Panagballigi iti Karit ti Kinasungdo
“Ikawesyo koma ti baro a personalidad a naparsua maitunos iti pagayatan ti Dios iti pudno a kinalinteg ken kinasungdo.”—EFESO 4:24.
1. Apay nga utangtayo ken ni Jehova a Dios ti kinasungdo?
ADU ti parupa ti panagballigi iti karit ti kinasungdo. Kangrunaan iti amin isut’ panagballigi iti karit ti kinasungdo ken ni Jehova a Dios. Pudno, iti panangusig no siasino ni Jehova ken no aniat’ naaramidanna para kadatayo, ken gapu iti dedikasiontayo kenkuana, utangtayo kenkuana ti kinasungdo. Kasanotay a maiparangarang ti kinasungdo ken Jehova a Dios? Ti kangrunaan a pamay-an isut’ panagbalin a nasungdo kadagiti nalinteg a prinsipio ni Jehova.
2, 3. Aniat’ pagnaigan ti kinasungdo ken ti kinalinteg?
2 Tapno mapagballigian dayta a karit, masapul nga ipangagtayo ti sasao a masarakan iti 1 Pedro 1:15, 16: “Maitunos iti Daydiay Santo a nangayab kadakayo, agbalinkayo met a nasantuan a mismo iti isuamin a kababalinyo, agsipud ta adda a naisurat: ‘Agbalinkayo a nasantuan, agsipud ta nasantuanak.’” Tumulong kadatayo ti kinasungdo ken Jehova a Dios tapno agtulnogtayo kenkuana iti amin a panawen, nga itunos iti nasantuan a pagayatanna dagiti panunot, sao, ken tignaytayo. Kaipapanannat’ panangsalimetmet iti nasayaat a konsiensia, kas naibilin kadatayo iti 1 Timoteo 1:3-5: “Pudno ti panggep daytoy a bilin [saan a tapno isuro ti naiduma a doktrina wenno ipangag dagiti ulbod a sarsarita] ket ayat manipud iti maysa a nadalus a puso ken manipud iti maysa a naimbag konsiensia ken manipud iti pammati nga awanan panaginsisingpet.” Pudno, awan asinoman kadatayo ti perpekto, ngem rumbeng nga ikagumaantayo nga aramiden ti amin a kabaelantayo, saan kadi?
3 Ti kinasungdo ken Jehova ti manglapped kadatayo iti managimbubukodan a panangikompromiso kadagiti nalinteg a prinsipio. Iti kinapudnona, ti kinasungdo ti manglapped kadatayo nga agbalin a managinsisingpet. Ti kinasungdo ti pampanunoten ti salmista idi inkantana: “Isurom kaniak ti dalanmo, O Jehova. Kayatko ti magna iti kinapudno. Pagkaykaysaem toy pusok tapno agbuteng ita naganmo.” (Salmo 86:11) Kalikaguman iti kinasungdo ti umiso a nailadawan kas “panagtulnog kadagiti di maipaulog.”
4, 5. Ti kinasungdo lapdannatayo nga agaramid iti ania?
4 Ti kinasungdo ken Jehova a Dios ti manglapped met kadatayo a mangaramid iti aniaman a mangumsi iti nagan ken Pagarianna. Kas pagarigan, naminsan a kasta laengen ti di panagkinnaawatan ti dua a Kristiano ta di maiparbeng a nagkamangda iti nailubongan a korte ti linteg. Nagsaludsod ti ukom, ‘Saksi ni Jehovakay kadi a dua?’ Nalawag a dina matarusan no apay nga addada iti korte. Anian a panangumsi dayta! Ti kinasungdo ken ni Jehova a Dios ti timmulong koma kadagidiay a kakabsat tapno ipangag ti balakad ni apostol Pablo: “Ngarud, pudno a kaipapananna ti naan-anay a pannakaabakyo ta agdidinnarumkayo iti maysa ken maysa. Apay a dikay ketdi koma baybay-an a maranggasan ti bagbagiyo? Apay a dikay ketdi koma baybay-an a masaur ti bagbagiyo?” (1 Corinto 6:7) Pudno, ti dana ti kinasungdo ken ni Jehova a Dios isut’ panagsagaba iti personal a pannakaabak imbes a mangumsi ken ni Jehova ken iti organisasionna.
5 Mairaman met iti kinasungdo ken ni Jehova a Dios ti saan nga isusuko iti buteng iti tao. “Ti panagbuteng iti tao mangyeg iti silo, ngem ti agkammatalek ken Jehova natalgedto.” (Proverbio 29:25) Iti kasta, ditay makikompromiso no maipasango iti panangidadanes, no di ket surotentayo ti ulidan dagiti Saksi ni Jehova iti dati nga Union Soviet, idiay Malawi, idiay Ethiopia, ken iti adu a sabsabali pay a lugar.
6. Ti kinasungdo lapdannatayo a makilangen iti asino?
6 No nasungdotayo ken Jehova a Dios, liklikantay ti makigayyem iti amin a kabusorna. Isu a nagsurat ni adalan a Santiago: “Mannakikamalala a babbai, dikay aya ammo a ti pannakigayyem iti lubong ket pannakibusor iti Dios? Siasinoman, ngarud, a tarigagayanna ti agbalin a gayyem ti lubong ibilbilangna ti bagina a kabusor ti Dios.” (Santiago 4:4) Kayattayo ti agbalin a nasungdo a kas ti impakita ni Ari David idi kinunana: “Saanko aya a guraen, O Jehova, dagiti gumura kenka, ken saanko aya a paglidayan dagiti tumakder a sibubusor kenka? Guraek ida iti naan-anay a gura. Agbalinda a kabkabusormo.” (Salmo 139:21, 22) Ditayo kayat ti makipulapol kadagiti asinoman a nasukir a managbasol, ta awan pakaipadaantayo kadakuada. Saan aya a ti kinasungdo iti Dios ti manglapped kadatayo a makilangen iti kakasta a kabusor ni Jehova, direkta man wenno babaen ti telebision?
Panangitandudo ken Jehova
7. Ti kinasungdo tulongannatayo a mangaramid iti ania maipaay ken Jehova, ket kasano nga inaramid ni Eliu daytoy?
7 Ti kinasungdo ti mangtignay kadatayo a mangitandudo ken Jehova a Dios. Anian a nagsayaat nga ulidan kadatayo ni Eliu! Kuna kadatayo ti Job 32:2, 3: “Ti pungtot ni Eliu . . . bimmara. Nagluksaw a maibusor ken Job agsipud ta pinalpalintegna ti bagina a saan ket nga iti Dios. Kasta met a nagrurod a maibusor iti tallo a kakaduana, agsipud ta dida nakasarak ti isungbatda no di ket intuloyda a kuna a managdakdakes ti Dios.” Iti Job kapitulo 32 aginggat’ 37, intandudo ni Eliu ni Jehova. Kas pagarigan, kinunana: “An-anusandak iti sangkabassit pay a panawen, ket ipakaammok kadakayo nga addada pay sasao a maibaga iti Dios. . . . Ipaayko ti kinalinteg iti Namarsua kaniak. . . . Dina ikkaten dagiti matana manipud iti asinoman a nalinteg.”—Job 36:2-7.
8. Apay a masapul nga itandudotayo ni Jehova?
8 Apay a masapul a maitandudo ni Jehova? Ita, matabtabbaawan ni Jehova a Diostayo iti nagadu a pamay-an. Naibaga nga awan isuna, a paset ti maysa a Trinidad, nga awan inggana a tutuokenna dagiti tattao iti umap-apuy nga impierno, nga ikagkagumaanna a kombertien ti lubong, a saan maseknan iti sangatauan, ken dadduma pay. Maiparangarangtayo ti kinasungdotayo kenkuana babaen ti panangitandudo kenkuana ken panangpaneknek a talaga nga adda ni Jehova; nga isut’ masirib, addaan hustisia, mannakabalin-amin, ken managayat a Dios; nga adda panawenna iti amin a banag; ken no dumtengen ti naikeddeng a panawenna, ipatinggananto ti amin a kinadakes ket pagbalinen a paraiso ti intero a daga. (Eclesiastes 3:1) Kalikaguman daytoy nga usarentayo ti amin a gundaway tapno mangpaneknek iti nagan ken Pagarian ni Jehova.
Kinasungdo iti Organisasion ni Jehova
9. Kadagiti ania a bambanag nga impakita ti dadduma ti kinaawan kinasungdoda?
9 Dimtengtayon iti banag maipapan iti panagbalin a nasungdo iti makitkita nga organisasion ni Jehova. Awan duadua, rumbeng nga agbalintayo a nasungdo iti dayta, agraman iti “matalek ken masirib nga adipen,” a babaen iti dayta, mapakpakan iti naespirituan ti kongregasion Kristiano. (Mateo 24:45-47) No ngay kas pagarigan adda agparang kadagiti publikasion ti Watch Tower a ditay matarusan wenno anamongan ita. Aniat’ aramidentayo? Maupaytayo kadi ket pumanaw iti organisasion? Daytat’ inaramid ti sumagmamano idi inyaplikar ti The Watch Tower, adun a tawen ti napalabas, ti baro a tulag iti Milenio. Naupay ti dadduma iti kinuna naminsan ti Pagwanawanan maipapan iti isyu a neutralidad. No nasungdo koma dagidiay naitibkol maipanggep kadagitoy a banag iti organisasion ken kadagiti kakabsatda, inurayda koma nga ilawlawag ni Jehova dagitoy a banag, a daytat’ inaramidna iti naikeddeng a tiempona. Gapuna, mairaman iti kinasungdo ti siaanus a panaguray agingga nga ipablaak ti matalek ken masirib nga adipen ti kanayonan a pannakaawat.
10. Ti kinasungdo lapdannatayo nga agusioso iti ania?
10 Ti kinasungdo iti makitkita nga organisasion ni Jehova kaipapananna met ti panangilaksid kadagiti apostata. Saan a tarigagayan nga ammuen dagiti nasungdo a Kristiano no ania ti maibaga ti kakasta a tao. Pudno, imperpekto dagidiay us-usaren ni Jehova a Dios tapno maiwanwan ti trabahona ditoy daga. Ngem aniat’ ibaga ti Sao ti Dios nga aramidentayo? Pumanaw iti organisasion ti Dios? Saan. Rumbeng nga agtalinaedtayo a nasungdo iti dayta gapu iti panangipategtayo kadagiti kakabsat, ken itultuloytayo koma nga “ayaten ti maysa ken maysa a nasged unay manipud iti puso.”—1 Pedro 1:22.
Kinasungdo Kadagiti Nasungdo a Papanglakayen
11. Ti kinasungdo tulongannatayo nga agbantay maibusor iti ania a negatibo a panagpampanunot?
11 No marigatantayo a mangtarus iti maysa a banag a kinuna wenno inaramid iti kongregasion, ti kinasungdo ti manglapped kadatayo a mangukom kadagiti motibo ken tulongannatayo nga agpanunot a nalabit maipapan iti panangusar iti kabaelan a mangeddeng dayta. Saan aya a nasaysayaat nga amang nga usigen ti nasasayaat a galad dagiti nadutokan a panglakayen ken ti dadduma a kapammatian imbes a dagiti pagkurkuranganda? Wen, kayattayo a liklikan ti amin a kasta a negatibo a panagpampanunot, ta mainaig dayta iti panagbalin a di nasungdo! Tulongannatayo met ti kinasungdo nga agtungpal iti bilin ni Pablo a ‘di agsao iti makadangran iti asinoman.’—Tito 3:1, 2.
12, 13. Ania dagiti partikular a karit a masapul a sanguen dagiti panglakayen?
12 Mangpataud ti kinasungdo kadagiti partikular a karit iti papanglakayen. Maysa kadagitoy a karit ti maipapan iti kinamapagtalkan iti kompidensial a banag. Mabalin nga agipudno ti maysa a kameng ti kongregasion iti maysa a panglakayen. Ti kinasungdo iti dayta ti manglapped iti panglakayen a mangsalungasing iti prinsipio ti kinamapagtalkan iti kompidensial a banag. Ipangagna ti balakad iti Proverbio 25:9: “Dika ipalgak ti palimed ti sabali.” Kaipapananna ti di panangipalgak uray pay iti asawana!
13 Addada pay met sabsabali a pannubok iti kinasungdo a masapul a pagballigian dagiti panglakayen. Manangay-ayoda kadi iti tattao, wenno situtured ken siaalumamay a tulonganda dagidiay makasapul iti pannakakorehir, uray no kabagian wenno nadekket a gagayyemda ida? Ti kinasungdo iti organisasion ni Jehova ti mangtignay kadagiti panglakayen nga ikagumaan a tulongan ti asinoman a makasapul iti naespirituan a tulong. (Galacia 6:1, 2) Nupay naasitayo, ti kinasungdo ti mamagbalin kadatayo a prangka iti padatayo a panglakayen, a kas ti sipaprangka a panagsao ni apostol Pablo ken ni apostol Pedro. (Galacia 2:11-14) Iti kasumbangirna, kayat dagiti manangaywan ti agannad, tapno maliklikan ti di nainsiriban a panagtignay wenno panangipakita iti panangidumduma wenno iti sabsabali a pamay-an panangabuso iti autoridadda, a pakarigatan dagiti ay-aywananda nga agbalin a nasungdo iti organisasion ti Dios.—Filipos 4:5.
14, 15. Ania dagiti banag a nalabit mangsubok iti kinasungdo dagiti kameng iti kongregasion?
14 Addada sabali pay a banag no maipapan iti panagballigi iti karit ti kinasungdo iti kongregasion ken kadagiti panglakayenna. No adda kasla nariribuk a kasasaad iti kongregasion, mangipaay daytoy kadatayo iti gundaway a mangiparangarang iti kinasungdo ken Jehova ken kadagidiay mangibagi kenkuana. (Kitaenyo ti Pagwanawanan, Hunio 15, 1987, pinanid 15-17.) No adda panangilaksid, kalikaguman ti kinasungdo a suportarantayo dagiti panglakayen, a di padpadasen a pugtuan no addada umdas a rason iti addang a naaramid.
15 Ti kinasungdo iti kongregasion kalikagumanna met kadatayo a suportaran ti amin a lima a linawas a gimong aginggat’ ipalubos ti kasasaad ken kabaelantayo. Kalikaguman ti kinasungdo a saan laeng a regular a tumabuno kadagitoy no di pay met agsagana maipaay kadagitoy ken agkomento iti makapabileg bayat nga ipalubos ti gundaway.—Hebreo 10:24, 25.
Kinasungdo iti Panagasawa
16, 17. Ania dagiti karit ti kinasungdo a masapul a pagballigian dagiti naestaduan a Kristiano?
16 Iti asino pay a masapul a nasungdotayo? No naasawaantayo, gapu iti panagkinnari iti panagasawatayo, masapul a pagballigiantayo ti karit nga agbalin a nasungdo iti asawatayo. Ti kinasungdo iti asawatayo ti manglapped kadatayo nga agbiddut nga agbalin a makaay-ayo iti sabali a babbai wenno lallaki malaksid iti asawatayo a babai wenno lalaki. Kalikaguman met ti kinasungdo iti asawatayo ti ditay panangipalgak iti sabsabali dagiti pagkapkapuyan wenno pagkurkurangan ti asawatayo. Nalaklaka ti agreklamo iti sabsabali ngem iti mangikagumaan a mamagtalinaed a nakalukat dagiti linia ti komunikasion iti asawatayo, a daytat’ rumbeng nga aramidentayo maitunos iti Nabalitokan a Bilin. (Mateo 7:12) Kinaagpaysuanna, ti panagbalin a naestaduan mangpataud iti pudpudno a karit iti Nakristianuan a kinasungdotayo.
17 Tapno mapagballigian daytoy a karit ti kinasungdo, saan laeng a masapul a liklikantayo ti nadagsen a panagbasol no di pay met bantayantayo dagiti mismo a panunot ken riknatayo. (Salmo 19:14) Kas pagarigan, no agkalikagum unay ti manangallilaw a pusotayo iti ragsak ken ganas, naglakatayo nga agbalin a managimbubukodan manipud pannakaay-ayo nga agturong iti panagtarigagay. Iti panangidagadag iti kinamatalek iti panagasawa, balakadan iti piguratibo a pamay-an ni Ari Solomon dagiti assawa a lallaki nga ‘uminumda ti danum kadagiti tangkeda met laeng.’ (Proverbio 5:15) Ket kinuna ni Jesus: “Tunggal maysa nga agtultuloy a mangmatmat iti maysa a babai tapno gartemanna nakikamalalan kenkuana iti pusona.” (Mateo 5:28) Agpegpeggad dagiti assawa a lallaki a maigamgamer kadagiti pornograpiko a material a makaaramid iti pannakikamalala, iti kasta lipliputanda ti assawada ket agbalinda a di nasungdo kadakuada. Iti kasta met laeng a rason, masulisog nga agbalin a di nasungdo ken ni lakayna ti asawa a babai a maigamgamer iti panagbuya kadagiti soap opera nga addaan kadagiti eksena maipapan iti pannakikamalala. Nupay kasta, babaen ti panagbalin a pudpudno a nasungdo iti asawatayo, mapatibkertayo ti singgalut ti panagasawa, ken makapagtinnulongtayo a mangikagumaan a mangay-ayo ken Jehova a Dios.
Dagiti Tulong Tapno Agtalinaed a Nasungdo
18. Ti panangapresiar iti ania ti tumulongto kadatayo nga agbalin a nasungdo?
18 Aniat’ tumulong kadatayo nga agballigi iti karit ti kinasungdo kadagitoy uppat a benneg: kinasungdo ken Jehova, iti organisasionna, iti kongregasion, ken iti asawatayo? Ti maysa a tulong isut’ panangapresiar a ti panagballigi iti karit ti kinasungdo nainaig unay iti panangalangon iti kinasoberano ni Jehova. Wen, babaen ti panagtalinaedtayo a nasungdo ipakpakitatayo a matmatmatantayo ni Jehova kas Soberano iti Uniberso. Iti kasta maaddaantayo met iti panagraem-iti-bagi ken ti namnama a biag nga agnanayon iti baro a lubong ni Jehova. Matulongantayo ti bagbagitayo nga agtalinaed a nasungdo babaen ti panangusig kadagiti nasasayaat nga ulidan ti kinasungdo, manipud ken Jehova agingga kadagiti nadakamat iti Biblia ken kadagiti publikasion ti Watch Tower, agraman dagiti salaysay iti Yearbook.
19. Aniat’ maaramidan ti pammati iti panagbalintayo a nasungdo?
19 Ti natibker a pammati ken ni Jehova a Dios ken ti panagbuteng a di mangay-ayo kenkuana tulongannatayo nga agballigi iti karit ti kinasungdo. Mapapigsatayo ti pammatitayo ken panagbuteng ken Jehova babaen ti siaanep a panagadal iti Sao ti Dios ken ti pannakipaset iti Nakristianuan a ministerio. Tumulong daytoy kadatayo nga agtignay maitunos iti balakad ni Pablo a nailanad iti Efeso 4:23, 24: “Mapabarokayo koma iti puersa a mangtigtignay iti panunotyo, ket ikawesyo koma ti baro a personalidad a naparsua maitunos iti pagayatan ti Dios iti pudno a kinalinteg ken kinasungdo.”
20. Kangrunaan iti amin, ania a galad ti tumulong kadatayo nga agbalin a nasungdo ken Jehova ken iti amin a sabsabali pay a nakautangantayo iti kinasungdo?
20 Ti panangapresiar kadagiti galad ni Jehova ti tumulong kadatayo nga agbalin a nasungdo. Kangrunaan iti amin, ti awan panagimbubukodanna nga ayat iti nailangitan nga Amatayo ken panagyaman iti amin nga inaramidna kadatayo, ti panagayat kenkuana iti amin a puso ken kararua ken isip ken pigsa tulongannatayo nga agbalin a nasungdo kenkuana. Maysa pay, ti kaadda ti ayat a kinuna ni Jesus a pakabigbigan dagiti pasurotna tulongannatayo nga agbalin a nasungdo iti amin a Kristiano iti kongregasion ken iti pamiliatayo. Iti sabali a pannao, daytat’ talaga a maipapan iti panagbalin a managimbubukodan wenno di managimbubukodan. Ti di kinasungdo kaipapanannat’ panagbalin a managimbubukodan. Ti kinasungdo kaipapanannat’ panagbalin a di managimbubukodan.—Marcos 12:30, 31; Juan 13:34, 35.
21. Kasano a magupgop ti panagballigi iti karit ti kinasungdo?
21 Kas sumario: Ti kinasungdo ti kasasayaatan a galad nga impakita ni Jehova a Dios, ni Jesu-Kristo, ken amin a pudno nga adipen ni Jehova. Tapno maaddaan iti nasayaat a relasion ken ni Jehova a Dios, masapul a mapagballigiantayo ti karit ti kinasungdo kenkuana babaen ti panagbiag a maitunos kadagiti nalinteg a pagalagadanna, saan a pannakainaig kadagiti kabusorna, ken panangitandudo ken ni Jehova iti panangpaneknek iti pormal ken impormal a pamay-an. Masapul a pagballigiantayo met ti karit nga agbalin a nasungdo iti makitkita nga organisasion ni Jehova. Masapul nga agbalintayo a nasungdo iti kongregasiontayo ken nasungdo iti asawatayo. Babaen ti naan-anay a panagballigi iti karit ti kinasungdo, makiramantayto iti panangalangon iti kinasoberano ni Jehova, ket dumasigtayto kenkuana iti isyu. Iti kasta magun-odtayto ti anamongna ken awatentayto ti gunggona a biag nga agnanayon. Ti naikuna ni apostol Pablo maipapan iti nadiosan a debosion maikuna met maipapan iti panagballigitayo iti karit ti kinasungdo. Makagunggona dayta agpadpada iti biag ita ken iti masanguanan.—Salmo 18:25; 1 Timoteo 4:8.
Kasanoyo a Sungbatan?
◻ Kadagiti ania a pamay-an a mapagballigiantayo ti karit ti kinasungdo iti Dios?
◻ Aniat’ kalikaguman kadatayo ti kinasungdo iti organisasion ni Jehova?
◻ Kasano a mapagballigian dagiti panglakayen ti karit ti kinasungdo?
◻ Ania a karit iti kinasungdo ti masapul a pagballigian dagiti naasawaan a Kristiano?
◻ Ania dagiti galad a tumulong kadatayo nga agballigi iti karit ti kinasungdo?
[Ladawan iti panid 17]
Ti kinasungdo kadagiti kameng iti kongregasion lapdanna dagiti panglakayen iti panangipalgak kadagiti kompidensial a banag
[Dagiti ladawan iti panid 18]
Ti kinasungdo iti asawa patibkerenna ti singgalut ti panagasawa