Dagiti Buya Manipud Naikari a Daga

Agrag-okayo! Agliplippias Dagiti Tangke iti Lana

PINAREGGET ni mammadto Joel dagiti ‘annak ti Sion nga agragsak ken agrag-oda ken ni Jehova.’ Inusarna ti lana ti olibo a mangiladawan ti ragsak ken kinarang-ayda: “Ket dagiti pagtaltagan mapunnodanto iti nataepan a trigo, ket dagiti tangke aglippiasdanto iti baro nga arak ken lana.”​—Joel 2:23, 24.

No nagbiagkayo idiay Israel idi panawen ti Biblia, maragsakankayo la ketdi nga adda kayo ti olibo iti asideg ti balayyo, wenno iti taltalonyo, kas iti kayo ti olibo a naipakita iti ngato.a Nalabit pinagbalinna a nanam-ay ken ad-adda a makaay-ayo ti biagyo. Apay a nakapatpateg ti kayo ti olibo?​—Idiligyo ti Oc-ocom 9:8, 9.

Umuna, mingminganyo a naimbag ti kayo a mulayo. Nalabit agbibiag dagiti kayo ti olibo iti sinigsiglon, dadduma nasurok a rinibo a tawen, isu a no sukimaten madlawyo ti nabuko, maris-dapo a puonna. Mabalin nga agtayag iti 6 a metro ti kayo a mulayo, sigurado a saan a kas katayag ti sedro wenno kas kangayed ti palma. Ti nasileng, kankanayon a berde a bulongna, mangipaay ti linong iti intero a tawen. Ngem, dikay ipateg ti kayo a mulayo gapu laeng iti langa wenno iti linong nga ipaayna. Talaga a saan.

Ti bunga ti kapatgan, dagidiay rinibo a berde wenno nangisit nga olibo! Dayta ti mamagbalin itoy a kapatgan a banag iti biag ken trabaho idiay Israel. Naarpawan daytoy kadagiti nakusnaw marisna a sabong iti Mayo, nga agbalinto a bungana. (Job 15:33) No matangkenanen, agbaliw iti kolor kape wenno nangisit ti pangamarilioen a berde a maris dagitoy.

Narigat a trabaho ti panagburas iti olibo iti Oktubre/Nobiembre. Aprasenyo ti kayo tapno maregreg dagiti naluom a bungana kadagiti naiyaplag a lupot iti baba. (Deuteronomio 24:20) Buguanyo pay nga umuna dagiti bunga sakbay a maproseso, kas ti panangiyuper iti naasinan a danum tapno maikkat ti gagangay a napait a ramanna. Ania ti sumaruno?

Depende no aniat’ kayatyo nga aramiden iti nawadwad nga apityo. Mabalinyo a kanen a naata, wenno artemenyo tapno adda naraman nga abasto ti pamiliayo iti adu a bulan. Mabalin a kangrunaan a paset ti taraon a buklen dagiti naraman nga olibo a kadua dagiti bibingka a sebada.

Nupay kasta, mabalin nga iprosesoyo ti kaaduan daytoy tapno maalayo ti nakapatpateg a banag​—ti lana ti olibo. Makaalakayo iti nagduduma a grado ti lana, nga adut’ pakausaranna. Umuna, mabalinyo nga in-inut a luluen wenno pespesen ti naluom nga olibo iti alsong wenno uray baddebaddekan. (Mikias 6:15) Mangpataud iti kasayaatan a lana a maaw-awagan iti extra virgin, a maiyanatup kadagiti pagsilawan a nanglawag iti tabernakulo. (Exodo 25:37; 27:20, 21) Anian a panangipategyo iti daytoy nga abasto a lana nga usaren iti panagluto para iti naisangsangayan nga okasion!

Uray dagiti nababa a klase ti olibo, mabalin nga ikabil iti pagpespesan tapno mapespes ti ad-adu pay a lana manipud iti lasagna, nupay daytoy ket nababbaba ti gradona. Agarup 50 a porsiento a lana ti adda iti lasagna. Mabalin nga usaren ti nadumaduma a wagas ti panagpespes, ngem maysa laeng ti naiyilustrar ditoy. Maikabil iti nagtimbukel a pagkargaan ti sibubukel wenno saan unay a napespes nga olibo. Mapespesda babaen ti gilingan a bato nga ipusipos ti asno wenno tao, agingga nga agayus ti lana sa maurnong iti burnay.​—Mateo 18:6.

Maiyasping met ti lana ti olibo iti natunaw a balitok​—maipatpateg unay ken adu ti usarna. Ti makatawen nga abasto a lana ti pamilia a buklen ti lima wenno innem ket mapataud ti maysa a kayo. Gapu ta nalaka a marunaw ken mangpakired, maysa daytoy kadagiti kangrunaan a taraonda. (Idiligyo ti Jeremias 41:8; Ezequiel 16:13.) Mabalinyo nga aramiden ti lana a bangbanglo ken usaren a kosmetiko wenno pangsapsapo iti ulo ti sangaili a mangipamatmat ti kinamanagpadagus. (2 Samuel 12:20; Salmo 45:7; Lucas 7:46) Mabalinyo nga usaren a pangagas kadagiti sugat.​—Isaias 1:6; Marcos 6:13; Lucas 10:34.

Saan laeng a dagitoy ti pakausaran ti nawadwad nga abasto a lana ti olibo. Mausaryo met daytoy a pangsilaw iti balayyo, kas paset ti daton iti Dios, wenno kas tagilako. Wen, nakapatpateg ti kayo ti olibo idi panawen ti Biblia, isu a maikanatad nga inusar ni Joel daytoy a mangiladawan iti kinarang-ay ken kinaragsak.​—Deuteronomio 6:11; Salmo 52:8; Jeremias 11:16; Mateo 25:3-8.

[Footnote]

[Picture Credit Line iti panid 24]

Pictorial Archive (Near Eastern History) Est.