Jesu-Kristo​—Ti Dungdungoen nga Anak ti Dios

“Kasta met, adda ti maysa a timek a nanipud kadagiti langlangit a kunkunana: ‘Daytoy ti Anakko, a dungdungoek, isu nga inanamongak.’”​—Mateo 3:17.

1, 2. (a) Ania a simple a kinapudno ti isursuro ti Biblia maipapan iti Dios a mannakabalin-amin ken ni Jesu-Kristo? (b) Aniat’ isursuro dagiti relihion ti Kakristianuan?

NI Jesu-Kristo ket nabautisaran idi agtawen iti 30 babaen ti pannakaitanebna iti danum. Idi isut’ rimkuas iti danum, maysa a timek manipud langit ti nagkuna: “Daytoy ti Anakko, a dungdungoek, isu nga inanamongak.” (Mateo 3:17) Dayta a timek ket timek ti Dios. Iti sabali pay nga okasion, iti panagkararagna iti Dios, kinuna ni Jesus: “Ama, itanokmo ti naganmo.” Ket idi a nakuna ni Jesus daytan, “immay ngarud ti timek [ti Dios] a nanipud langit: ‘Intan-okkon ket itan-okkonto manen.’”​—Juan 12:28.

² Manipud kadagitoy a salaysay, uray ti bassit nga ubing maawatanna a ti relasion ti Dios a mannakabalin-amin ken ni Jesu-Kristo ket kas ti maysa nga ama ken iti dungdungoenna nga anak, dua a nagduma nga indibidual. Kaskasdi, daytoy simple a kinapudno ti Biblia ket iliblibak dagiti relihion ti Kakristianuan. Ipapilitda a ni Jesu-Kristo isu a mismo ti Dios a Mannakabalin-amin, ti maikadua a persona iti Trinidad, a ti maikatlo a persona isu ti nasantuan nga espiritu.

3. Kasano a maipakita ti kinagulo maipapan iti doktrina a Trinidad?

³ Dayta a sursuro ket nakapataud ti dakkel a pannakariro uray pay kadagiti tattao iti relrelihion iti Kakristianuan, nga isut’ maysa a rason no apay a ti New Catholic Encyclopedia inawaganna ti Trinidad a maysa a misterio. Pudno unay, daytat’ nakapataud iti pannakariribuk uray kadagiti klero, ta kuna met laeng dayta nga encyclopedia: “Addada sumagmamano a mannursuro iti teolohia a Trinidad kadagiti seminario a Romano Katoliko a saan a narirriribukan iti naminsan wenno iti dadduma a tiempo maipapan iti saludsod a, ‘Ngem kasano a maikaskasaba ti maysa ti Trinidad?’ Ket no ti saludsod ket sintoma iti pannakariribuk iti biang dagiti estudiante, nalabit daytat’ sintoma met ti umas-asping a pannakariribuk iti biang dagiti propesorda.”

4. Ania ti opisial a sursuro dagiti relihion maipapan iti Trinidad?

⁴ Dayta makariribuk a doktrina isu ti kangrunaan a pammati dagiti relihion a Katoliko ken Protestante. Kuna ti The Catholic Encyclopedia: “Ti Trinidad isu ti termino a maus-usar a mangipamatmat iti kangrunaan a doktrina iti Nakristianuan a relihion. . . Gapuna, kadagiti sasao iti Kredo ni Atanacio: ‘ti Ama ket Dios, ti Anak ket Dios, ket ti Espiritu Santo ket Dios, ket kaskasdi awan ti tallo a Dios no di ket maymaysa a Dios.’” Umas-asping iti dayta, iti maysa a kaso iti korte a nakairamanan dagiti Saksi ni Jehova idiay Grecia, kuna ti Greek Orthodox Church: “Ti pamunganayan a doktrina iti Kinakristiano, a pamatian amin dagiti Kristiano. . . agpapan pay sekta wenno dogma, isu. . . ti Trinidad, a ti Dios ket Maymaysa iti tallo a persona.” Kuna pay ti Greek Orthodox Church: “Dagiti Kristiano isuda dagiti umawat ken Kristo kas Dios.” Kinunana a dagidiay madi a mangawat iti Trinidad ket saanda a Kristiano no di ket erehesda.

5, 6. Apay a nasken a maammuan ti kinapudno maipapan iti daytoy a banag?

⁵ Nupay kasta, no daytoy “pamunganayan” a pannursuro a Trinidad iti Kakristianuan ket saan a pudno, no daytat’ maysa a kinaulbod, ngarud ti kasunganina met isut’ pudno. Dagiti pudno a Kristiano laksidenda dayta. Dagidiay a timmalikud iti Kinakristiano ti mangsalimetmet iti dayta. Ket ania ti ibungana iti maud-udi a grupo? Iti maudi a libro ti Biblia, a “paltiing ni Jesu-Kristo, nga inted ti Dios kenkuana,” mabasatayo maipapan kadagidiay saan a makakualipikar iti biag nga awan inggana iti Pagarian ti Dios: “Idiay ruar addada dagiti as-aso ken dagiti managanito ken dagiti mannakikamalala ken dagiti nakapapatay ken dagiti agrukbab kadagiti didiosen ken tunggal maysa nga agayat ken agaramid iti ulbod.”​—Apocalipsis 1:1; 22:15.

⁶ Gapu iti kinapategna, rebbeng a mapakaammuantayo no sadino ti namunganayan daytoy kapanunotan a Trinidad ken no apay a daytat’ namunganay. Asino a talaga ti adda iti likudan dayta? Aniat’ maikuna iti moderno a pannakaammo ti Biblia maipapan iti dayta? Ngem sakbay a pagsasaritaan dagitoy a bambanag, sukimatentayo pay no aniat’ kuna ti mismo a naipaltiing a Sao ti Dios.​—2 Timoteo 3:16, 17.

Saan a ‘Dios Anak’ no di ket “Anak ti Dios”

7. Aniat’ ipanayag ti awan panangidumdumana a panagadal iti Biblia maipapan ken ni Jesus?

⁷ Nikaanoman saan a kinuna ni Jesus nga isu a mismo ti Dios a mannakabalin-amin. Aniaman nga awan ti panangidumdumana a panagbasa ti Biblia nga awanan kadagiti antimano nga idea maipapan iti Trinidad ti mangpaneknek iti dayta. Kas pangarigan, idiay Juan 3:16, kinuna ni Jesus: “Ta kasta la unay ti panagayat ti Dios iti lubong nga intedna ti Anakna a bugbugtong.” Iti dua a bersikulo laeng kamaudiananna, kinuna manen ni Jesus nga isu “ti bugbugtong nga Anak ti Dios.” (Juan 3:18) Idi dagiti Judio pinabasolda ni Jesus iti panagtabbaaw, isu ti simmungbat: “Kunaenyo iti pinagsanto ti Ama ken imbaonna ditoy lubong, ‘Agtabbaawka,’ agsipud ta kinunak, siak ti Anak ti Dios?” (Juan 10:36) Saan a kinuna ni Jesus nga isu ti ‘Dios Anak’ no di ket isu ti “Anak ti Dios.”

8. Ania a pammaneknek ti inted ti opisial ti buyot ken dagidiay kakaduana?

⁸ Idi a natay ni Jesus, uray dagiti soldado a Romano a sitatakder iti sibayna ammoda a ni Jesus ket saan a Dios: “Daydi opisial ti buyot ken dagiti naikuyog kenkuana a nagbambantay ken Jesus, idi nakitada daydi ginggined ken dagiti naaramid, nagbutengda iti dakkel unay, a kunkunada: ‘Pudno nga Anak ti Dios daytoy.’” (Mateo 27:54) Saanda a kinuna, ‘daytoy ti Dios’ wenno ‘daytoy ti Dios Anak,’ agsipud ta ni Jesus ken dagiti adalanna insuroda a ni Jesus Anak ti Dios, saan a Dios a Mannakabalin-amin nga adda iti natauan a langa.

9, 10. Ania a napigsa a pammaneknek ti inted dagiti Ebanghelio maipapan iti relasion ti Dios ken ni Jesus?

⁹ Ti Dios a mismo pinaneknekanna a ni Jesus ti Anakna a dungdungoen, a kas ti kinuna ni Mateo a mannurat ti Biblia idi a nabautisaran ni Jesus. (Mateo 3:17) Kasta met laeng ti kinuna dagiti dadduma a mannurat ti Biblia. Insurat ni Marcos: “Ket nangngeg ti maysa a timek nanipud langit: ‘Sika ti dungdungoek nga Anak; maay-ayoak unay kenka.’” (Marcos 1:11) Kinuna ni Lucas: “Ket nangngeg ti maysa a timek iti langit: ‘Sika ti Anakko, a dungdungoen; maay-ayoak unay kenka.’” (Lucas 3:22) Ket ni Juan a Mammautisar, a nangbautisar ken ni Jesus, pinaneknekanna: “Ket siak nakitak ket pinaneknekak a daytoy [ni Jesus] ti Anak ti Dios.” (Juan 1:34) Gapuna ti Dios a mismo, amin dagiti uppat a mannurat ti Ebanghelio, ken ni Juan a Mammautisar, a nangbautisar ken ni Jesus, pinaneknekanna: “Ket siak nakitak ket pinaneknekak a daytoy [ni Jesus] ti Anak ti Dios.” (Juan 1:34) Gapuna ti Dios a mismo, amin dagiti uppat a mannurat ti Ebanghelio, ken ni Juan a Mammautisar nalawag ti panagkunada a ni Jesus ket isu ti Anak ti Dios. Ket iti maud-udi a tiempo, iti panagbalbaliw ti langa ni Jesus, ti umas-asping a banag ket napasamak: “Ket nagtaud ti maysa a timek [ti Dios] idi ulep a nagkuna: ‘Daytoy ti Anakko, daydiay a napili. Denggenyo.’”​—Lucas 9:35.

¹⁰ Kadagitoy a salaysay, ibagbaga aya ti Dios nga isu ti mismo nga anakna, nga imbaonna ti bagbagina, ken isu ti naay-ayo iti bagina? Saan, ti Dios nga isu ti Ama, ti Namarsua, ibagbagana nga imbaonna ni Jesus nga Anakna, maysa a naisina nga indibidual, a mangtungpal iti aramid ti Dios. Gapuna, iti intero a Griego a Kasuratan ti sasao nga “Anak ti Dios” ti nausar a mangtukoy ken ni Jesus. Ngem uray naminsan ditayo makita ti sasao a ‘Dios Anak,’ agsipud ta ni Jesus ket saan nga isu ti Dios a mannakabalin-amin. Isu ti Anak ti Dios. Isuda ti dua a nagduma a persona, ket awan “misterio” ti teolohia a mabalin a mangbalbaliw iti dayta a kinapudno.

Ti Ama Nangatngato Ngem iti Anak

11. Kasanot’ panangipakita ni Jesus a ti Dios natantan-ok ngem isu?

¹¹ Ammo ni Jesus nga isu ket saan a kapada ni Amana no di ket iti tunggal pamay-an adda iti nababbaba a posision. Ammona nga isu ti Anak a dungdungoen nga addaan iti nauneg a panagayat ken ni Amana. Isut’ gapuna, a kankanayon, inyebkas ni Jesus dagiti sasao a kas iti sumaganad: “Ti Anak saanna a mabalin ti agbukbukod nga agaramid iti uray ania, no di ket ti makitana nga aramiden ti Ama.” (Juan 5:19) “Ta bimmabaak nanipud langit, saan a tapno aramidek ti pagayatak, no di ti pagayatan ti nangibaon kaniak.” (Juan 6:38) “Ti isursurok saanko a kukua, no di kukua ti nangibaon kaniak.” (Juan 7:16) “Siak ammok [ti Dios], ta naggapuak a pannakabagi kenkuana, ket Isu imbaonnak.” (Juan 7:29) Daydiay mangibabaon isut’ natantan-ok. Daydiay maibabaon isut’ nababbaba, ti adipen. Ti Dios ti nangibaon. Ni Jesus isu daydiay naibaon. Saanda nga agpada. Kas panangiyebkas ni Jesus iti dayta: “Ti adipen saan a dakdakkel ngem ti apona, ket saan a dakdakkel ti maysa a naibaon ngem iti nangibaon kenkuana.”​—Juan 13:16.

12. Ania nga ilustrasion ti mangidemostra iti nababbaba a posision ni Jesus ngem ti Ama?

¹² Napagbalin met a nalawag daytoy iti maysa a pangngarig nga inted ni Jesus. Inyarigna ni Amana, ni Jehova a Dios, a makinkukua iti pagubasan nga isu ti nagdaliasat iti adayu a daga ket imbatina ti pagubasan nga aywanan dagiti mannalonna​—a kaawatan iladladawanna dagiti klero a Judio. Idi agangay, ti makinkukua nangibaon ti maysa nga adipen tapno mangala ti sumagmamano kadagiti bunga manipud iti pagubasan, ngem dagiti mannalon kinabilda ti adipen ket pinagawidda nga ongaong. Ket ti makinkukua nagbaon manen ti maikadua nga adipen, ket isu met laeng ti napasamak. Nangibaon ti maikatlo nga adipen, nga isu met laeng ti pannakatratona. Kalpasanna ti makinkukua (ti Dios) kinunana: “Ibaonkonto ti anakko [ni Jesus] ti dungdungoek. Nalabit padayawandanto no makitada.” Ngem dagiti dakes a mannalon kunada: “‘Daytoy isu ti agtawid; papatayentayo, tapno ti tawid kukuatayto.’ Ket isu induronda iti ruar ti kaubasan ket pinatayda.” (Lucas 20:9-16) Ditoy manen, pinagbalin daytoy a nalawag a ni Jesus isu ti agpasakop ken Amana, imbaon ti Ama a mangaramid iti pagayatan ti Ama.

13. Ania a nalawag a sasao ti Biblia ti mangipakita a ti Dios ket nangatngato ngem ni Jesus?

¹³ Kinuna a mismo ni Jesus: “Ni Ama dakdakkel ngem siak.” (Juan 14:28) Rebbeng a patientay ni Jesus, ta pudpudno nga ammona ti kinapudno maipapan iti pannakirelasionna ken Amana. Ammo met ni apostol Pablo a ti Dios nangatngato ngem ni Jesus, ket kinunana: “Uray ti Anak [ni Jesus] met laeng paiturayanton iti. . . Dios.” (1 Corinto 15:28) Makita daytoy nga ad-adda iti sasao ni Pablo iti 1 Corinto 11:3: “Ket ti pannakaulo ni Kristo isu ti Dios.” Binigbig ni Jesus nga isut’ addaan nangatngato a Dios idi a kinunana kadagiti adalanna: “Umuliak ken Amak ken Amayo ken iti Diosko ken Diosyo.”​—Juan 20:17.

14. Ania a dadduma pay a kasuratan ti mangipakita a ni Jesus ket saan a Dios a Mannakabalin-amin?

¹⁴ Nasao ni Jesus ti kinatan-ok ti Dios idi inkalikagum ti ina dagiti dua nga adalan nga agtugaw ti maysa kadagiti annakna iti kannawan ken ti maysa iti kannigid ni Jesus inton umay iti Pagarianna. Insungbatna: “Ti panagtugawyo iti makannawanko ken iti makattigidko saan a siak ti makinrebbeng a mangited.” (Mateo 20:23) No ni Jesus koma ti Dios a mannakabalin-amin, karbenganna koma nga isut’ mangited. Ngem saan a kasta. Ni Amana isut’ mangited. Umasping iti dayta, idi salaysayenna ti padto maipapan iti panungpalan daytoy a sistema dagiti bambanag, ni Jesus kinunana: “Ngem ti maipapan iti dayta nga aldaw wenno dayta nga oras awan ti makaammo, uray pay dagiti anghel sadi langit uray pay toy Anak, no di laeng ti Ama.” (Marcos 13:32) No ni Jesus koma ti Dios a Mannakabalin-amin, ammona koma dayta nga aldaw ken oras. Ngem saanna nga ammo agsipud ta saan nga isu ti Dios a Makaammo iti isuamin. Isut’ Anak ti Dios ket saanna nga ammo ti isuamin nga ammo ni Amana.

15. Idi ngangnganin matay ni Jesus, kasanot’ panangipakitanat’ panagpasakopna iti Dios?

¹⁵ Idi ngangngani a matayen ni Jesus, impakitana ti panagpasakop ken Amana babaen iti panagkararag: “Ama, no pagayatam, iyadayum kadi daytoy a kopa kaniak. Nupay kasta, saan koma a maaramid ti pagayatak, no di ti pagayatam.” (Lucas 22:42) Siasino ti pagkarkararagan ni Jesus? Iti bagina? Saan, isu ti agkarkararag iti Amana idiay langit. Nalawag nga ipakita daytoy ti sasaona: “Saan koma a maaramid ti pagayatak, no di ti pagayatam.” Kalpasanna, iti ipapatayna, impukkaw ni Jesus: “Diosko, Diosko, apay-apay a binaybay-annak?” (Marcos 15:34) Siasino ti pagpukpukkawan ni Jesus? Iti bagina? Saan, isut’ agpukpukkaw ken Amana nga adda idiay langit.

16. Kasano a ti ipapatay ken ti panagungar ni Jesus ipakitana a saan nga isu a mismo ti Dios a mannakabalin-amin?

¹⁶ Kalpasan ti ipapatay ni Jesus, isut’ adda iti tanem iti agarup tallo nga aldaw. Asino ti nangpagungar kenkuana? Agsipud ta isut’ natay, saanna a mabalin a pagungaren ti bagina met laeng. Ket no isut’ saan a pudpudno a natay, ngarud saanna koma a nabayadan ti subbot a maipaay iti basol ni Adan. Ngem isut’ pudno a natay, ket isu ti awan-biagna iti agarup tallo nga aldaw. Ni apostol Pedro ibagana kadatayo no asino ti namagungar ken ni Jesus: “Isu a pinagungar ti Dios a nakalapsut kadagiti rigat ni patay.” (Aramid 2:24) Ti nangatngato, ti Dios a Mannakabalin-amin, pinagungarna daydiay nababbaba, ti dungdungoenna nga Anak, ni Jesus, manipud ken patay. Tapno maiyilustrar: Idi pinagungar ni Jesus ni Lazaro manipud ken patay, asino ti natantan-ok? Ni Jesus ti natantan-ok, agsipud ta napasublina ni Lazaro manipud ken patay. (Juan 11:41-44) Kasta met idi a ti Dios pinagungarna ni Jesus. Ti Dios ti natantan-ok, agsipud ta napagsublina ni Jesus manipud ken patay.

17. Ania ti dadduma a pammaneknek a ni Jesus ket saan nga isu ti Dios?

¹⁷ Saan a mabalin a ni Jesus ti Dios a mismo, agsipud ta ni Jesus ket pinarsua ti Dios. Kitaenyo no kasano ti panangipaulog ti Emphatic Diaglott ni Benjamin Wilson iti Apocalipsis (Paltiing) kapitulo 3, bersikulo 14: “Dagitoy a bambanag kuna ti Amen, ti matalek ken pudno a saksi [ni Jesus], ti puon ti pinarsua ti Dios.” Umas-asping iti dayta, kuna ti Colosas 1:15, 16 maipapan ken Jesus: “Isu a ladawan ti Dios a di makita, ti anak nga inauna kadagiti amin a naparsua; ta kenkuana naparsua dagiti amin nga adda kadagiti langlangit ken daga. . . Dagiti isuamin naparsuada gapu kenkuana ken maipaayda kenkuana.” Gapuna idiay langit ti Dios a mannakabalin-amin ti direkta a nangparsua iti Anakna ket kalpasanna “babaen kenkuana,” wenno “gapu kenkuana,” pinarsuana dagiti dadduma a bambanag, kas met iti maysa a nalaing a trabahador a nangsanay iti maysa nga empleado a mangaramid iti trabaho para kenkuana. Dagidiay bambanag a naparsua “babaen kenkuana” saanna nga inraman ni Jesus a mismo, ta ti Dios ti nangparsua kenkuana. Gapuna, isut’ naawagan ti “inauna,” ti “bugbugtong.” No ti anak isu ti inauna, ti bugbugtong, pulos a saanna kayat a sawen a ti anak ket isu met laeng ti ama. Kanayon a kaipapanan dayta nga addada dua a nagduma a personalidad a nairaman, ti ama ken ti anak.

Nasantuan nga Espiritu​—Maysa a Persona wenno Aktibo a Puersa?

18. Ania ti isursuro ti Biblia maipapan iti nasantuan nga espiritu?

¹⁸ Ti met ngay maipagpagarup a maikatlo a persona iti Trinidad, ti nasantuan nga espiritu, a naikuna a maipada iti pannakabalin, mangbukel iti dayta, ken kinaagnanayon iti Ama ken ti Anak? Nikaanoman awan ti nadakamat iti Biblia a nasantuan nga espiritu a maipada iti Dios ken ni Kristo. Kas pangarigan, idi pannakabautisar ni Jesus, ipakita ti Marcos 1:10 a ti nasantuan nga espiritu bimmaba ken ni Jesus “kas maysa a kalapati,” saan nga iti natauan a langa. Ti nasantuan nga espiritu ket saan a maysa a persona a bumabbaba ken ni Jesus no di ket kas aktibo a puersa ti Dios. Dayta a pannakabalin a naggapu iti Dios ti namagbalin ken ni Jesus a nangpaimbag kadagiti masakit ken mangpagungar kadagiti natay. Kas kunaen ti Lucas 5:17 idiay Diaglott: “Ti Napigsa a Pannakabalin ti Apo [ti Dios] adda kenkuana [ni Jesus] tapno mangagas.” Kamaudiananna, idi Pentecostes, dagiti apostol naikkanda met ti pannakabalin a naggapu iti Dios a mangagas kadagiti masaksakit ken mangpagungar iti natay. Dayta aya ti namagbalin kadakuada a paset ti makunkuna a “kinadios”? Saan, basta naikkanda laeng ti pannakabalin a naggapu iti Dios, babaen ken Kristo, a mangaramid iti saan a gagangay a maaramidan ti tao.

19. Apay a saan a posible ti panagbalin ti nasantuan nga espiritu a maikatlo a persona iti Trinidad?

¹⁹ Dayta met laeng nga aktibo a puersa ti nadakamat idiay Efeso 5:18, a sadiay namalakad ni Pablo: “Mapnokay koma iti espiritu.” Umas-asping iti dayta, kuna ti Aramid 7:55 a ni Esteban ket “sipupunno iti nasantuan nga espiritu.” Ket idi Pentecostes, dagiti paspasurot ni Jesus “napnoda amin iti nasantuan nga espiritu.” (Aramid 2:4) Mabalinan kadi ti maysa a tao ti mapunno iti sabali a persona? Saan, ngem mabalin nga isut’ mapunno iti pannakabalin a naggapu iti Dios. Dayta nasantuan nga espiritu isu met laeng ti puersa nga inusar ti Dios a nangparsua iti uniberso. Kas kunaen ti Genesis 1:2: “Ket ti aktibo a puersa ti Dios nagtignay iti rabaw dagiti dandanum.”

20. Ania a sirmata ti nakita ni Esteban a mangipamatmat pay a ti Trinidad ket saan a pudno?

²⁰ Kalpasan ti pannakapagungar ni Jesus, naikkan ni Esteban iti sirmata iti langit ket “nakitana ti dayag ti Dios ken ni Jesus nga agtaktakder iti makanawan ti Dios.” (Aramid 7:55) Gapuna, dua a nagsina a persona ti makitkita idiay langit: (1) ti Dios ken (2) ni napagungar a Jesu-Kristo. Awan ti nadakamat a nasantuan nga espiritu iti daytoy a sirmata agsipud ta awan ti maikatlo a persona iti Trinidad. Ti nasantuan nga espiritu, kas aktibo a puersa ti Dios, ket aggapu iti Dios ngem saan a naisina a persona. Isut’ gapuna a dua laeng a persona ti nakita ni Esteban, saan a tallo.

21, 22. (a) Ania a panangadmitir ti inaramid ti maysa a narelihiusuan nga encyclopedia maipapan ti nasantuan nga espiritu? (b) Ania dagiti punto a mairaman iti sumaganad nga artikulotayo?

²¹ Maipapan iti nasantuan nga espiritu, ti New Catholic Encyclopedia inadmitirna: “Ti D[aan] a T[ulag] nalawag a saanna a nakita ti espiritu ti Dios kas maysa a persona, uray pay iti naan-anay a pilosopikal a pannakaawat, wenno iti Semetico a pannakaawat. Ti espiritu ti Dios ket basta pannakabalin ti Dios. No daytat’ mairepresentar no maminsan kas naiduma iti Dios, daytat’ agsipud ta ti panaganges ni Yahweh agtigtignay iti ruar.” Kuna pay met dayta: “Ti kaaduan kadagiti teksto ti B[aro] a T[ulag] ipanayagna ti espiritu ti Dios kas maysa a banag, saan a kas maysa a persona; daytoy ti makita a nangnangruna iti paralelismo iti espiritu ken ti pannakabalin ti Dios.”

²² Gapu kadagitoy amin a kinapudno, daytoy “pamunganayan” a doktrina ti Trinidad iti Kakristianuan ket saan nga agbalin a pudno. Ti mismo a Sao ti Dios suppiatenna dayta a panagkuna. Ipakita a silalawag dayta a ni Jehova a Dios ti naayat nga Ama ket ni Jesu-Kristo ti dungdungoen nga Anakna, maysa nga Anak nga addaan iti kasta a panagayat ken Amana nga isut’ situtulok nga agtulnog agingga ken patay. Nupay kasta, irupir dagiti dadduma nga addada dagiti kasuratan a kasla mangsuportar iti Trinidad, gapuna ti sumaganad nga artikulotayo, sukimatenna ti sumagmamano kadagita. Kasta met, pagsasaritaantayo no apay a dayta a doktrina ket nagbalin a kasta unay a nagpateg a paset iti Kakristianuan ken no sadino ti namunganayanna.

[Kasanoyo a Sungbatan?]

▫ Aniat’ isursuro ti Biblia maipapan iti Dios ken maipapan ken Jesus?

▫ Kasanot’ panangipakita ti Kasuratan iti relasion ti Ama ken Anak?

▫ Aniada dagiti sumagmamano a kasuratan a mangipakita a ti Dios natantan-ok ngem ni Jesus?

▫ Apay a ti nasantuan nga espiritu ket saan a mabalin nga nga agbalin a paset iti maysa a Trinidad?

[Ladawan iti panid 13]

Kinuna ni Jesus: “Ni Ama dakdakkel ngem siak”