Dagiti Saludsod Manipud Kadagiti Managbasa

Kunaen ti Hebreo 9:16 a ti maysa a mannakitulag masapul a matay tapno agkurri ti tulag. Ngem ti Dios inaramidna ti baro a tulag, ket isut’ di natay. Gapuna kasanotayo a maawatan daytoy a bersikulo?

Mabasatayo idiay Hebreo 9:15-17: “Gapu itoy isu [ni Kristo] ti mangibabaet iti maysa a baro a tulag, tapno, gapu ta adda maysa nga ipapatay maipaay iti pannakasubbot dagiti salsalungasing iti sidong daydi immuna a tulag, dagiti maayaban awatenda koma ti kari ti agnanayon a tawid. Ta no adda tulag, ti ipapatay ti [natauan] a mannakitulag kasapulan a maipakita. Ta ti tulag adda bilegna iti kalpasan ti ipapatay, ta awan ti aniaman a pategna no sibibiag pay ti mannakitulag.”a

Ni Jehova isu ti aktual a Nangaramid iti baro a tulag. Idiay Jeremias 31:31-34, espesipiko nga impakpakauna ti Dios nga isu a mismo ti mangaramid iti baro a tulag iti ilina. Inadaw ni apostol Pablo daytoy a Kasuratan idiay Hebreo 8:8-13, nga ipakpakitana a kinaagpaysuanna, binigbig ni Pablo, a ti Dios a mismo ti nangipunganay itoy a nadiosan a tulag.

Nupay kasta, idiay Hebreo kapitulo 9, intultuloy nga insarita ni Pablo dagiti nagduduma nga akem ni Jesus no maipanggep iti baro a tulag. Immay ni Kristo kas Nangato a Padi daytoy a tulag. Manipud sabali pay a panangmatmat, ni Jesus isu ti daton maipaay iti baro a tulag, ti laeng “dara ni Kristo” ti mabalin a “mangdalus kadagiti konsiensiatayo manipud ar-aramid a natay.” Ni Kristo isu met ti Manangibabaet daytoy a tulag, a kas ken Moises isu ti nangibabaet iti Linteg ti tulag.​—Hebreo 9:11-15.

Dinakamat ni Pablo a ti ipapatay ket kasapulan tapno mapagkurri dagiti tulag iti nagbaetan ti Dios ken dagiti tattao. Ti Linteg ti tulag ket maysa a pangarigan. Ni Moises isu idi ti manangibabaetna, daydiay mangipagteng itoy a tulagan iti nagbaetan ti Dios ken ti nainlasagan nga Israel. Napateg ngarud ti akem ni Moises ket isu met ti tao a nakilangen kadagiti Israelitas idi a sumsumrekda iti tulag. Ni Moises ngarud ket mabalin a mamatmatan kas ti natauan a mannakitulag iti Linteg ti tulag a namunganay ken Jehova. Ngem kinasapulan kadi ni Moises nga ibukbok ti darana maipaay iti panagkurri ti Linteg ti tulag? Saan. Imbes ketdi naidaton dagiti animal, ti darada ti nangsuno iti dara ni Moises.​—Hebreo 9:18-22.

Ania met ngay maipapan iti baro a tulag iti nagbaetan ni Jehova ken ti nasion ti naespirituan nga Israel? Naaddaan ni Jesu-Kristo iti nadayag nga akem ti bumallaet, ti Manangibabaet iti nagbaetan ni Jehova ken ti naespirituan nga Israel. Nupay impunganay ni Jehova daytoy a tulag, daytat’ naisadag ken Jesu-Kristo. Malaksid iti Panangibabaetna, naaddaan ni Jesus kadagiti direkta a pannakilangen iti lasag kadagidiay umuna a maala iti daytoy a tulag. (Lucas 22:20, 28, 29) Kasta pay met, isu ket kualipikado a mangipaay iti daton a kasapulan tapno mapagkurri ti tulag. Daytoy a daton ket saan a babaen kadagiti animal laeng no di ket iti maysa a perpekto a natauan a biag. Gapuna a matukoy ni Pablo ni Kristo kas ti natauan a mannakitulag ti baro a tulag. Kalpasan a “simrek ni Kristo . . . idiay langit met laeng, tapno agparang ita iti sanguanan ti Dios gapu kadatayo,” nagkurri ti baro a tulag.​—Hebreo 9:12-14, 24.

Iti panagsaona maipapan kada Moises ken Jesus kas natauan a mannakitulag, saan nga isingsingasing ni Pablo nga asinoman kadakuada ti nangipunganay iti imbabaetda a tulag, nga iti kinaagpaysuanna ket inaramid ti Dios. Imbes ketdi, dagidiay a dua a tao ket sisisinged a nainaigda kas manangibabaet iti panangipatungpal kadagiti dua a tulag. Iti dua a kaso, ti ipapatay ket kasapulan​—dagiti animal a nangsandi idi ken Moises, ken ti panangidaton ni Jesus iti bukodna a dara para kadagidiay adda iti baro a tulag.

[Footnote]