Ti Kadi Panagasawa Isu ti Kakaisuna a Tulbek iti Kinaragsak?
“Adda a siwawaya a makiasawa iti kayatna, isuna laeng a maaramid koma a maiyalubog iti Apo. Ngem isu naragragsakto no mataginayon kas iti kasasaadna.”—1 CORINTO 7:39, 40.
1. Kasanot’ panangdeskribir dagiti Kasuratan ken Jehova, ken aniat’ naaramidannan agpaay kadagiti parsuana?
NI Jehova isu “ti naragsak a Dios.” (1 Timoteo 1:11) Kas Aglaplapusanan a Manangipaay iti “tunggal naimbag a sagut ken tunggal naan-anay a sagut,” itedna kadagiti amin a nasaririt a parsuana—tattao ken espiritu—no ania a talaga ti kasapulanda tapno agbalinda a naragsak iti serbisiona. (Santiago 1:17) Maipanggep iti dayta, ti maysa a billit nga agsagsagawisiw, ti agalang-ang nga uken, wenno maysa a naamo a lumba-lumba mangpaneknek amin a pinarsua ni Jehova dagiti animal tapno tagiragsakenda ti biag kadagiti mismo a pagtaenganda. Ti salmista uray na la indaniw a “dagiti kaykayo ni Jehova mapnoda iti tubbog, dagiti sedro ti Libano nga immulana.”—Salmo 104:16.
2. (a) Aniat’ mangipakita a nasarakan ni Jesus ti kinaragsak iti panangaramidna iti pagayatan ni Amana? (b) Aniada a rason agpaay iti kinaragsak ti adda kadagiti adalan ni Jesus?
2 Ni Jesu-Kristo isu ‘ti napaypayso a ladawan ti kinaisu ti Dios.’ (Hebreo 1:3) Saan a nakaskasdaaw, ngarud, a rebbeng a maawagan ni Jesus a “ti naragsak ken maymaysa a Mannakabalin.” (1 Timoteo 6:15) Ipaayannatayo iti nakaskasdaaw nga ulidan no kasano a ti panangaramid iti pagayatan ni Jehova ket agbalin nga ad-adda pay a makapnek ngem iti taraon, a mamataud iti nasin-aw a ragsak. Ipakita met ni Jesus a maadda met ti panangtagiragsak no agtigtignaytayo iti panagbuteng iti Dios, nga isu ti, napakuyogan iti nauneg a panangdayaw ken nasayaat a panagamak iti di panangay-ayo Kenkuana. (Salmo 40:8; Isaias 11:3; Juan 4:34) Idi a dagiti 70 nga adalan nagsublida “buyogen rag-o” kalpasan panangikasaba iti Pagarian a panagdaliasat, ni Jesus a mismo “napalaus ti rag-ona iti nasantuan nga espiritu.” Kalpasan panangiyebkasna iti rag-ona ken Amana iti kararag, sinublianna dagiti adalan ket kunana: “Naragsak dagiti mata a makakita kadagiti makitayo. Ta kunak kadakayo, Adu dagiti mammadto ken ar-ari a tinarigagayanda a kitaen dagiti makitayo ket dida nakita ida, ken denggen dagiti mangngegyo ngem dida nangngeg ida.”—Lucas 10:17-24.
Dagiti Rason Tapno Agbalin a Naragsak
3. Aniadat’ sumagmamano a rason agpaay iti kinaragsak?
3 Saan kadi a maragsakan dagiti matatayo a makakita kadagiti bambanag a makitatayo kas kaitungpalan ti Sao ni Jehova ken dagiti panggepna iti daytoy panawen ti panungpalan? Saantayo kadi koma nga agrag-o unay a matarusan dagiti padto a di maawatan dagiti matalek a mammadto ken ar-ari kas kada Isaias, Daniel, ken David? Ken saantayo kadi a maragsakan nga agserbi iti naragsak a Dios, ni Jehova, iti sidong ti panangidaulo ti naragsak a Mannakabalin, ti Aritayo a Jesu-Kristo? Siempre maragsakantayo!
4, 5. (a) Tapno agtalinaed a naragsak iti serbisio ni Jehova, aniat’ rebbeng a liklikantayo? (b) Aniadat’ sumagmamano a bambanag a mangnayon iti kinaragsak, ken ania a saludsod ti patauden daytoy?
4 No kayattayo ti agtalinaed a naragsak iti serbisio ti Dios, nupay kasta, masapul a saantayo nga ibatay dagiti kalikagumtayo maipaay iti kinaragsak kadagiti nailubongan a kapanunotan. Nalakada la dagitoy a lengdan ti panagpampanunottayo gapu ta iramanda dagiti material a kinabaknang, naparammag nga estilo ti panagbiag, ken dagiti umasping pay. Aniaman a “kinaragsak” a naibatay kadagita a bambanag ket saan nga agpaut, ta daytoy a lubong ket aglabas.—1 Juan 2:15-17.
5 Kaaduan kadagiti dedikado nga adipen ni Jehova mausigda a ti pananggaw-at kadagiti nailubongan a kalat ket dinto mangiyeg iti pudno a kinaragsak. Ti laeng nailangitan nga Amatayo ti mangipaay kadagiti naespirituan ken namaterialan a banag a tumulong iti napaypayso a kinaragsak dagiti adipenna. Anian a yamantayo gapu iti naespirituan a taraon nga it-itedna kadatayo baeten “iti matalek ken naannad nga adipen”! (Mateo 24:45-47) Agyamantayo met agpaay iti pisikal a taraon ken sabsabali pay a material a bambanag a maaw-awattayo manipud iti naayat nga ima ti Dios. Ken, kasta met, adda dita ti nakaskasdaaw a sagut ti panagasawa ken dagiti nainaig a rag-o iti biag ti pamilia. Isu met laeng a ti naimpusuan a tarigagay ni Noemi maipaay kadagiti nabalo a manugangna a babbai ket naiyebkas kadagitoy a sasao: “Sapay koma ta mangaramid ni Jehova iti maysa a sagut kadatayo, ken makasarakkayo koma iti paginanaan tunggal maysa iti balay ni asawana.” (Ruth 1:9) Gapuna a ti panagasawa ket maysa a tulbek a makailukat iti ridaw agturong iti dakkel a kinaragsak. Ngem ti kadi panagasawa isu laeng ti tulbek a mangilukat iti pagserkan agturong iti naragsak a biag? Dagiti agtutubo pay nangnangruna a kasapulanda a sukimaten a sipapasnek no agpayso daytoy.
6. Sigun iti Genesis, aniat’ kangrunaan a panggep ti urnos ti panagasawa?
6 Iti pananglagipna iti namunganayan ti panagasawa, kunaen ti Biblia: “Ti Dios pinarsuana ti tao iti ladawanna, iti ladawan ti Dios isu pinarsuana; pinarsuana ida a lalaki ken babai. Ket, ti Dios binendisionanna ida ket ti Dios kunana kadakuada: ‘Agbungakayo ket agadukayo ket punnuenyo ti daga ken agbalinkayo nga appo kenkuana.’” (Genesis 1:27, 28) Babaen panangiyussuat ni Jehova iti panagasawa, naaramat ni Adan tapno mapataud ti ad-adu pay a natauan a parsua, ngarud umadu ti natauan a rasa. Ngem ad-adu pay ti nainaig iti panagasawa.
“Maiyalubog Laeng iti Apo”
7. Ania a kalikagum iti panagasawa ti nangbusbosan ti maysa a matalek a patriarka iti nawadwad a panangikagumaan tapno maitungpalna?
7 Yantangay ni Jehova a Dios isu ti Namunganay iti panagasawa, isut’ mainanamatayo a mangituyang kadagiti pagalagadan iti panagasawa nga agresulta iti kinaragsak dagiti adipenna. Kadagiti panawen dagiti patriarka, ti pannakiasawa kadagidiay saan a managdayaw ken Jehova ket nakarot’ dina pannakaiparegta. Pinagkari ni Abraham ni adipenna nga Eleazar ken Jehova nga isut’ saanto a mangala iti babai nga iyasawana iti anak ti patriarka a ni Isaac manipud kadagiti taga Canaan. Nangaramid ni Eleazar iti nawatiwat a panagdaliasat ket siinget a sinurotna dagiti panangiwanwan ni Abraham tapno masarakanna ‘ti babai nga intuding ni Jehova para iti anak ti apona.’ (Genesis 24:3, 44) Gapuna a ni Isaac inasawana ni Rebecca. Idi a ti anakda a ni Esau nangpili kadagiti assawana manipud kadagiti pagano a Hitheo, dagitoy a babbai “gubuayan ida iti ladingit ti espiritu kada Isaac ken Rebecca.”—Genesis 26:34, 35; 27:46; 28:1, 8.
8. Ania a panangipawil ti impabaklay ti Linteg ti tulag iti panagasawa, ken apay?
8 Iti sidong ti Linteg ti tulag, ti panangasawa kadagiti lallaki wenno babbai a naibilang kadagiti naituding a Canaanita a nasnasion ket maiparit. Binilin ni Jehova ti ilina: “Dikanto makiinnasawa kadakuada. Dikanto ited ti anakmo a babai iti anakna a lalaki, wenno ti anakna a babai dikanto alaen nga iyasawa iti anakmo a lalaki. Ta pagbaw-ingennanto ta anakmo iti isusurot kaniak, ket agserbidanto iti sabali a didios; iti kasta ti pungtot ni Jehova sumgedto kadakayo, ket dagusennakayo a dadaelento.”—Deuteronomio 7:3, 4.
9. Ania a balakad iti panagasawa ti ited ti Biblia kadagiti Kristiano?
9 Saan a nakaskasdaaw a dagiti umasping a panangiparit iti panangasawa kadagidiay saan nga agdaydayaw ken Jehova ket rebbeng a maipakat iti uneg ti Kristiano a kongregasion. Inggunamgunam ni apostol Pablo kadagiti padana a manamati: “Saankay a makikadua iti sangol kadagiti saan a manamati. Ta ania ti pakikaduaan ti kinalinteg iti kinakillo? Wenno ania ti pakikaduaan ti silaw iti sipnget? Ket ania ti pakikappiaan ni Kristo ken Belial? Wenno ania ti pakaibiangan ti manamati iti saan a manamati?” (2 Corinto 6:14, 15) Dayta a balakad agaplikar kadagiti nagduduma a pamay-an, ket agaplikar la ketdi dayta iti panagasawa. Ti nabatad a pammilin ni Pablo kadagiti amin a dedikado nga adipen ni Jehova ket rebbeng koma a panunotenda ti pannakiasawa iti maysa a tao “no laeng isu ket naikaykaysa iti Apo.”—1 Corinto 7:39, footnote.
Di Makaasawa “iti Apo”
10. Aniat’ ar-aramiden ti adu a di naasawaan a Kristiano, ken ania a saludsod ti tumaud?
10 Adu a di naasawaan a Kristiano ti nangpili a mangsurot iti ulidan ni Jesu-Kristo babaen panangsukay iti sagut ti panagwaywayas. Sa manen, gapu iti dida pannakasarak iti agdama iti managbuteng-Dios nga asawa ket ngarud makiasawa “iti Apo,” adu a nasungdo a Kristiano ti nangikabil iti panagtalekda ken Jehova ken nagtalinaedda a di naasawaan imbes a makiasawada iti saan a manamati. Ti espiritu ti Dios mangiyeg iti unegda kadagiti bunga ti espiritu kas iti rag-o, talna, pammati, ken panagteppel, a mamagbalin kadakuada a mangtaginayon iti nadalus a panagwaywayas. (Galacia 5:22, 23) Naibilang kadagidiay sibaballigi a nakalasat iti daytoy a subok ti debosion iti Dios ket nakaad-adu a bilang dagiti Kristiano a kakabsattayo a babbai, a kadakuada addaantayo iti nangato a panangibilang. Kadagiti nagduduma a dagdaga, ad-adut’ bilangda ngem dagiti kakabsat a lallaki ket ngarud addaandat’ dakkel a bingay iti panangasaba a trabaho. Pudno, “ni Jehova met laeng itdenna ti sao; dagiti babbai a mangiwarnak iti naimbag a damag dakkelda a buyot.” (Salmo 68:11) Kinaagpaysuanna, adu a di naasawaan nga adipen ti Dios iti agsinnumbangir a sekso ti mangtagtaginayon iti kinatarnawda gapu ta ‘agtalekda ken Jehova iti amin a pusoda, ken palpalintegenna dagiti desdesda.’ (Proverbio 3:5, 6) Ngem dagidiay kadi agdama a di makaasawa “iti Apo” ket sigurado a saanda a naragsak?
11. Iti ania a mapasiguraduan dagiti Kristiano nga agtalinaed a di naasawaan gapu iti panagraemda kadagiti prinsipio ti Biblia?
11 Laglagipentayo a Saksinatayo ti naragsak a Dios, ni Jehova, nga agserserbi iti sidong ti naragsak a Mannakabalin, ni Jesu-Kristo. Gapuna a no ti panagraemtayo kadagiti panangipawil a silalawag a naibatay iti Biblia ti rebbeng a mangtignay kadatayo nga agtalinaed a di naasawaan gapu iti di pannakabiruk iti pakiasawaan “iti Apo,” nainrasonan kadi a panunoten a ti Dios ken ni Kristo ket baybay-andatayo tapno di naragsak? Saan la ketdi. Ngarud, masapul nga ipatotayo a posible ti agbalin a naragsak kas Kristiano nupay addatayo iti di naasawaan a kasasaad. Ni Jehova mapagbalinnatayo a pudpudno a naragsak naasawaantayo man wenno agwaywayas.
Ti Tulbek iti Pudno a Kinaragsak
12. Aniat’ ipabigbig ti kaso dagiti nasukir nga anghel no maipapan iti panagasawa?
12 Ti panagasawa ket saan a ti kakaisuna laeng a tulbek iti kinaragsak agpaay iti amin nga adipen ni Jehova. Alaentayo, kas pangarigan, dagiti anghel. Sakbay ti Layus, dadduma nga anghel ti nangsukay kadagiti tarigagay a saan a gagangay kadagiti espiritu a parsua, nagbalinda a di kontento iti dida pannakaasawa, ket nagtagilasagda tapno mangalada kadagiti babbai kas assawada. Gapu ta dagitoy nga anghel ngarud “pinanawanda daydi umiso a paggiananda,” ti Dios “inkabilna [ida] kadagiti agnanayon a pannakabalud iti sidong ti napuskol a kinasipnget maipaay iti panangukom ti naindaklan nga aldaw.” (Judas 6; Genesis 6:1, 2) Nalawag, nikaanoman saan nga inyurnos ti Dios a mangasawa dagiti anghel. Gapuna a ti panagasawa ket talaga a saan nga isu ti tulbek ti kinaragsakda.
13. Apay a naragsak dagiti nasantuan nga anghel, ken aniat’ ipabigbig daytoy kadagiti amin nga adipen ti Dios?
13 Kaskasdi, naragsak dagiti matalek nga anghel. Impasdek ni Jehova dagiti pamuon ti daga “iti narag-o a panagkanta a sangsangkamaysa dagiti bitbituen ti agsapa ken ti nagkaykaysa a panagdir-i dagiti [angheliko nga] annak ti Dios.” (Job 38:7, The New Jerusalem Bible) Apay a naragsak dagiti nasantuan nga anghel? Agsipud ta addada iti kankanayon a panagserbi ken Jehova a Dios, nga “agim-imdengda iti timek ti saona” tapno tungpalenda dayta. Pagrayuanda ti “panangaramid iti pagragsakanna.” (Salmo 103:20, 21, footnote) Wen, ti kinaragsak dagiti nasantuan nga anghel agtaud manipud panagserbi a simamatalek ken Jehova. Isu dayta ti tulbek ti pudno a kinaragsak uray met kadagiti tattao. Iti dayta a banag, dagiti naasawaaan a napulotan a Kristiano a siraragsak nga agserserbi ita iti Dios ket saandanton a mangasawa inton mapagungarda iti nailangitan a biag, ngem agbalindanto a naragsak kas espiritu a parparsua a mangar-aramid iti nadiosan a pagayatan. Naasawaan man wenno agwaywayas, ngarud, amin a nasungdo nga adipen ni Jehova mabalinda ti agragsak gapu ta ti pudno a pakaibatayan ti kinaragsak ket ti matalek a panagserbi iti Namarsua.
“Banag a Naim-imbag Ngem Annak a Lallaki ken Babbai”
14. Ania a naimpadtuan a kari ti naited kadagiti nadiosan nga eunuko idiay kadaanan nga Israel, ken apay a kasla karkarna daytoy?
14 Uray no ti maysa a nasungdo a Kristiano saan a pulos a makiasawa, maipasigurado ti Dios ti kinaragsak dayta a tao. Mabalin a maadaw ti kinaragsak manipud kadagitoy a sasao a naimpadtuan a naiturong kadagiti eunuko idiay kadaanan nga Israel: “Kastoy ti kuna ni Jehova kadagiti eunuko nga agngilin kadagiti aldawko a panaginana ken pinilida dagiti bambanag a makaay-ayo kaniak ken salimetmetanda ti tulagko: ‘Mangtedakto kadakuada iti uneg ti balayko ken iti uneg dagiti bakudko iti maysa a pakalaglagipan ken maysa a nagan, a naim-imbag ngem kadagiti annak a lallaki ken annak a babbai. Ikkakto ida iti maysa a nagan a mataginayon, a saanto a makeltay.’” (Isaias 56:4, 5) Mabalin nga inanamaen ti maysa a dagitoy nga indibidual ket maikariandanto iti asawa a babai ken annak a mangtaginayon iti naganda. Ngem naikarianda iti “banag a naim-imbag ngem kadagiti annak a lallaki ken babbai”—mataginayon a nagan iti uneg ti balay ni Jehova.
15. Aniat’ mabalin a maikuna maipapan iti kaitungpalan ti Isaias 56:4, 5?
15 No dagitoy nga eunuko ket maibilangda a kas naimpadtuan a ladawan a manginanaig “iti Israel ti Dios,” irepresentarda dagiti napulotan nga umawat iti mataginayon a lugar iti uneg ti naespirituan a balay ni Jehova, wenno templona. (Galacia 6:16) Awan duadua, daytoy a padto ket maaddaantot’ literal a pannakaipakatna kadagiti mapagungarto a nadiosan a eunuko ti kadaanan nga Israel. No awatenda ti daton a subbot ni Kristo ken itultuloyda a pilien ti pagay-ayatan ni Jehova, awatendanto ti “maysa a nagan a mataginayon” idiay baro a lubong ti Dios. Mabalin met a maipakat daytoy kadagidiay kameng ti “sabsabali a karnero” iti daytoy panawen ti panungpalan a mangliwat iti pannakiasawa ken panagbalin a nagannak tapno maipamaysada dagiti bagbagida nga ad-adda iti serbisio ni Jehova. (Juan 10:16) Dadduma kadakuada ti mabalin a matay a di naasawaan wenno awanan anak. Ngem no matalekda, inton panagungar awatendanto ti “banag a naim-imbag ngem kadagiti annak a lallaki ken babbai”—maysa a nagan “a saanto a makeltay” idiay baro a sistema dagiti bambanag.
Ti Panagasawa Saan a ti Kakaisuna a Tulbek iti Kinaragsak
16. Apay a maikuna a ti panagasawa ket saan a kanayon a mangiyeg iti kinaragsak?
16 Dadduma a tao mariknada a ti kinaragsak ket kankanayon a nainaig iti panagasawa. Masapul a maannugot, nupay kasta, nga uray kadagiti adipen ni Jehova ita, ti panagasawa saan a kanayon a mangiyeg iti kinaragsak. Daytat’ mangrisot kadagiti dadduma a parikut ngem masansan a mangpataud kadagiti sabsabali a narigrigat a sarangten ngem kadagidiay mapasaran dagiti di naasawaan a tattao. Kuna ni Pablo a ti panagasawa mangiyeg ‘rigat ti lasag.’ (1 Corinto 7:28) Adda dagiti panawen a ti naasawaan a tao ket “madanagan” ken “mariribukan.” Masansan nga isu ket marigatan nga agbalin a “kankanayon a naipamaysa iti Apo nga awanan pannakasinga.”—1 Corinto 7:33-35.
17, 18. (a) Aniat’ impadamagen dagiti dadduma nga agdaldaliasat a manangaywan? (b) Ania a balakad ti inted ni Pablo, ken apay a makagunggona nga iyaplikar dayta?
17 Agpada a ti panagasawa ken ti panagwaywayas ket sagut manipud iti Dios. (Ruth 1:9; Mateo 19:10-12) Tapno agballigi iti agpada a kasasaad, nupay kasta, napateg ti managkararag a kapanunotan. Ipadamag dagiti agdaldaliasat a manangaywan nga adu a Saksi ti ubing unay nga agas-asawa, a masansan agbalinda a nagannak sakbay a nakasaganada a mangibaklay kadagiti ibungana a responsabilidad. Dadduma kadagitoy a panagasawa ti maburak. Dagiti sabsabali a pagassawaan masarangetda dagiti parikutda, ngem ti panagasawada di nangiyeg kadakuada iti kinaragsak. Kas insurat ni Ingles a dramatista a William Congreve, dagidiay agasawa a sidadarasudos “mabalin nga agbabawidanto inton panawenna.”
18 Ipadamag met dagiti manangaywan ti sirkito a dadduma nga agtutubo a kakabsat a lallaki ti agkitakit nga agaplikar iti serbisio iti Bethel wenno iti panagboluntario para iti Ministerial Training School gapu iti kalikagum nga agtalinaed a di naasawaan iti mabayag bassit a tiempo. Ngem ited ni Pablo ti balakad a di panagasawa sakbay a ti maysa “ket limmabasen iti kinalapsak ti kinaagtutubona,” kayatna a sawen, panaguray agingga a nagpababan ti umuna a panagkidar ti seksual a tarigagay. (1 Corinto 7:36-38) Dagiti tawtawen a mabusbos iti panagbiag kas maysa a di naasawaan a nataengan ket mangipaay iti maysa a tao ti napateg a kapadasan ken pannakaawat, a mangikabil kenkuana iti nasaysayaat a takder nga agpili iti parehana wenno mangaramid iti naannad pannakausigna a pangngeddeng tapno agtalinaed a di naasawaan.
19. Kasanot’ mabalin a panangmatmattayo kadagiti bambanag no awan napaypayso a panagkasapulantayo iti panagasawa?
19 Dadduma kadatayo ket limmabasen iti kinalapsak ti kinaagtutubona, buyogen ti napigsa a duron ti seksual a kinasinged. Mabalin a sagpaminsan maisilnagtayo dagiti bendision ti panagasawa ngem kinaagpaysuanna addaantayo iti sagut ti panagwaywayas. Mabalin a makita ni Jehova a makapagserbitayo kenkuana a siiepektibo iti di naasawaan a kasasaad ken awan pudno a pakasapulantayo iti panagasawa, a mabalin daytat’ mangkalikagum iti panangpanawtayo kadagiti sumagmamano a pribilehio iti serbisiona. No ti panagasawa ket saan a personal a kasapulan ken saantayo a naparaburan iti maysa a katakunaynay, mabalin nga adda sabali a banag nga isagsagana ti Dios kadatayo. Alagadentayo ngarud ti pammati nga ipaaynanto no ania ti kasapulantayo. Ti kadakkelan a kinaragsak agresulta manipud sipapakumbaba a panangawat no ania ti agparang a pagayatan ti Dios para kadatayo, kas kadagiti Judio a kakabsat ‘nagulimekda ket impadayagda ti Dios’ apaman a nailasinda a ti Dios sinagutanna dagiti Gentil iti panagbabawi tapno maaddaanda iti biag.—Aramid 11:1-18.
20. (a) Ania a balakad iti di pannakiasawa ti naited ditoy kadagiti agtutubo a Kristiano? (b) Ania a pamunganayan a punto maipanggep iti kinaragsak ti agtalinaed a pudno?
20 Gapuna, ngarud, ti panagasawa mabalin a tulbek iti kinaragsak, nupay mabalinna met a lukatan ti ruangan kadagiti parikut. Maysa a banag ti sigurado: Ti panagasawa ket saan a ti kakaisuna a pamay-an tapno masarakan ti kinaragsak. Iti pannakausigen amin dagiti bambanag, nainsiriban ngarud, nangnangruna kadagiti agtutubo a Kristiano, a pagreggetanda ti mangilugar iti sumagmamano a tawen a di naasawaan. Dagita a tawtawen ket mabalin a naimbag pannakaaramatna tapno agserbi ken Jehova ken tapno rumang-ay iti espiritualidad. Aniaman ti tawen wenno naespirituan nga irarang-aytayo, nupay kasta, daytoy a pamunganayan a punto agtalinaed a pudno agpaay amin kadagidiay awan-pambarna a dedikado iti Dios: Ti pudno a kinaragsak ket masarakan iti matalek a serbisio ken Jehova.
Kasanot’ Isusungbatmo?
◻ Apay a naragsak dagiti adipen ni Jehova?
◻ Apay a ti panagasawa ket saan a tulbek iti kadakkelan a kinaragsak?
◻ Iti panagpili iti katakunaynay, aniat’ makalikaguman iti ili ni Jehova?
◻ Apay a nainrasonan a patien a dagiti Kristiano nga agtalinaed a di naasawaan ket makapagragsakda?
◻ Aniat’ masapul a maannugot maipapan iti panagasawa ken kinaragsak?