Panangagas babaen iti Pammati—Aniat’ Pangawisna?
Ti iglesia iyallanguganna ti uni ti gitara, trumpeta, tambor, pandereta, ken dagiti piangpiang. Dagiti lallaki, babbai ken ub-ubbing agsala ken agkantada a sigagagar iti napalaus a kinaragsak. Ti kasasaad ket maiyanatup para iti panangrugi iti panangagas.
Ti faith healer, a nakaaruat iti puro puraw a kawes, nangrugi babaen iti panangiparabawna ti imana iti maysa a pilay a lalaki a magna nga agkarkaradap. Sumaruno, maysa a bulsek a lalaki, a dagiti matana a di makakita ket nakaluban iti nangisit nga antiohos. “Maysa a milagro!” impukkaw dagiti agbuybuya bayat a ti pilay makapagnan ken ti bulsek makakitan . . .
DAGITI buya a kas iti daytoy ket kadawyanda iti adu nga ig-iglesia nga Africano nga agag-agas babaen iti pammati. Pudno unay, adut’ paspasurot dagiti faith healer (wenno agag-agas babaen iti pammati) idiay Africa ken dadduma pay a dagdaga gaput’ panangakoda a masolbarda amin a kita dagiti problema babaen iti panagkararag ken pammati iti Dios. Dadduma ngarud ti umay kadagiti faith healer nga addan kadagiti problema iti pinansial. Ket agsipud ta iti kagimongan nga Africano ti kinaawan anak ket masansan a mangipababa iti reputasion, sumagmamano ti dumatag kadagiti faith healer ket mangnamnamada iti pannakaagas ti kinabaogda.
Dagiti problema iti salun-at, nupay kasta, dakdakkel ti alaenda nga atension dagiti faith healer ngem iti aniaman. Nupay no dagiti droga a medisina layusenda ti tiendaan iti sangalubongan ken maar-aramid dagiti panagregget a mararaem iti tay-ak ti medisina tapno mangiyeg bang-ar kadagiti masakit, kaskasdi a ti tao ket adayu pay laeng manipud iti pannakasarakna iti sungbat ti problema iti sakit. Sumagmamano a biktima ti sakit ti nakabusbos iti dadakkel a gatad ti kuarta iti panagsapsapulda kadagiti agas, ngem napaayda laeng. Di pakasdaawan, ngarud, nga iti pannakaupayda, adu ti bumaw-ing kadagiti faith healer!
Marikna dagiti dadduma nga epektibo ti faith-healing (wenno panangagas babaen iti pammati) kadakuada ken makitada nga awan ti pannakaibusor dayta iti Kristianismo. Pudno, agsipud ta dagiti agag-agas kadarato a bigbigenda nga agtartrabahoda iti nagan ni Jesus, di karkarna para kadagiti paspasurotda nga agpadpada a miembroda iti agdama nga uso a relihion ken ti maysa nga iglesia nga agag-agas babaen iti pammati. Ngem ti kadi pudno nga agdaydayaw iti Dios maiparbeng a gundawayanna ti agpaagas iti maysa a faith healer? (Juan 4:23) Ket ti kadi aniaman a panangagas nga impaayda talaga a naggapuda iti Dios?