Ti Gubuayan ti Di Maibus a Tured
“MAYSA nga insiwet nga aweng ti kellaat a nangpasardeng kadakami. Kalpasanna, manipud iti kasamekan iti kanigidmi, dua a billit a nakapasgar dagiti payakda ti nagturong kadakami. Iti sangomi, adda dua nga itlog iti maysa a bassit a lukong iti daga. Inatipadakami dagiti billit tapno saanmi a mabaddekan ti umokda. Tunggal gandatenmi nga asitgan ken retratuen dagiti nakaay-ayat a turikturikan iti kolor kape nga itlog, uliten dagiti billit ti isisiplagda. ‘Anian a kinatured,’ naikunami.”
Dayta ti kapadasan dagiti uppat a nataengan idi maasitganda ti umok ti turikturikan a dikkop. Ti basbassit a billit isu ti blacksmith plover. Iti libro nga Everyone’s Guide to South African Birds, kastoy ti ilawlawag da ornitologo a Sinclair ken Mendelsohn: “Bambantayan a naimbag dagiti agit-itlog a pagassawaan ti umok ken ubboda ket agbalinda nga ad-adda nga agresibo no adda aggandat nga umasideg. Saanda a mabuteng iti kadakkel ti managasak ken agtayabda nga agpangato a buyogen ti nauyong nga uni, nga agsuekda nga awanan buteng tapno ballaagan dagiti tao nga adda sadiay.”
Buybuyaen ti dadduma dagiti dadakkel nga elepante a di inggagara a magna iti yan ti umok ti maysa a blacksmith plover, a mangpasgar laeng iti billit. Gagangay met nga aganus dagiti elepante babaen ti panaglisi iti sabali a dalan.
Sadino ti pangal-alaan dagiti billit iti kasta a kinatured? Nagtaud dayta iti Daydiay nangparsua kadakuada. Impaayan ni Jehova a Dios dagitoy a babassit a parsua iti nainkasigudan a mekanismo tapno maatipa dagiti daddadakkel nga ayup a mangperdi iti umok wenno kadagiti ubboda.
Maysa a Leksion Para Kadagiti Kristiano
Adda maadal dagiti Kristiano iti daytoy, nupay tarigagayanda ti ad-adda pay ngem iti nainkasigudan a kinatured. Makalikagumanda a mangtulad iti Apoda, ni Jesu-Kristo, nga awanan buteng a nagtulnog kadagiti bilin ti Dios. (Hebreo 12:1-3) Kondenaren ti Biblia dagidiay takrut nga agsanud nga agserbi iti Dios. (Hebreo 10:39; Apocalipsis 21:8) Maigiddato iti dayta, maawatan ni Jehova ti imperpekto a pakabuklantayo ken ammona a no dadduma agbasoltayo wenno awanantay iti tured a kasapulan tapno maaramidtay a naan-anay ti pagayatanna. (Salmo 103:12-14) Aniat’ maaramidan ti maysa a tao no isut’ lapdan ti buteng a mangaramid iti umiso?
Rumbeng nga umadani ti maysa a Kristiano iti Dios babaen ti kararag maipaay iti pigsa a mangsango kadagiti pakasuotan ken agtultuloy a mangaramid iti pagayatan ti Dios. Naglaon ti Biblia ti kastoy a mainanama a tulong ni Jehova: “Isu ti mangpapigsa iti nakapuy; ken iti daydiay awan ti kabaelanna isu pawadwadenna iti pigsa. Uray pay dagiti ubbing kumapuydanto ken mabannogdanto, ken dagiti agtutubo matuangdanto a matalipupos. Ngem dagiti agpannuray ken ni Jehova pabaruendanto ti pigsada. Agpangatodanto a sipapayak a kas la agila. Agtaraydanto ket dida mabannog; magnadanto ket dida agkapuy.” (Isaias 40:29-31) Mapaspasaran ti adu nga imperpekto a tattao ti kinapudno dagitoy a sasao ket ‘manipud iti nakapuy a kasasaad napabilegda.’ (Hebreo 11:34) Ti maysa a nagsayaat nga ulidan isu ni Kristiano nga apostol Pablo, a nagsurat: “Ti Apo nagtakder iti sibayko ket impastrekna kaniak ti pannakabalin, tapno babaen kaniak naan-anay a maitungpal ti panangaskasaba ket amin dagiti nasion mangngegda koma dayta.”—2 Timoteo 4:17.
Uray dagiti kabbaro nga interesado a tattao a mayat nga agbalin a pasurot ni Jesu-Kristo mapaspasaranda met ti kasta a makapabileg a tulong. Usigenyo ti maysa a lalaki nga agnagan Henry a taga-Sud Africa, nga isu ti tesorero iti simbaanna ken kaarruba ti pastorna. Agsapsapul ni Henry iti kinapudno. Nupay naikameng iti iglesia, maysa nga aldaw inawatna ti tukon a libre a pannakipagadal ti Biblia kadagiti Saksi ni Jehova iti pagtaenganna. Idi agangay, inyebkasna ti tarigagayna nga agbalin a maysa a Saksi ket nagimtuod no ania dagiti addang a masapul nga alaenna tapno maragpatna dayta a kalat. Nailawlawag a rumbeng nga aglusulos pay nga umuna iti iglesia a nakaikamenganna. (Apocalipsis 18:4) Yantangay ti pastor ket kaarruba ken gayyemna, narikna ni Henry a saan nga umdas ti panangaramid iti surat ti panaglusulos no di ket masapul a personal nga ilawlawagna dayta a banag. Situtured nga inaramidna daytoy.
Naklaat ti pastor ket idi agangay inkuyogna ti moderator ken dadduma pay a kameng ti simbaan a mangsarungkar ken ni Henry. Kayatda a maammuan no apay a pinanawanna ti iglesiada tapno agbalin a maysa a kameng ti maysa a relihion a, sigun kadakuada, awanan iti nasantuan nga espiritu ti Dios. “Idi damo, mabutbutengak a sumungbat kadakuada,” inlawlawag ni Henry, “gapu ta masansan nga addaanda iti dakkel nga impluensia kaniak. Ngem nagkararagak ken Jehova maipaay iti tulong, ket tinulongannak a mangikalintegan iti kastoy: ‘Kadagiti amin nga internasional a relihion, ania laeng ti kakaisuna a mangar-aramat iti nagan ti Dios, a Jehova? Saan aya a dagiti Saksi ni Jehova? Ti panagkunayo palubosan aya ida ti Dios a mangawit iti naganna ket saanna met nga itden kadakuada ti nasantuan nga espirituna?’” Saan a nabalusingsing dagiti opisial ti iglesia ti kasta a panagrason. Siyayaman iti pannakaammo ken pigsa nga ipapaay ti Dios, situtured itan a makiramraman ni Henry a kadua dagiti Saksi ni Jehova iti panangasaba iti ruruangan.
Wen, kasapulan ti tured iti panagbalin a maysa a pudpudno a Kristiano. Bayat nga umasideg ti panungpalan daytoy a lubong, umadu dagiti pannubok iti pammati. Kayat ni Satanas a rabsuten kadagiti adipen ti Dios ti nakaskasdaaw a namnamada a biag nga agnanayon babaen iti panangikagumaanna a mangdadael iti kinatarnawda ken Jehova. (Idiligyo ti Apocalipsis 2:10.) Ngem masapul a pulos a ditay sumuko. Uray no agsagabatayo iti temporario a panagkapuy gapu iti buteng, matulongannatay ni Jehova a mangpabaro iti pigsatayo. Itultuloyyo ti umadani kenkuana maipaay iti pigsa tapno maitultuloyyo a maaramid ti pagayatanna. Laglagipenyo, isu a nangparsua kadagiti awanan buteng a billit ti Gubuayan ti di maibus a tured. Wen, rumbeng nga “agtalged ket sawen [dagiti pudno a Kristiano]: ‘Ni Jehova ti katulongak; Diakto agbuteng. Ania ti maaramidan ti tao kaniak?’”—Hebreo 13:6.