Ti Ayat a Nainkabsatan ket Aktibo
Dagiti Tampok Manipud Filemon
NI Jesu-Kristo intedna kadagiti paspasurotna ti “baro a bilin” nga agayan-ayatda iti maysa ken maysa a kas ti panagayatna kadakuada. (Juan 13:34, 35) Gapu itoy nga ayat, uray pay matayda maigapu iti maysa ken maysa. Wen, ti nainkabsatan nga ayat kastat’ kapigsa ken kaaktibona.
Ni apostol Pablo nakasigurado a ti nainkabsatan nga ayat gutugotenna ni Filemon, maysa a Kristiano a naitimpuyog iti kongregasion idiay Colosas, a siudad iti Asia Menor. Ti ayat isut’ nangtignay ken ni Filemon a manglukat iti balayna tapno mausar kas Nakristianuan a pagtataripnongan. Ni Onesimo nga adipen ni Filemon nagtalaw, mabalin a nagtakaw tapno gastuenna iti panagbiahe a mapan Roma, a sadiay naam-ammona ni Pablo iti kamaudianan ket inawatna ti Kinakristiano.
Bayat a sibabalud idiay Roma idi agarup 60-61 K.P., ni Pablo nagsurat iti maysa a surat a naiturong a nangnangruna ken Filemon. Nagapelar ken ni Filemon tapno awatenna manen ni Onesimo a buyogen ti espiritu ti nainkabsatan nga ayat. Basaenyo daytoy a surat, ket makitayonto nga isut’ maysa a nasayaat nga ulidan ti ayat ken taktika—maysa a banag a nagsayaat a tuladen dagiti tattao ni Jehova.
Komendasion iti Ayat ken Pammati
Iti pannakisaritana ken Filemon ken kadagiti sabsabali, ni Pablo nangted nga immuna iti komendasion. (Bersikulo 1-7) Ti apostol kanayon a mangmangngegnat’ maipapan iti pammatina. Daytoy ti nangtignay ken Pablo nga agyaman ken Jehova ken nangyeg kenkuana iti dakkel a rag-o ken liwliwa. Komkomendarantay met laeng aya a personal dagiti padatayo a manamati a mapagulidanan iti ayat ken pammati? Aramidentay koma a kasta.
Ti panangbagbaga a naibatay iti ayat ket kankanayon a matarigagayan iti pannakilangenlangen kadagiti pada a Kristiano, kas ipakita dagiti sasao ni Pablo. (Bersikulo 8-14) Kalpasan ti nataktika a panangiruginat’ pammagbaga, ti apostol kinunana a nupay mabalinna a bilinen ni Filemon “nga aramiden ti umiso,” imbes ketdi, pinilina nga isut’ balakadanna. Tapno aramiden ti ania? Tapno awatenna ti adipen nga Onesimo iti naasi a wagas! Kalikaguman ni Pablo a pagtalinaeden dagiti napateg a serbisio ni Onesimo ngem dina aramiden daytoy no awan pammalubos ni Filemon.
Dagiti kasla di nasayaat a paspasamak masansan mapaneknekanda a makagunggona, kas sumaruno nga impakita ni Pablo. (Bersikulo 15-21) Kinaagpaysuanna, nasayaat ti imbungana idi nagtalaw ni Onesimo. Apay? Agsipud ta isut’ mapasublin ni Filemon kas maysa a natulok, nasingpet a Kristiano a kabsat, saanen a kas maysa a mapilpilit, naulbod nga adipen. Kiniddaw ni Pablo ken Filemon nga abrasaenna ni Onesimo a kas met pannakaabrasa ni Pablo. No rinanggasan ni Onesimo ni Filemon iti aniaman a pamay-an, ti apostol ti agbayad. Tapno natultulok pay nga agtungpal ni Filemon, impalagip ni Pablo kenkuana nga isu a mismo ket nakautang iti apostol iti panagbalinna a Kristiano. Gapuna, sigurado ni Pablo a ni Filemon aramidennat’ ad-adu pay ngem iti makiddaw nga aramidenna. Anian a nataktika, naayat a kiddaw! Pudno unay, isu daytoy ti wagas a pannakilangentay koma kadagiti padatayo a Kristiano.
Inleppas ni Pablo ti suratna iti maysa nga inanama, dagiti kablaaw, ken dagiti parabur. (Bersikulo 22-25) Ninamnamana a babaen kadagiti karkararag dagiti sabsabali a maipaay kenkuana, isut’ mawayawayaanton manipud pannakaibalud. (Kas ipakita ti maikadua a surat ni Pablo ken Timoteo, dagidiay a karkararag nasungbatanda.) Kas pangserra iti suratna, ni Pablo nangted kadagiti kablaaw ket inyebkasna ti parabur ti di magatadan a kinamanangaasi ni Kristo Jesus maipaay koma iti espiritu nga impakita ni Filemon ken dagiti padana a managdaydayaw ken Jehova.
[Kahon/Ladawan iti panid 23]
Napatpateg Ngem Adipen: Maipapan ti panagsubli ni Onesimo a nagtalaw nga adipen ni Filemon, kinuna ni Pablo: “Ta nalabit . . . isu naiyadayo kenka iti bassit a tiempo, tapno isu agsubli nga agtaeng kenka iti agnanayon, saanen a kasla adipen no di ket napatpateg ngem adipen, kasla kabsat a dungdungnguen, nangruna kaniak, ngem nangnangruna pay kenka nga agpadpada iti lasag ken iti biang ti Apo.” (Filemon 15, 16) Idiay Imperio ti Roma, ti pannakaadipen impaalagad ti imperial a gobierno, ket ni Pablo binigbigna dagiti kakasta a “nangangato a turturay.” (Roma 13:1-7) Saanna nga imparegta ti panagalsa dagiti adipen ngem tinulonganna dagiti kakasta nga indibidual a manggun-od ti espiritual a wayawaya kas Kristiano. Maitunos iti bukodna a balakad para kadagiti adipen nga agpasakopda kadagiti appoda, ni Pablo imbaonna ni Onesimo tapno agsubli ken Filemon. (Colosas 3:22-24; Tito 2:9, 10) Ni Onesimo napatpateg itan ngem ti maysa a nailubongan nga adipen. Isut’ maysa a madungdungngo a pada a manamati nga agpasakop ken Filemon kas nasaysayaat nga adipen, maysa a maiwanwanwan babaen kadagiti nadiosan a prinsipio ken mangiparparangarang ti nainkabsatan nga ayat.