Dagiti Saludsod Manipud Kadagiti Managbasa
◼ Apaman a ti maysa pinirmaanna ti Deklarasion a Mangikarkari ti Kinamatalek, addanto aya panagpaso dayta nga urnos?
Ti saludsod ket maipapan ti maysa a probision a di agaplikar kadagiti kaaduan a dagdaga. Gapuna kitaentayo nga umuna no ania dayta sagrado a naiballaet nga urnos.
Sinalaysay ti The Watchtower iti Marso 15, 1977, ti maysa a parikut nga adda kadagiti dadduma a dagdaga. Nupay ipalpalubos ti Dios ti diborsio a naibatay iti Kasuratan, dadduma a gobierno ti awananda ti probision iti diborsio. (Mateo 19:9) Wenno ti linteg ti mabalin a pagbalinenna a narigat ti pananggun-od ti diborsio, nalabit abutenna ti adu a tawtawen. Gapuna, dayta a ruar ti magasin ilawlawagna a dagiti Saksi ni Jehova nga addaan iti maysa a pammalubos nga agaplikar laeng kadagita a dagdaga; ramanen dayta ti Declaration Pledging Faithfulness wenno Deklarasion a Mangikarkari ti Kinamatalek. Usigenyo ti maysa a pangarigan dayta nga urnos:
Maysa a babai naammuanna ti Nakristianuan a kinapudno bayat a makikabkabbalay (ken nalabit addaanen ti annak) iti maysa a lalaki a nabayagen a naisina iti legal nga asawana. Ti kabbaro nga interesado a babai ti matalek kenkuana ket kayatna ti makiasawa kenkuana, ngem imposible dayta agsipud ta di ipalubos ti linteg nga idiborsio ti lalaki ti legal nga asawana. Gapuna, no kumbinsido dagiti panglakayen iti kongregasion a ti pannakirelasionna iti daytoy a lalaki ket awaten ti Dios, palubosanda ti babai a mangpirma iti maysa a Deklarasion a Mangikarkari ti Kinamatalek. Iti dayta ibaganto ti babai nga inaramidna amin a kabaelanna a pagbalinen a legal daytoy a relasion; a bigbigbigenna iti imatang ti Dios ti makaisinggalut a kasasaad ti Deklarasion; ket ikarkarina a pagbalinen a legal ti panagasawada apaman a posible dayta, iti kasta mapason ti Deklarasion nga isut’ namagbalin kenkuana a paset ti kongregasion Kristiano.
Nupay kasta, rumsua ti saludsod: Apaman a ti babai (wenno asinoman nga adda iti dayta a kasasaad) simrek iti kongregasion iti sidong ti kasta a Deklarasion, adda pay kadi sabali a pamay-an a daytat’ agpatingga wenno mabalin a mapagpatingga?
Kuna a mismo ti Deklarasion a dagiti nangpirma iti dayta ‘bigbigenda ti pannakirelasionda a kas maysa a makaisinggalut nga urnos iti imatang ni Jehova a Dios ken iti imatang amin dagiti tattao, ket daytat’ salimetmetanda ken dayawenda a naan-anay a maitunos kadagiti prinsipio ti Sao ti Dios.’ Ngarud dayta, manipud panangmatmat ti kongregasion, ti makaisinggalut a moral kas iti legal a panagasawa. Nupay kasta, ti ipapatay ti maysa nga asawa ti mamagpatingga iti panagasawa wenno panagkallaysa iti sidong ti kasta a Deklarasion. (Roma 7:2) kuna met ti Biblia a no ti asawa ti maysa ket nagbasol iti por·neiʹa (seksual nga imoralidad iti ruar ti panagasawa), ti awan basolna nga asawa mabalinna ti mangala iti diborsio. (Mateo 5:32; 19:9) No maipada iti dayta, iti sidong ti Deklarasion a Mangikarkari iti Kinamatalek, ti imoralidad ti maysa nga asawa ket agbalin a pakaibatayan ti panamagpatingga ti kasta a panagtipon, no pilien ti awan basolna dayta. Ti awan basolna a Kristiano masapul nga ipasdekna iti imatang dagiti panglakayen ti pammaneknek ti di kinamatalek. Daytoy ti mamagpason iti Deklarasion; kalpasan dayta ti awan basolna ti Nainkasuratanen a siwayawaya.
No bigbigen a ti kongregasion ket ibilangna ti Deklarasion a Mangikarkari ti Kinamatalek kas makaisinggalut iti moral kas iti legal a panagasawa daytat’ mamataud met iti mainaig nga isyu. Rumsua daytoy no ti napalabas a lapped iti panagasawa ket maikkaten. Kas pangarigan, iti pangarigan nga adda iti ngato, matay ti legal nga asawa ti lalaki wenno mabalinen a pagbalinen ti gobierno a legal ti diborsio, ket ti lalaki situtulok a mangasawa iti babai a Kristiano a legal. Iti dayta a kaso ti kabsat a babai ket di makapagtultuloy iti sidong ti Deklarasion a Mangikarkari ti Kinamatalek, uray pay agpaay iti rason a kasla nakababain iti panangasawa a legal itan wenno agsipud ta ti babai mabalin nga adda mapukawna a namaterialan a bentahe. Maitunos iti Deklarasionna, masapul a ti babai alaennan ti addang a pagbalinen a legal ti panagkabkabbalayda. Ta no saan, pagbalinen ti kongregasion nga awan serbinan ti Deklarasion, ket ti babai masapul a sumina iti lalaki wenno isut’ mailaksid.
Ngem, kasanon, no ti di manamati ket dina kayat nga asawaen ti babai? Idi pinirmaan ti babai ti Deklarasion, minatmatan ti kongregasion ti panagkallaysada kas natibker ken moral. Ti kinapudno a dina mapilit ti di manamati a kabbalayna a mangaramid a legal ti panagtiptiponda dina pagbalinen nga imoral ti panagtiponda. Gapuna mabalinan ti babai ti agtultuloy a matalek nga asawana, a dina kasapulan ti sumina iti di manamati, nupay ti babai rebbeng nga itultuloyna nga aramiden ti amin a panagreggetna a pagbalinen a legal ti panagkallaysada. (Daytoy ti mangbalbaliw iti komento idiay “Dagiti Saludsod Manipud kadagiti Managbasa” iti Nobiembre 1, 1985.)—Idiligyo iti Oc-ocom 11:35; Lucas 18:1-5.
Siempre, ti kasasaad naiduma no dagiti agpadpada a partido pinirmaanda ti Deklarasion ket nabautisarandan a Kristiano. Iti daytoy a kaso, agpadpada a sisasagrado nga inkumitda ti bagbagida a sumrek iti legal a panagasawa inton ti lapped ti gobierno ket naikkaten, nga iti dayta a punto agbalin metten a pasado ti Deklarasion. Obligadoda a mangaramid iti daytoy iti las-ud ti kalalainganna a tiempo, wenno saan agsinada tapno makapagtalinaedda iti kongregasion. (Idiligyo iti “Dagiti Saludsod Manipud kadagiti Managbasa” iti Ti Pagwanawanan a Marso 1, 1983.) Ket no agsinada, ti maipaalagad pay a moral a Deklarasion ti kaskasdi nga agaplikar, gapuna awan ti siwayawaya a sumrek iti pannakikallaysa iti sabali.—Idiligyo iti 1 Corinto 7:10, 11.
Nupay ti urnos ti Deklarasion a Mangikarkari ti Kinamatalek ket di agaplikar iti kaaduan a luglugar, ti salaysay iti ngato ket naisentro iti pagalagadan ti Biblia nga agaplikar iti isuamin a lugar: “Ti panagasawa nadayaw koma kadagiti isuamin, ket ti pagiddaan awan koma ti tulawna, ta ti Dios ukomennanto dagiti mannakiabig ken dagiti mannakikamalala.”—Hebreo 13:4.