Ti Kaiyulogan dagiti Damdamag
Sekreto iti Kinaragsak?
“Dua a tawen a panagrigat, agnanayon a kinaragsak.” Daytoy, sigun iti diario a Hapones a Yomiuri Shimbun, isu dagiti sasao a pagay-ayat dagiti estudiante nga Insik idiay Japan. Babaen ti pananginanama a bumaknang, dagitoy nga estudiante umutangda iti pundo tapno mapan idiay Japan, a patienda nga agtudo iti kuarta manipud langit. Inanamaenda a babaen ti panagtrabaho iti uneg ti dua a tawen kadagiti paset-tiempo a trabaho bayat ti panageskuelada, makaurnongda iti dua milion a yen (agarup $15,400, E.U.) ket kalpasanna agawiddan ket agbiag a siraragsak kalpasanna.
Ti kasta a panagtalek iti kuarta a sekreto iti kinaragsak ket nasaknap iti sangalubongan. Maysa a nabiit pay a surbey kadagiti agtutubo iti 9 kadagiti 11 a pagpagilian a nangipalgak a ti “‘kuarta’ isu ti umuna iti listaan” dagiti pakadanagan ken pakaseknanda, kuna ti Asahi Evening News.
Ti kadi panagtalek iti kinabaknang pudno a lukatanna ti ruangan iti kinaragsak? Namakdaar ni Ari Salomon a “ti managayat iti pirak dinto mapnek iti pirak.” (Eclesiastes 5:10; 7:12) Ti panangiyun-una iti kuarta saan nga agbanag iti pudno a pannakapnek, ket dina met ipanamnama ti kinatalged iti masanguanan. Kas pangarigan, kunaen ti Biblia: “Uray ti pirakda uray ti balitokda didanto mabalin ti mangispal kadakuada iti aldaw ti pungtot ni Jehova.” (Sofonias 1:18) Maisupadi, nupay kasta, nagsurat ni salmista David: “Naragsak ti maingel a tao a pagbalinenna a pagkammatalkanna ni Jehova.” Ti panagtalek ken ni Jehova, saan nga iti kuarta, isu ti sekreto iti panangtagiragsak iti agnanayon a kinaragsak.—Salmo 40:4; Isaias 30:18.
Parikut iti Bautismo
Timmaud ti dua a parikut maipapan iti bautismo ti maladaga kadagiti nabiit pay a tiempo iti Church of England. Ti umuna ket maipapan iti “awan pilpilienna” a bautismo, isu a deskribiren dagiti papadi a maysa a kita iti “naespirituan a bakuna.” Ti maikadua isu ti panagkedked dagiti umad-adu a bilang dagiti papadi a mangbautisar kadagiti maladaga a dagiti nagannak kadakuada saan nga aktibo a mangsupsuportar iti Church of England.
Adu a papadi mabigbigda a dagiti nagannak masansan a dida tarigagayan ti tumabuno iti simbaan ket dida met kayat a tumabuno dagiti annakda. Apay ngarud a bautisaran dagiti maladaga? “Kayatda a mabuniagan dagiti annakda,” kuna ti The Times, “kas met iti panagayatda a mangted wenno umawat iti regalo iti kasangay, mangdekorasion kadagiti pagtaenganda iti Krismas . . . Daytat’ paset ti kulturada: saan a masapul ti rason.”
Nagikkat ti maysa a padi gapu ta nakagteng iti konklusion a ti panangbautismo kadagiti maladaga saan koma a maaramid. Kinunana: “Ti laeng mabalin a makitulag ken Kristo isu ti tao a mismo.” Mabalin nga innayonna koma a ni Jesu-Kristo ket 30 años idi nabautisaran ket ti Griego a sao a para iti bautismo, ba·ptiʹzo, kaipapananna ti itaneb wenno irarem. Kalpasan ti pannakabautisarna idiay Karayan Jordan, “simmang-at [ni Jesus] iti danum.” (Marcos 1:10; Mateo 3:13, 16) Awan ti tinukoy ti Biblia sadiay a panangiwarsi iti danum iti maladaga. Yantangay ti bautismo ket simbolo ti dedikasion ti maysa a tao iti Dios kas sumursurot iti addang ni Kristo, daytat’ saan a desision a kabaelan nga aramiden ti maysa a maladaga.
Dagiti Panglapped iti Sikog ken dagiti Katoliko
Ti ibubusor ti Iglesia Katolika kadagiti panglapped iti Sikog ket pinatalgedan ni Juan Paulo II idiay Maikadua nga International Congress on Moral Theology a naaramid idiay Roma iti napalabas a Nobiembre. Sigun iti diario ti Vatican City, a L’Osservatore Romano, kinunana: “Daytat’ saan a doktrina nga inimbento ti tao. Daytat’ insurat ti manamarsua nga ima ti Dios a naisaad iti pannakaparsua ti tao. Awan duadua a dayta kaipapananna ti panangikedked iti paglaingantayo iti Dios,” ket ngarud, kinunana pay, “di mabalin a suppiaten dagiti teologo a Katoliko.”
Ngem ti surat ti papa a Humanae Vitae a tuktukoyen ni Papa Juan Paulo ken insurat ni Paulo VI 20 a tawenen ti napalabas “ket dagdagus a sinuppiat dagiti adu a teologo,” kuna ti diario nga Italiano a La Stampa, ken di inkankano “dagiti kaaduan a Katoliko.”
Nalawag, ti di maisin a takder ti iglesia maipapan iti parikut iti pananglapped iti sikog ti nangsinasina kadagiti teologo ken kasta unay a riniribukna dagiti napasnek a Katoliko. Ti agtultuloy a pannakasinasina maipapan iti panangusar iti aniaman a kita iti panglapped iti sikog ti nangtignay ken Juan Paulo a mangbagbaga kadagiti teologo nga agsaoda “iti maymaysa a pagsasao.” Kaskasdi, maisupadi iti kunaen ti papa a ti takder ti iglesia maipapan iti panglapped iti sikog ket “insurat ti manamarsua nga ima ti Dios,” kuna ti diario a La Repubblica nga “awan ti naisitar iti Ebanghelio wenno iti Daan a Tulag a mangpatalged iti doktrina.”
Awan ti salaysayen ti Biblia a panangusar kadagiti panglapped iti sikog wenno panangtimbeng iti panagsikog iti panagasawa, wenno dina met kunaen a dagiti Kristiano obligadoda a maaddaan kadagiti annak. Ipabiang ti Sao ti Dios ti panagplano ti pamilia iti konsiensia ti tunggal agassawa a Kristiano. Babaen ti panangipaulogna iti paglinteganna maipapan iti panangtimbeng iti panagsikog, ti Iglesia Katolika “linabsanna dagiti bambanag a naisurat.”—1 Corinto 4:6.