Taginayonenyo ti Panagkaykaysa Kadagitoy Maudi nga Al-aldaw
“Agtignaykayo iti pamay-an a maikari iti naimbag a damag . . . , nga agtaktakderkayo a sititibker iti maymaysa nga espiritu, agraman iti maymaysa a kararua nga umag-agawa nga agdadanggay a maipaay iti pammati iti naimbag a damag.” —FILIPOS 1:27.
1. Aniat’ pagdumaan dagiti Saksi ni Jehova ken ti lubong?
DAGITOY dagiti “maudi nga al-aldaw.” Di pagduaduaan, adtoyen dagiti “napeggad a tiempo a narigat a pakilangenan.” (2 Timoteo 3:1-5) Iti daytoy “tiempo ti panungpalan,” agraman ti nariribuk a kagimongan ti tao, nakabatbatad ti pannakaiduma dagiti Saksi ni Jehova gapu iti kinatalna ken panagkaykaysada. (Daniel 12:4) Ngem tunggal maysa a karaman iti sangalubongan a pamilia dagiti managdaydayaw ken Jehova makalikaguman nga ikagumaanda a taginayonen daytoy a panagkaykaysa.
2. Aniat’ kinuna ni Pablo maipapan iti panangtaginayon iti panagkaykaysa, ket ania a saludsod ti usigentayo?
2 Imbalakad ni apostol Pablo kadagiti pada a Kristiano a taginayonenda ti panagkaykaysa. Insuratna: “Agtignaykayo iti pamay-an a maikari iti naimbag a damag maipapan ken Kristo, tapno iti kasta, uray no umayak ket makitakayo wenno awanak, mangngegko koma dagiti bambanag maipapan kadakayo, nga agtaktakderkayo a sititibker iti maymaysa nga espiritu, agraman iti maymaysa a kararua nga umag-agawa nga agdadanggay a maipaay iti pammati iti naimbag a damag, ket iti aniaman a pamay-an saan a mabutbuteng kadagiti kabusoryo. Daytoy met laeng a banag ket pammaneknek ti pannakadadael kadakuada, ngem pannakaisalakan kadakayo; ket daytoy a panangipakita naggapu iti Dios.” (Filipos 1:27, 28) Silalawag nga ipakita ti sasao ni Pablo a masapul nga agtrabahotayo a sangsangkamaysa kas Kristiano. Gapuna, ania ngarud ti tumulong kadatayo a mangtaginayon iti Nakristianuan a panagkaykaysatayo kadagitoy narigat a tiempo?
Panagpasakup iti Pagayatan ti Dios
3. Kaano ken kasano a nagbalin a pasurot ni Kristo dagiti immuna a di nakugit a Gentil?
3 Ti maysa a pamay-an tapno mapagtalinaed ti panagkaykaysatayo isut’ panagpasakup iti pagayatan ti Dios iti isuamin a tiempo. Mabalin a kalikaguman daytoy ti panangbalbaliw iti panagpampanunottayo. Usigenyo dagiti nagkauna a Judio nga adalan ni Jesu-Kristo. Idi immuna a nangaskasaba ni apostol Pedro kadagiti di-nakugit a Gentil idi 36 K.P., impaayan ti Dios iti nasantuan nga espiritu dagitoy a tattao dagiti nasion, ket nabautisaranda. (Aramid, kapitulo 10) Sakbay daytoy, dagiti laeng Judio, nakomberte iti Judaismo, ken Samaritano ti nagbalin a pasurot ni Jesu-Kristo.—Aramid 8:4-8, 26-38.
4. Kalpasan ti panangilawlawagna no aniat’ napasamak ken Cornelio, aniat’ kinuna ni Pedro, ket ania a suot ti impasango daytoy kadagiti Judio nga adalan ni Jesus?
4 Idi naammuan dagiti apostol ken dadduma pay a kakabsat idiay Jerusalem ti maipapan iti pannakakomberte ni Cornelio ken dagiti dadduma pay a Gentil, interesadoda a makangngeg iti padamag ni Pedro. Kalpasan a nailawlawag ti napasamak mainaig ken Cornelio ken iti dadduma pay a manamati a Gentil, ingngudo ti apostol iti sasao: “Ngarud, no ti Dios intedna kadakuada [kadagidiay manamati a Gentil] ti isu met laeng nga awan bayadna a sagut [ti nasantuan nga espiritu] kas iti inaramidna met kadatayo [a Judio] a namati ken Apo Jesu-Kristo, siasinoak tapno kabaelak koma a lapdan ti Dios?” (Aramid 11:1-17) Nangipasango daytoy iti suot kadagiti Judio a pasurot ni Jesu-Kristo. Agpasakupda ngata iti pagayatan ti Dios ken awatenda dagiti manamati a Gentil kas padada a managdaydayaw? Wenno agpeggad kadi ti panagkaykaysa dagiti naindagaan nga adipen ni Jehova?
5. Kasanot’ panagtignay dagiti apostol ken ti dadduma pay a kakabsat iti banag nga impaay ti Dios ti panagbabawi kadagiti Gentil, ket aniat’ maadaltayo iti daytoy a kababalin?
5 Kuna ti salaysay: “Itan idi a [dagiti apostol ken dadduma pay a kakabsat] nangngegdan dagitoy a bambanag, timmulokda, ket indaydayawda ti Dios, a kunkunada: ‘No kasta, ngarud, ti Dios impalubosna ti panagbabawi a maipaay iti panggep a biag kadagiti met tattao iti nasnasion.’” (Aramid 11:18) Dayta a kababalin ti nangtaginayon ken nangitandudo iti panagkaykaysa dagiti pasurot ni Jesus. Iti las-ud laeng ti apagbiit a panawen, rimmang-ay ti trabaho a panangasaba kadagiti Gentil, wenno tattao dagiti nasion, ket binendisionan ni Jehova ti kakasta a trabaho. Rumbeng a tumuloktay met no makalikaguman ti pannakitinnulongtayo mainaig iti panangbukel iti baro a kongregasion wenno no adda maaramid a sumagmamano a nateokratikuan a panagbalbaliw iti sidong ti panangiwanwan ti nasantuan nga espiritu ti Dios. Ti naimpusuan a pannakitinnulongtayo ti makaay-ayo ken Jehova ken tumulong kadatayo a mangtaginayon iti panagkaykaysatayo kadagitoy maudi nga al-aldaw.
Kumpetkayo iti Kinapudno
6. Aniat’ epekto ti kinapudno iti panagkaykaysa dagiti managdaydayaw ken Jehova?
6 Kas paset ti pamilia dagiti managdaydayaw ken Jehova, mataginayontayo ti panagkaykaysa gapu ta amintayo ket ‘nasursuruan ken Jehova’ ken siiirut a kumpettayo iti naipalgak a kinapudnona. (Juan 6:45; Salmo 43:3) Tangay naibatay iti Sao ti Dios dagiti sursurotayo, amintayo ti agsao buyogen ti panagtutunos. Siraragsak nga awatentayo ti naespirituan a taraon nga ipapaay ni Jehova babaen “ti matalek ken masirib nga adipen.” (Mateo 24:45-47) Ti kasta a maymaysa a sursuro tulongannatayo a mangtaginayon iti panagkaykaysatayo iti sangalubongan.
7. No marigatantayo kas indibidual a mangtarus iti maysa a punto, aniat’ rumbeng nga aramidentayo, ken aniat’ di rumbeng nga aramidentayo?
7 Kasanon no tunggal maysa kadatayo marigatan a mangtarus wenno mangawat iti maysa a pannursuro? Rumbeng nga agkararagtayo maipaay iti sirib ken agsukimat iti Kasuratan ken kadagiti Nakristianuan a publikasion. (Proverbio 2:4, 5; Santiago 1:5-8) Mabalin a makatulong ti pannakisarita iti maysa a panglakayen. No saan latta a matarusan ti punto, mabalin a kasayaatan no bay-an pay laeng dayta a banag. Nalabit maipablaakto ti ad-adu pay nga impormasion maipapan iti dayta a tema, ket iti kasta lumawanto ti pannakaawattayo. Nupay kasta, biddut ti panangpadas a mangkombinsir kadagiti dadduma iti kongregasion a mangawat iti bukodtayo a naiduma a kapanunotan. Mangimula daytoy iti panagsusupiat, saan a makatulong iti panamagtalinaed iti panagkaykaysa. Anian a nasaysayaat nga amang ti ‘panagtultuloy a magna iti kinapudno’ ken paregtaen dagiti dadduma a mangaramid iti kasta!—3 Juan 4.
8. Ania a kababalin maipanggep iti kinapudno ti maitutop?
8 Idi umuna a siglo, kinuna ni Pablo: “Iti agdama kumitkitatayo iti nakudrep a ladawan babaen ti pagsarmingan a metal, ngem kalpasanna rupan-rupanton. Iti agdama di naan-anay ti ammok, ngem kalpasanna maammuakton a siuumiso a kas met kaniak a naammuan a siuumiso.” (1 Corinto 13:12) Nupay saan a natarusan dagiti nagkauna a Kristiano ti amin a detalye, nagtalinaedda a nagkaykaysa. Nalawlawag itan ti pannakaawattayo iti panggep ni Jehova ken iti Saona a kinapudno. Gapuna agyamantayo iti kinapudno nga inawattayo babaen ti ‘matalek nga adipen.’ Ket agyamantay koma ta inwanwannatay ni Jehova babaen ti organisasionna. Nupay saan a kanayon nga agpapada ti tukad ti pannakaammotayo, saantay a mabisin wenno mawaw iti naespirituan a pamay-an. Imbes ketdi, pinagkaykaysanatay ti Pastortayo, ni Jehova, ket inaywanannatayo a naimbag.—Salmo 23:1-3.
Aramatenyo a Siuumiso ti Dila!
9. Kasano a mausar ti dila a mangitandudo iti panagkaykaysa?
9 Ti panangaramat iti dila a mangparegta iti dadduma ket maysa a napateg a pamay-an tapno maitandudo ti panagkaykaysa ken espiritu ti panagkakabsat. Ti surat a nangrisut iti parikut maipanggep iti pannakakugit, nga impatulod ti umuna a siglo a bagi a manarawidwid, ket gubuayan iti pammaregta. Kalpasan a nabasada dayta, dagiti adalan a Gentil idiay Antioquia “nagrag-oda gapu iti pammaregta.” Da Judas ken Silas, a naibaon manipud Jerusalem buyogen ti surat, “pinaregtada dagiti kakabsat babaen kadagiti adu a palawag ket pinabilegda ida.” Di pagduaduaan, ti kaadda da Pablo ken Bernabe ti nangparegta ken nangpabileg met kadagiti kapammatian idiay Antioquia. (Aramid 15:1-3, 23-32) Dakkel met ti magapuanantayo no agtataripnongtayo kadagiti Nakristianuan a panaggigimong ket ‘agpipinnaregta iti maysa ken maysa’ babaen ti kaaddatayo sadiay ken kadagiti makapabileg a komentotayo.—Hebreo 10:24, 25.
10. Tapno mataginayon ti panagkaykaysa, aniat’ mabalin a kasapulan a maaramid no adda mangrabrabngis?
10 Nupay kasta, ti di umiso a panangusar iti dila pagpeggadenna ti panagkaykaysatayo. “Ti dila ket maysa a bassit a kameng ngem nupay kasta agaramid kadagiti dadakkel a kinapangas,” insurat ni adalan a Santiago. “Adtoy! Anian a nagbassit nga apuy ti kasapulan a panguram iti dakkel unay a kakaykaywan!” (Santiago 3:5) Kagura ni Jehova dagidiay mangpatpataud kadagiti panagsusupiat. (Proverbio 6:16-19) Ti kasta a panagsasarita mabalin a pakaigapuan ti pannakasinasina. Gapuna, kasanon no adda mangrabrabngis, kayatna a sawen, ti panangibunton iti panangabuso iti maysa a tao wenno pananginsulto kenkuana kadagiti sasao? Ikagumaan dagiti panglakayen a tulongan ti agar-aramid iti dakes. Nupay kasta, ti di agbabawi a manangrabngis rumbeng a mailaksid tapno mapagtalinaed ti kinatalna, kinaurnos, ken panagkaykaysa ti kongregasion. Total, insurat ni Pablo: “Isardengyo ti makikadkadua iti asinoman a maaw-awagan kabsat a maysa a . . . manangrabngis . . . , saan uray makipangan iti kasta a tao.”—1 Corinto 5:11.
11. Apay a napateg ti kinapakumbaba no adda naisawangtayo a pakaigapuan ti riribuk iti nagbaetantayo ken iti maysa a kapammatian?
11 Ti panangmedmed iti dila tulongannatayo a mangtaginayon iti panagkaykaysa. (Santiago 3:10-18) Ngem ipapantayon nga adda imbagatayo a namataud iti riribuk iti nagbaetantayo ken iti maysa a pada a Kristiano. Saan kadi a maiparbeng a datayo ti umun-una a makikappia iti kabsattayo, nga agpadispensar no kasapulan? (Mateo 5:23, 24) Pudno, kalikaguman daytoy ti panagpakumbaba, wenno kinapakumbaba iti panagpampanunot, ngem insurat ni Pedro: “Bariksanyo ti bagbagiyo iti kinapakumbaba iti panagpampanunot maipaay iti maysa ken maysa, agsipud ta ti Dios busorenna dagiti natangsit, ngem mangted iti di kaikarian a kinamanangaasi kadagiti napakumbaba.” (1 Pedro 5:5) Ti kinapakumbaba tignayennatayo a ‘mangsurot iti talna’ a kadua dagiti kakabsattayo, a bigbigentay dagiti bidduttayo ken dumawat iti maitutop a pammakawan. Tumulong daytoy a mangtaginayon iti panagkaykaysa iti pamilia ni Jehova.—1 Pedro 3:10, 11.
12. Kasanotay a mausar ti dila a mangitandudo ken mangtaginayon iti panagkaykaysa iti ili ni Jehova?
12 Maparang-aytayo ti espiritu ti pamilia kadagidiay karaman iti organisasion ni Jehova no usarentayo a siuumiso ti dilatayo. Tangay kasta ti inaramid ni Pablo, mapalagipanna dagiti taga-Tesalonica: “Ammoyo unay no kasano, kas iti aramiden ti maysa nga ama kadagiti annakna, nga intultuloymi a binagbagaan ti tunggal maysa kadakayo, ket liniwliwami ken nangsaksikami kadakayo, tapno agtultuloy a magnakayo a maikari iti Dios.” (1 Tesalonica 2:11, 12) Gapu ta nangipaay iti nagsayaat nga ulidan iti daytoy a banag, maidagadag ni Pablo kadagiti pada a Kristiano nga ‘agsao iti makaliwliwa kadagiti malmaldaangan a kararua.’ (1 Tesalonica 5:14) Panunotenyo ti dakkel a pagimbagan a maaramidantayo iti panangusar iti dila tapno mangliwliwa, mangparegta, ken mangpabileg iti dadduma. Wen, “ti maysa a sao iti maitutop a tiempo, anian a nagsayaat!” (Proverbio 15:23) Maysa pay, ti kasta a sasao tumulong tapno maitandudo ken mataginayon ti panagkaykaysa ti ili ni Jehova.
Agbalinkayo a Manangpakawan!
13. Apay a rumbeng a manangpakawantayo?
13 Kasapulan unay ti panangpakawan iti nagbasol a dumawdawat iti pammakawan no kayattayo a taginayonen ti Nakristianuan a panagkaykaysa. Ket kasano kasansan a mamakawantayo? Kinuna ni Jesus ken Pedro: “Saan nga, Agingga iti mamimpito, no di ket, Agingga iti mamimpitopulo ket pito.” (Mateo 18:22) No saantayo a manangpakawan, saantayo a magunggonaan. Kasano a kasta? Bueno, ti guranggura ken panagimula iti sakit ti nakem pukawenna ti talna ti panunottayo. Ket no naglataktayo gapu iti naranggas ken di-manangpakawan a kababalin, nalabit a pakaigapuan dayta ti pannakaisinatayo. (Proverbio 11:17) Ti panagimula iti sakit ti nakem saan a makaay-ayo iti Dios ken mangiturong iti nadagsen a basol. (Levitico 19:18) Laglagipenyo a napugotan iti ulo ni Juan a Mammautisar iti maysa a plano nga insayangkat ni managdakdakes a Herodias, nga “ing-ingpenna idi ti sakit ti nakem” maibusor kenkuana.—Marcos 6:19-28.
14. (a) Aniat’ isursuro kadatayo ti Mateo 6:14, 15 maipapan iti panangpakawan? (b) Kasapulan kadi a kanayon nga urayentayo ti panagpakawan sakbay a pakawanentayo ti maysa a tao?
14 Mairaman iti modelo a kararag ni Jesus dagitoy a sasao: “Pakawanennakami iti basbasolmi, ta pakawanenmi met a mismo ti tunggal maysa a nakautang kadakami.” (Lucas 11:4) No saantayo a mamakawan, agpeggadtayo nga inton tiempona saanen a pakawanen ni Jehova a Dios dagiti basoltayo, ta kinuna ni Jesus: “No pakawanenyo dagiti tattao kadagiti labsingda, pakawanennakayto met ti nailangitan nga Amayo; idinto ta no dikay pakawanen dagiti tattao kadagiti labsingda, uray ni Amayo saanna a pakawanen dagiti labsingyo.” (Mateo 6:14, 15) Gapuna no talaga a kayattayo nga aramiden ti pasettayo iti panangtaginayon iti panagkaykaysa iti pamilia dagiti managdaydayaw ken Jehova, manangpakawantayo, a nalabit lipatenen ti basol a maigapu iti kinadarasudos ken awan aniaman a dakes a panggep. Kinuna ni Pablo: “Itultuloyyo nga anusan ti maysa ken maysa ken sibubulos a pakawanen ti maysa ken maysa no ti asinoman adda pangidarumanna iti sabali. Kas iti sibubulos a panangpakawan ni Jehova kadakayo, kasta met ti aramidenyo.” (Colosas 3:13) No mamakawantayo, makatulongtayo a mangtaginayon iti nagpateg a panagkaykaysa iti organisasion ni Jehova.
Panagkaykaysa ken Dagiti Personal a Pangngeddeng
15. Aniat’ tumultulong iti ili ni Jehova a mangtaginayon iti panagkaykaysa no agar-aramid kadagiti personal a pangngeddeng?
15 Pinarsuanatay ti Dios nga addaan wayawaya nga agpili a pakairamanan ti pribilehio ken rebbengen a mangaramid kadagiti personal a pangngeddeng. (Deuteronomio 30:19, 20; Galacia 6:5) Nupay kasta, mataginayontayo ti panagkaykaysatayo gapu ta sursurotentayo dagiti linteg ken prinsipio iti Biblia. Usigentayo dagitoy no agaramidtayo kadagiti personal a pangngeddeng. (Aramid 5:29; 1 Juan 5:3) Ipapantayon a tumanor ti parikut maipanggep iti neutralidad. Makaaramidtayo iti nainsiriban a personal a pangngeddeng babaen ti pananglaglagip a ‘saannatayo a paset ti lubong’ ken ‘pinandaytayon dagiti kampilantayo tapno agbalin a dingding ti arado.’ (Juan 17:16; Isaias 2:2-4) Umasping iti dayta, no mangaramidtayo iti personal a pangngeddeng maipanggep iti relasiontayo iti Estado, usigentayo ti kuna ti Biblia maipapan iti panagbayad iti “Dios kadagiti banag a kukua ti Dios,” bayat nga ipasakuptayo ti bagitayo “kadagiti nangatngato nga agtuturay” maipanggep kadagiti sekular a banag. (Lucas 20:25; Roma 13:1-7; Tito 3:1, 2) Wen, ti panangusig kadagiti linteg ken prinsipio iti Biblia no mangaramid kadagiti personal a pangngeddeng tumulong a mangtaginayon iti Nakristianuan a panagkaykaysatayo.
16. Kasanotayo a makatulong a mangtaginayon iti panagkaykaysa no mangaramidtayo kadagiti pangngeddeng a saan met a makuna nga umiso wenno biddut sigun iti Kasuratan? Iladawanyo.
16 Makatulongtayo a mangtaginayon iti Nakristianuan a panagkaykaysa uray mangar-aramid kadagiti pangngeddeng a naan-anay a personal ken saan met nga umiso wenno biddut sigun iti Kasuratan. Kasano a kasta? Babaen ti panangipakita iti naayat a pannakaseknan iti sabsabali a maapektaran iti pangngeddengtayo. Tapno iladawan: Iti kongregasion iti nagkauna a Corinto, timmanor ti parikut maipanggep iti karne a naidaton kadagiti idolo. Siempre, saan a makipaset ti maysa a Kristiano iti idolatroso a seremonia. Nupay kasta, saan a basol ti pannangan iti kastoy a kita ti natda a karne nga umiso ti pannakapadarana a nailako iti tiendaan. (Aramid 15:28, 29; 1 Corinto 10:25) Nupay kasta, nakonsiensia ti sumagmamano a Kristiano maipanggep iti pannangan iti daytoy a karne. Gapuna indagadag ni Pablo iti dadduma a Kristiano a liklikanda ti mangitibkol kadakuada. Kinapudnona, insuratna: “No ti taraon itibkolna ti kabsatko, diakto pulos mangan manen iti lasag, tapno saanko a maitibkol ti kabsatko.” (1 Corinto 8:13) Gapuna uray awan linteg wenno prinsipio iti Biblia a nairaman, anian a kinamanagayat ti panangibilang iti dadduma no mangaramid kadagiti personal a pangngeddeng a makaapektar iti panagkaykaysa ti pamilia ti Dios!
17. Aniat’ nainsiriban nga aramiden no kasapulan a mangaramidtayo kadagiti personal a pangngeddeng?
17 No saantay a masinunuo no ania a dana ti surotentayo, nainsiriban ti mangeddeng iti pamay-an nga agtalinaed a nadalus ti konsiensiatayo, ket masapul a raemen ti dadduma ti pangngeddengtayo. (Roma 14:10-12) Siempre, no kasapulan a mangaramidtayo iti personal a pangngeddeng, masapul a dumawattayo iti panangiwanwan ni Jehova babaen ti kararag. Kas ti salmista, makapagkararagtayo buyogen ti panagtalek: “Iyallingagmo kad ta lapayagmo kaniak. . . . Ta sika ti batok ken pagsalindegak; anansata gapu iti naganmo idalannak ket iturongnak kadi.”—Salmo 31:2, 3.
Kanayon a Taginayonen ti Nakristianuan a Panagkaykaysa
18. Kasanot’ panangiladawan ni Pablo iti panagkaykaysa ti kongregasion Kristiano?
18 Iti 1 Corinto kapitulo 12, inaramat ni Pablo ti bagi ti tao tapno iladawanna ti panagkaykaysa ti kongregasion Kristiano. Impaganetgetna ti panagpannuray iti maysa ken maysa ken ti kinapateg ti tunggal maysa a kameng. “No isuda amin ket maymaysa a kameng, sadinonto ti yan ti bagi?” insaludsod ni Pablo. “Ngem ita aduda a kamkameng, ngem maymaysa a bagi. Ti mata dina mabalin a kunaen iti ima: ‘Awan pakasapulak kenka’; wenno, manen, ti ulo dina mabalin a kunaen kadagiti saka: ‘Awan pakasapulak kadakayo.’” (1 Corinto 12:19-21) Umasping iti dayta, saan nga amin kadatayo a karaman iti pamilia dagiti managdaydayaw ken Jehova ket mangar-aramid iti isu met laeng a rebbengen. Ngem, agkaykaysatayo, ket kasapulantayo ti maysa ken maysa.
19. Kasanotay a magunggonaan kadagiti naespirituan a probision ti Dios, ket aniat’ kinuna ti maysa a nataenganen a kabsat iti daytoy a banag?
19 No kasano a kasapulan ti bagi ti taraon, panangaywan, ken panangiwanwan, kasapulantayo dagiti naespirituan a probision nga ipapaay ti Dios babaen ti Sao, espiritu, ken ti organisasionna. Tapno magunggonaan kadagitoy a probision, kasapulan nga agbalintayo a paset ti naindagaan a pamilia ni Jehova. Kalpasan ti adu a tawen a panagserbi iti Dios, insurat ti maysa a kabsat: “Agyamyamanak la unay ta nagbiagak maitunos iti pannakaammo kadagiti panggep ni Jehova manipud kadagidi nga aldaw sakbay ti 1914 idi a saan pay unay a nalawag ti amin . . . agingga ita a ti kinapudno agranraniag a kas init iti agmatuon. No adda banag a kapatgan kaniak, daytat’ panagtalinaed a nadekket iti makitkita nga organisasion ni Jehova. Insuronak ti nagkauna a kapadasak no kasano nga awan mamaayna ti panagpannuray iti panagrasrason ti tao. Idi naglawagen kaniak dayta a punto, inkeddengkon ti agtalinaed iti matalek nga organisasion. Kasano pay koma a magun-odan ti maysa ti pabor ken bendision ni Jehova?”
20. Aniat’ masapul a determinado nga aramidentayo maipapan iti panagkaykaysatayo kas ili ni Jehova?
20 Inayaban ni Jehova ti ilina manipud iti nailubongan a kinasipnget ken pannakasinasina. (1 Pedro 2:9) Inyegnatayo iti maysa a naparaburan a pannakikaykaysa kenkuana ken kadagiti kapammatiantayo. Addanto daytoy a panagkaykaysa iti baro a sistema dagiti bambanag nga ita nakaas-asidegen. No kasta, kadagitoy napeggad a maudi nga al-aldaw, itultuloytayo a ‘kawesan ti bagbagitayo iti ayat’ ken aramidentayo ti amin a kabaelantayo a mangitandudo ken mangtaginayon iti napateg a panagkaykaysatayo.—Colosas 3:14.
Kasanoyo a Sungbatan?
◻ Apay a ti panangaramid iti pagayatan ti Dios ken panangpetpet iti kinapudno tulongannatayo a mangtaginayon iti panagkaykaysa?
◻ Kasano a mainaig ti panagkaykaysa iti umiso a panangusar iti dila?
◻ Aniat’ mairaman iti panagbalin a manangpakawan?
◻ Kasanotay a mataginayon ti panagkaykaysa no mangaramidtayo kadagiti personal a pangngeddeng?
◻ Apay a taginayonentay ti Nakristianuan a panagkaykaysa?
[Ladawan iti panid 16]
Kas iti panangsalimetmet daytoy a pastor iti arbanna a sangsangkamaysa, kasta met a salimetmetan ni Jehova dagiti tattaona a nagkaykaysa
[Dagiti ladawan iti panid 18]
Babaen ti sipapakumbaba a panagpadispensar no nakapasakittayo, tumulongtayo a mangitandudo iti panagkaykaysa