Rumbeng Kadi a Mabautisarankayo?

NGANGNGANI maysa a milion a tao ti binautisaran dagiti Saksi ni Jehova iti napalabas a tallo a tawen. Agpromedio daytoy iti 824 tunggal aldaw, wenno 4 a tao ti nabautisaran iti tunggal 7 a minuto. Maysa laeng aya daytoy a kapadpada ti relihiuso a kinaregget idi maika-15 ken maika-16 a siglo?

Saan, saan a nabautisaran dagitoy nga indibidual babaen ti pannakapilit, kas paset ti sapasap a pannakakumberte, wenno kas resulta ti emosional a pakaasi ti sumagmamano a relihiuso a bumibitla. Nabautisaranda agsipud ta ni Jesu-Kristo, ti Apo ken Pangulo dagiti Kristiano, imbilinna a maaramid daytoy. Sinurotda dagiti addang ken pagannurotan nga imbalabala ni Jesus ken inalagad dagiti apostol a pinili ken sinanayna a mismo.

Kalpasan ti panagungar ni Jesus ken sakbay ti iyuulina sadi langit, intedna kadagiti pasurotna daytoy pammakada a bilin: “Inkayo ngarud ket pagbalinenyo nga ad-adalan dagiti tattao iti amin a nasnasion, a bautisaranyo ida iti nagan ti Ama ken ti Anak ken ti nasantuan nga espiritu, nga isuroyo kadakuada a tungpalenda dagiti amin a bambanag nga imbilinko kadakayo. Ket, adtoy! Addaak kadakayo iti amin nga aldaw agingga ti panagpatingga ti sistema dagiti bambanag.” (Mateo 28:19, 20) Manipud iti dayta a tiempo ken agpatpatuloy, isu laeng daytoy ti pammautisar iti danum nga anamongan ti Dios.

Maiyanatup unay, ibaga kadatayo ti Biblia a dagidiay immuna a paspasurot ni Kristo nagbalinda “a saksi [ni Jesus] agpadpada idiay Jerusalem ken iti isuamin a Judea ken Samaria ken agingga iti kaadaywan a paset ti daga.” (Aramid 1:8) Kas impadto ni Jesus, ti trabahoda a panangaskasaba ken panangisuro agbanagto iti pannakabautisar dagiti manamati nga agbalinto met a paspasurot ni Kristo.

Ti immuna a nairekord a pangarigan iti daytoy ket napasamak idiay Jerusalem idi aldaw ti Pentecostes 33 K.P. Iti dayta a tiempo ni apostol Pedro “nagtakder agraman dagiti sangapulo ket maysa” ket nagsao iti naummong nga umariwekwek maipapan ken Jesus a Mesias. Ibaga kadatayo ti salaysay a ti bitlana ‘sinugatna ti pusoda,’ ket inimtuodda no ania ti aramidenda. “Agbabawikayo, ket ti tunggal maysa kadakayo mabautisaran koma iti nagan ni Jesu-Kristo maipaay iti pannakapakawan dagiti basbasolyo,” kinuna ni Pedro. Ti resultana ket “dagidiay nangabrasa a naimpusuan iti saona nabautisaranda, ket iti dayta nga aldaw agarup tallo ribo dagiti kararua a nainayon.” (Aramid 2:14-41) Dagiti nagsasaganad a salaysay pasingkedanda a sakbay ti pannakabautisar dagiti adalan immun-una a nangngeganda ti Nakristianuan a mensahe, a namatida iti naimbag a damag, ken nagbabawida.​—Aramid 8:12, 13, 34-38; 10:34-48; 16:30-34; 18:5, 8; 19:1-5.

Iti Ania a Pamay-an?

Ngem kasano ti pannakabautisar dagitoy nga adalan iti danum? Babaen kadi ti aspersion (panangwarsi), affusion (panangbukbok iti ulo), wenno pannakaitaneb (naan-anay a pannakaipalned)? Ania ti ipakita ti rekord ti Biblia? Yantangay ni Jesus nangibati kadatayo iti ulidan “tapno surotentayo a naimbag dagiti addangna,” iti ania a pamay-an a nabautisaran idi?​—1 Pedro 2:21.

Ipakita ti Biblia a nabautisaran ni Jesus idiay Jordan, a maysa a dakkel a karayan. Kalpasan a nabautisaran, “simmang-at manipud iti danum.” (Marcos 1:10; Mateo 3:13, 16) Gapuna, aktual a naitaneb ni Jesus idiay Karayan Jordan. Isut’ binautisaran ni Juan, isu nga, iti panagsapulna iti maitutop a lugar a pangaramidanna kadagiti panangbautisar, pinilina ti maysa a disso idiay Ginget ti Jordan iti asideg ti Salim “agsipud ta adda idi adu a danum sadiay.” (Juan 3:23) Dagiti sasao ti eunuko nga Etiope paneknekanda ti kinapudno a ti naan-anay a pannakaipalned iti danum ti naipasdek a wagas ti pammautisar dagiti pasurot ni Jesus. Iti isusungbatna iti sursuro ni Felipe, kinunana: “Adtoy! Maysa a bagi ti danum; ania ti makalapped kaniak a mabautisaran?” Kalpasanna “napanda a dua iti danum” sada “simmang-at iti danum.”​—Aramid 8:36-39.

Ti ngata sekular a historia paneknekanna ti alagaden dagiti Kristiano a panangbautisar babaen ti pannakaitaneb? Pudno a kasta. Ket makapainteres a maammuan nga adu a dadakkel a labneng a pagbautisaran ti adda pay laeng iti adu a dagdaga. “Ti ebidensia ti arkeolohia aglaplapusanan a paneknekanna ti pannakaitaneb kas ti gagangay a pamay-an ti panangbautisar bayat dagiti umuna a sangapulo agingga ti sangapulo ket uppat a siglo,” kuna ti pagiwarnak a Ministry. Inayonna: “Matunton kadagiti reggaay ti immuna a Nakristianuan a patpatakder, ken kasta met kadagiti kadaanan a simbaan a maus-usar pay laeng, ti pakasaritaan ti Nakristianuan a pammautisar. Dagiti ladawan a naipinta kadagiti panteon ken simbaan, dagiti mosaic a disenio kadagiti datar, diding, ken bobida, dagiti kitikit, ken ladawan kadagiti kadaanan a manuskrito ti Baro a Tulag nayonanda dagiti detalye daytoy a pakasaritaan . . . Mainayon daytoy iti ebidensia a nasarakan iti intero a sursurat dagiti amma ti simbaan a ti pannakaitaneb ti kadawyan a pamay-an ti panangbautisar ti simbaan idi.”

Admitiren ti New Catholic Encyclopedia: “Nalawag a ti Pammautisar iti nasapa a Simbaan ket babaen ti pannakaitaneb.” Di pagsiddaawan, ngarud, makasaraktayo kadagiti kastoy a kangrunaan a paulo iti diario: “Isubli Dagiti Katoliko ti Pannakaitaneb a Pammautisar” (The Edmonton Journal, Canada, Setiembre 24, 1983), “Aglatlataken Kadagiti Katoliko Ditoy ti Pammautisar Babaen ti Pannakaitaneb” (St. Louis Post-Dispatch, Abril 7, 1985), “Pilpilienen ti Adu a Katoliko ti Pammautisar Babaen ti Pannakaitaneb” (The New York Times, Marso 25, 1989), ken “Maisubsublin Dagiti Pannakaitaneb a Pammautisar” (The Houston Chronicle, Agosto 24, 1991).

Iti Ania a Panggep?

Apay a kinalikaguman ni Jesus a mabautisaran dagiti adalanna? Bueno, maysa dayta a maiyanatup a simbolo ti naimpusuan a dedikasionda iti Dios. Ti “naimbag a damag” masapul a maikasaba iti intero a daga, ket masapul ti panagaramid iti ad-adalan manipud “tattao iti amin a nasnasion.” (Mateo 24:14; 28:19) Kaipapanan daytoy a saanen nga iti laeng nasion dagiti Judio ti pakilanglangenan ti Dios, a buklen dagiti tattao a naidedikar kenkuana manipud pannakaiyanakda. Dagiti immuna a Gentil, wenno di-Judio, nga immawat iti kinapudno maipapan ken Jesu-Kristo ken nabautisaran ket isuda Cornelio ken ti pamiliana.

Ti pannakairarem iti danum impakitana a dagidiay nabautisaran ket nataydan iti kabibiag a naipamaysa iti bagbagida. Ti pannakairukkuasda iti danum insimbolona a sibibiagda itan iti panagaramid iti pagayatan ti Dios ket iyun-unadan dayta iti biagda, kas inaramid ni Jesus. (Mateo 16:24) Ti pannakabautisar “iti nagan ti Ama ken ti Anak ken ti nasantuan nga espiritu” impasimudaagna nga inadal ken inawatdan ti kinapudno maipapan iti tunggal maysa kadagitoy ket binigbigdan ti kinasiasino dagitoy. (Mateo 28:19; idiligyo ti Aramid 13:48.) Ti bautismo ket maysa laeng a pangrugian nga addang iti panagtulnog iti Dios ken panagpasakop iti pagayatanna.

Saan a suportaran dagiti Kasuratan ti nasaknap a relihiuso a panangmatmat a ti bautismo ket maysa a sakramento, kayatna a sawen, narelihiusuan a seremonia a mangipaay iti pateg​—parabur, kinasanto, wenno naespirituan a gunggona​—iti daydiay nabautisaran. Kas pangarigan, ti bilin ti papa a ni Papa Eugenio IV a naadaw iti immun-una nga artikulo intuloyna a kinuna maipapan iti bautismo: “Ti epekto daytoy a sakramento ket pannakapakawan ti amin a basol, natawid ken aktual; kasta met iti amin a pannakadusa a maigapu iti basol. Kas bungana, awan naibilin a pannakapennek kadagiti napalabas a basbasol kadagidiay mabautisaran; ket no matayda sakbay pay a makaaramidda ti aniaman a basol, dagus a makagtengda idiay pagarian ti langit ken iti presensia ti Dios.”

Nupay kasta, nabautisaran ni Jesus nupay “saan a nakaaramid iti basol.” (1 Pedro 2:22) Mainayon pay, sigun iti Kasuratan, magun-odan laeng ti pannakapakawan dagiti basol babaen ti daton a subbot ni Jesu-Kristo. Indagadag ni Ananias ken Saulo a taga Tarso: “Tumakderka, agpabautisarka ket ugasam dagiti basolmo babaen ti iyaawagmo iti nagan [ni Jesus].” (Aramid 22:12-16) Wen, posible laeng ti pannakaisalakan babaen ti naiparukpok a dara ni Jesus ken ti “iyaawag iti naganna” buyogen ti pammati.​—Hebreo 9:22; 1 Juan 1:7.

Ania, ngarud, ti kaipapanan dagiti sasao ni Pedro idiay 1 Pedro 3:21? Sadiay kunana: “Daydiay katupag daytoy isalsalakannakayo met ita, nga isu ti bautismo, (saan a ti panangiwaksi iti rugit ti lasag, no di ket ti panagkiddaw iti Dios iti naimbag a konsiensia,) babaen ti panagungar ni Jesu-Kristo.” Idildilig ni Pedro ti bautismo iti kapadasan ni Noe nga ilalasat kadagiti danum ti Layus. (1Pe 3 Bersikulo 20) Ni Noe, a mangipakpakita iti naan-anay a pammati iti Dios, binangonna ti daong a pakaispalan ti pamiliana. (Hebreo 11:7) Umasping iti dayta, babaen ti pammati ken Jehova a Dios ken iti probisionna iti pannakaisalakan babaen ken Kristo Jesus, mabalin dagiti tattao itatta ti maisalakan manipud iti daytoy agdama a nadangkes a lubong. Masapul nga agtignayda met iti dayta a pammati. Babaen ti panagbabawi iti basbasol, panangtallikud iti dakes a kurso, ken panangaramid iti awan kondisionna a dedikasion ken Jehova a Dios babaen ti kararag, maaramid ti panagkiddaw iti Dios iti naimbag a konsiensia. Ngem maibatay iti daton ni Jesus, ken iti panagungarna a babaen dayta indatagna iti Dios idiay langit ti pateg dayta a daton, a mapakawan dagiti basbasol ken posible ti pannakaisalakan.​—1 Pedro 3:22.

Ania ti Aramidenyo?

Maysakayo kadi a makitimtimpuyog kadagiti Saksi ni Jehova iti sumagmamanon a tiempo? Nalabit naaramidyon dagiti nasken a panagbalbaliw iti biagyo maitunos kadagiti prinsipio ti Biblia ngem dikay pay nagdedikar ken nagpabautisar. Mabalin a kayatyon nga aramiden ti pagayatan ti Dios, ngem agamakkayo a ti bautismo obligarennakayonto. Iti kasta, mabalin a kaykayatyo a liklikan ti kasta a responsabilidad ken panungsungbat iti sumagmamano a tiempo. Ngangngani 11.5 milion a tao ti timmabuno iti pannakarambak ti Pangrabii ti Apo idi napalabas a tawen. Nupay kasta, ti kangatuan a bilang dagidiay makiramraman iti trabaho a panangikasaba iti naimbag a damag iti intero a makatawen ket nakurang a 4.5 milion. Kaipapanan daytoy nga agarup pito milion a tattao ti mangipatpateg iti kinapudno ti Dios, nupay saanda a nabautisaran a Saksi ni Jehova. Siempre, sumagmamano kadagitoy ket ub-ubbing ken kabbaro nga interesado. Ngem dadduma kadagidiay makiramraman iti panangaskasaba a trabaho ket dida pay met nabautisaran. Gapuna adu a tattao ti nakagun-oden iti umiso a pannakaammo iti Biblia ngem dida pay naan-anay nga inawat ti probision ti Dios iti pannakaisalakan babaen ti panagpabautisar.

Maysa a napateg a punto a laglagipen ket ti pannakaammo iti kalikaguman ti Dios kadakayo ti mangiyeg iti obligasion. “No ti maysa ammona no kasano ti panagaramid iti umiso ket kaskasdi saanna nga aramiden dayta, basol dayta kenkuana,” kuna ti Santiago 4:17. Ipakita ti Ezequiel 33:7-9 a ti maysa a tao a napakaammuan kadagiti bilin ken pannursuro ti Dios ket responsable a mangtungpal kadagita. Gapuna ti saludsod ket no ti maysa addaan napasnek nga ayat iti Dios ken napudno a tarigagay a mangay-ayo kenkuana. Ti tao a pudpudno nga addaan kasta nga ayat ken kayatna ti naisangsangayan a pannakirelasion ken Jehova a Dios saan nga agkedked a mangidedikar a naan-anay iti biagna kenkuana. Ti bautismo ket maysa a makinruar a simbolo dayta a dedikasion. Dayta ket nasken nga addang iti pannakaisalakan. Dagiti pudno a manamati agpabautisarda.​—Aramid 8:12.

Dagiti engrande a panginanamaan nga ikari ti Dios kadagiti matalek, dedikado nga indibidual iti um-umayen a baro a lubong lab-awanna unay ti aniaman a temporario a pagimbagan nga itukon daytoy nadangkes a daan a sistema ti bambanag. Maiwaksi ti panagbuteng kadagiti pada a tao no panunotentayo ti nabileg nga ima ti Dios. (1 Corinto 10:22; 1 Pedro 5:6, 7) Pudno unay, daytoyen ti tiempo a panangimtuodyo iti bagiyo, kas iti panangimtuod ti eunuko nga Etiope ken Felipe: “Ania ti makalapped kaniak a mabautisaran?”

[Ladawan iti panid 7]

Kas iti eunuko nga Etiope, im-imtuodenyo kadi iti bagiyo: “Ania ti makalapped kaniak a mabautisaran?”