Ti Imun Dandanina Dinadael ti Biagko

PUDNO a nangrugi a buriborennak ti imun idi nakikallaysaak iti maikadua nga asawak, a ni Mark.a Dakam a dua, masapul a tamingenmi ti sumagmamano a siuman ken pakilangenan dagiti dati nga assawami. Nagrigat a talaga ti kasasaad no dadduma. Tunggal adda supiat iti pamilia, kasla saannak a supsuportaran ni Mark. Nariknak ket ngarud nga ay-ayatenna pay laeng ti dati nga asawana. Imbes a parmekek ti imunko, pinalubosak daytoy a mangkontrol iti biagko. Mariribukanak tunggal adda ti dati nga asawa ni Mark.

Kanayon a sipsiputak ni Mark, a siputak pay ketdi dagiti matana tapno makitak no sadino ti nakaituronganda. Inikkak iti madi a kaipapanan dagiti panagkitana. No dadduma sipapanayag a pabasolek nga ay-ayatenna pay laeng ti dati nga asawana. Iti naminsan, pudno a naburibor iti daytoy nga uray la a timmakder ket pinanawanna ti Nakristianuan nga asamblea. Nariknak a nagbasolak ken Jehova. Pinagbalinko a nakaay-ay-ay ti biag ti pamiliak gapu ta iti kamaudiananna naapektaran metten dagiti ubbing. Kagurak ti bagik gapu iti ar-aramidek, ngem uray aniat’ aramidek, kasla diak maparmek a talaga ti imunko.

Imbes a tulongannak, rinugian ni Mark ti agibales. No kasta a pabasolek, bugkawannak, “Imun, agim-imunka laeng.” Iranrantanak pay ketdi a pagimunen. Nalabit nga impagarupna a daytoy ti mangparmek iti panagimunko, ngem kimmaro laeng dagiti bambanag. Rinugiannat’ agsirpat iti dadduma a babbai, nga ibagbagana no kasanot’ kinapintasda. Gapu iti daytoy nariknak a saanak a napateg kenkuana ken dinak kayat. Nakagteng daytoy iti punto a timmaud kaniak ti maysa pay a nalaad a kababalin​—ti gura. Mariribukanak unay idi ta kayatko payen ti makisina kenkuana ken iti pamiliana.

Apag-isu la unay ti kuna ti Biblia a ti “imun isu ti mamagtumoy kadagiti tultulang.” (Proverbio 14:30) Nangrugin a maapektaran ti salun-atko. Naaddaanak kadagiti ulser iti bituka a nagbayag sakbay nga immimbag. Nagtultuloy a pinagbalinko a nakaay-ay-ay ti biagko babaen ti panagsuspetsak iti amin nga ar-aramiden ni Mark. Rikisaek dagiti bulsana, ket no adda masarakak a numero ti telepono, awagak tapno maammuak no siasino ti sumungbat. Mabainak unay iti bagik, nga agsangsangitak gapu iti bainko ken Jehova. Ngem diak magawidan ti bagik. Ti mismo a bagik ti kadadaksan a kabusorko.

Naapektaran ti espiritualidadko agingga iti punto a diak payen makapagkararag. Ay-ayatek ni Jehova ken talaga a kayatko nga aramiden no ania ti umiso. Kabisadok ti amin a kasuratan a mainaig iti assawa a lallaki ken babbai, ngem diak mayaplikar ida. Iti damo a gundaway iti biagko, diak kayaten ti agbiag, iti laksid ti kinapudno nga addaanak kadagiti nasasayaat nga annak.

Nagbalin a dakkel a pammaregta kaniak dagiti panglakayen iti kongregasion Kristiano ken inkagumaanda ti tumulong kaniak iti amin a kabaelanda. Ngem idi dinakamatda ti maipapan iti panagimunko, inlibakko dayta gapu iti bainko, a diak kayat nga aminen a kastat’ parikutko.

Kamaudiananna, nagsagaba unay ti salun-atko agingga a kasapulan a mayospitalak tapno agpaopera. Bayat nga addaak sadiay nautobko a saan a mabalin nga agtultuloy a kastoy ti biagko. Inkeddengmi ken ni Mark nga agsinakami iti las-ud ti tallo a bulan tapno adalenmi ti kasasaadmi a saan unay a mairaman ti rikriknami. Iti dayta a tiempo adda nasayaat a napasamak. Rimmuar ti maysa nga artikulo iti magasin nga Agriingkayo! a napauluan “Tulong Agpaay Kadagiti Adulto nga Annak Dagiti Alkoholiko.”b

Ammoyo, ni nanangko ket maysa nga alkoholiko. Nupay saanak a naabuso iti pisikal, pulos a di nangipakita dagiti dadakkelko iti pisikal a panangipateg iti maysa ken maysa wenno kaniak. Awan lat’ malagipko nga inar-arakupnak ni nanang wenno imbagana nga ay-ayatennak. Isu nga iti kinapudnona dimmakkelak a diak ammo a talaga no kasanot’ agayat wenno, kas iti kapateg daytoy, no kasanot’ maayat.

Masansan nga imbagbaga kaniak ni nanang ti maipapan iti panagbabai ni tatang ken isut’ dina mapagtalkan. Gapuna ti kunak dimmakkelak nga awan panagtalekko kadagiti lallaki iti pangkaaduan. Gapu iti pannakapadakkelko, kanayon a mariknak a nababbabaak ngem kadagiti dadduma, nangnangruna kadagiti dadduma a babbai. Ti panangbasbasak iti dayta nga artikulo ti Agriingkayo! timmulong kaniak a mangawat iti kaipapanan dagitoy a bambanag. Iti damo a gundaway, natarusak dagiti ramut ti parikutko mainaig iti imun.

Impakitak ti artikulo ti Agriingkayo! ken ni Mark a lakayko, ket timmulong met dayta kenkuana nga ad-adda a makaawat kaniak. Di nagbayag nabaelanmi a suroten ti balakad ti Biblia para kadagiti agassawa nga agpalplano nga agsina. Nagsinnublianankami. (1 Corinto 7:10, 11) Itatta nasaysayaaten ti panagasawami. Sangsangkamaysa nga aramidenmi ti kaaduan a bambanag, nangnangruna dagiti Nakristianuan nga aramid. Ad-adda a nagbalin a mannakipagrikna ni Mark. Gistay inaldaw nga ibagbagana kaniak nga ay-ayatennak unay, ket ita talaga a mamatiak iti dayta.

Tunggal ammok nga agkitakami iti dati nga asawa ni Mark, agkararagak ken Jehova maipaay iti pigsa, a dawatek kenkuana a tulongannak nga agtignay iti pamay-an ti maysa a nataengan a Kristiano. Ket epektibo dayta. Uray ti pannakasuronko kenkuana in-inut a naikkat. Saanakon nga agpanunot kadagiti negatibo a bambanag wenno palubosan nga iyaw-awannak ti imahinasionko.

Kaskasdi a makariknaak pay laeng iti sangkabassit a di umiso nga imun. Ti laeng perpekto a biag iti baro a lubong ti Dios ti naan-anay a mangikkat iti daytoy kaniak. Kabayatanna, nasursurok a kontrolen ti panagimun, imbes a palubosak daytoy a mangkontrol kaniak. Wen, ti imun dandanina dinadael ti biagko, ngem agyamanak ken Jehova ken iti organisasionna, ta naragragsakak nga amang itan, ken napasublik manen ti salun-atko. Addaanak manen iti natibker a relasion iti Diosko, a ni Jehova.​—Naipatulod.

[Footnotes]