangngeddeng ni Jehova ket isu ti nagtakder iti pagalagadan ti Dios. Ti kasta nga anak a lalaki ti maispal nupay mapapatay ti amana.​—Ezequiel 18:14-17.

Nupay kasta, di mailibak a mabalin nga agsagaba dagiti annak gapu kadagiti ar-aramid dagiti dadakkelda. Dagiti nagannak a manangsayang wenno maag ti mabalin a makaiyeg ti panagrigat ti intero a pamilia. Wenno pampanunotenyo ti epekto kadagiti annak no ti maysa a naganak ket naibalud gapu iti kriminal nga aramid. Uray pay dagiti didigra a nainkalintegan nga inyeg ti Dios iti Israel gaput’ kinadakesda ti nangapektar kadagiti annakda idi. (Deuteronomio 28:15, 20-32; Ezequiel 8:6-18; 9:5-10) Maisupadi iti dayta, ingunamgunam ti Dios iti ilina: “Isu ti gapuna a piliem ti biag tapno agbiagka, sika ken ti putotmo, ti panagayat ken Jehova a Diosmo, ti panagtungpal iti timekna ken ti idedekket kenkuana; ta isu ti biagmo ken ti kaatiddog dagiti al-aldawmo.”​—Deuteronomio 30:19, 20.

Gapuna, ti kapadasan ni David ken ni Batseba ti mangipaganetget koma kadagiti nagannak a dagiti kababalinda ket mabalin nga apektaranna unay dagiti annakda. No dagiti nagannak ket ‘agbutengda iti nagan ti Dios, lumgakto ti init ti kinalinteg’ nga agpaay a pakabendisionan ti intero a pamilia.​—Malakias 4:2.