Ti Parikut ti Panagsursuro nga Aguray

TI PANAGSURSURO nga aguray kadagiti bambanag a kayattayo ti nalabit maysa kadagiti karirigatan a leksion a madawat kadatayo a tattao. Nainkasigudan dagiti babassit nga ubbing ti di makaan-anus. Aniaman a makaawis iti panagkitada, kayatda, ket kayatda nga insigida! Ngem kas pagaammoyo sigun iti kapadasan, a maysa a kinapudno ti biag a saan nga amin ket mapaadda no dawatem. Uray kadagiti maiparbeng a tarigagay, masapul a sursuruentay ti aguray iti umiso a tiempo tapno mapennek ida. Adut’ makaadal iti daytoy a leksion; dagiti dadduma pulos a dida nakasursuro.

Dagiti tattao a mayat a gumun-od iti anamong ti Dios addaanda kadagiti masinunuo a rason nga agsursuro nga aguray. Ni Jeremias, maysa nga adipen ni Jehova sakbay ti panawen dagiti Kristiano, impaganetgetna daytoy: “Naimbag a ti maysa a tao aguray koma, a siuulimek, iti panangisalakan ni Jehova.” Idi agangay, kinuna ni Kristiano nga adalan a Santiago: “Aganuskayo ngarud, kakabsat, agingga iti kaadda ti Apo.”​—Un-unoy 3:26; Santiago 5:7.

Adda bukod ni Jehova a pagorasan iti inna panangileppas kadagiti nadibinuan a panggepna. No ditay makauray agingga iti naituding a tiempona a panangaramid kadagiti bambanag, awantot’ pannakapnektayo, nga isut’ mangdadael ti rag-o. No awan ti rag-o kumapuy iti naespirituan ti adipen ti Dios, a kas imbaga ni Nehemias kadagiti kailianna: “Ti rag-o iti APO isu ti pigsayo.”​—Nehemias 8:10, The New English Bible.

Ti Kinasirib ti Panagsursuro nga Aguray

Maysa a nainkasigudan a rikna kadagiti awan assawana a kayatda ti makiasawa wenno kadagiti awan annakna ti maaddaan kadagiti annak. Mainayon pay, awan dakdakesna nga iliwentay ti pannakapennek kadagiti umiso a material a kasapulan wenno tartarigagay. Nupay kasta, gapu ta patienda a mabilbilangen dagiti aldaw daytoy a sistema dagiti bambanag ket iti mapasungad a baro a sistema, ti Dios ‘ukraden[nanto] ti imana ket pennekenna ti tarigagay ti isuamin a nabiag,’ inkeddeng dagiti adu a Kristiano ti aguray tapno matungpal dagiti dadduma kadagitoy a tarigagay iti ad-adda a maitutop a tiempo.​—Salmo 145:16.

Nupay kasta, dagiti tattao nga awanan iti daytoy natibker a Nakristianuan a namnama, bassit laeng ti maawatanda a makagapu ti pannakaitantan dayta. Gapu ta awan pammatida ken Jehova, a paggapuan ti “tunggal sagut a nasayaat ken tunggal sagut a naan-anay,” pagduaduaanda ti kinanainsiriban ti panangiyur-uray kadagiti bambanag iti masanguanan a kadakuada pulos a dinto umay. Agbibiagda iti pagsasao a: “Mangan ken uminumtayo, ta inton bigat mataytayo.”​—Santiago 1:17; 1 Corinto 15:32; Isaias 22:13.

Kadagiti narang-ay a nasion, gundawayan ti tay-ak ti advertising business ti di agbiddut a panagduyos iti insigida a pagragsakan. Paregtaenda dagiti tattao a mangpagusto kadagiti bagbagida. Allukoyennatayo ti komersio a mamati a dagiti moderno a pagnam-ayan ken pagliwliwaan ket kasapulan unay. Apay nga ipalubosmo nga awan daytoy kenka, irupirda, idinto ta addayta dagiti credit card, installment plan, ken “buy now​—pay later” a sistema a palakaenna ti pananggun-od amin kadagita itan? Maysa pay, ‘Maikarika iti kasayaatan; kaasiam ta bagim! Laglagipen, gundawayam dayta itan ta no saan awanton!’ Dagitoy dagiti pagsasao nga ipampanayagda.

Kabayatanna, pinullo a riwriw dagiti tattao kadagiti napanglaw a pagilian ti agan-anus kadagiti apag-isu a kasapulan​—wenno kurang pay. Adda ngata pay ad-adda a makailadawan iti kinaimperpekto ken kinaawan hustisia ti napolitikaan ken ekonomiko a sistema ti tao?

Ti kinasirib ti panagsursuro nga aguray ket makita kadagiti riniwriw a tattao nga agtukkiad​—wenno nalabit agrason a saan a masapul nga aramidenda dayta​—a nailumlom iti utang tapno mapennekda dagiti agdama a tarigagayda. Dagiti di ninamnama a kasasaad, a kas ti sakit ken pannakaikkat iti panggedan, mabalin nga agtungpal iti pakairubuan. Ilawlawag ti diario nga Aleman a Frankfurter Allgemeine Zeitung no apay nga adda naireport a maysa a milion a tattao idiay Alemania nga awan pagtaenganna: “Masansan, ti gapu ti kinaawan pagtaengan ket kinaawan ti panggedan wenno nalabes a panagutang.”

Gapu ta dida mabayadan dagiti utangda, adu kadagita a daksanggasat nga indibidual ti aglak-am iti dakkel a pukaw, agpadpada iti pagtaengan ken sanikua. Kaaduanna, ti napalalo a rigat mangyeg iti riribuk iti pamilia. Dagiti narukop a pagassawaan mangrugidan a masinasina. Gagangayen ti panagliday ken dadduma a problema iti salun-at. No kadagiti Kristiano, mabalin nga agsagaba ti espiritualidadda, a mangituggod iti ballikug a panagpampanunot ken di umiso a kondukta. Dagiti tattao a nairuam iti di nainsiriban a panaggusto iti amin a bambanag gistay awan nagangganabda.

Kadagiti Adu, Baro a Karit

Silalawag nga imbaga ni Jesus a masapul nga agannadtayo di la ket ta “dagiti pakaringgoran iti daytoy a sistema dagiti bambanag ken ti makaallilaw a pannakabalin ti kinabaknang ken dagiti tarigagay kadagiti dadduma a bambanag sumrekda ket lemmesenda ti sao.” (Marcos 4:19) Laglagipentay koma nga awan napolitikaan a sistema a sibaballigi a nakaikkat kadagiti pakaringgoran, agraman ti ekonomia, a sinao ni Jesus.

Ti Komunismo nga inwaksin dagiti pagilian iti Makindaya nga Europa pinadasna a palanasen dagiti bambanag babaen ti maysa nga ekonomia a tengtenglen ti Estado. Maisupadi iti sistema a kapitalista, impaayan dagiti dati a sistema dagiti tattao kadagidiay a pagilian ti natalged a pagbiagan a masansan a di kabaelan nga ited ti kapitalismo. Kaskasdi, dagiti pakaringgoran a sinao ni Jesus addada babaen kadagiti agkurang a kasapulan ken ti pannakatengngel ti personal a wayawaya.

Itatta, irugrugi dagiti adu kadagidiay a pagilian ti ekonomia nga iturayan ti karbengan a gumatang ken aglako, nga isut’ mangipasango kadagiti makipagilida iti baro a karit. Kunaen ti maysa a report itay nabiit: “Naikadua ti kinainosente iti tarigagay nga insigida a mangragpat iti estandarte ti panagusar iti lumaud.” Tapno magun-odan daytoy “adda umad-adu a bilang dagiti tattao iti baro a Länder [dati a komunista a paset ti Alemania] iti makindaya nga Alemania nga in-inut nga al-alun-onen ti alikuno ti panagutang.” Inayon ti report: “Kalpasan ti damo a ragsak a maigapu iti baro a wayawaya iti ekonomia agsaksaknapen ti buteng ken pannakaupay.” Nupay nabaliwanen ti komunismo iti kapitalismo, nagtalinaed dagiti panagdandanag.

Ti dakdakkel a wayawaya iti politika ken ekonomia linuktanna dagiti baro a gundaway a mangpasayaat ti ekonomia. Ngarud, adu nga indibidual ti mabalin a maallukoy nga umanamong iti ideya a mangirugi iti bukodda a negosio wenno umakarda iti sabali a pagilian a sadiay adda nasaysayaat a panggedan.

Dagiti kastoy a pangngeddeng ket personal a banag. Saan a dakes a parang-ayen ti maysa a Kristiano ti kasasaad ti panagbiagna. Nalabit matignay babaen ti tarigagay a mangaywan iti pamiliana, ta ammona a “no adda saan a mangtaraon kadagiti adda iti aywanna, ket nangruna kadagiti kabbalayna met laeng, naglikudanna ti pammati ket dakdakes ngem iti saan a mamati.”​—1 Timoteo 5:8.

Saan ngarud a mayanatup a babalawen ti pangngeddeng dagiti dadduma. Kasta met, saan koma a liplipatan dagiti Kristiano a saan a nainsiriban ti panagutang iti kasta unay tapno makalung-aw iti rigat ta agbalinto dayta a silo kadakuada. Kasta met a di umiso ti panangikagumaan a makalung-aw iti rigat iti wagas a mabaybay-an dagiti naespirituan nga obligasion ken kasapulan.

Panagsursuro Kadagiti Dadduma

Kadagidi tawen kalpasan ti Gubat Sangalubongan II, pinanawan dagiti rinibo nga Aleman ti dinadael ti gubat nga Europa ket napanda kadagiti sabali a pagilian, nangruna iti Australia ken Canada. Sadiay adu ti rimmang-ay iti kasasaadda ti biag, ngem awan kadakuada ti naan-anay a nakalapsut kadagiti ekonomiko a pakaringgoran a sinao ni Jesus. No maminsan ti panangrisut kadagiti parikut ti ekonomia nangpataud kadagiti baro a parikut​—iliw, ganggannaet a pagsasao, pannakairuam kadagiti baro a taraon, naiduma a kustombre, pannakibagay kadagiti kabbaro a gagayyem, wenno pannakitunos kadagiti naiduma a kababalin.

Dadduma kadagitoy nga immakar ket Saksi ni Jehova. Makaparagsak ta adu kadakuada ti di nangipalubos kadagiti problema a kakuykuyog ti panagakar a manglemmes iti espiritualidadda. Ngem adda dagiti nangipalubos. Nagbalin dagiti dadduma a biktima ti makaallilaw a pannakabalin ti kinabaknang. Rumangrang-ayda iti material ngem saanda a rumangrang-ay iti naespirituan.

Kinapudnona iyilustrar daytoy ti kinasirib iti naannad a panangamiris iti kasasaadtayo sakbay a mangaramid iti nalabit di nainsiriban a pangngeddeng. Pagsadutennatayo dagiti materialistiko a pagannayasan iti dinto-mauliten a trabaho a panangaramid-adalan a naipaannong kadagiti Kristiano. Pudno daytoy uray sadino ti pagnanaedantayo, yantangay awan pagilian a libre kadagiti ekonomiko a pakaringgoran.

Pannakirupak iti Nasayaat a Dangadang

Binalakadan ni Pablo ni Timoteo: “Surotem ti kinalinteg, ti nadiosan a debosion, ti pammati, ti ayat, ti anus, ti kinaemma. Makirupakka iti nasayaat a pannakidangadang ti pammati, petpetam ti biag nga agnanayon isu a nakaawisam.” Kadagiti Kristiano a taga-Corinto kinunana: “Agtalinaedkayo a natibker, saan a magaraw, nga aduankayo laeng iti aramid ti Apo.”​—1 Timoteo 6:11, 12; 1 Corinto 15:58.

Ti panangsurot iti daytoy naimbag a balakad ti kasayaatan a pamay-an a pangparmek a sibaballigi iti materialismo, ket pudno nga adut’ maaramidan ti maysa a Kristiano! Kadagiti pagilian a bassit dagiti agibumbunannag ti Pagarian, umariwekwek a tattao ti limitado a mapakaammuan iti kinapudno. Umiso ti panangipadto ni Jesus: “Ti anien adu, ngem dagiti agani bassitda.”​—Mateo 9:37.

Imbes a palubosanda dagiti ekonomiko a pakaringgoran kadagitoy a pagilian a mangsinga kadakuada iti madama a naespirituan a trabaho, aprobetsaren dagiti Saksi ni Jehova ti kasasaad iti inda panangusar a naan-anay kadagiti agdama a gundaway. No awan pay panggedanda, adu kadakuada ti mangpalawa iti pannakiramanda iti trabaho a panangasaba. Ti serbisioda, malaksid iti panangpapigsada iti ikkis ti panagdaydayaw ken Jehova, mangted kadakuada ti rag-o a kasapulan tapno madaeranda dagiti problemada iti ekonomia.

Ipangpangruna dagitoy a Saksi ti trabaho a panangasaba ket ikabilda dagiti pakarigatan ti ekonomia iti maikadua a saad, a mangipakita iti sangalubongan a panagkakabsat nga agtalekda a naan-anay ken ni Jehova nga aywananna ida. Daytoy ti karina: “Itultuloyyo ngarud, a biruken nga umuna ti pagarian ken ti kinalintegna, ket amin dagitoy a dadduma a bambanag mainayondanto kadakayo.”​—Mateo 6:33.

Manipud pannakaisubli ti pudno a panagdaydayaw idi 1919, saan nga impalubosen ni Jehova a kumapuy ti ilina. Sinalaknibanna ida iti sidong ti nakas-ang a pannakaidadanes ken iti dadduma a lugar iti sidong ti dinekada a pannakaipawil ti aktibidadda. Determinado dagiti Saksi ni Jehova a ti di nagun-od ti Diablo babaen ti panangidadanes, dina met maaramid babaen ti nasiksikap a silo ti materialismo!

Panagsursuro nga Aguray iti Amin a Gundaway

Dagiti nalawa a Kingdom Hall, nangingina nga alikamen ti sound, dagiti Assembly Hall, ken dagiti napintas a pagtaengan a Bethel ket pakaidaydayawan ni Jehova ken mangipaay iti naulimek a pammaneknek a bembendisionanna ti ilina. Mabalin a marikna dagiti Saksi ni Jehova kadagiti pagilian a nabayag a naparitan ti trabaho nga adu pay ti aramidenda tapno makakamakamda kadagiti sabali a pagilian. Ngem ti kapapatgan isut’ agtultuloy a panagrang-ay iti naespirituan. Dagiti makinruar a pakakitaan ti namaterialan a bendision ti Dios ti sumaruno inton tiempona.

Masapul nga agannad dagiti dedikado nga adipen ni Jehova di la ket ta, iti panagagawada iti bukodda a pagimbagan, mangrugi a mariknada a didan kayat ti mapaidaman kadagiti material a banag. Gagangay laeng ti agtarigagay iti pannakabang-ar manipud iti narigat a biag ken sasaaden iti sosiedad, ngem ammo ti ili ni Jehova nga amin dagiti adipen ti Dios il-iliwenda ti pannakabang-ar. Aggagar ti bulsek a makakitanto manen, iliwen ti masaksakit ti pannakaisublinto ti salun-atna, ti malmalday seggaanna ti naragsak a namnama, ket dagiti napanawan iliwenda a makitanto manen dagiti natay a patpatgenda.

Gapu kadagiti sirkumstansia, adda dagiti kasasaad a tunggal Kristiano kapilitan nga aguray iti baro a lubong ni Jehova a mangrisut kadagiti problemana. Isut’ gapuna a rumbeng a saludsodantay ti bagbagitayo, ‘No addan taraon ken kawesko, saan aya a rumbeng a mapnekakon kadagitoy a banag ket sitatallugodak nga aguray iti pannakabang-ar manipud kadagiti problema iti ekonomia?’​—1 Timoteo 6:8.

Maipanamnama kadagiti Kristiano a naan-anay nga agtalek ken Jehova a no makaurayda, isuamin dagiti umiso a tarigagay ken kasapulanda mapennekto iti din agbayag. Awanto ti agur-uray iti barengbareng. Ulitentayo ti sasao ni Pablo: “Agtalinaedkayo a natibker, saan a magaraw, nga aduankayo laeng iti aramid ti Apo, ta ammoyo a ti aramidyo addanto kapaypay-anna iti Apo.”​—1 Corinto 15:58.

Isu a talaga koma aya a dakkel a parikut ti panagsursuro nga aguray?

[Ladawan iti panid 10]

Ti panagsursuro nga aguray maisalakanna ti biagyo