“Makibakaldanto Kenka, ngem Saandakanto nga Atiwen”

KINUNA ni Soberano nga Apo Jehova ken agtutubo a Jeremias nga isu ti pagbalinenna a “kasla siudad a nasarikedkedan ken kasla adigi a landok ken kasla bakud a gambang” a maibusor iti asinoman a mangisikat iti pannakadadaelna. Kadagiti moderno a tiempo, datayo a Saksi ni Jehova ti addaan iti umas-asping a pammasiguro manipud iti Diostayo. Wen, iti sidong ti impluensia ni Satanas, ‘makibakaldanto kadatayo,’ ngem didatayto atiwen. “Ta ‘siak addaak kenka,’ kuna ni Jehova, ‘tapno isalakanka.’”​—Jeremias 1:18, 19.

Kadagiti naipakpakni a purpurok idiay Solomon Islands, sumrek dagiti ganggannaet nga irisgo dagiti mismo a biagda, nangnangruna no mangiyegda iti maysa a baro a relihion. Dayta ti kapadasan ti dua kadagiti espesial a payunir a Saksi ni Jehova. Dagiti nauyong ti panagkitkitada a pumurok ti nangipatuyongen kadagiti pana kadakuada. Adda bilin kadakuada a panaenda ida! Idi umirteng ti adda a kasasaad, maysa a lakay ti dagdagus a bimmalaet, a kunkunana: “Sangailik dagitoy. Dikay dangdangran ida.” Iti pannakadismaya dagiti pumurok, inturongna ida idiay balayna. Daytoy ti nakangkangngegen kadagiti Saksi; ita isu ti nakaala iti libro a Mabalinyo ti Agbiag nga Agnanayon Idiay Paraiso a Daga, ket narugian ti panagadal ti Biblia. Insigida nga isu ti nagdaliasat a mapan kadagiti paggigimongan. Itatta dagiti kakabsat ti siwayawayan a mangaskasaba iti dayta a lugar, a siyayaman iti immuna a panangispal ni Jehova kadakuada.

Masansan nga um-umay ti pannakaisalakan babaen iti panangipabigbig ti maysa kas maysa kadagiti Saksi ni Jehova. Gapu iti panangaskasaba iti balbalay, naammuanen dagiti tattao no asino dagiti Saksi ken no ania ti takderda kadagiti pagsasalisalan iti aldaw. Iti maysa a bassit a purok idiay Peru, inakusar dagiti terrorista dagiti pumurok kas nangtraidor wenno nangliput kadakuada. Inurnongda amin dagiti lallaki iti ili ket pinaglineada ida tapno paltoganda ida. (Kadagiti umas-asping a kasasaad dagiti intero a barbario napappapatayda.) Ngem iti daytoy a punto, maysa kadagiti terrorista ti nakabigbig iti maysa a kabsat ket kinunana kadagiti mangpapatay: “Dayta a tao ket saan a maysa kadakuada. Isut’ ammok a maysa a Saksi ni Jehova, ket saanda a makibibiang iti politika.” Ti kabsat ti nawayawayaan. Pudno unay, salsalakniban ni Jehova ti ilina!

Ti isla a teritoria ti Cyprus ti nangipadamag a ti Greek Orthodox Church ti aktibo unay a mangpaspasardeng iti trabaho dagiti Saksi ni Jehova. Ti simbaan ti nagiwaras kadagiti polieto a mangak-akusar kadagiti Saksi kadagiti adu a bambanag ken papaayenda dagiti tattao iti pannakisarsarita kadagiti Saksi. Dadduma pay kadagiti teologo ti nangorganisar iti bagbagida a mangsarungkar kadagiti tattao a makipagad-adal kadagiti Saksi ni Jehova, a padpadasen nga upayen ida. Dayta a kababalin isut’ napasamak idiay Paphos, a sadiay da Pablo ken Bernabe naminsan pinarmekda ti umas-asping nga ibubusor. (Aramid 13:6-12) Maysa a padi a teologo pinadpadasna a kumbinsiren ti tallo a nagduduma a tattao a sardengan a suksukimaten ti Biblia a kadua dagiti Saksi ni Jehova. Isuda met, iti biangda ken sinaggaysa, inyurnosda ti maysa a kabsat a lalaki a makikadua kadakuada iti maysa a diskusion iti daytoy a teologo. Kas resultana, amin dagiti tallo ti aktibo itan a makitimtimpuyog kadagiti Saksi. Nagkomento ti padi, ‘Diakto pulos maaddaanen iti aniaman a diskusion kadagiti Saksi ni Jehova.’

Dadduma kadagiti papadi nagtenganda pay ti nangkabil kadagiti Saksi bayat nga agbalaybalayda iti maysa kadagiti purok. Ngem karkarna, sumagmamano nga aldaw kalpasanna, maysa nga alipugpog ti dimteng iti dayta a purok, a nangdadael kadagiti atep ti adu a balbalay. Nagkomento dagiti dadduma a pumurok: ‘Dusa daytoy a naggapu iti Dios gapu iti inaramid dagiti papadi kadagiti Saksi ni Jehova.’ Iti daytoy a purok, dagiti nasingpet-panagpuspusona a tattao ti kaskasdi a mangaw-awat pay met laeng kadagiti kakabsattayo iti pagtaenganda. Naminsan, bayat nga iparparang ti maysa a kabsat dagiti baro a magasin iti maysa nga interesado a tao, maysa kadagiti papadi a nangkabil kadagiti kakabsat ti naiparna a limmabas ket imbagana iti kabsat a baybay-anna laeng koma ‘dagiti arbanna.’ Kuna ti interesado a tao iti daydiay padi, ‘Nataenganak metten a mangammo no ania ti ar-aramidek.’ Gapuna dagiti klero saanda a napasardeng dagiti Saksi ni Jehova; ti ar-aramidda ti bimmalandra kadakuada, ket ad-adu a tattao ti nangala iti takderda a maipaay ken ni Jehova.

Iti rinabngis ti gubat a pagilian idiay Central Africa, maysa a manangaywan ti sirkito ti pinasardeng dagiti soldado a maipaay iti gagangay a panangrekisa. Sinuppiatda ti maysa a banag iti surat nga aw-awitenna ket isut’ imapanda idiay hedkuarter ti polisia, a sadiay ti nangbaotanda ken nangparigatan dagiti tallo a soldado kenkuana. Nupay awan ti darum a maibusor kenkuana ken awan naangay a pannakabista, isu ti imbaludda iti makatawen. Iti innem a bulan isu ti inkabilda iti napekpek a selda a kadua dagiti 40 a dadduma a balud. Gapu iti nakail-ilet a pagturoganda, kasapulan nga agsisinnublatda a maturog, saggatlo nga oras tunggal maysa. Iti dadduma a tiempo, masapul nga agtalinaedda a sitatakder. Bayat a ti kabsattayo ti adda sadiay, 137 kadagiti balud ti natnatay, ket isut’ naikkan iti trabaho a mangikabil kadagiti bangkayda kadagiti sako a maipaay iti panangipompon.

Nataginayon daytoy a manangaywan ti sirkito ti naespirituan a bilegna babaen ti panangbusbos ti adu a tiempo a panangaskasaba kadagiti padana a balud. Ti reportna ti mangipakita iti nasurok a 30 oras iti kada bulan a nabusbos iti panangasaba; isut’ nakaidaulo iti uppat a panangyadal iti Biblia bayat nga adda idiay pagbaludan. Maysa kadagiti estudiantena ti nangrugi payen a nangaskasaba kadagiti dadduma. Iti intero a pannakasuotna, ni Jehova ti nangaywan iti daytoy a kabsat, a mangted met iti daytoy a pammagbaga kadagiti dadduma: “No addakay idiay pagbaludan, ipabiangyo amin a bambanag iti ima ni Jehova. Agpannuraykayo kenkuana. Agtalekkayo kenkuana. Dikay unay agdanag. Agmatalekkayo.”

Iti maysa a lugar idiay Zimbabwe, ti annak dagiti Saksi ni Jehova naparuarda manipud iti eskuelaan gapu iti dida pannakiramraman kadagiti napolitikaan nga ar-aramid. Gaput’ saanda a pannakapnek iti daytoy, dagiti lokal a butangero ti nangpuor kadagiti pagtaengan dagiti nagannak ket dinadaelda dagiti mulmulada. Dagiti pampamilia dagiti Saksi ti napilitan a pumanaw a maipaay iti biagda, a pinanawanda dagiti bakbakada ken dadduma pay a sanikuada. Nupay kasta, dayta a banag ti naiyeg iti atension dagiti nangangato a turay ti gobierno a siaasi a nangurnos iti panagsubli dagiti pampamilia kadagiti pagtaenganda. Naisubli dagiti bakbakada, ket ti gobierno nagtignay a mangisubli iti amin a pukaw dagiti kakabsat. Pudno unay a dagiti Saksi ni Jehova apresiarenda no dagiti “nangangato nga agtuturay” ipakitada ti bagbagida kas ‘ministro ti Dios a maipaay iti naimbag.’ (Roma 13:1-4) Iti isuamin dayta, maysa a nagsayaat a pammaneknek ti naited, ket dagiti lokal nga umuli ti mangipakpakitan iti dakkel nga interes iti mensahe ti Pagarian. Kas panangikuna ti maysa kadagiti kakabsat, ‘Ammomi a mabalin nga aramiden ni Jehova dagiti kakasta a kasasaad nga agbalin a kas maysa a pammaneknek a maipaay iti naganna.’

Ti napalabas a tawen serbisio ti nakakita iti pammendision ni Jehova iti trabaho idiay Malawi. Idiay laeng luglugar a dagiti lokal a pumurok nga adda ing-ingpenda a gura kadagiti Saksi a sadiay aglaklak-amda ti pammarparigat. Ti sumaganad a report ti mamaneknek iti daytoy: “Kadagiti adu a paset iti tay-ak, natalna ti adda a kasasaad. Ngem iti maysa a kongregasion, dua a pamilia dagiti Saksi ti sidadakes a minolestia dagiti grupo dagiti agtutubo. Ti ulo ti maysa kadagitoy a pamilia ti nabugbog ti kasta unay agingga a napukaw ti puotna iti uppat nga oras. Kalpasan dayta, isut’ impanda idiay estasion ti polisia, a sadiay ti polis nga abambantay intultuloyna ti nangbugbog kenkuana ken kadagiti dadduma pay a naikuyog kenkuana. Kamaudiananna, nupay kasta, maysa a sabali a polis ti immay a nagbantay. Daytoy ti naas-asi. Winayawayaanna dagiti kakabsat ket pinagsublina ida kadagiti pagtaenganda, ket agyamyamanda ken Jehova iti daytoy di ninamnama a pannakaispalda. Nasarakan met laeng iti kamaudiananna a ti gapu daytoy a pasamak isu ti personal a gura manipud maysa kadagiti asideg a kabagianda. Ti bilang dagiti timmabuno iti Memorial iti daytoy a tawen ti makaparegta. Addaankam iti 23,476. Daytoy ti mangipakita nga adda pay met laeng dagiti tattao a kimmarnero a masapul a tulonganmi nga agbalin nga ad-adalan ni Jesu-Kristo ditoy Malawi.”

Maysa a pagilian idiay Makindaya nga Europa ti nangipatulod iti daytoy a mensahe iti panangapresiar: “Pagyamyamananmi ti nasinged a pannakilangen a laklak-amenmi iti Bagi a Manarawidwid babaen kadagiti isuamin a kalasugan ti naindagaan nga organisasion ni Jehova. Babaen iti daytoy mapalpalubosankami a makakita no kasano ti panangur-urnong ti nailangitan nga Amatayo, babaen iti Anakna ken amin dagiti anghelna, kadagiti karkarnerona itatta, ken no kasano a maaddaankami iti bassit a paset iti dayta. Ania a pribilehio daytoy! Binendisionan ti Amatayo ti panagreggetmi iti panagrang-ay. Ad-adu a tiempo ti nabusbos iti tay-ak, ad-adu dagiti auxiliary payunir a sireregta a mangikaskasaba iti naimbag a damag, ken ti kangatuan a bilang dagiti libro a naipabulod wenno naipaima iti tay-ak ti resulta daytoy a bendision.”

Ti moderno-aldaw a tangguyob ti Jubileo ti nagunin a sipipigsa ken silalawag. Ti immuna a naiyurnos a report ipakitana no kasano ti panangsungbat dagiti Saksi ni Jehova iti dayta nga awis iti amin a paset ti daga.