Saganaan ti Aldaw ni Jehova!
Dagiti Tampok Manipud Umuna a Tesalonica
ALDAW ni Jehova! Impagarup dagiti Kristiano idiay Tesalonica idi ugma a daytat’ asidegen. Umisoda kadi? Kaano ngata ti iyuumayna? Daytat’ maysa a nasken a banag a naisalaysay iti umuna a surat ni apostol Pablo kadagiti taga Tesalonica, a naipatulod manipud Corinto iti agarup tawen 50 iti Kadawyan a Panawentayo.
Impasdek da Pablo ken Silas ti kongregasion idiay Tesalonica, ti administratibo a sentro ti Romano a probinsia ti Macedonia. (Aramid 17:1-4) Iti kamaudianan, iti umuna a suratna kadagiti taga Tesalonica, nangted ni Pablo ti komendasion, nangipaay ti pammagbaga, ken insalaysayna ti aldaw ni Jehova. Magunggonaantay met manipud itoy a suratna, nangnangruna maipapan iti aldaw ni Jehova nga itan nakaas-asidegen.
Mangkomendar ken Mangparegta
Umuna kinomendaran ni Pablo dagiti taga Tesalonica. (1Te 1:1-10) Ti komendasion ket maipaay iti matalek nga aramid ken panagibturda. Makomendaranda pay, ta “inawat[da] ti sao a nabuyogan ti adu a rigat agraman ragsak ti nasantuan nga espiritu.” Komkomendaranyo met aya dagiti dadduma, kas ken Pablo?
Nangipakita ti apostol ti nasayaat nga ulidan. (2:1-12) Agpapan pay nagubsang a pannakatratona idiay Filipos, isut’ naaddaan ‘tured babaen iti Dios a mangisao ti naimbag a damag’ kadagiti taga Tesalonica. Inidianna ti panangal-aliog, kinaagum, ken panagsapsapul ti pakaidayawan. Saan a nagbalin ni Pablo a nagasto a pakadagsenan no di ket isut’ nakadungdungngo kadakuada kas ina nga agtagibi iti anakna met laeng. Anian a nagsayaat nga ulidan para kadagiti panglakayen itatta!
Ti sumaganad a sasao ni Pablo pinaregtana dagiti taga Tesalonica nga agtalinaed a natibker no maidaddadanes. (2:13–3:13) Inibturanda ti pannakaidadanes babaen kadagiti kailianda, ket ni Timoteo nangyeg naimbag a damag ken Pablo maipapan ti kasasaadda iti naespirituan. Nagkararag ti apostol nga adduanda koma iti ayat ken mapatibker koma ti pusoda. Kasta met, ita ikarkararagan dagiti Saksi ni Jehova dagiti maidaddadanes a kapammatianda, a paregtaenda ida no mabalin, ken makipagrag-o kadagiti damag ti kinamatalekda.
Agtalinaed a Siririing ti Naespirituan!
Sumaganad immawat dagiti taga Tesalonica ti balakad. (4:1-18) Rebbeng nga ad-adda a rumang-ayda iti kurso a makaay-ayo iti Dios, nga iparangarang ti dakdakkel a nainkabsatan nga ayat ken agtrabahoda a mismo maipaay kadagiti kasapulanda. Mainayon pay, aglilinniwanliwada koma iti maysa ken maysa a mangin-inanama nga iti kaadda ni Jesus dagiti mammati a naiyanak iti espiritu a natayen bumangondanto nga umuna ket maitiponda kenkuana. Kalpasanna, dagiti sibibiag pay a napulotan inton ipapatay ken panagungarda maikaduadanton ken Jesus ken kadagidiay napagungaren iti nailangitan a biag.
Sumaganad insalaysay ni Pablo ti aldaw ni Jehova ken nangted pay ti kanayonan a pammagbaga. (5:1-28) Ti aldaw ni Jehova umay kas maysa a mannanakaw, a buyogen ti kellaat a pannakadadael kalpasan ti panangipukkawda ti: “Talna ken talged!” Gapuna masapul a dagiti taga Tesalonica agtalinaedda a siririing iti naespirituan, a masalakniban iti kabal ti barukong ti pammati ken ayat ken babaen ti namnama ti pannakaisalakan kas kabal ti ulo. Masapul a bigbigenda dagidiay mangidadaulo ti kongregasion ken umadayoda iti kinadakes, kas rebbeng met kadatayo.
Ti umuna a surat ni Pablo kadagiti taga Tesalonica rebbeng a tignayennatayo a mangted komendasion ken pammaregta kadagiti kapammatiantayo. Tignayennatayo met koma nga agbalin a mapagulidanan iti ugali ken kababalin. Ken pudno unay ti balakadna tulongannatayo met a saganaan ti aldaw ni Jehova.
[Kahon/Ladawan iti panid 22]
Kabal ti Barukong ken Ulo: Iti panangigunamgunamna ti panagbalin a siririing iti naespirituan, insurat ni Pablo: “Managparbengtayo koma nga ikapettayo a kabal ti barukong ti pammati ken ayat ken kabal ti ulo ti inanama ti pannakaisalakan.” (1 Tesalonica 5:8) Ti kabal ti barukong salaknibannat’ barukong ti mannakidangadang, a daytat’ buklen dagiti kas siksik a metal, dagiti kadena, wenno solido a metal. Umasping iti dayta, ti kabal ti barukong ti pammati salaknibannatayo iti naespirituan. Ket ti met ngay kadaanan a kabal ti ulo? Masansan a naaramid iti metal, daytat’ kallugong militar a nadisenio a mangsalaknib iti mannakibakal bayat ti laban. Kas ti helmet salaknibanna ti ulo ti mannakigubat, kasta met ti namnama ti pannakaisalakan salaknibanna dagiti pannakabalin ti isip, iti kasta mataginayon ti Kristiano ti kinatarnawna. Anian a nagpateg a ti ili ni Jehova isuotda dayta a naespirituan a kabal!—Efeso 6:11-17.