Saludsod

◼ Sakbay a makualipikar ti di bautisado nga agibumbunannag a mabautisaran, ania ti masapul a makita iti itatabunona kadagiti gimong ken iti pannakipasetna iti ministerio?

Ti panagpabautisar ti kapatgan a desision nga aramiden ti maysa a tao. Gapuna, sakbay a makualipikar iti bautismo ti maysa, masapul a matarusanna no ania ti kalkalikaguman ti Dios kenkuana ken makita metten ti determinasionna nga agbiag maitunos kadagita.

Naibilin kadagiti Kristiano a dida liwliwayan ti panagtataripnong, isu a rumbeng a napinget a tumabuno kadagiti gimong iti kongregasion ti maysa a di bautisado nga agibumbunannag. (Heb. 10:24, 25) Masapul a makipaset metten kadagiti gimong babaen ti panagkomentona. Nalabit nagpasalista metten iti Teokratiko nga Eskuelaan ti Panagministro, nupay saan a kualipikasion daytoy.

Kanayonanna, yantangay nabilin dagiti Kristiano nga ikasabada ti naimbag a damag ken agaramidda kadagiti adalan, masapul a regular a makipaspaseten iti ministerio ti di bautisado nga agibumbunannag sakbay a mabautisaran. (Mat. 24:14; 28:19, 20) Mano a bulan ti rumbeng a panagbalinna a di bautisado nga agibumbunannag sakbay a makualipikar iti bautismo? Masapul a maipaayan iti umdas a panawen a mangipakita iti determinasionna a regular ken sireregta a makiraman iti ministerio iti kada bulan. (Sal. 78:37) Ngem saan a nasken a nakapapaut ti panagbalinna a di bautisado nga agibumbunannag sakbay a makualipikar iti bautismo, nalabit sumagmamano laeng a bulan. Mano nga oras ti masapul nga ireportna? Awan ti istrikto a pagannurotan iti daytoy. Rumbeng a tingitingen dagiti panglakayen ti kasasaad ti tunggal agibumbunannag ken agbalinda a nainkalintegan ken balanse.—Luc. 21:1-4.

Rumbeng a laglagipen dagiti panglakayen (wenno ministerial nga adipen no bassit ti panglakayen iti kongregasion) a makisarita iti kandidato iti bautismo a nagduduma ti tunggal tao ken tingitingenda a naimbag no isu ket kualipikado a mabautisaran. Namnamaenda a napudno ti tarigagayna nga agbalin a Saksi ni Jehova ken talaga nga ipatpategna ti pribilehio a makikadua iti organisasion ni Jehova ken makiraman iti ministerio. Matarusan dagiti panglakayen nga isu ket saan pay unay a nataengan iti naespirituan wenno nalaing nga ebanghelisador a kas kadagiti aduan kapadasan a bautisado nga agibumbunannag. No makita dagiti panglakayen a saan a kualipikado ti kandidato iti bautismo, masapul nga ilawlawagda kenkuana iti naayat a pamay-an dagiti rason a naibatay iti Biblia no apay a kasta ti desisionda ken ipaayanda iti naespirituan a tulong.