Kasapulan Dagiti Karnero ni Jehova ti Nadungngo a Panangaywan

“Ammoyo a ni Jehova isu ti Dios. . . . Datayo ti ilina ken karkarnero ti pagpaarabanna.”​—SALMO 100:3.

1. Kasanot’ panangtrato ni Jehova kadagiti adipenna?

NI Jehova ti Naindaklan a Pastor. No ad-adipennatayo, ibilangnatayo kas karkarnerona ken sidudungngo nga aywanannatayo. Liwliwaen ken bang-arannatayo ti nailangitan nga Amatayo ken iturongnatayo kadagiti “dana ti kinalinteg a gapu iti naganna.” (Salmo 23:1-4) Ay-ayatennatay unay ti Nasayaat a Pastor, ni Jesu-Kristo, ta insukona ti kararuana maigapu kadatayo.​—Juan 10:7-15.

2. Ania ti kasasaad dagiti tattao ti Dios?

² Kas umaw-awat iti nadungngo a panangaywan, maikunatayo ti kas iti kinuna ti salmista: “Agserbikayo a sirarag-o ken Jehova. Umaykayo iti sanguananna agraman panagkanta. Ammoyo a ni Jehova, isu ti Dios. Isu ti nangaramid kadatayo, a saan ket a datayo a mismo. Datayo ti ilina ken karkarnero ti pagpaarabanna.” (Salmo 100:2, 3) Wen, naragsak ken natalgedtayo. Kas man la addatayo iti pagaponan dagiti karnero nga addaan kadagiti natibker a pader a bato a natalged kadagiti narungsot nga ayup.​—Numeros 32:16; 1 Samuel 24:3; Sofonias 2:6.

Natulok a Papastor iti Arban

3. Kasanot’ panangtrato dagiti nadutokan a Kristiano a panglakayen iti arban ti Dios?

³ Di pakasdaawan a naragsaktayo kas karkarnero ti Dios! Dagiti nadutokan a panglakayen ti mangidaldalan kadatayo. Saanda nga ‘agakem kas prinsipe,’ a mamangulo kadatayo, wenno padasenda nga iturayan ti pammatitayo. (Numeros 16:13; Mateo 20:25-28; 2 Corinto 1:24; Hebreo 13:7) Imbes ketdi, naayatda a papastor a mangyap-aplikar iti balakad ni apostol Pedro: “Ipastoranyo ti arban ti Dios nga adda iti aywanyo, di mapilpilit, no di ket situtulok; saan met nga iti panagayat iti nakusit a gunggona, no di ket sigagagar; saan met a kas agturay kadagidiay tawid ti Dios, no di ket agbalinkayo a pagulidanan ti arban.” (1 Pedro 5:2, 3) Kinuna ni apostol Pablo kadagiti padana a panglakayen: “Asikasuenyo ti bagbagiyo ken ti isuamin nga arban, a kadakuada dinutokannakayo ti nasantuan nga espiritu kas manangaywan, tapno ipastoranyo ti kongregasion ti Dios, a ginatangna babaen ti dara ti bukodna nga Anak.” Ket anian a yaman dagiti karnero ta dagitoy a lallaki a nadutokan iti nasantuan nga espiritu “tratuen[da] a sidudungngo ti arban”!​—Aramid 20:28-30.

4. Iti ania a kita ti relasion iti arban a naglatak ni Charles T. Russell?

⁴ Nangipaay ni Jesus iti kongregasion kadagiti “sagut a tattao,” dadduma kas “papastor,” wenno agpaspastor, a mangtrato iti arban ni Jehova iti nadungngo a pamay-an. (Efeso 4:8, 11; King James Version) Maysa kadagitoy a tattao ni Charles T. Russell, ti immuna a presidente ti Watch Tower Society. Naawagan kas Pastor Russell gapu iti naayat ken naasi a trabahona a panangipastor iti arban iti babaen ti Kangrunaan a Pastor, ni Jesu-Kristo. Ita, nadutokan dagiti Kristiano a panglakayen babaen ti Bagi a Manarawidwid dagiti Saksi ni Jehova, ken adda panagannad iti saan a panangaramat kadagiti termino a kas iti “pastor,” “panglakayen,” wenno “mannursuro” kas titulo. (Mateo 23:8-12) Nupay kasta, panangipastor ti trabaho dagiti agdama-aldaw a panglakayen maipaay iti pagimbagan dagiti karnero iti pagpaaraban ni Jehova.

5. Apay a rebbeng nga am-ammuen dagiti kabbaro dagiti nadutokan a panglakayen iti kongregasion Kristiano?

⁵ Kas papastor, adda napateg a paset dagiti panglakayen iti naespirituan a panagrang-ay dagiti kabbaro. Gapuna, kunaen ti baro a libro a Pannakaammo a Mangiturong iti Biag nga Agnanayon iti panid 168: “Am-ammuenyo dagiti nadutokan a panglakayen iti kongregasion. Aduandan ti kapadasan iti panangyaplikar iti pannakaammo ti Dios, ta naragpatda dagiti kualipikasion para kadagiti manangaywan a nailanad iti Biblia. (1 Timoteo 3:1-7; Tito 1:5-9) Dikay agalikaka nga umasideg iti maysa kadakuada no kasapulanyo ti naespirituan a tulong a mangparmek iti ugali wenno kababalin a maikaniwas kadagiti pagannurotan ti Dios. Makitayonto a sursuroten dagiti panglakayen ti balakad ni Pablo nga: ‘Agsaokayo iti makaliwliwa kadagiti malmaldaangan a kararua, saranayenyo dagiti nakapuy, maaddaankayo iti mabayag a panagitured iti isuamin.’​—1 Tesalonica 2:7, 8; 5:14.”

No Tarigagayan Dagiti Kabbaro ti Mangasaba

6. Ania a pamay-an ti masurot no tarigagayan ti estudiante iti Biblia ti agbalin nga agibumbunannag iti Pagarian?

⁶ Kalpasan nga addaanen pannakaammo ti estudiante iti Biblia ken tumabtabuno metten kadagiti gimong, mabalin a tarigagayanna ti agbalin nga agibumbunannag iti Pagarian, maysa a manangaskasaba iti naimbag a damag. (Marcos 13:10) No kasta, ti Saksi a mangyad-adal iti Biblia kenkuana rumbeng a makisarita iti mamangulo a manangaywan, a mangyurnos iti maysa kadagiti panglakayen iti Congregation Service Committee ken maysa pay a panglakayen a makisarita iti estudiante ti Biblia ken iti mangisursuro kenkuana. Maibatay ti diskusion iti libro nga Organisado a Mangitungpal ti Ministeriotayo, panid 98 ken 99. No makita dagitoy dua a panglakayen a mamati ti kabbaro kadagiti kangrunaan a sursuro iti Biblia ken immannuroten kadagiti prinsipio ti Dios, maibaga kenkuana a kualipikadon a makiraman iti publiko a ministerio.a No ireportna ti ministeriona babaen ti panangtedna iti report iti tay-ak ti serbisio, maisurat dayta iti Congregation’s Publisher Record card a nakaisuratan iti naganna. Maireport itan ti kabbaro ti nagapuananna iti panangaskasaba a kadua ti riniwriw a dadduma pay a siraragsak a ‘mangibumbunannag iti sao ti Dios.’ (Aramid 13:5) Maipakaammo iti kongregasion nga isu ket maysan a di nabautisaran nga agibumbunannag.

7, 8. Kadagiti ania a pamay-an a maipaayan ti di nabautisaran nga agibumbunannag iti kasapulan a tulong iti ministerio?

⁷ Kasapulan ti di nabautisaran nga agibumbunannag ti tulong dagiti panglakayen ken dadduma a nataengan a Kristiano. Kas pagarigan, ti naespirituan a panagrang-ayna ti pakaseknan ti konduktor iti Panagadal iti Libro ti Kongregasion a tabtabunuanna. Mabalin a marigatan ti kabbaro nga agibumbunannag nga agsao a sieepektibo iti panagbalaybalay a trabaho. (Aramid 20:20) Gapuna mabalin a kayatna ti agpatulong, nangnangruna iti daydiay mangyad-adal iti Biblia kenkuana iti libro a Pannakaammo. Mayanatup ti kasta a praktikal a tulong, ta insagana ni Jesu-Kristo dagiti adalanna iti ministerio.​—Marcos 6:7-13; Lucas 10:1-22.

⁸ Tapno epektibo ti ministeriotayo, nasken ti nasayaat a nasakbay a panagsagana. Ngarud, dagiti dua nga agibumbunannag mabalin nga umuna nga insiarenda a sangsangkamaysa dagiti presentasion a naisingasing kadagiti binulan a ruar Ti Ministeriotayo iti Pagarian. No mangrugida iti tay-ak ti serbisio, nalabit a ti ad-adut’ kapadasanna ti mangala iti damo a ruangan wenno iti maikadua. Kalpasan ti nainggayyeman nga introduksion, mabalin nga agbinnulig dagiti dua nga agibumbunannag a mangipaay iti pammaneknek. Ti panagtrabaho a sangsangkamaysa iti ministerio iti sumagmamano a lawas mabalin a mangiturong kadagiti nasayaat a panagsarungkar ken uray pay panangyadal iti Biblia iti pagtaengan iti libro a Pannakaammo a Mangiturong iti Biag nga Agnanayon. Nalabit a ti ad-adut’ kapadasanna nga agibumbunannag ti mangikondukta pay laeng iti panagadal sana iyallawat iti kabbaro a manangiwaragawag iti Pagarian. Anian a ragsak ti dua nga agibumbunannag no mangipakita ti estudiante iti Biblia iti panangapresiar iti pannakaammo ti Dios!

9. Ania dagiti urnos a maaramid no tarigagayan ti agibumbunannag ti mabautisaran?

⁹ Bayat a rumangrang-ay ti di nabautisaran nga agibumbunannag, mabalin nga agdedikar iti Dios babaen ti kararag ken tarigagayanna ti agpabautisar. (Idiligyo ti Marcos 1:9-11.) Rumbeng nga ipakaammona ti tarigagayna nga agpabautisar iti mamangulo a manangaywan iti kongregasion, a mangyurnos kadagiti panglakayen a mangrepaso a kadua ti agibumbunannag kadagiti saludsod iti panid 175 aginggat’ 218 ti Organisado a Mangitungpal ti Ministeriotayo. Dagiti uppat a paset a nakabingbingayan dagiti saludsod mabalin a saklawen iti tallo a sesion babaen ti tallo a nadumaduma a panglakayen no mabalbalin. No umanamongda nga addaan ti di nabautisaran nga agibumbunannag iti nainkalintegan a pannakaawat kadagiti sursuro ti Biblia ken kualipikado iti dadduma a pamay-an, ibagada kenkuana a mabalinnan ti agpabautisar. Kas resulta ti dedikasion ken bautismona, ‘namarkaanen’ maipaay iti pannakaisalakan.​—Ezekiel 9:4-6.

Panangipaay Kadagiti Naisangsangayan a Kasapulan

10. No nalpasnan nga inadal ti libro a Pannakaammo ken nabautisaranen, kasano a mapaadu ti maysa a tao ti pannakaammona iti Kasuratan?

¹⁰ No nalpasen a naan-anay ti indibidual ti panagadalna iti Biblia iti libro a Pannakaammo ken nabautisaranen, mabalin a saanen a kasapulan a pormal nga iyadalan iti maikadua a libro, a kas ti Nagkaykaysa iti Panagdayaw iti Maymaysa a Pudno a Dios.b Siempre, adut’ maadal ti kababautisar a tao iti panagsaganana maipaay kadagiti Nakristianuan a gimong ken regular nga itatabunona kadagitoy. Makagun-od met iti kanayonan a pannakaammo bayat nga isut’ tignayen ti wawna iti kinapudno nga agbasa ken agadal kadagiti Nakristianuan a publikasion iti pribado ken isarsaritana dagiti Nainkasuratan a banag kadagiti kapammatianna. Ngem kasanon no bumangon dagiti naisangsangayan a kasapulan?

11. (a) Kasano a natulongan ni Apolos babaen kada Priscila ken Aquila? (b) Ania a tulong ti mabalin nga ipaay iti kababautisar nga agkabannuag nga agngayngayangay a mangasawa?

¹¹ Uray ni Apolos, a “nalaing iti Kasuratan” ken nasursuruan a siuumiso maipapan ken Jesus, ti nagunggonaan idi a dagiti addaan kapadasan a Kristiano a da Priscila ken Aquila “inkuyogda ket ad-adda a siuumiso nga imbinsabinsada kenkuana ti dalan ti Dios.” (Aramid 18:24-26; idiligyo ti Aramid 19:1-7.) No kasta, ipapantayo nga agngayngayangay nga agarem ken mangasawa ti kababautisar nga agkabannuag. Nalabit a matulongan ti ad-adut’ kapadasanna a Kristiano nga agsapul iti impormasion maipapan kadagitoy a patangan kadagiti publikasion ti Watch Tower. Kas pagarigan, agparang ti makatulong a material kadagitoy a banag iti libro a Dagiti Saludsod nga Iyimtuod ti Agtutubo​—Dagiti Sungbat nga Epektibo, Seksion 7.c Ti agibumbunannag a nangyadal iti Biblia kenkuana mabalin a salaysayenna daytoy a material iti kabbaro, nupay saan a kasapulan ti regular a panagadal.

12. Ania a tulong ti maipaay iti kabbaro a nabautisaran a pagassaawan nga addaan kadagiti parikut iti panagasawa?

¹² Usigenyo ti sabali pay a pagarigan. Nalabit nga addaan parikut dagiti kababautisar nga agassawa iti panangyaplikar kadagiti nadiosan a prinsipio. Mabalin a makiumanda iti maysa a panglakayen, a mabalin a mangbusbos iti sumagmamano a rabii a mangsalaysay kadakuada kadagiti Kasuratan ken mangiturong iti atensionda iti impormasion a masarakan kadagiti publikasion ti Watch Tower. Nupay kasta, saan a mangipasdek manen ti panglakayen iti regular a panangyadal iti Biblia iti agassawa.

No Agbiddut ti Kabbaro

13. Apay a rumbeng a mangipakita iti asi dagiti panglakayen iti kongregasion iti kabbaro a nabautisaran a tao a nagbiddut ngem agbabbabawi?

¹³ Tuladen dagiti panglakayen ti Naindaklan a Pastor, ni Jehova, a nangikuna: “Siakto met laeng ti agpastor kadagiti karnerok, . . . bedbedakto daydiay nabungtol ket papigsaekto daydiay masakit.” (Ezequiel 34:15, 16; Efeso 5:1) Maitunos iti dayta nga espiritu, indagadag ni adalan a Judas a maipakita koma ti asi kadagiti napulotan a Kristiano nga addaan panagduadua wenno nagbasol. (Judas 22, 23) Yantangay siuumiso nga ad-adda a mangnamnamatay kadagiti addaan kapadasan a Kristiano, awan duadua a rebbeng a maipakita ti asi iti kababautisar a tao​—a maysa a kordero​—a nagbiddut ngem agbabbabawi. (Lucas 12:48; 15:1-7) Gapuna, dagiti panglakayen, nga ‘agukom a gapu ken Jehova,’ sidudungngo nga aywananda dagiti kasta a karnero ken siaalumamay nga aturenda ida.​—2 Cronicas 19:6; Aramid 20:28, 29; Galacia 6:1.d

14. Aniat’ rumbeng nga aramiden no agbasol iti nadagsen ti kababautisar nga agibumbunannag, ken kasano a matulongan?

¹⁴ Ibagatayon a dati a mangnginum ti kababautisar nga agibumbunannag ket napalaluanna manen ti imminum iti maysa wenno dua a gundaway. Wenno nalabit naparmekna ti panagsigsigariliona a nabayag a nakaigameranna ngem nasulisog nga agsigarilio a sililimed iti naminsan wenno namindua. Nupay dimmawaten ti kabbaro a kabsattayo iti pammakawan ti Dios, rumbeng nga agpatulong iti panglakayen tapno saan a mayugali ti basol. (Salmo 32:1-5; Santiago 5:14, 15) No dakamatenna ti biddutna iti maysa kadagiti panglakayen, rumbeng nga ikagumaan dayta a panglakayen nga aturen ti kabbaro iti naasi a pamay-an. (Salmo 130:3) Mabalin nga umdas ti Nainkasuratan a balakad a tumulong kenkuana a mangilinteg iti danana kalpasanna. (Hebreo 12:12, 13) Salaysayen daytoy a panglakayen dagiti kasasaad iti mamangulo a manangaywan iti kongregasion tapno maikeddeng ti kanayonan a tulong a maipaay.

15. Iti sumagmamano a kaso, aniat’ mabalin a nasken no agbasol ti kabbaro a nabautisaran a tao?

¹⁵ Iti dadduma a kaso, mabalin a saan nga umdas dayta. No adut’ makaammo, agpeggad ti arban, wenno adda sabsabali pay a nakaro a parikut, mangituding ti bagi dagiti panglakayen iti dua a panglakayen a mangimbestigar iti parikut. No masarakan dagitoy a panglakayen a talaga a nakaro ti parikut a kasapulan ti mangukom a komite, rumbeng nga ireportda daytoy iti bagi dagiti panglakayen. Kalpasanna, mangituding ti bagi dagiti panglakayen iti mangukom a komite tapno matulongan ti nagbasol. Rumbeng a makilangen kenkuana ti mangukom a komite iti nadungngo a pamay-an. Ikagumaanda koma nga aturen buyogen ti Kasuratan. No mangipangag kadagiti naasi a panagbannog ti mangukom a komite, iti kasta maikeddengda no adda aniaman a pagimbagan iti saanna a pannakaaramat kadagiti paset iti plataporma kadagiti gimong idiay Kingdom Hall wenno no rumbeng a mapalubosan nga agkomento kadagiti gimong.

16. Aniat’ mabalin nga aramiden dagiti panglakayen tapno matulongan ti nagbasol?

¹⁶ No mangipangag ti nagbasol, mangaramid ti maysa wenno dua a panglakayen iti mangukom a komite iti panagipastor nga isasarungkar tapno mapatibker ti pammatina ken mangpatanor iti panangapresiarna kadagiti nalinteg a pagalagadan ti Dios. Nalabit tunggal maysa kadakuada ti makipagtrabaho kenkuana iti tay-ak ti ministerio sagpaminsan. Mabalin a maaddaanda iti sumagmamano a Nainkasuratan a panagsasarita, a nalabit aramatenda dagiti maitutop nga artikulo iti Pagwanawanan ken Agriingkayo! ngem saanda a mangipasdek iti regular a panagadal iti Biblia. Buyogen ti kasta a nadungngo a panangaywan, mabalin a mapapigsa ti nagbasol a mangsaranget iti pagkapkapuyan iti lasag kadagiti masanguanan nga aldaw.

17. Ania dagiti addang a masurot no saan nga agbabawi ti nabautisaran a nakabasol ken dina panawan ti dakes nga aramidna?

¹⁷ Siempre, saan a pagpambar ti kinabiit pay a pannakabautisar iti awanan panagbabawi a panangyugali iti panagbasol. (Hebreo 10:26, 27; Judas 4) No saan nga agbabawi ti asinoman a bautisado a nakabasol ken dina panawan ti dakes nga aramidna, mailaksid iti kongregasion. (1 Corinto 5:6, 11-13; 2 Tesalonica 2:11, 12; 2 Juan 9-11) No agparang a nesesita daytoy a tignay, mangpili ti bagi dagiti panglakayen iti mangukom a komite. No mapasamak ti panangilaksid, maaramid daytoy ababa nga anunsio: “Nailaksid ni . . .”e

Tulonganyo Ida a “Rumang-ay iti Kina-nataengan”

18. Apay a makasiguradotayo a dagiti kabbaro a nabautisaran a Kristiano ken dadduma pay ket kanayon nga adunto pay ti adalenda maipapan ken Jehova ken iti pagayatanna?

¹⁸ Agtalinaed ti kaaduan kadagiti adipen ti Dios iti arban. Kasta met, makaparagsak ta tunggal maysa kadatayo makaasideg nga ad-adda iti nailangitan nga Amatayo agsipud ta kanayon a makasursurotayo iti ad-adu pay maipapan kenkuana ken iti pagayatanna. (Eclesiastes 3:11; Santiago 4:8) Awan duadua nga adu pay idi ti adalen dagiti rinibu a nabautisaran idi Pentecostes 33 K.P. (Aramid 2:5, 37-41; 4:4) Kasta met dagiti Gentil nga awanan pannakaammo iti Kasuratan. Kas pagarigan, pudno daytoy kadagidiay nabautisaran kalpasan ti panagbitla ni Pablo iti Areopago sadi Atenas. (Aramid 17:33, 34) Kasta met ita, adu pay ti sursuruen dagiti kabbaro a nabautisaran ken masapulda ti tiempo ken tulong a mangpapigsa iti pangngeddengda nga agtultuloy a mangaramid iti umiso iti imatang ti Dios.​—Galacia 6:9; 2 Tesalonica 3:13.

19. Kasano a matulongan dagidiay mababautisaran a “rumang-ay iti kina-nataengan”?

¹⁹ Tinawen a rinibu ti mabautisaran ken makasapul iti tulong tapno “rumang-ay[da] iti kina-nataengan.” (Hebreo 6:1-3) Babaen ti sao, ulidan, ken praktikal a tulong iti ministerio, matulonganyo ti sumagmamano a mangikawes iti baro a personalidad ken ‘agtultuloy a magna iti kinapudno.’ (3 Juan 4; Colosas 3:9, 10) No maysakayo nga aduan kapadasan nga agibumbunannag, mabalin nga awisendakayo dagiti panglakayen a tumulong iti kabbaro a kapammatian iti tay-ak ti serbisio wenno makisarita kenkuana maipapan kadagiti Nainkasuratan a punto iti sumagmamano a lawas tapno mapabileg ti pammatina iti Dios, ti panangapresiarna iti Nakristianuan a panaggigimong, ken dadduma pay. Umasping ti relasion dagiti pastor ken ti arban iti ama a mamalbalakad ken iti ina a nadungngo. (1 Tesalonica 2:7, 8, 11) Nupay kasta, adda sumagmamano a panglakayen ken ministerial nga adipen a saanda a magabenan nga asikasuen ti amin a kasapulan iti kongregasion. Umaspingtay amin iti maysa a pamilia nga agtitinnulong dagiti miembrona. Adda maaramidan ti tunggal maysa kadatayo tapno matulongan dagiti padatayo a managdaydayaw. Dakayo a mismo mabalinanyo ti mangparegta, mangliwliwa iti malmalday, mangsaranay iti nakapuy.​—1 Tesalonica 5:14, 15.

20. Aniat’ maaramidanyo tapno maisaknap ti pannakaammo ti Dios ken tapno maipaay ti nadungngo a panangaywan kadagiti karnero iti pagpaaraban ni Jehova?

²⁰ Kasapulan ti sangatauan ti pannakaammo ti Dios, ket kas Saksi ni Jehova, mabalinyo ti makiraman a sirarag-o iti panangisaknap iti dayta. Kasapulan dagiti karnero ni Jehova ti nadungngo a panangaywan, ket mabalinyo ti maaddaan iti naayat nga akem iti panangtulong a mangipaay iti daytoy. Sapay koma ta bendisionan ni Jehova ti ministerioyo, ken supapakanna ti naimpusuan a panagreggetyo a tumulong kadagiti karnero iti pagpaarabanna.

[Dagiti Footnote]

Kasanoyo a Sungbatan?

◻ Kasanot’ panangtrato ni Jehova kadagiti karnerona?

◻ Aniat’ aramiden no tarigagayan dagiti kabbaro ti mangasaba?

◻ Kasano a matulongan dagiti kapammatian dagiti kabbaro nga addaan kadagiti naisangsangayan a kasapulan?

◻ Aniat’ maitulong dagiti panglakayen kadagidiay agbiddut ngem agbabawi?

◻ Kasanoyo a matulongan ti kabbaro a nabautisaran a “rumang-ay iti kinanataengan”?

[Ladawan iti panid 16]

Nalatak ni Charles T. Russell kas maysa a naayat a pastor ti arban

[Ladawan iti panid 18]

Sidudungngo a tratuen dagiti naasi a pastor ti arban ti Dios