Ti Kadi Panangagas Babaen Pammati Anamongan ti Dios?
“NAKITATAYO dagiti karkarna a bambanag ita!” Wen, nasdaaw dagiti nakakita. Maysa a nakarot’ kinabaldadona a lalaki ti naagasan iti imatangda. Ti mangngagas kunana iti lalaki: “Bumangonka ket pidutem ti bassit a pagiddaam ket agawidkan.” Ket kasta a talagat’ inaramid ti lalaki! Isu ket saanen a paralitiko. Isu met laeng a dagidiay nakaimatang “nangrugida nga ipadayag ti Dios”! (Lucas 5:18-26) Daytoy a panangagas, nga inaramid ni Jesu-Kristo agarup 2,000 a tawen ti napalabasen, ket silalawag nga addaan anamong ti Dios.
Kumusta met ngay ita? Ti kadi namilagruan a panangagas ket posible pay laeng para kadagidiay di makasarak ti medikal a pannakaagas? Nangaramid ni Jesus kadagiti milagro iti panangagas. Kuna dagiti manangagas babaen pammati ita nga isut’ tultuladenda. Kasanot’ rebbeng a panangmatmattayo kadagiti saoda?
Ti panangagas babaen pammati ket nadepinar kas “maysa a pamay-an ti panangagas kadagiti sakit babaen iti kararag ken panangwatwat ti pammati iti Dios.” Pasingkedan ti Encyclopædia Britannica: “Ti historia ti panangagas babaen pammati iti Kinakristiano ket nangrugi babaen kadagiti makapasiddaaw a personal a ministerio ni Jesus ken dagiti apostol.” Wen, nagaramid ni Jesus kadagiti naidumduma a panangagas. Dagiti kadi manangagas babaen pammati ita agaramidda kadagiti milagro kas iti inaramidna?
Pammati—Makalikaguman Kadi?
Sigun iti Black’s Bible Dictionary, ni Jesus “impasinunuona [ti pammati] kas maysa a makalikaguman nga umuna maipaay kadagiti milagro ti panangagasna.” Ngem kasta kadi idi ti kaso? Dinawat kadi ni Jesus a ti maysa a masakit a tao masapul a maaddaan pammati sakbay nga isut’ agasanna? Ti sungbat ket saan. Ti pammati ket kasapulan iti biang ti mangngagas ngem saan nga inkapilitan a maadda iti biang ti masakit a tao. Naminsan napaay dagiti adalan ni Jesus a mangagas iti maysa a kissiw a barito. Inagasan ni Jesus ti barito ket kalpasanna imbagana kadagiti adalan no apay nga isut’ dida naagasan. “Kunana kadakuada: ‘Gapu iti bassit a pammatiyo.’”—Mateo 17:14-20.
Sigun iti Mateo 8:16, 17, ni Jesus “pinaimbagna dagiti amin a masakit.” Pudno, dagitoy a tattao naaddaanda iti maysa a rukod ti pammati ken Jesus a nakaigapuan iti iyaasidegda kenkuana. (Mateo 8:13; 9:22, 29) Iti kaaduan a kaso kasapulanda ti mapan ken agkiddaw sakbay nga agasanna ida. Nupay kasta, saanen a makalikaguman ti panangipudno iti pammati tapno maaramid ti milagro. Naminsan inagasan ni Jesus ti maysa a pilay a lalaki a di pay makaammo no siasino ni Jesus. (Juan 5:5-9, 13) Iti karabiian ti pannakatiliwna, insubli ni Jesus ti natagpas a lapayag ti adipen ti nangato a padi, nupay daytoy a lalaki ket maysa iti grupo dagiti kabusor ni Jesus a napan tapno mangtiliw kenkuana. (Lucas 22:50, 51) Pudno, sagpaminsan, pinagungar pay ni Jesus dagiti natay!—Lucas 8:54, 55; Juan 11:43, 44.
Kasano a maaramid ni Jesus dagiti kakasta a milagro? Gapu ta isut’ nagpannuray iti nasantuan nga espiritu ti Dios, wenno aktibo a puersa. Isu daytoy ti nangaramid iti panangagas, saan ket a ti pammati ti masakit nga indibidual. No basaenyo dagiti salaysay kadagiti Ebanghelio, madlawyo met a dagiti panangagas ni Jesus ket naaramid buyogen bassit laeng a seremonia. Awan panagpabuya wenno panangkusit iti emosion. Ad-adda pay, uray ania a sakit, di pulos napaay ni Jesus. Isu ket kankanayon a naballigi, ken di pulos nagpabayad.—Mateo 15:30, 31.
Dagiti Moderno a Panangagas Umasping Kadagidiay Inaramid ni Jesus?
Ti sakit ket maysa a nakaro a parikut, ket no daytat’ dumteng, natural laeng nga agsapultayo iti bang-ar. Ania ngay, nupay kasta, no agtaengtayo iti maysa a lugar a sadiay “dagiti tattao, kangrunanna dagidiay nakurapay, ket tratuen dagiti propesional nga empleado ti salun-at kas bambanag saan ket a kas tattao”? Dayta ti kasasaad a napaliiw ti maysa a doktor iti maysa a pagilian ti Latin-America. Ken ania ngay no agtaengtayo iti maysa a lugar a sadiay, kas iti dayta met laeng a pagilian, ‘40 porsiento laeng kadagiti mediko ti kualipikado a mangwatwat iti propesionda’?
Isu met laeng nga adu, gapu ta awan makitadan a sabali a pamay-an, ti mangmatmat iti panangagas babaen pammati kas naimbag a pamadasan. Kaskasdi, dagiti masasao a panangagas dagiti mangngagas babaen pammati ket mapagsusuppiatan. Kas pangarigan, mapattapatta a 70,000 ti timmabuno iti maysa a panagtataripnong idiay São Paulo, Brazil, a sadiay dua a mangngagas ti ‘nangpayat-payat kadagiti ginasut nga antiparra nga imbelleng dagiti agbuybuya, nga ikarkarida kadagiti napeklan a makinkukua kadagita ti pannakaisubli ti panagkitada.’ Maysa kadagiti mangngagas ti sipupudno a nangbigbig iti maysa a pannakiuman: “Diak maibaga nga amin dagidiay masakit nga inkararaganmi ket maagasan. Agpannuray dayta iti pammatida. No mamati ti maysa a tao, isut’ maagasan.” Impabasolna ti aniaman a pannakapaay a maagasan iti kinakurang ti pammati iti biang ti masakit a tao. Laglagipenyo, nupay kasta, kas immuna a nakitatayon, nga impabasol ni Jesus ti pannakapaay a mangagas gapu iti kinakurang ti pammati daydiay mangag-agas!
Inkari ti sabali pay a mangngagas nga agasanna ti kanser ken kinabaldado. Aniat’ napasamak? Sigun iti magasin a Veja, “nalawag, a ti kari, ket saan a natungpal.” Ken imdenganyo ti pamay-an ti panagtignay ti lalaki: “Kabayatan ti ngangngani dua nga oras, [ti mangngagas babaen pammati] liniwliwana dagiti agbuybuya babaen kadagiti sermon, kararag, panagriaw, panagkanta—uray pay panangdanog, iti pananginanama a mapaksiatna dagiti demonio nga agtataeng kadagiti bagi dagiti napeklan. Iti ngudona, impurruakna ti kurbata ken paniona kadagiti agsidsiddaaw nga agbuybuya ken nangipasa iti plato tapno agkulekta kadagiti ‘boluntario a kontribusion.’” Ni Jesus ken dagiti apostolna dida pulos nagdawat ti kuarta maipaay kadagiti namilagruan a panangagas, ken dida pulos nakiraman kadagiti kakasta a panagpabuya.
Nalawag, ngarud, a dagiti kakasta a moderno a mangngagas babaen pammati ket dida ar-aramiden ti inaramid ni Jesus. Ken narigat a patien nga anamongan ti Dios ti ar-aramidenda. Adda kadi, nupay kasta, aniaman a namilagruan a panangagas nga an-anamonganna ita? Wenno adda kadi aniaman a pamay-an a matulongannatayo ti pammatitayo no agsakitttayo wenno dagiti inay-ayattayo?