Agbuteng ken Jehova ken Ipadayag ti Nasantuan a Naganna

“Siasino ti di agbutengto kenka, Jehova, ken saan a mangipadayagto iti naganmo, ta siksika laeng ti nasungdo?”​—APOCALIPSIS 15:4.

1, 2. (a) Kasano a linuktan ni Jehova dagiti

NI Jehova ‘linuktanna dagiti tawa ti langlangit ket imbuyatna ti bendision agingga nga awanen lugar a makalaon nga umawat.’ Dagidiay a sasao mabalin a maulit-ulit a maiyaplikar kadagiti Saksi ni Jehova iti kallabes a pampanawen. (Malakias 3:10) Kas pangarigan, kabayatan ti 1991 a tawen ti serbisio, ti kinarayray dagiti sangsangaili a Saksi ken dagiti lumugar a makikumbension ket naglaplapusanan iti Nakristianuan a panaglalangen kadagiti naisangsangayan a kumbension a naangay iti intero a lubong​—manipud kadagiti “Nadalus a Pagsasao” a Kumbension idiay Buenos Aires idiay Sud Africa; ken idiay Manila, Taipei, ken Bangkok idiay Daya; agingga kadagiti “Dagiti Managayat iti Wayawaya” a Kumbension idiay Budapest, Prague, ken Zagreb (Agosto 16-18, 1991) idiay Makindaya nga Europa.

² Anian a rag-o dayta para kadagiti delegado manipud ballasiw-taaw a maam-ammo dagiti nagkauna a matalek a Saksi kadagidiay a lugar! Kas pangarigan, idiay Bangkok, ni Frank Dewar​—naminsan ti kakaisuna nga agibumbunannag ti Pagarian idiay Thailand​—sinaritana maipapan ti 58 a tawen ti misionero a serbisiona. Dagiti ar-aramidna simmaknap manipud kadagiti isla ti Pacifico agingga idiay Abagatan a daya nga Asia, ken uray agingga idiay China. Sinangona dagiti peggad manipud pannakarba, dagiti atap nga animal kadagiti kabakiran, saksakit kadagiti napudot a lugar, ken ti naulpit a panagturay dagiti manangidaulo ti gubat a Hapon. Idi napagsaludsodan no ania a balakad ti itedna kadagiti makikumbension, simple laeng ti sungbatna: “Agbuteng ken Jehova!”

3. Apay a rebbengtay nga ipakita ti nadiosan a panagbuteng?

³ “Agbuteng ken Jehova!” Anian a nagpateg daytoy kadatayo amin tapno masukayan dayta a nasayaat a panagbuteng! “Ti panagbuteng ken Jehova isu ti pangrugian ti kinasirib.” (Salmo 111:10) Daytoy a panagbuteng ket saan a panagaliaw ken Jehova. Imbes ketdi, daytoy ket nauneg a panagraem iti nakaam-amak a bileg ken nadiosan a galadna, maibatay iti pannakaawat a maalatayo baeten panagadal iti Sao ti Dios. Idiay Apocalipsis 15:3, 4, ipakaammo ti kanta ni Moises ken ti Kordero: “Dadakkel ken nakaskasdaaw dagiti aramidmo, Jehova a Dios, ti Mannakabalin-amin. Nalinteg ken pudno dagiti dalanmo, Ari ti kinaagnanayon. Siasino ti di agbutengto kenka, Jehova, ken saan a mangipadayagto iti naganmo, ta siksika laeng ti nasungdo?” Iti kinasungdona kadagiti managdaydayawna, addaan ni Jehova ti “maysa a libro ti pakalaglagipan . . . a nakaisuratan iti saklangna dagidiay agbuteng ken Jehova ken dagidiay mangpampanunot iti naganna.” Magunggonaanda iti biag nga agnanayon.​—Malakias 3:16; Apocalipsis 20:12, 15.

Agballigi ti Nadiosan a Panagbuteng

4. Ania a nagkauna a pannakaisalakan ti rebbeng a mangparegta kadatayo nga agbuteng ken Jehova?

⁴ Idi nagmartsa ti Israel a rummuar manipud Egipto ni Faraon, silalawag nga impakita ni Moises a ni Jehova laeng ti nagbutnganna. Di nagbayag, nalakub dagiti Israelitas iti nagbaetan ti Nalabaga a Baybay ken ti nabileg a buyot ti Egipto. Aniat’ maaramidanda? “Ni Moises kunana kadagiti tattao: ‘Dikayo agbuteng. Agtalnakayo ket kitaenyo ti panangisalakan ni Jehova, nga aramidennanto kadakayo ita nga aldaw. Ta dagiti Egipcio a makitayo ita nga aldaw uray kaano diyonto ida makitan, saan, saanto a pulosen. Ni Jehova makibakalto maipaay kadakayo, ket dakayo agtaengkayo a sitatalna.’” Simimilagro, binisngay ni Jehova dagiti danum. Nagmartsa dagiti Israelitas a bimmalasiw iti daga ti baybay. Kalpasanna dagiti danum narpuogda manen. Napunas a namimpinsan ti buyot ni Faraon. Inispal ni Jehova dayta a managbuteng-Dios a nasion, kabayatan ti panangiwayatna ti panangukom iti di managraem-Dios nga Egipto. Kasta met ita, ipabuyananto ti kinasungdona iti panangispalna kadagiti managbuteng-Dios a Saksina manipud lubong ni Satanas.​—Exodo 14:13, 14; Roma 15:4.

5, 6. Aniada a pasamak iti panawen ni Josue ti mangipakita a rebbengtay a pagbutngan ni Jehova a nangnangruna ngem ti tao?

⁵ Kalpasan ipapanaw manipud Egipto, nangibaon ni Moises ti 12 a managsimisim idiay Naikari a Daga. Sangapulo ti napabutngan iti pannakakitada kadagiti kasla higante nga agnanaed ket pinadasda nga upayen ti Israel manipud iseserrek iti daga. Ngem dagiti sabali a dua, da Josue ken Caleb, impadamagda: “[Daytat’] aglablabes ti imbagna a daga. No ni Jehova kaay-ayonatayo, iyegnatayto ngarud iti daytoy a daga ket itednanto kadatayo, maysa a daga nga agayus ti gatas ken diro. Isuna laeng a dikayo koma kumaniwas ken Jehova; ket dakayo, dikayo agbuteng kadagiti tattao iti dayta a daga, ta isuda ti taraon nga agpaay kadatayo. Ti sarikedkedda naikkat kadakuada, ket ni Jehova adda kadatayo. Dikay agbuteng kadakuada.”​—Numeros 14:7-9.

⁶ Nupay kasta, dagidiay nga Israelitas rimmukmada iti panagbuteng iti tao. Kas nagbanaganna, dida pulos nakadanon iti daga a naikari. Ngem ni Josue ken ni Caleb, agraman maysa a baro a kaputotan dagiti Israelitas, naikkan pribilehio a sumrek iti dayta a napili a daga ket taripatuenda dagiti kaubasanna ken dagiti kaoliboanna. Iti pammakada a panagbitlana iti naguummong nga ili ti Israel, inted ni Josue daytoy a balakad: “Agbutengkayo ken Jehova ken agserbikayo kenkuana iti kinadalus ken kinapudno.” Ken innayon ni Josue: “Ngem siak ken ti balayko, agserbikamto ken Jehova.” (Josue 24:14, 15) Anian a makaparegta a sasao para kadagiti ulo ti pamilia ken amin a sabsabali pay tapno agbutengda ken Jehova bayat nga agsaganatayo a bumallasiw agturong iti nalinteg a baro a lubong ti Dios!

7. Kasano nga impaganetget ni David ti kinapateg ti panagbuteng iti Dios?

⁷ Ti barito a pastor a ni David nangipakita met ti mapagulidanan a panagbuteng ken Jehova idi kinaritna ni Goliat iti nagan ni Jehova. (1 Samuel 17:45, 47) Idiay nakaidalitanna, maibaga ni David: “Ti espiritu ni Jehova nagsao a gapu kaniak, ket ti saona adda idi iti dilak. Ti Dios ti Israel kinunana, ti Bato ti Israel nagsao kaniak, ‘Ti maysa a mangituray a sililinteg kadagiti tattao, a mangituray iti panagbuteng ti Dios, isunto ti kas iti lawag ti bigat, no ti init lumgak, maysa a bigat nga awan dagiti ul-ulep.’” (2 Samuel 23:2-4) Daytoy a panagbuteng iti Dios ket saan a makita kadagiti agtuturay daytoy a lubong, ket anian a nakalkaldaang ti nagbanaganna! Anianto ket a naiduman no ni Jesus, “ti Anak ni David,” iturayannan ti daga iti panagbuteng ken Jehova!​—Mateo 21:9.

Panagtignay iti Panagbuteng ken Jehova

8. Apay a rimmang-ay ti Juda iti sidong ni Josafat, a mangipabpabigbig iti ania maipaay ita?

⁸ Agarup sangagasut a tawen kalpasan ipapatay ni David, nagbalin nga ari ni Josafat idiay Juda. Adda manen ditoy ti maysa nga ari a nagserbi iti panagbuteng ken Jehova. Insublina ti teokratiko nga urnos idiay Juda, insaadna dagiti ukom iti intero a daga, ken inikkanna ida kadagitoy a pammilin: “Ta dikayo agukom gapu iti tao no di ket gapu ken Jehova; ket isu adda kadakayo iti panangukom. Ita ngarud adda koma kadakayo ti buteng ken Jehova. Aluadanyo ket aramidenyo, ta awan ti kinadangkes ken Jehova a Diostayo wenno panangidumduma iti kinatao wenno panangawat iti pannuksok. . . . Kastoy ti aramidenyonto iti panagbuteng ken Jehova buyogen kinamatalek ken buyogen ti puso a napalungdo.” (2 Cronicas 19:6-9) Ngarud, rimmang-ay ti Juda iti panagbuteng ken Jehova, a kas met iti ili ti Dios magunggonaan babaen iti serbisio dagiti nadungngo a manangaywan ita.

9, 10. Kasano a nagballigi ni Josafat iti panagbuteng ken Jehova?

⁹ Nupay kasta, ti Juda addaan kadagiti kabusor. Dagitoy inkeddengda a pukawen ti nasion ti Dios. Ti nagtitipon a buyot ti Ammon, Moab, ken Bantay Seir ket dinappatanda ti intero a masakopan ti Judea ket pinagpeggadda ti Jerusalem. Daytat’ maysa a nabileg a buyot. Immadani ni Josafat ken Jehova iti kararag “bayat nga amin dagidiay adda iti Juda agtaktakderda iti saklang ni Jehova, uray dagiti ubbingda, dagiti assawada ken dagiti annakda.” Kalpasanna, kas sungbat iti dayta a kararag, immapay ti espiritu ni Jehova ken Levita a Jahaziel, a nagkuna: “Kastoy ti kuna ni Jehova kadakayo, ‘Dikayo agbuteng wenno dikayo met agkullayaw gapu itoy umariwekwek; ta ti gubat saanyo a kukua, no di ket kukua ti Dios. Inton bigat sumalogkayo a maibusor kadakuada. . . . Saanyonto a masapul ti gumubat itoy a bakal. Agurnongkayo, agtakderkayo a sitatalna ket kitaenyo ti panangisalakan ni Jehova kadakayo. O Juda ken Jerusalem, dikayo agbuteng wenno dikayo met agkullayaw. Inton bigat inkayo bumusor kadakuada, ket ni Jehova kumuyogto kadakayo.’”​—2 Cronicas 20:5-17.

¹⁰ Kabigatanna, nasapa a bimmangon dagiti lallaki ti Juda. Bayat a situtulnog a rimmuarda tapno sabtenda dagiti kabusor, nagtakder ni Josafat ket kunana: “Denggendak, O Juda ken dakayo nga agnaed iti Jerusalem! Mamatikayo ken Jehova a Diosyo tapno iti kasta agpautkayto. Patienyo dagiti mammadtona iti kasta naballigikayto.” Iti panagmartsada iti sango dagiti buyot a lallaki, sangsangkagiddan a nagkanta dagiti kumakanta ken Jehova: “Agdayawkayo ken Jehova, ta ti naayat a kinamanangaasina agpaut iti agnanayon.” Inyebkas ni Jehova dayta a naayat a kinamanangaasi babaen panangipuruakna kadagiti kabusor iti pannakariro nga inkisapda ti maysa ken maysa. Bayat a napan dagiti lallaki ti Juda iti pagwanawanan idiay let-ang, dagiti laengen bangkay dagiti kabusor ti nabati.​—2 Cronicas 20:20-24.

11. No maipanggep iti panagbuteng, kasano a naiduma dagiti nasnasion manipud ili ti Dios?

¹¹ Idi nangngeg dagiti kaparangetna a nasion daytoy namilagruan a pannakaisalakan, “ti panagamak iti Dios” immapay kadakuada. Iti sabali a bangir, ti nasion a nagtulnog iti panagbuteng ken Jehova addaan itan “talna iti aglikmut.” (2 Cronicas 20:29, 30) Umasping unay, inton iwayat ni Jehova ti panangukom inton Armagedon, dagiti nasnasion “agamakdanto iti Dios” ken iti Manangpapatay nga Anakna, ni Jesu-Kristo, ket didanto makapagtakder inton aldaw ti nadiosan a pungtot.​—Apocalipsis 6:15-17.

12. Kasano a ti panagbuteng ken Jehova ket nagunggonaan kadagidi immuna a panawen?

¹² Ti nasayaat a panagbuteng ken Jehova mangiyeg kadagiti nabaknang a gunggona. Ni Noe “impakitana ti nadiosan a panagbuteng ket namangon iti maysa a daong maipaay a pakaisalakanan ti sangakabbalayanna.” (Hebreo 11:7) Ket no maipapan kadagiti umuna-siglo a Kristiano, nairekord a, kalpasan panawen ti pannakaidadanes, ti kongregasion “simrek iti panawen ti talna, a napakired; ket bayat a daytat’ nagna iti panagbuteng ken Jehova ken iti liwliwa ti nasantuan nga espiritu daytat’ nagtultuloy nga immadu​—kas met laeng ita idiay Makindaya nga Europa.​—Aramid 9:31.

Ayaten ti Naimbag, Guraen ti Dakes

13. Kasanotay laeng a mabalin a mapasaran ti bendision ni Jehova?

¹³ Amin-amin ni Jehova ket naimbag. No kasta, “ti panagbuteng ken Jehova kaipapananna ti pananggura iti dakes.” (Proverbio 8:13) Naisurat maipapan ken Jesus: “Inayatmo ti kinalinteg, ket ginuram ti kinakillo. Gapuna ti Dios, ti Diosmo, pinulotannaka iti lana ti panagragsak.” (Hebreo 1:9) No datayo, kas ken Jesus, tarigagayantayo ti bendision ni Jehova, masapul a karugittayo ti kinadakes, ti imoralidad, ti kinaranggas, ken ti kinaagum ti natangsit a lubong ni Satanas. (Idiligyo ti Proverbio 6:16-19.) Masapul nga ayatentayo ti ayaten ni Jehova ken guraentayo ti guraenna. Masapul nga agbutengtayo a makaaramid iti aniaman a di mangay-ayo ken Jehova. “Iti panagbuteng ken Jehova ti tao panawanna ti dakes.”​—Proverbio 16:6.

14. Kasanonatayo nga ipaayan ni Jesus ti pagtuladan?

¹⁴ Nangibati ni Jesus kadatayo ti pagtuladan tapno surotentayo a siiinget dagiti addangna. “Idi rinabrabngisda, saan a simmungbat iti dakes. Idi nagsagaba, saan a nagam-ames, no di ket nagtalek iti daydiay mangukom a sililinteg.” (1 Pedro 2:21-23) Iti panagbuteng ken Jehova, maibturantayo met dagiti panangumsi, dagiti panangublag, dagiti panangidadanes, nga ipataw kadatayo ti lubong ni Satanas.

15. Apay a rebbengtay a pagbutngan ni Jehova imbes a dagidiay makabalin a mamapatay iti bagi?

¹⁵ Idiay Mateo 10:28, balakadannatayo ni Jesus: “Saanyo a pagbutngan dagiti mamapatay iti bagi ngem ti kararua dida mabalin a papatayen; ngem pagbutnganyo ketdi daydiay makabalin a mangpukaw iti kararua ken iti bagi idiay Gehenna.” Uray no ti maysa nga agbuteng ken Jehova ket mapapatay ti kabusor, dagiti pannaplit ni patay ket apagbiit laeng. (Oseas 13:14) Itinto met laeng pannakapagungarna, dayta a tao mabalinnanto a kunaen: “Adino ti yanna, O Patay ti panagballigim? Adino ti yanna, O Patay ti panniludmo?”​—1 Corinto 15:55.

16. Kasano nga impakita ni Jesus ti panagbuteng ken Jehova ken isut’ impadayagna?

¹⁶ Mangipaay a mismo ni Jesus ti nangayed nga ulidan para kadagiti amin a mangayat iti kinalinteg ni Jehova ken manggura iti dakes. Ti panagbutengna ken Jehova ket naisilnag kadagiti maudi a sasaona kadagiti adalanna, kas masarakan idiay Juan 16:33: “Dagitoy insaok idi kadakayo tapno adda koma talnayo kaniak. Ditoy lubong addanto rigatyo, ngem umingelkayo! Siak pinarmekko ti lubong.” Ituloy ti salaysay ni Juan: “Ni Jesus sinaona dagitoy, ket, idi intangadna dagiti matana sadi langit, kinunana: ‘Ama, ti oras dimtengen; padayawam ti Anakmo, tapno ti Anakmo padayawannaka koma . . . Imparangarangko ti naganmo kadagiti tao nga intedmo kaniak ditoy lubong.’”​—Juan 17:1-6.

Agbuteng ken Jehova ken Agdayaw Kenkuana

17. Kadagiti ania a pamay-an a mabalintayo a matulad ti ulidan ni Jesus?

¹⁷ Kasanotay ita a matulad ti natured nga ulidan ni Jesus? Sigurado a mabalinantayo babaen panagbuteng ken Jehova! Impakaammo ni Jesus kadatayo ti narimat a nagan ken galad ni Jehova. Iti panagbuteng ken Jehova kas ti Soberano nga Apotayo, isut’ itan-oktayo a naringringbaw ngem amin a sabsabali a didios, agraman ti awan naganna, makatikaw a Trinidad ti Kakristianuan. Ni Jesus nagserbianna ni Jehova buyogen nasalun-at a panagbuteng, a nagkedked a makubong iti silo ti panagbuteng iti matay a tao. “Kadagidi aldaw ti panaglasagna ni Kristo nangidaton kadagiti karkararag ken dawdawat a nabuyogan iti nasged nga araraw ken lulua, iti Daydiay makabalin idi a mangispal kenkuana iti ipapatay, ket isut’ naipangag gapu iti nadiosan nga amakna.” Kas ken Jesus, sapay koma ta agbutengtayo ken Jehova bayat nga itultuloytayo a sursuruen ti panagtulnog manipud kadagiti bambanag a sagabaentayo​—kankanayon a buyogen ti agnanayon a pannakaisalakan kas kalat.​—Hebreo 5:7-9.

18. Kasanotay a mabalin ti mangipaay sagrado a serbisio iti Dios buyogen nadiosan a panagbuteng?

¹⁸ Kalpasanna iti dayta a surat kadagiti Hebreo a Kristiano, guyugoyen ni Pablo dagiti napulotan a Kristiano: “Gapuna idinto nga awatentayo ti maysa a pagarian a saan a mabalin a garawen, agtultuloytayo koma a maaddaan di kaikarian a kinamanangaasi, ket gapu itoy mangipaaytayo ti sagrado a serbisio iti Dios a makaay-ayo kenkuana buyogen panagamak ken nadiosan a panagbuteng.” Ita, ti “dakkel a bunggoy” makiramramanda iti dayta a sagrado a serbisio. Ket aniat’ lagumenna? Kalpasan panangisaritana iti di kaikarian a kinamanangaasi ni Jehova iti panangipaayna ti daton ti Anakna, ni Jesu-Kristo, kunaen ni Pablo: “Gapu kenkuana idatontayo a kankanayon iti Dios ti daton ti panagdaydayaw, kayatna a sawen, ti agaon kadagiti bibbibig a mangipaduyakyak iti naganna.” (Hebreo 12:28; 13:12, 15) Iti panangapresiartayo ti di kaikarian a kinamanangaasi ni Jehova, rebbeng a tarigagayantayo nga ipaay ti tunggal oras a mabalinantayo para iti sagrado a serbisiona. Kas nasungdo a kakadua dagiti nabatbati a napulotan a Kristiano, ti dakkel a bunggoy ita ket itungtungpalda ketdi ti dakkel a paset dayta a serbisio. Dagitoy ipagapuda ti pannakaisalakan iti Dios ken ni Kristo, bayat a piguratibo nga agtakderda iti sango ti trono ti Dios, nga “ipapaayda kenkuana ti sagrado a serbisio iti aldaw ken rabii.”​—Apocalipsis 7:9, 10, 15.

Ipadayag ni Jehova iti Agnanayon

19, 20. Ania a dua a kita ti panagbuteng ti nabatadto iti “aldaw ni Jehova”?

¹⁹ Ti nadayag nga aldaw ti pannakaalangon ni Jehova ket umas-asideg! “‘Adtoy! ti aldaw umay a manguram a kasla urno, ket amin dagiti natangsit ken amin dagidiay agaramid ti dakes maipungetdanto. Ket ti aldaw nga umay alun-unennanto ida,’ kuna ni Jehova dagiti buybuyot.” Dayta a makadidigra a panawen ket isu “ti dakkel ken nakaam-amak nga aldaw ni Jehova.” (Malakias 4:1, 5) Iyegnanto ti “panagkullayaw” kadagiti puso dagiti nadangkes, ket dagitoy “didanto pulos makalisi.”​—Jeremias 8:15; 1 Tesalonica 5:3.

²⁰ Ti ili ni Jehova, nupay kasta, ket naparayray iti sabali a kita ti panagbuteng. Ti anghel a nakaitalkan ti “agnanayon a naimbag a damag” inummongna idan buyogen ti natbag a timek, a kunkunana: “Agbutengkayo iti Dios ken isut’ dayawenyo, gapu ta dimtengen ti oras ti panangukomna.” (Apocalipsis 14:6, 7) Agtakdertayto buyogen panagsiddaaw iti dayta a panangukom bayat a ti sumsumged a pudot ti Har–Magedon silmutanna ti lubong ni Satanas. Ti nasayaat a panagbuteng ken Jehova ti maimarkanto a di mapunas kadagiti pusotayo. Sapay koma ngarud ta maanamongantayo a makasarak kadagiti bagbagitayo a maysa ‘kadagiti nailasat nga immawag iti nagan ni Jehova’!​—Joel 2:31, 32; Roma 10:13.

21. Kadagiti ania a bendision ti pagturongan ti panagbuteng ken Jehova?

²¹ Sumarunonto dagiti nakaskasdaaw a bendision, agraman “tawtawen ti biag” a dumanon iti kinaagnanayon! (Proverbio 9:11; Salmo 37:9-11, 29) Ngarud, ti namnamatayo man ket mangtawid iti Pagarian wenno agserbi iti masakupanna ditoy daga, agtultuloytayo koma itan a mangipaay ti sagrado a serbisio iti Dios buyogen nadiosan a panagbuteng ken panagamak. Itultuloytayo koma nga ipadayag ti nasantuan a naganna. Ket buyogen ti ania a nabendisionan a resulta? Panagyaman nga agnanayon ta impapusotayo ti nainsiriban a balakad a kankanayon nga agbuteng ken Jehova!

Kasanot’ Isusungbatmo?

◻ Aniat’ kaipapanan daydiay “ti panagbuteng ken

Jehova”?

◻ Kasano a ti panagbuteng iti Dios ginunggonaanna

ti kadaanan nga ilina?

◻ Ania a pagtuladan ti nadiosan a panagbuteng ti

imbati kadatayo ni Jesus?

◻ Kasanotay a mabalin a masalimetmetan ti

kinatarnaw iti panagbuteng ken Jehova?

tawtawa ti langit kabayatan ti 1991? (b) Ania a

kapadasan ti biag ti nangtignay iti maysa a matalek

a misionero tapno mangted ti balakad nga: “Agbuteng

ken Jehova”? (Kitaenyo met ti 1991 Yearbook, pinanid

187-9.)

[Ladawan iti panid 18]

Idiay libro ti Apocalipsis, dagiti kakabsat ni Jesus ket nakita nga agkankanta “iti kanta ni Moises,” maysa a kanta a mangidaydayaw ken Jehova

[Ladawan iti panid 20]

Nagballigi ti buyot ni Josafat iti panagbuteng ken Jehova

[Ladawan iti panid 23]

Dagiti tawtawen ti biag a dumanon iti kinaagnanayon isunto ti gunggona dagidiay nga agbuteng ken Jehova