Kasano Kabayag ti Panagan-anus ti Dios?

AGARUP 3,000 a tawen ti napalabasen, insurat ti maysa a masirib a tao: “Ti tao inturayanna ti tao iti pagdaksanna.” (Eclesiastes 8:9) Sipud pay inaramidna dayta a kapaliiwan, saanen a simmayaat dagiti bambanag. Iti intero a historia, dagiti indibidual ken grupo inagawda ti turay, nga agsasagadsad, a domdominaranda ken ab-abusuenda dagiti sabali a tattao. Siaanus nga inibturan ni Jehova a Dios daytoy.

Nagan-anus ni Jehova bayat a dagiti gobierno imbaonda dagiti minilion tapno matayda iti gubat ken pinalubosanda dagiti nalabes nga ekonomiko a kinaawan-hustisia. Ita, watwatwatenna pay laeng ti kinaanus bayat a dadaelen dagiti tattao ti ozone layer ken rugitanda ti tangatang ken ti baybay. Anian a saem kenkuana ti pannakakita ti pannakadadael ti nabunga a naimbag a daga ken ti naulpit a panangdadael kadagiti kabakiran ken dagiti atap nga animal!

Apay a Nakaan-anus ti Dios?

Ti maysa a simple nga ilustrasion mabalin a tulongannatayo a mangsungbat iti daytoy a saludsod. Usigenyo ti epektona iti maysa a negosio no ti maysa nga empleado agtultuloy a maladaw a sumrek. Aniat’ rebbeng nga aramiden ti makin-kukua? Ti simple a kinahustisia dawatenna ti madagdagus a panangikkatna iti empleado. Ngem mabalin a malagipna ti pagsasao iti Biblia: “Ti nabannayat nga agpungtot aglaplapusanan iti pannakaawat, ngem ti nadarasudos ti espirituna itantan-okna ti kinamaag.” (Proverbio 14:29) Mabalin a ti pannakaawat ti mamaguray kenkuana sakbay nga agtignay. Mabalin nga ikeddengna a palubosan ti tiempo tapno masanay ti isandina iti kasta ti negosio ket saan a malugi nga ad-adda.

Ti pannakikadua mabalin a mangtignay met kenkuana nga agtutor. No ngata ngay ballaaganna ti naliway nga empleado tapno kitaenna no baliwanna ti kababalinna? Apay a saanna a kasarita tapno makitana no ti naipaugali a kinamanagladladawna ket gapu iti maysa a parikut a mabalin a marisut wenno gapu iti saanen a maagasan a dakes a kababalin? Idinto a ti makin-kukua iti negosio ikeddengna a watwaten ti kinaanus, ti kinaanusna ti, nupay kasta, saan a di nakedngan. Ti empleado kasapulanna ti agbalbaliw no saan isut’ maikkat. Daytat’ nainkalintegan laeng iti negosio a mismo ken kadagiti empleado a mangsursurot kadagiti paglintegan.

Iti umasping laeng a pamay-an, watwatwaten ni Jehova a Dios ti kinaanus iti imatang ti kinadakes tapno palubosanna ti tiempo maipaay ti pannakaisagana ti maysa a nalinteg a solusion kadagiti sumagmamano a parikut. Kasta met, ti kinaanusna mangipaay gundaway kadagiti nadangkes tapno agbalbaliwda ken gun-odenda dagiti agnanayon a gunggona. Ngarud, paregtaennatayo ti Biblia a saantay nga agladingit gapu iti kinaanus ti Dios. Imbes ketdi, kunaenna: “Ibilangyo a pannakaisalakan ti kinaanus ti Apotayo.”​—2 Pedro 3:15.

Maysa a Pangarigan iti Kinaanus ti Dios

Naganus ni Jehova sakbay ti dakkel a Layus iti kaaldawan ni Noe. Ti lubong iti dayta a tiempo ket napno iti kinaranggas ken daytat’ nagdakes unay. Mabasatayo: “Ket nakita ni Jehova nga aglaplapusanan ti kinadakes ti tao iti daga . . . Gapuna kinuna ni Jehova: ‘Pukawekto iti rabaw ti daga ti tao a pinarsuak.’” (Genesis 6:5, 7) Wen, adda iti panunot ni Jehova ti maudi a solusion ti parikut iti kinadakes uray pay idin: ti pannakaikkat dagiti nadangkes. Ngem isut’ di nagtignay a dagus. Apay a saan?

Agsipud ta saan nga amin ket dakes. Ni Noe ken ti pamiliana ket nalintegda iti panagkita ti Dios. Isu nga iti pagimbaganda, siaanus a naguray ti Dios tapno palubosanna dagiti sumagmamano a nalinteg nga indibidual nga agsagana maipaay iti pannakaisalakan. Kasta met, dayta a napaut a panaguray nangted gundaway ken Noe nga agbalin a “manangikasaba ti kinalinteg,” a nangted kadagiti nadangkes ti gundaway nga agbalbaliw. Kunaen ti Biblia: “Ti panagan-anus ti Dios nagur-uray kadagiti aldaw ni Noe, bayat a mabangbangon ti daong, isu a nakaisalakanan ti bassit, kayatna a sawen, walo a kararua, ti nailasat manipud iti danum.”​—2 Pedro 2:5; 1 Pedro 3:20.

Apay nga Agan-anus ti Dios Ita

Ita, umas-asping ti kasasaad. Napno manen ti lubong iti kinaranggas. Kas idi kaaldawan ni Noe, inukomen ti Dios daytoy a lubong, a, kunaen ti Biblia, “naaywananda maipaay iti panangukom ken pannakadadael dagiti tattao a nadangkes.” (2 Pedro 3:7) Inton mapasamak dayta, awanton ti pannakadadael ti aglawlaw, pannakaparigat dagiti nakurapay, wenno ti naagum a panangabuso iti turay.

Apay, ngarud, a saan a dinadael ti Dios dagiti nadangkes idi pay? Agsipud ta addan dagiti salisal a mataming ken dagiti napateg a bambanag a maurnos. Pudno, iyas-asidegen ni Jehova ti maysa a permanente a solusion kadagiti parikut iti kinadakes a mangiraman iti adu a bambanag, a pakaibilangan ti panangispal kadagiti nalinteg-panagpuspusona a tattao manipud pannakabalud iti sakit ken ipapatay.

Sipapanunot iti daytoy a naud-udi a pagtungpalan, pinanggep ni Jehova ti mangipaay iti Manangisalakan a mangidatag iti subbot kadagiti basbasoltayo. Maipapan kenkuana, kunaen ti Biblia: “Ta kasta la unay ti panagayat ti Dios iti lubong nga intedna ti bugbugtong nga Anakna, tapno isuamin a mangalagad ti pammati kenkuana saan koma a madadael no di ket maaddaan ti biag nga agnanayon.” (Juan 3:16) Kinasapulanna ti rinibo a tawen tapno maisagana ti dalan maipaay ken Jesus tapno umay ken idatonna ti biagna para iti sangatauan. Bayat amin dagidiay a tawtawen, siaayat a nagan-anus ti Dios. Ngem saan kadi a maikari dayta a probision iti panaguray?

Impaay ni Jesus ti subbot para iti sangatauan ngangngani dua ribo a tawenen ti napalabas. Apay, ngarud, a watwatwaten pay la ti Dios ti panaganus? No maminsan, ti ipapatay ni Jesus minarkaanna ti panangrugi ti maysa nga edukasional a kampania. Masapul a maammuan ti sangatauan daytoy a naayat a probision ken maikkanda koma ti gundaway a mangaklon wenno mangilaksid iti dayta. Busbusen dayta ti panawen, ngem daytantot’ nasayaat pannakausarna a tiempo. Kunaen ti Biblia: “Saan a namayamay ni Jehova maipapan iti karina, kas panangibilang dagiti dadduma a kinabayag, no di ket agur-uray a siaanus gapu kadakayo gapu ta dina kayat a madadael ti uray siasino no di ket agturongda koma amin iti panagbabawi.”​—2 Pedro 3:9.

Ti Salisal iti Gobierno

Sabali pay a banag ti busbusenna met ti panawen. Adda pakasapulan a marisut ti parikut iti gobierno ti tao. Idi damo, ti tao adda iti sidong ti nadiosan a gobierno. Ngem idiay minuyongan ti Eden, tinallikudan dagiti immuna a nagannaktayo dayta. Pinilida ti agwaywayas manipud iti Dios, a kinaykayatda ti mangituray kadagiti bagbagida. (Genesis 3:1-5) Pudno unay, nupay kasta, saan a naparsua ti tao tapno iturayanna ti bagina. Insurat ni mammadto a Jeremias: “O Jehova, ammok, a ti dalan ti tao saan nga agtaud kenkuana met laeng. Saan nga agtaud iti tao a magna iti panangiturong kadagiti addangna.”​—Jeremias 10:23; Proverbio 20:24.

Agpapan pay kasta, gapu ta timmaud ti salisal ti gobierno, siaanus a pinalubosan ni Jehova ti tiempo tapno marisut dayta. Pudno, sipaparabur a nangipalubos iti rinibribo a tawen iti tao tapno padasenna ti aniaman a mapanunotna a porma ti gobierno. Iti ania a resulta? Nagbalin a nalawag unay nga awan ti natauan a gobierno a makaikkat ti panangparigat, di panagpapada, wenno sabsabali pay a pagtaudan ti ladingit.

Pudno, iti panangmatmat iti natauan a historia, pudpudno kadi a maibaga ti asinoman a saan a nalinteg ti Dios no ipakaammona ti panggepna a mangikkat iti amin a natauan a gobierno ken sukatanna ida iti bukodna a gobierno? Sigurado a saan! Sipopositibo nga abrasaentayo ti kaitungpalan daytoy a padto ti Biblia: “Iti aldaw dagidiay nga ar-ari ti Dios ti langit mamangonto iti maysa a pagarian a dinto pulos madadael. Ket ti panagturayna dinto met maited iti sabali nga ili. Burakennanto ken ibusennanto amin dagitoy a pagpagarian, ket isu agtalinaedto iti agnanayon.”​—Daniel 2:44.

Ti nailangitan nga Ari dayta a Pagarian isu ni napagungar a Jesus. Ti panangisagana kenkuana iti dayta nga akem​—kasta met ti panangpili kadagiti tattao a makipagturay kenkuana​—kinasapulanna ti panawen. Bayat amin dayta a tiempo, winatwat ti Dios ti kinaanus.

Magunggonaan Itan Manipud Kinaanus ti Dios

Ita, minilion a tattao iti di kumurang a 212 a dagdaga ti magunggonaan manipud kinaanus ti Dios. Nagkaykaysadan iti tarigagayda nga agtulnog iti Dios ken agserbi iti nailangitan a gobiernona. No agtataripnongda idiay Kingdom Hallda, masursuroda no kasano kasayaat unay ti pangiyaplikar kadagiti prinsipio ti Biblia kadagiti bibiagda. Dida makiraman kadagiti mamagsisina a politika daytoy a lubong, nupay agpasakopda kadagiti natauan a gobierno agingga a siaanus a palubosan ti Dios nga agtalinaed dagitoy.​—Mateo 22:21; Roma 13:1-5.

Ti kasta a panagtitinnulong kadagiti adu unay a tattao idayawna ni Jehova kas Daydiay makaiyeg panagtutunos kadagiti napalungdo a tattao a mangsursuro a mangayat kenkuana ken mayat nga agserbi kenkuana. Awan duadua a nasabetyon dagitoy bayat nga itultuloyda ti isu met la a trabaho nga inrugi a mismo ni Jesus, ti panangiwaragawag ti naimbag a damag ti Pagarian ti Dios. Impadto ni Jesus ti tampok daytoy a trabaho idi kunana: “Daytoy naimbag a damag ti pagarian maikaskasabanto iti amin a mapagnaedan a daga agpaay a pammaneknek kadagiti nasnasion; iti kasta umayton ti panungpalan.”​—Mateo 24:14.

Din Mabayag!

Ti makitkita nga ebidensia paneknekanna a dagiti urnos para iti nalinteg a gobierno ti Dios a mangsukat iti agbaliw-baliw a panagturay iti daga ket ngangnganin maan-anay. Kalpasan panangiladawanna kadagiti nakaro a resulta ti pannakapaay ti natauan a gobierno a naimatangantayon iti las-ud daytoy a siglo, kuna ni Jesus: “Inton makitayo a mapaspasamak dagitoy a bambanag, ammuenyo a ti pagarian ti Dios asidegen.”​—Lucas 21:10, 11, 31.

Iti mabiit, ikkatenton ti Dios dagiti nadangkes manipud ditoy daga. Maaddaanton ti literal nga aplikasion dagiti sao ti salmista: “Ta dagiti agaramid iti dakes magessatdanto . . . Ta iti bassit pay a darikmat, ket ti nadangkes maawanton; wen, mingmingamto a sigaganetget ti ayanna, ket awanton.” (Salmo 37:9, 10) Mailadawanyo kadi dita panunotyo ti maysa a lubong nga awanan kinadakes? Siasinonto ngarud ti mangipapagna kadagiti bambanag? Kunaen ti Biblia: “Maysa nga ari [ni Kristo Jesus a naitrono kadagiti langlangit] agturayto maipaay iti kinalinteg met laeng; ket kadagiti prinsipe [dagiti nasungdo a dinutokanna ditoy daga], agturaydanto kas piprinsipe maipaay ti kinahustisia met laeng. Ket ti aramid ti kinalinteg isunto ti talna; ket ti patauden ti pudno a kinalinteg, kinaulimek ken panagtalek nga agnanayon. Ket ti ilik agnaedto iti natalna a paggianan ken iti namayengmeng a pagtaengan ken kadagiti natalingenngen a paggianan.”​—Isaias 32:1, 17, 18.

Ngarud, ti nailangitan a gobierno ti Dios atiwennanto dagiti dakes nga epekto ti di umiso nga aramid ti tao ken urnosenna dagidiay manginanama Kenkuana agturong iti agtutunos a natauan a kagimongan. Iti panangiladawanna iti daytoy a panagtutunos, kunaen ti Biblia: “Ti lobo makipagtaengto iti apagbiit iti kordero, ken iti urbon ti leopardo makikaiddanto, ket ti urbon ti baka ken ti urbon ti leon ken ti napalukmeg agkakaiddadanto; ket ti maysa nga ubing a bassit idalannanto ida . . . Didanton mangranggas wenno mangdadael iti amin a bantayko a nasantuan; ta ti daga mapnonto iti pannakaammo ken Jehova, a kas kadagiti dandanum saknapanda ti baybay.”​—Isaias 11:6-9.

Anian a nagtan-ok a resulta manipud panangwatwat ti Dios iti kinaanus! Ngarud, imbes nga agreklamo a napaut unay ti panaguray ti Dios, apay a dikay gundawayan ti kinaanusna tapno agpaituray iti Pagarianna? Ammuenyo manipud Biblia no ania dagiti pagalagadanna ken tumulokkayo kadakuada. Makilangenkayo kadagiti sabsabali a nagtutunos nga agpasakop kenkuana. Iti kasta, ti kinaanus ti Dios agresultanto kadagiti agnanayon a bendision agpaay kadakayo.