Ti Kinamanagpadagus ti Malta Mangiyeg Bembendision

TI Malta impaayna iti maabrasa a pagsangladan ni apostol Pablo idi narba ti barangayda idi umuna a siglo K.P. Dagiti umili iti puro ti “situtulong” a nangabrasa kenkuana agraman dagiti kaduana a managdaliasat. Kinapudnona, dagiti taga Malta pinakitaanda dagiti managdaliasat iti “naisangsangayan a naimbag a nakem.”​—Aramid 28:1, 2.

Kalpasanna, ti panguluen iti puro, a ni Publio, inawatna ni Pablo ken dagiti kakaduana ket ‘pinadagusna ida iti tallo nga aldaw a siaayat.’ Idi nagraira ti damag a pinaimbag ni Pablo ti ama ni Publio iti gurigor ken panagiblengna, “dagiti sabsabali met nga addaan nasaksakit idiay a puro immayda tapno maagasanda.” (Aramid 28:7-9) Ngem ad-adu pay ti inaramid ni Pablo. Intukitna dagiti bukel ti kinapudno kadagiti puso ti tattao, ket nagresulta daytoy iti adu a bendision kadagitoy a managpadagus nga agnaed iti puro. Ita, isu met laeng ti maar-aramid idiay Malta. Umaykayo ket kitaenyo no kasano.

Dagiti Bisita Iyegda ti Naimbag a Damag

No maimatangan manipud iti tangatang, ti masilnagan iti init a Malta sumilap a kas maysa nga alahas a naisaad iti asul a Mediterano. Apaman nga umas-asideg iti Luga Airport, makita ti bisita ti pinatikag ti init a daga a kasla bassit laeng dagiti mula. No addaka iti daga, maammuanna a daytoy onse por disiseis kilometros nga isla ket isut’ pagtaengan ti mapattapatta a 347,000 nga umuli. Dagiti nagtimbukel ken timmarid nga adu a simsimbaan ipalgakda ti relihiuso a nalikudanna. Ngem iti daytoy maika-20 a siglo, kasano a nabenipisiaran dagiti taga Malta manipud iti ibibisita dagiti Saksi ni Jehova?

Maysa nga agdaldaliasat a manangaywan a managan David ti simmarungkar iti pagtaengan ni Juliana ket nakasarak iti sidadaan a panangawat iti mensahe ti Pagarian. “Makasuronak unay iti pannakinamin ti iglesia iti politika,” kuna ni Juliana, “ket iti kasta pinadasko a sapulen idiay Biblia ti kinapudno maipapan iti gobierno ti Dios. Ngem bayat a basbasaek dayta, adda bambanag a diak dagdagus a maawatan. Agasenyo no kasanot’ pannakasdaawko idi daytoy nga immawag iti ruanganko insaludsodna no ammok no ania ti Pagarian ti Dios! Insigida, indawatko kenkuana nga ipakitana kaniak ti sungbat iti katoliko a Bibliak. Inaramidna dayta. Iti dayta met laeng nga aldaw ammokon a nasarakak ti kinapudno.”

Maysa a lokal a Saksi inyurnosna ti panagadal iti Biblia ken Juliana. Idi nagsubli ni David sadi Malta innem a bulan kalpasanna, anian a nagsayaat a surpresa nga isut’ abrasaen ni Juliana idiay Kingdom Hall! Iti mabiit isut’ sisasaganan nga agbalin a maysa a managibumbunannag ti naimbag a damag ti Pagarian.

Ti lakay ni Juliana, a ni Francis, maburburiboran met kadagiti sursuro ti iglesia. Bayat nga isut’ bumisbisita ken baketna idi isut’ naiyospital, nasarakanna nga isut’ agdengdengngeg iti tape recordings ti palawag publiko iti Biblia a naipaay idiay Kingdom Hall. Idi mangngegna ti presentasion maipapan iti tema ti pamilia, napaliiw ni Francis no kasanot’ kinaumiso dagiti balakad iti Biblia, ket kas resultana, inkeddengna ti mangrugi nga umatender kadagiti Nakristianuan gimong. Di nagbayag nakitana ti problema a masapul a masolbar. Ania dayta?

Iti agarup 20 a tawtawenen, agtartrabaho ni Francis kas katulongan iti casino. Mabigbigna itan a dayta nga trabaho a nainaig iti panagsugal ket di maitunos kadagiti Nakristianuan a prinsipio a mangkondenar iti kinaagum ken panagimbubukodan. (Roma 13:9, 10; 1 Corinto 6:9, 10) “Nupay no idi damo nagkurangak iti pammati a kasapulan tapno baliwak ti trabahok,” inadmitir ni Francis, “nagkararagak maipaay iti tulong ni Jehova. Kamaudiananna, nakasarakak iti dadduma a trabaho a mamagbael kaniak a mangaywan iti asawak ken ti anakko a lalaki, a ni Sandro.” Ita, agserserbin ni Francis a kas panglakayen iti lokal a kongregasion dagiti Saksi ni Jehova.

Liwliwa Manipud kadagiti Kasuratan

Ni Rose siraragsak a naiyasawan ken ni George iti innem a tawen idi nakaam-amak a natay ni George iti maysa nga aksidente. Awan ti nasarakanna a liwliwa iti kinuna ti padi nga innala ti Dios ni George gaput’ panagimunna iti adda nga ayat ni Rose ken ni lakayna. Nagleddaang unay ni Rose ta plinanona ti mangkettel ti biag dagiti tallo nga annakna ket kalpasanna isut’ agbekkel.

Ngem anian a panagbalbaliw ti dimteng ken Rose idi maysa a kaaruba a Saksi nga agnagan Helen inrugina nga inkondukta ti panagadal ti Biblia kenkuana! Di nagbayag naliwliwa ni Rose babaen iti sursuro ti Kasuratan iti panagungar. (Juan 5:28, 29) Kabayatanna, ti pammaregta naggapu ken Peter, sabali pay a bumisbisita a manangaywan. Nagunggonaan unay kadagiti palawagna maipapan iti panagungar. Naparegta iti daytoy a namnama, kimmadua ni Rose ken ni Helen iti panangaskasaba ti publiko, ket agpadpadadan nga agserserbi kas regular payunir, wenno amin-tiempo a manangaskasaba ti Pagarian.

Panangpabileg nga Agbalin a Naregta

Aggapu ni Joe iti maysa a dakkel a pamilia, ta addaan iti 12 a kakabsat a lallaki ken babbai. Gapu ta pinaregta ti agdaldaliasat a manangaywan, sireregta a nangaskasaba kadagiti adu a kabagianna. “Idi damo,” kunana, “ammo ti pamiliak a ti inlawlawagko kadakuada ket umiso. Ngem idi nakitada a dimmakkel ti interesko nga agbalin a Saksi, binalbaliwanda ti isipda, ket amindan ti bimmusor kaniak​—nangnangruna ni tatangko.” Ti kadi kababalinda pinakapuyna ti regta ni Joe?

Saan a pulos! Kas pangarigan, idi ti ubing nga anak ti maysa kadagiti kabsatna ket nagsakit a ngangnganin matay, nangted pammaneknek ni Joe iti kabsatna, a nakisarita maipapan iti namnama a panagungar. Itan daytoy a kabsat a babai maysan a bautisado a Saksi ni Jehova. Sumaruno, maysa kadagiti manongen ni Joe ken ti pamiliana nangipakitada iti interes iti kinapudno. Kalpasanna ti inauna a kabsat a lalaki ken ti pamiliana dimmasigda iti Pagarian ti Dios. Kabayatanna, marubrubroban ti pungtot ti tatang ni Joe. Idi ti buridekda a kabsat a babai nangrugi met nga agadal iti Biblia, pinagtalawna ni Joe iti pagtaengan. Saan a nalapdan, inusar ni Joe ti tunggal okasion a mangbisita kadagiti kabagyanna ket makisarita maipapan iti mensahe ti Biblia. Kaskasdi, sipupungtot a nagtignay ni tatangna ket kinunana: “Apay a dika kasarita ti padi? Ammona a nalaing ti Biblia!” Simmungbat ni Joe a siraragsak a mangaramid iti dayta no isut’ kuyogen ni tatangna. Aniat’ nagbanagan ti ibibisitada?

“Nangiyurnoskami iti aldaw ken oras,” linagip ni Joe, “ngem ti padi kayatna a maammuan ti suheto tapno makapagsagana, nga inlawlawagna a gapu ta pito a tawenen ti napalabas idi a pimmanaw iti seminario, kasapulanna itan ti mangaramid iti sumagmamano a panagsirarak. . . . Ngem kalpasan ti maysa a lawas, maysa a bulan, ken uray pay dua a bulan, awan pulos sinalimetmetanna a tulagan. Idi napaliiw ni tatangko daytoy, binalbaliwanna ti panunotna maipapan iti iglesia ket in-inut a nabigbigna a ti naadalko manipud Biblia ket pudno.” Iti kamaudiananna inakseptar ti tatang ni Joe ti kinapudno, a mangiyeg iti bilang a 29 kadagiti miembro ti pamiliana nga agserserbin ken Jehova.

Ti Makatulong a Balakad Mangiyeg kadagiti Bendision

No pagsaritaan a sireregta maipapan iti maysa pay a bumisbisita a manangaywan, ti maysa a naasawaan a payunir nga agnagan ti Ignatio ilawlawagna: “Ni Paul ken ti asawana immayda nakipagian kadakami. Tinulongandakam a dua iti relasionmi nga agasawa agraman iti tay-ak ti panagserbi. Kanayon nga ipaganetgetna ti kinapateg ti panangaskasaba.”

Linagip ni Ignatio ti napasamak idi nakisarita ni Paul kadagiti panglakayen ken ministerial nga adipen iti kongregasion bayat ti maudi nga ibibisitana. “Idi kinunak a diak pay laeng mangasaba iti dayta a bigat tapno isaganak ti pasetko iti programa ken iti gimong,” kunan Ignatio, “kuna ni Paul nga isut’ rummuar iti tay-ak ti panagserbi a kas iti naiyurnos uray no isut’ diak makadua. Iti dayta, inkeddengko met ti mapan. Anian ti panangbendision ni Jehova iti desisionko! Iti dayta a bigat nakairugiak iti panagadal iti Biblia, ket manipud iti dayta, addan innem a tattao iti kinapudno.”​—Idiligyo ti 3 Juan 4.

Panagpipinnaregta

Tunggal bumisita ti agdaldaliasat a panglakayen kadagiti pada a Saksi idiay Malta, isut’ awatenda a padagusenda ket magagaranda a magunggonaan manipud iti pammaregta ken pammalakadna. (Idiligyo iti 3 Juan 5-8.) Kas resultana, umad-adu a taga Malta ti mangal-ala iti natibker a takderda maipaay ken Jehova ken iti Pagarianna. Idi agngudo ti 1989 a tawen ti serbisio, 389 kadagitoy a managpadagus nga agnaed iti puro ti nangaramiden iti kasta. Itan a naorganisardan iti lima a rumangrang-ay a kongregasion (uppat idiay Malta ken maysa iti kabangibang a puro ti Gozo), iwarwaragawagda a situtured ti naimbag a damag.

Amin nga agdaldaliasat a manangaywan a natudingan a bumisita idiay Malta kadagiti nabiit pay a tawen nariknada ti narikna ni apostol Pablo, a nagkuna kadagiti Romano a Kristiano: “Ta tarigagayankayo a makita, tapno ipaayankayo iti sagut a naespirituan tapno mapabilegkayo.” Ti ibibisitada pudno a nagresulta iti makapabang-ar a “panagpipinnaregta.” (Roma 1:11, 12) Mainayon pay, dagiti panangikaskasaba ti Pagarian a trabaho dagiti Saksi ni Jehova mangiyegda iti nabaknang a naespirituan a bendision kadagiti managpadagus nga umili ti Malta.

[Mapa/Dagiti Ladawan iti panid 24, 25]

(Para iti aktual a pannakaurnosna, kitaem ti publikasion)

GOZO

COMINO

MALTA

Valletta

Baybay Mediterano

8 km

5 mi