Dagiti Saludsod Manipud Kadagiti Managbasa

◼ Ti kadi maysa a tao a mangidedikar iti biagna ken ni Jehova a Dios maiyanatup a sawenna dayta kas maysa a kari?

Dagiti tattao nga ayatenda ti pudno a Dios ken determinadoda nga agserbi a naan-anay kenkuana rebbeng nga idedikarda ti biagda ken ni Jehova ken kalpasanna mabautisaranda. Nupay saan nga us-usaren ti Biblia ti sao a “kari” maipapan iti Nakristianuan a dedikasion, ti panangaramid iti dayta saan met a maisuppiat.

Ilawlawag ti Aid to Bible Understanding nga iti Kasuratan ti kari ket “maysa a tulag a mangaramid iti maysa a panagtignay a panagaramid iti daton wenno sagut, wenno iseserrek iti maysa a serbisio wenno kondision; maysa a sapata, mabalin a positibo wenno negatibo.” Dadduma a kari iti rekord ti Biblia ramanenna ti sapata a mangsurot iti maysa a naiyebkas a kurso no umuna a nangaramid ti Dios iti maysa a banag. Kas pangarigan, kuna ti Numeros 21:2: “Ket ti Israel nangipaay iti maysa a kari ken ni Jehova ket kinunana: ‘No pudno nga iyawatmonto iti imak dayta nga ili, talipuposekto a dadaelen dagiti il-ilida.’” (Genesis 28:20-22; Oc-ocom 11:30-39) Ti panangidedikar ti Kristiano iti biagna iti Dios ket nalawag a saan a maysa nga addaan kondision a kari. Saanna a kunaen, kayariganna: ‘No sika, Jehova, pagbalinennak a naragsak ken nabaknang ita ken ipanamnamam ti biagko nga agnanayon idiay baro a sistema dagiti bambanag, agkariak nga agserbi kenka iti intero a panagbiagko.’

Iparparang ti Biblia dagiti dadduma a kari kas saan a kinalkalikaguman wenno dinawdawat. Kuna ti Wilson’s Old Testament Word Studies iti sao a Hebreo a nairaman: “[na·daŕ ] agkari, i.e. ti mangikari a siboboluntario a mangited wenno mangaramid iti maysa a banag; ti kangrunaan a kapanunotan a ta daydiay pannakailasin ti maysa.” Gapuna ti maysa a tao siboboluntario a mangaramid iti panagkari iti Dios. Ngem mabalin kadi a mairason a ti panagbalin ti maysa a tao a dedikado, nabautisaran nga adalan ni Jesus ket saanna a buklen ti maysa a kari agsipud ta ita ti Dios kalikagumanna ti dedikasion dagidiay amin a mayat nga umawat iti anamongna?a

Nupay kasta, kinapudnona a ni Jehova addaan kadagiti pagannurotan tapno ti maysa a tao agbalin a gayyemna dina kaipapanan nga awanen ti nairaman a personal a panagpili. Kinuna ni Moises kadagiti Israelitas: “Inkabilko iti sangom ti biag ken ti patay, ti bendision ken ti lunod; isu ti gapuna a pilien ti biag tapno agbiagka, sika ken ti putotmo.” (Deuteronomio 30:19, 20; Salmo 15:1-5; idiligyo iti Josue 24:15; 1 Ar-ari 18:21.) Laglagipenyo ti sasao ni Jesus: “Umaykayo kaniak, dakayo amin nga agrigrigat ken madagdagsenan, ta paginanaenkayto. Alaenyo ti sangolko kadakayo ket agsursurokayo kaniak, ta siak naemmaak ken napakumbabaak iti panagpuspusok, ket makasarakkayto ti inana a maipaay kadagiti kararuayo.” (Mateo 11:28, 29) Maysa aya nga inkapilitan a pagannurotan dayta, maysa a kasapulan? Wenno daytat’ maysa nga awis a mangipalubos ti boluntario nga isusungbat?

Ni Jesus naiyanak iti maysa a nasion a dedikado iti Dios; adu a paspaset ti biag ken ipapatayna ti immuna a naikeddeng babaen kadagiti padto; ket insaganaan ti Dios ni Jesus ti maysa a bagi a maidaton. Kaskasdi, ti boluntario a pangngeddeng ni Kristo a nangipaay iti bagina a maipaay iti naisangsangayan a serbisio ket maisarming kadagiti sasaona: “Kinunak ngarud, ‘Adtoy! umayak (iti lukot ti pagbasaan a naisurat maipapan kaniak) tapno aramidek, O Dios, ti pagayatam.’” (Hebreo 10:5-10) Iti umas-asping a pamay-an tunggal indibidual masapul nga ikeddengna a personal ti panagbalinna a dedikado, nabautisaran a Kristiano.

Mainayon pay, mailasin dagiti Kristiano itatta a ti panangusar iti sao kas ti “kari” ket saan a limitado no kasanot’ pannakausar dayta idiay Biblia. Nabayagen nga us-usaren dagiti Saksi ni Jehova dagiti “kari iti panagasawa” kadagiti panagkasar a maar-aramid kadagiti Kingdom Halls da.b Maitunos daytoy iti pangkaaduan a kaipapanan iti “kari,” kas iti dipinasion: “maysa a napasnek a tulag wenno tutungpalen, nangnangruna iti porma ti maysa a sapata iti Dios.”​—Oxford American Dictionary, 1980, panid 778.

Gapuna, kasla saan a nesisita a limitaran ti pannakausar ti sao a “kari.” Ti maysa a tao a mangikeddeng nga agserbi iti Dios mabalin a patienna a, para kenkuana, ti awan ikedkedkedna a dedikasion ket kaipapananna kenkuana ti personal a kari​—maysa a kari ti dedikasion. Isu ti ‘sipapasnek a mangitulag wenno mangitungpal ti maysa a banag,’ nga isu daytat’ kaipapanan ti kari. Iti daytoy a kaso, isut’ panangusar ti biagna nga agserbi ken ni Jehova, a mangaramid a simamatalek iti pagayatanna. Ti kasta nga indibidual ti rebbeng a riknaenna a sisiserioso daytoy. Isu koma ti kas iti salmista, a tuktukoyenna dagiti bambanag nga inkarina: “Ania ti itdekto ken ni Jehova a subad dagiti paraburna kaniak? Alaekto ti kopa ti pannakaisalakan, ken awagakto ti nagan ni Jehova. Bayadakto dagiti karkarik ken Jehova.”​—Salmo 116:12-14; kitaenyo met ti Salmo 50:14.

[Dagiti Footnote]