Panangtungpal iti Karitayo iti Inaldaw
1 Natignay ni salmista David a nangikuna ken Jehova: “Ikantakto ti panangidaydayaw iti naganmo iti agnanayon, tapno matungpalko nga inaldaw dagiti karkarik.” (Sal. 61:8) Ammo ni David a naan-anay a boluntario a banag ti panagkari. Nupay kasta, naawatanna met a no nangaramid iti kari, masapul a tungpalenna.
2 Idi nagdedikartayo ken Jehova, situtuloktayo a nagkari nga aramiden ti pagayatanna. Tinallikudantay ti bagbagitayo ket inaramidtay ti panagserbi ken Jehova a kangrunaan iti biagtayo. (Luc. 9:23) Ngarud, masapul a tungpalentay met nga inaldaw ti karitayo. (Ecl. 5:4-6) Masapul a maanninaw iti intero a panagbiagtayo ti publiko a deklarasiontayo idi nabautisarantayo iti danum, tangay ammotayo a “buyogen iti ngiwat ti maysa mangaramid iti publiko a panangideklara maipaay iti pannakaisalakan.” (Rom. 10:10) Ramanen daytoy ti panangikasaba iti naimbag a damag. (Heb. 13:15) Nagduduma dagiti personal a kasasaad, ngem mabalintay amin nga aramiden a kalat nga iranud nga inaldaw ti naimbag a damag kadagiti sabsabali.
3 Mangaramid Kadagiti Gundaway a Mangasaba iti Inaldaw: Tapno mairanud ti naimbag a damag iti inaldaw masapul a mangaramidtayo kadagiti gundaway a mangasaba no ipalubos ti kasasaadtayo. Adu a naragsak a kapadasan ti nasagrap dagidiay nanggundaway a mangasaba iti di pormal iti pagtrabahuan wenno iti eskuelaan ken kadagiti kaarruba wenno kadagiti dadduma pay a makapulapolda iti inaldaw. Mabalintay met a kasabaan dagiti sabsabali babaen ti panagsurat wenno panagtelepono. Amin dagitoy a pamay-an agraman ti regular a panangilasin iti panawen para iti panangasaba kadagiti balbalay ken isasarungkar ket mangiturong iti rag-o nga agtaud iti panangyadal iti Biblia iti pagtaengan. Wen, mabalintay ti mangaramid kadagiti gundaway a mangasaba iti inaldaw.
4 Bayat ti panagsarimadengna iti trabaho, rinugian ti maysa a sister a binasa ti Panangsukimat Kadagiti Kasuratan iti Inaldaw-aldaw. Inawisna ti maysa a katrabahuanna a basaenda a dua ti teksto iti aldaw, ket di nagbayag nangiturong dayta iti panagadal iti Biblia iti daytoy a babai. Nagadalda iti kagudua oras iti kada aldaw, lima nga aldaw iti makalawas. Napaliiw ti sabali pay a katrabahuan ti inaldaw a panagadalda. Idi agangay impabigbigna ti bagina kas maysa a di aktibo a kabsat. Natignay iti regta ti sister, nakiuman iti maysa a panglakayen tapno agbalin manen nga aktibo. Natulongan daytoy a kabsat a babai ti dua a tao gapu ta inkagumaanna a tungpalen nga inaldaw ti karina.
5 No gutugotennatay ti manangipateg a puso, ti panangtungpal iti dedikasiontayo iti inaldaw mangyeg kadatayo iti rag-o ken pannakapnek. Kas iti salmista, maikunatayo: “Idaydayawkanto, O Apo [Jehova, NW] a Diosko, iti amin a pusok, ket idaydayawkonto ti naganmo iti agnanayon.”—Sal. 86:12.