Apay a Nakabaybayag nga Ibanag ti Isyu?
AGANGAY 6,000 a tawen ti napalabasen, ti kinasoberano ti Dios saan idi nga isyu. Iti pannakairingpas ti nakaskasdaaw nga ar-aramid ti panamarsuana, “ti Dios nakitana amin nga inaramidna ket, adtoy! nasayaatda unay.” (Genesis 1:31) Kalpasanna simrek iti naunday a panawen ti “panaginana”; saan, siempre, a gapu ta nabannogen iti pisikal. Imbes ketdi, naginana a kaipapanannat’ panangisardengna ti panagparsuana ditoy daga, addaan panagtalek a ti naimbag a panggepna maiyannugot kadagitoy ket maysanto a naan-anay a balligi.—Genesis 2:1-3; Isaias 55:11.
Ania dayta a panggep? Inkabil ni Jehova ti umuna a natauan a pagassawaan iti maysa a lugar a naawagan ti minuyongan ti Eden. Ti immuna nga annongenda isut’ panangaywan ti naparaisoan a pagtaenganda, agraman ti nagadu a nagduduma nga animal. Kasta met, mangpatanorda kadagiti ubbing. Kabayatanna, bayat a dimmakkel ti pamiliada, isaknapda ti Paraiso agingga kadagiti ungto ti daga kas panagtungpal iti bilin ti Dios nga ‘iturayanyo ti daga.’ Gapuna, ti daga agbalinto iti kamaudianan a maysa a nadayag a pagtaengan, paggianan ti maysa a naragsak, nagkaykaysa a pamilia nga agserserbi iti nailangitan nga Amada. Dayta ti orihinal a panggep ti Dios.—Genesis 1:27, 28; 2:8, 15, 20-22.
Makiramanto ngata da Adan ken Eva iti panangitungpal daytoy engrande a panggep iti pagtungpalanna? Daytat’ nagdepende iti agtultuloy a kooperasionda iti dayta babaen panagtulnogda iti Namarsuada. Ti panagtulnogda saan a bulsek, di managpanunot. Naikkandat’ wayawaya, ta tinarigagayan ti Dios nga agserbida kenkuana manipud manangapresiar a puso. Kas makita a mangipalagip iti kalinteganna iti kinasoberano, nangipaay ti simple a subok. Mabalinda a kanen ti aniaman a probision idiay minuyongan malaksid iti maysa. Adda idi maysa a kayo nga agbunga a maipapan iti dayta kinuna ti Dios: “Ta iti aldaw a pannanganmo iti daydiay mataykanto a di bumurong.”—Genesis 2:16, 17.
Dagitoy a sasao ibagada kadatayo a da Adan ken Eva saanda a naparsua tapno aglakay ken agbaketda ken matayda. Ti ipapatay umay laeng no sukirenda daytoy simple a bilin. No da Adan ken Eva nagtalinaedda a natulnog iti Dios, isuda komat’ sibibiag pay laeng ditoy daga kas nagannak ti maysa a sangalubongan a pamilia dagiti perpekto nga annak.—Kitaenyo ti prinsipio a nailanad idiay Salmo 37:29.
Nupay kasta, maysa kadagiti angheliko a parsua ti Dios, maawagan itan a Satanas, nagbalin a manangbabalaw iti wagas ti panangituray ti Dios. Inallukoyna ni Eva a mangan iti maiparparit a bunga, a siaallilaw nga insingasingna nga iti panagbalin nga agwaywayas manipud kinasoberano ti Dios, isut’ agbalinto a nasaysayaat. Ti pudpudno a motibo ni Satanas, nupay kasta, isut’ tarigagay nga agbalin a dios ti mainanama a pamilia ti sangatauan.—Genesis 3:1-5; Mateo 4:8, 9; Juan 8:44.
Yantangay inted ni Jehova iti umuna a pagassawaan ti amin a kasapulanda, ti kinasoberanona intandudo koma ni Eva ket linaksidna ti naulbod a singasing ni Satanas. Makapaladingit, nupay kasta, isut’ nagtultuloy ket sinalungasingna ti linteg ti Dios. Kalpasanna, pinili ni Adan ti makikanunong iti di nainsiriban a kurso ti asawana. Gapuna ti pagassawaan a nagtignay iti kabukbukodanda a pangngeddeng, kasta met ken Satanas, immalsada a maibusor iti Dios, ket napataud ti isyu ti nadiosan a kinasoberano.—Genesis 3:6.
Tiempo a Kasapulan iti Panangibanag ti Napapateg nga Isyu
Mabalin koma a dinadael ni Jehova dagiti tallo a managalsa iti daydi met laeng a kanito. Ngem daytat’ di koma nangileppas ti pannakaibanag dagiti saludsod a pinataud ti panagalsa. Kabaelan kadi nga iturayan ti tao ti bagbagina a sibaballigi a naisina manipud iti Dios? Kinahustisia kadi iti biang ti Dios ti panangdawatna ti panagpasakop iti kinasoberanona? Mainayon pay, iti panangmatmat ti tignay ti immuna a pagassawaan, dagiti kadi tattao awan agumna a pilienda ti agserbi iti Dios iti kabukbukodanda a pangngeddeng—uray no isudat’ suoten ni Satanas? (Job 1:7-11; 2:4) Kasapulannat’ tiempo iti panangsungbat kadagitoy a salsaludsod. Kasta met, kasapulannat’ tiempo tapno maparmek dagiti epekto ti orihinal a panagalsa ken ti pannakaitungpal ti panggep ti Dios a panamagbalin ti daga a paraiso a paggianan ti awanan basol a natauan a rasa. Ur-urayentay pay laeng ti pinal a resolusion dagitoy nga isyu.
Maitunos ti lintegna, inikkat ti Dios manipud kada Adan ken Eva ti pribilehio ti panagbiag nga agnanayon. Saandan a maikari a makiraman iti kaitungpalan ti naindaklan a panggepna. Nupay kasta, sakbay a natayda, napalubosanda a mangpatanor kadagiti annak. Pudno, da Adan ken Eva didan mabalin nga ipasa kadagiti annakda ti nasalun-at, awanan basol a biag. (Roma 5:12) Ngem numan pay dagiti kaputotan a simmaruno naiyanakda nga imperpekto ken nailunod a matay, adu nga indibidual ti addaan gundaway a mangipakita no sadinot’ nakidasiganda no maipapan ti naindaklan nga isyu ti kinasoberano.
Panangibanag ti Isyu
Kasanonto ti panangibanag ti Dios kadagitoy a bambanag mainaig iti kinasoberanona? Iti maysa a kaipapanan dagiti saludsod a napataud idiay Eden masungsungbatandan. Rinibribo a tawen iti natauan a historia nakakaskas-ang pinagbalinna a nalawag a ti pammabasol ni Satanas a ni Eva nasaysayaatto no isut’ agwaywayas manipud iti Dios ket maysa a kinaulbod. Ti natauan a turay a mangilaklaksid iti Dios agtultuloy pannakapaayna. Kas kunaen ti Biblia: “Ti tao addaan pannakabalin iti sabali a maipaay iti pagdaksanna.”—Ecclesiastes 8:9.
Iti sabali a bangir, adu a naimbag a bambanag ti naisursuraten kabayatan dagiti naunday a tawtawen manipud panagbasol da Adan ken Eva. Adu iti sangatauan ti nangidemostran ti di maisin a panagayat iti kinasoberano ni Jehova, a ti naisangsangayan unay a pangarigan isu “ti Anak ti tao,” ni Jesu-Kristo a mismo. (Mateo 20:18; Hebreo 11:1–12:3) Dagidiay a nangsurot ti linlinteg ti Dios ken nangbigbig iti kinasoberanona nasarakanda nga isu daytoy ti talaga a kasasayaatan a dalan. Napadasanda ti kinapudno ti proverbio: “Ti bendision ni Jehova—daytat’ mangpabaknang, ket saanna nga anayan iti ladingit.” (Proverbio 10:22) Mainayon pay, pagyamanan iti probision ti panagungar, iti kamaudianan makiramandanto iti kaitungpalan ti engrande a panggep ti Dios.—Juan 5:28, 29.
Saan a nalipatan ni Jehova ti orihinal a panggepna. Dagidiay mangilaksid ti kinasoberanona saandanto a mapalubosan nga agturay ditoy daga iti amin a tiempo, ket ti Biblia mangted pakdaar nga iti mabiiten ti Dios agtignayton a maibusor kadakuada. Mabasatayo: “Ta ti pungtot ti Dios maiparangarang manipud langit a maibusor iti amin a kinakillo.” (Roma 1:18) Daytoy um-umayen nga ebkas ti pungtot ti Dios, nga aw-awagan ti Biblia nga Armageddon, di pagduaduaan idemostrana nga isut’ pudno nga adda. Dagidiay laeng mangawat ti kinasoberanona ti makalasat iti dayta a pasamak. “Ta ti nalinteg agtalinaedto ditoy daga, ket ti napnuan imbag agtaengto kenkuana. Ngem dagiti nadangkes magudasdanto ditoy daga.”—Proverbio 2:21, 22.
Ti Naindaklan nga Isyu ken Sika
Iti panangmatmat kadagitoy a kinapudno, tunggal maysa kadatayo—kas kada Adan ken Eva—masapul a mangaramid ti panagpili. Padpadasentayto kadi ti agbiag nga agwaywayas manipud ti Dios? Wenno agpasakoptayto kadi iti kinasoberanona? Laglagipenyo, daytoy ti kapapatgan nga isyu a sangsanguenyo ita. Dagiti dadduma nga isyu, mabalin a dagitoy kasla napategda, adda pannakainaigda iti agdama a biagyo. Daytoy maysa adda pannakainaigna iti agnanayon a biag. Ti pangngeddeng nga aramidenyo apektarannanto ti agnanayon a masanguananyo.
Kasanot’ panangipakitayo nga awatenyo ti kinasoberano ti Dios? Babaen nagaget a panangadal Saona, ti Biblia, ket sapulen ti panagtulnog iti pagayatanna iti pannakitimpuyog kadagiti dadduma pay a pudno a Kristiano. (Sofonias 2:2, 3) No aramidenyo dayta, maaddaankayto ti naragsak nga inanama ti pannakakita ti kaitungpalan ti engrande a panggep ti Dios. “Ta bassit pay a darikmat, ket ti nadangkes maawanton . . . Ngem dagiti naemma tawidendanto ti daga, ket maay-ayatandanto iti kinaruay ti talna.” (Salmo 37:10, 11) Anian a nakaskasdaaw a pagbanagan nga agpaay kadagiti amin nga agpasakop iti kinasoberano ti Dios! Anian a nabileg a rason maipaay ti nainsiriban a pangngeddeng iti daytoy kapapatgan unay a banag!