Panagbiag Maitunos iti Linteg ti Kristo

“Itultuloyyo nga awiten dagiti pakadagsenan ti maysa ken maysa, ket iti kasta tungpalenyo ti linteg ti Kristo.”​—GALACIA 6:2.

1. Apay a maikuna a ti linteg ti Kristo ket nabileg a puersa maipaay iti pagimbagan ita?

IDIAY Rwanda, inrisgo dagiti Hutu ken Tutsi a Saksi ni Jehova ti biagda tapno makapagsisinnalaknibda iti panangpapatay iti pulí a bimtak itay nabiit iti dayta a pagilian. Dagiti Saksi ni Jehova idiay Kobe, Japan, a napukawda dagiti kameng ti pamiliada iti makadadael a ginggined nagleddaangda gapu iti panagminatayda. Ngem, nagtignayda a dagus tapno isalakanda ti dadduma a biktima. Wen, dagiti mangtignay-puso a pagulidanan iti aglikmut ti lubong ipakitada a ti linteg ti Kristo ket maan-annurot ita. Maysa daytoy a nabileg a puersa iti pagsayaatan.

2. Kasano a di natarusan ti Kakristianuan ti kaipapanan ti linteg ti Kristo, ken kasanotay a matungpal dayta a linteg?

² Kagiddan dayta, matungtungpal ti maysa a padto ti Biblia maipapan kadagitoy napeggad a “maudi nga al-aldaw.” Adu ti addaan iti “kita ti nadiosan a debosion” ngem “libakenda ti pannakabalin dayta.” (2 Timoteo 3:1, 5) Nangnangruna iti Kakristianuan, masansan a ti relihion ket pormalidad laeng, awan iti puso. Dayta kadi ket gapu ta narigat ti agbiag maitunos iti linteg ti Kristo? Saan. Saan a mangted kadatayo ni Jesus iti linteg a saan a masurot. Talaga laeng a saan a natarusan ti Kakristianuan ti kaipapanan ti linteg. Napaay nga agtulnog kadagitoy naipaltiing a sasao: “Itultuloyyo nga awiten dagiti pakadagsenan ti maysa ken maysa, ket iti kasta tungpalenyo ti linteg ti Kristo.” (Galacia 6:2) “Tungpalen[ta]yo ti linteg ti Kristo” babaen ti panangawit kadagiti pakadagsenan ti maysa ken maysa, saan a babaen ti panangtulad kadagiti Fariseo ken ti di nainkalintegan a panangpadagsen kadagiti awit dagiti kakabsattayo.

3. (a) Ania ti sumagmamano a bilin a nairaman iti linteg ti Kristo? (b) Apay a di umiso a panunoten a ti kongregasion Kristiano saan a rumbeng a maaddaan kadagiti pagalagadan malaksid kadagiti direkta a bilin ni Kristo?

³ Mairaman iti linteg ti Kristo amin a bilin ni Kristo Jesus​—panangasaba man dayta ken panangisuro, panangtaginayon a natarnaw ken simple ti mata, pannakikappia iti padatayo a tao, wenno panangikkat iti kinarugit manipud iti kongregasion. (Mateo 5:27-30; 18:15-17; 28:19, 20; Apocalipsis 2:14-16) Wen, obligado dagiti Kristiano a mangtungpal iti amin a bilin iti Biblia a naibilin kadagiti pasurot ni Kristo. Ket saan laeng a dayta. Ti organisasion ni Jehova, kasta met ti tunggal kongregasion, kasapulan a mangipasdek kadagiti nasken a pagalagadan ken pagannurotan tapno mapagtalinaed ti nasayaat nga urnos. (1 Corinto 14:33, 40) Agasenyo, saan a makapagtataripnong a sangsangkamaysa dagiti Kristiano no awan dagiti pagalagadan no kaano, sadino, ken kasano nga ikondukta ti kakasta a gimong! (Hebreo 10:24, 25) Ti pannakitinnulong buyogen dagiti nainkalintegan a pagalagadan nga inkeddeng dagidiay naipaayan iti autoridad iti organisasion ket paset met ti panangtungpal iti linteg ti Kristo.​—Hebreo 13:17.

4. Aniat’ puersa a mangtigtignay iti nadalus a panagdayaw?

⁴ Nupay kasta, saan nga ipalubos dagiti pudno a Kristiano a ti panagdayawda agbalin nga awan mamaayna nga urnos dagiti linteg. Saanda nga agserserbi ken Jehova gapu laeng ta daytat’ ibagbaga kadakuada ti sumagmamano nga indibidual wenno organisasion. Imbes ketdi, ti ayat isut’ puersa a mangtigtignay iti panagdayawda. Insurat ni Pablo: “Ti ayat ti Kristo pilitennakami.” (2 Corinto 5:14, footnote iti Ingles) Imbilin ni Jesus kadagiti pasurotna nga agiinnayatda. (Juan 15:12, 13) Ti managsakripisio nga ayat ti pundasion ti linteg ti Kristo, ket pilitenna wenno tignayenna dagiti pudno a Kristiano iti amin a lugar, agpadpada iti pamilia ken iti kongregasion. Kitaentayo no kasano.

Iti Pamilia

5. (a) Kasano a matungpal dagiti nagannak ti linteg ti Kristo iti pagtaengan? (b) Aniat’ kasapulan dagiti annak kadagiti nagannakda, ken ania dagiti lapped a masapul a parmeken dagiti nagannak tapno maipaayda dayta?

⁵ Insurat ni apostol Pablo: “Assawa a lallaki, itultuloyyo nga ayaten dagiti assawayo, no kasano a ni Kristo inayatna met ti kongregasion ken inyawatna ti bagina a maipaay iti dayta.” (Efeso 5:25) No ni Kristo ti tuladen ti asawa a lalaki ket tratuenna ni baketna buyogen ti ayat ken pannakaawat, tungtungpalenna ti napateg a paset ti linteg ti Kristo. Maysa pay, sipapanayag a nangipakita ni Jesus iti panangipateg kadagiti ubbing, nga innalana ida kadagiti takiagna, nga impátayna kadakuada ti imana, ken binendisionanna ida. (Marcos 10:16) Mangipakita met iti panangipateg kadagiti annakda dagiti nagannak nga agtungtungpal iti linteg ti Kristo. Pudno, addada nagannak a marigatan a mangtulad iti ulidan ni Jesus iti daytoy a banag. Saan a nakaisigudan ti dadduma ti sipapanayag a panangipakitada iti rikriknada. Dakayo a nagannak, dikay palubosan a ti kakasta a kababalin lapdannakayo a mangipakita iti panagayatyo kadagiti annakyo! Saan nga umdas kadakayo nga ammoyo nga ipatpategyo dagiti annakyo. Masapul a maammuanda met dayta. Ket dida maammuan dayta no dikay mangaramid kadagiti pamay-an a mangipakita iti panangipategyo.​—Idiligyo ti Marcos 1:11.

6. (a) Kasapulan kadi ti annak dagiti pagalagadan ti nagannak, ket apay a kasta ti sungbatyo? (b) Ania a kangrunaan a makagapu kadagiti pagalagadan iti pagtaengan ti kasapulan a matarusan dagiti annak? (c) Ania dagiti peggad a maliklikan no maannurot dagiti linteg ti Kristo iti pagtaengan?

⁶ Maigiddato iti dayta, dagiti annak kasapulanda ti limitasion, kayatna a sawen a masapul a mangikeddeng dagiti nagannakda kadagiti pagalagadan ken no dadduma ipatungpalda dagitoy a pagalagadan babaen ti disiplina. (Hebreo 12:7, 9, 11) Uray kasta, kasapulan nga in-inut a matulongan dagiti annak a makakita iti kangrunaan a makagapu kadagitoy a pagalagadan: ay-ayaten ida dagiti nagannak kadakuada. Ken masapul a masursuroda nga ayat ti kasayaatan a makagapu iti panagtulnogda kadagiti nagannakda. (Efeso 6:1; Colosas 3:20; 1 Juan 5:3) Kalat ti mannakaawat a nagannak a sursuruan dagiti agtutubo a mangaramat iti ‘pannakabalinda nga agrason’ tapno inton agangay makaaramidda a mismo kadagiti nasayaat a pangngeddeng. (Roma 12:1; idiligyo ti 1 Corinto 13:11.) Iti sabali a bangir, saan a masapul nga adu unay dagiti pagalagadan wenno nainget unay ti disiplina. Kuna ni Pablo: “Dakayo nga amma, dikay rurruroden dagiti annakyo, tapno saan a maupay ti riknada.” (Colosas 3:21; Efeso 6:4) No maannurot ti linteg ti Kristo iti sangakabbalayan, awan maipaay a disiplina a mapakuyogan iti di mapengdan a pungtot wenno makasair a sasao. Iti kasta a pagtaengan, makarikna iti talged ken pammaregta dagiti annak, saan a madagsenan wenno maupay.​—Idiligyo ti Salmo 36:7.

7. Kadagiti ania a pamay-an a mangipaay iti ulidan dagiti pagtaengan a Bethel no maipanggep iti panangipasdek kadagiti pagalagadan iti pagtaengan?

⁷ Ti sumagmamano a nakapasiaren kadagiti pagtaengan a Bethel iti aglikmut ti lubong ti agkuna a dagitoy ket nasasayaat nga ulidan ti kinatimbeng no maipanggep kadagiti pagalagadan maipaay iti pamilia. Nupay buklen dagiti adulto, agandar ti kakasta nga institusion a kas kadagiti pamilia.a Komplikado dagiti panagandar iti Bethel ket kasapulanna ti adu a pagalagadan​—sigurado nga ad-adu ngem iti gagangay a pamilia. Nupay kasta, ikagumaan dagiti panglakayen a mangidadaulo kadagiti pagtaengan a Bethel, opisina, ken pabrika nga iyaplikar ti linteg ti Kristo. Matmatanda dayta kas annongenda saan laeng a tapno mangorganisar iti trabaho no di pay ket tapno itandudo ti naespirituan nga irarang-ay ken “ti rag-o ni Jehova” kadagiti katrabahuanda. (Nehemias 8:10) Gapuna, ikagumaanda nga aramiden dagiti banag iti positibo ken makaparegta a pamay-an ken ikagumaanda ti agbalin a nainkalintegan. (Efeso 4:31, 32) Di pakasdaawan a nalatak dagiti pamilia ti Bethel gapu iti kinaragsakda!

Iti Kongregasion

8. (a) Aniat’ rumbeng a kanayon a kalattayo iti kongregasion? (b) Iti sidong dagiti ania a kasasaad a nagkiddaw ti dadduma wenno pinadasda ti mangaramid kadagiti pagalagadan?

⁸ Iti kongregasion kalattay met ti agpipinnabileg iti espiritu ti ayat. (1 Tesalonica 5:11) Gapuna amin a Kristiano rumbeng nga agannad a dida padagsenan ti sabsabali babaen ti panangipilit kadagiti bukodda a kapanunotan iti bambanag a mainaig iti personal a panagpili. Pasaray dadduma ti agsurat iti Watch Tower Society tapno agkiddaw kadagiti pagalagadan maipanggep kadagiti banag kas iti no aniat’ rumbeng a panangmatmatda kadagiti espesipiko a pelikula, libro, ken uray dagiti ay-ayam. Ngem, saan nga autorisado ti Sosiedad a mangsukimat iti kakasta a bambanag ken mangipaulog kadagiti pangngeddeng kadagitoy. Iti kaaduan a kaso, dagitoy ti bambanag a rumbeng nga ikeddeng ti tunggal indibidual wenno ti ulo ti pamilia, maibatay iti panagayatna kadagiti prinsipio iti Biblia. Dadduma pagbalinenda dagiti singasing ken pagsurotan ti Sosiedad kas pagalagadan. Kas pagarigan, iti Marso 15, 1996, a ruar ti Pagwanawanan, adda nasayaat nga artikulo a mangparparegta kadagiti panglakayen a mangaramid iti regular a panangipastor nga isasarungkar kadagiti kameng ti kongregasion. Ti kadi panggep ket tapno mangipasdek kadagiti pagalagadan? Saan. Nupay dagidiay makasurot kadagiti singasing makasarakda iti adu a pagimbagan, dadduma a panglakayen saanda a maaramid ti kasta. Kasta met, ti artikulo a “Dagiti Saludsod Manipud Kadagiti Managbasa” iti Abril 1, 1995, a ruar ti Pagwanawanan namakdaar maibusor iti panangikkat iti dignidad ti okasion ti bautismo babaen ti panaglablabes, kas ti nariribuk a panagpadayá wenno panangorganisar kadagiti selebrasion. Nainget nga inyaplikar ti dadduma daytoy naannad a balakad, a nangaramidda pay ketdi iti pagalagadan a di umiso ti panagipatulod iti makaparegta a kard iti daytoy nga okasion!

9. Apay a nasken a liklikantayo ti agbalin a manangbabalaw unay ken manangukom iti maysa ken maysa?

⁹ Usigenyo met, a tapno agtalinaed kadatayo ti “perpekto a linteg a kukua ti wayawaya,” masapul a bigbigentayo a saan a padapada ti konsiensia ti amin a Kristiano. (Santiago 1:25) Rumbeng kadi a maluksawtayo no addaan dagiti tao kadagiti bukodda a pili a saan met a maisalungasing kadagiti prinsipio iti Kasuratan? Saan. Ti panangaramidtay iti dayta agbunga iti pannakasinasina. (1 Corinto 1:10) Kinuna ni Pablo, kas pakdaar kadatayo maibusor iti panangukom iti pada a Kristiano: “Iti bukodna nga apo isu sitatakder wenno maikulbo. Kinapudnona, isu mapagtakderto, ta kabaelan ni Jehova a patakderen.” (Roma 14:4) Agpeggadtayo iti panangrurod iti Dios no agsaotayo maibusor iti maysa ken maysa iti bambanag a rumbeng nga agpannuray iti konsiensia ti tunggal maysa.​—Santiago 4:10-12.

10. Asino dagiti nadutokan nga agbantay iti kongregasion, ken kasanot’ rumbeng a panangsuportartayo kadakuada?

¹⁰ Laglagipentay met, a nadutokan dagiti panglakayen nga agbantay iti arban ti Dios. (Aramid 20:28) Addada a tumulong. Ditay bumdeng nga agpabalakad kadakuada, gapu ta estudianteda iti Biblia ken pamiliar kadakuada dagiti nadakamaten iti literatura ti Watch Tower Society. No makita dagiti panglakayen ti kababalin a nalabit agturong iti panangsalungasing kadagiti prinsipio iti Kasuratan, situturedda a mangitukon iti kasapulan a balakad. (Galacia 6:1) Sursuroten dagiti miembro ti kongregasion ti linteg ti Kristo babaen ti pannakitinnulong kadagitoy maipatpateg a papastor, a mangidadaulo kadakuada.​—Hebreo 13:7.

Iyaplikar Dagiti Panglakayen ti Linteg ti Kristo

11. Kasano nga iyaplikar dagiti panglakayen ti linteg ti Kristo iti kongregasion?

¹¹ Magagaran dagiti panglakayen a mangtungpal iti linteg ti Kristo iti kongregasion. Mangidauloda iti panangikasaba iti naimbag a damag, mangisuro manipud iti Biblia tapno madanonda ti puso ken, kas naayat, naalumamay a papastor, makisaritada kadagiti “malmaldaangan a kararua.” (1 Tesalonica 5:14) Liklikanda dagiti di nakristianuan a kababalin nga adda iti adu a relihion ti Kakristianuan. Pudno, sipapartak a lumlumned daytoy a lubong, ket kas ken Pablo, mabalin a mariribukan dagiti panglakayen iti arban; ngem agtalinaedda a natimbeng bayat a sanguenda ti kakasta a pakaseknan.​—2 Corinto 11:28.

12. No agpatulong ti maysa a Kristiano iti panglakayen, kasano nga agtignay ti panglakayen?

¹² Kas pagarigan, mabalin a tarigagayan ti maysa a Kristiano ti makiuman iti panglakayen maipapan iti napateg a banag a saan a nasaklaw iti sumagmamano a direkta a Nainkasuratan a reperensia wenno agkasapulan dayta iti panangtimbeng iti nagduduma a Nakristianuan a prinsipio. Nalabit naitukon kenkuana ti pannakaital-o iti trabaho nga addaan dakdakkel a sueldo ngem dakdakkel a responsabilidad. Wenno mabalin a ti di manamati nga ama ti agtutubo a Kristiano adda kalikagumanna iti anakna a mabalin a mangapektar iti ministeriona. Kadagiti kasta a situasion liklikan dagiti panglakayen ti mangipaay iti personal a kapanunotan. Imbes ketdi, nalabit a lukibenna ti Biblia ket tulonganna ti indibidual nga agrason mainaig kadagiti nabatad a prinsipio. Mabalin nga usarenna ti Watch Tower Publications Index, no adda, tapno kitaen no aniat’ kuna “ti matalek ken masirib nga adipen” iti tema kadagiti panid ti Pagwanawanan ken dadduma pay a publikasion. (Mateo 24:45) Kasano no kalpasan daytoy mangeddeng ti Kristiano a kasla saan a kinanainsiriban iti panglakayen? No ti pangngeddeng ket saan a direkta a maisalungasing kadagiti prinsipio wenno linteg iti Biblia, masarakan ti Kristiano a bigbigen ti panglakayen ti kalintegan ti indibidual a mangaramid iti kasta a pangngeddeng, a pagaammona a “ti tunggal maysa awitennanto ti bukodna nga awit.” Nupay kasta, rumbeng a laglagipen ti Kristiano nga “aniaman nga imula ti maysa a tao, daytoyto met ti apitenna.”​—Galacia 6:5, 7.

13. Imbes a mangipaay iti direkta a sungbat kadagiti saludsod wenno mangipaay kadagiti bukodda a kapanunotan, apay a tulongan dagiti panglakayen ti dadduma tapno agrason kadagita a banag?

¹³ Apay a kastoy ti aramiden dagiti addaan kapadasan a panglakayen? Uray kaskasano adda dua a makagapu. Umuna, imbaga ni Pablo iti maysa a kongregasion a saan nga isut’ ‘agturay iti pammatida.’ (2 Corinto 1:24) Ti panglakayen, iti panangtulongna iti kabsatna nga agrason iti Kasuratan ken mangaramid iti bukodna a pangngeddeng a naibatay iti pannakaammo, tultuladenna ti kababalin ni Pablo. Bigbigenna nga adda limitasion iti autoridadna, no kasano a binigbig ni Jesus nga adda limitasion iti autoridadna. (Lucas 12:13, 14; Judas 9) Maigiddato iti dayta, sisasagana dagiti panglakayen a mangipaay iti makatulong, direkta pay ketdi, a Nainkasuratan a balakad a kasapulan. Maikadua, sansanayenna ti padana a Kristiano. Kinuna ni apostol Pablo: “Ti nakired a taraon agpaay kadagiti nataengan a tattao, kadagidiay a babaen iti panangusar nasanay dagiti pannakabalin ti pannakaawatda a mangilasin agpadpada iti umiso ken di umiso.” (Hebreo 5:14) Gapuna, tapno rumang-ay iti kinanataengan, kasapulan nga aramatentayo ti kabaelantayo nga agpanunot, a saan a kanayon nga agpampannuray iti sabali a mangipaay kadatayo kadagiti sungbat. Ti panglakayen, babaen ti panangipakitana iti padana a Kristiano no kasano ti agrason maitunos iti Kasuratan, ket iti kastoy a pamay-an tultulonganna a rumang-ay.

14. Kasano a maipakita dagiti nataengan nga agtalekda ken Jehova?

¹⁴ Maaddaantay pammati a ni Jehova a Dios babaen ti nasantuan nga espirituna tignayenna ti puso dagiti pudno a managdaydayaw. No kasta, matignay dagiti nataengan a Kristiano ti puso dagiti kakabsatda, nga agpakpakaasida, kas ti inaramid ni apostol Pablo. (2 Corinto 8:8; 10:1; Filemon 8, 9) Ammo ni Pablo a nangnangruna a ti nakillo, saan a ti nalinteg, ti makasapul kadagiti detaliado a linteg tapno mapagnakem ida. (1 Timoteo 1:9) Inyebkasna, saan a ti panaginap wenno kinaawan talek, no di ket pammati kadagiti kakabsatna. Insuratna iti maysa a kongregasion: “Adda panagtalekmi iti Apo maipapan kadakayo.” (2 Tesalonica 3:4) Sigurado a dakkel ti naaramidan ti pammati, pananginanama, ken panagtalek ni Pablo tapno matignay dagidiay a Kristiano. Kasta met ti panggep dagiti panglakayen ken agdaldaliasat a manangaywan ita. Anian a makapabang-ar dagitoy a matalek a lallaki, bayat a siaayat nga ipastoranda ti arban ti Dios!​—Isaias 32:1, 2; 1 Pedro 5:1-3.

Panagbiag Maitunos iti Linteg ti Kristo

15. Ania ti sumagmamano a maisaludsodtayo iti bagitayo tapno makita no iyap-aplikartayo ti linteg ti Kristo iti relasiontayo kadagiti kakabsattayo?

¹⁵ Kasapulantay amin a kanayon a sukimaten ti bagitayo tapno makita no agbibiagtayo maitunos iti linteg ti Kristo ken itantandudotayo dayta. (2 Corinto 13:5) Pudno, magunggonaantay amin iti panangisaludsod: ‘Mangparparegtaak kadi wenno manangbabalaw? Natimbengak kadi wenno aglablabes? Mangipakpakitaak kadi iti konsiderasion iti sabsabali wenno ipilpilitko dagiti kalintegak?’ Saan nga ikagumaan ti Kristiano nga idiktar no aniada nga addang ti rumbeng wenno di rumbeng nga aramiden ti kabsatna kadagiti banag a saan nga espesipiko a nasaklaw iti Biblia.​—Roma 12:1; 1 Corinto 4:6.

16. Kasanotay a matulongan dagidiay addaan negatibo a panangmatmat iti bagida, iti kasta matungpal ti napateg a paset ti linteg ti Kristo?

¹⁶ Kadagitoy napeggad a tiempo, napateg a mangbiroktayo kadagiti pamay-an tapno makapagpipinnaregta. (Hebreo 10:24, 25; idiligyo ti Mateo 7:1-5.) No matmatantayo dagiti kakabsattayo, saan kadi a napatpateg kadatayo dagiti nasayaat a kababalinda ngem dagiti pagkapuyanda? Ken Jehova, napateg ti tunggal maysa. Nakalkaldaang, saan a kasta ti marikna ti amin, uray iti bagida a mismo. Adu ti mangmatmat laeng kadagiti bukodda a pakapilawan ken kinaimperpekto. Tapno mapabileg ti kakasta​—ken ti dadduma​—mabalin ngata nga ikagumaantay a kasarita ti maysa wenno dua a tao kada gimong, nga ipakaammotay kadakuada no apay a tagipatgentayo ti kaaddada ken ti dakkel a tulong a maar-aramidanda iti kongregasion? Anian a rag-o no mapalag-an ti awitda iti kastoy a pamay-an ket iti kasta matungpal ti linteg ti Kristo!​—Galacia 6:2.

Maan-annurot ti Linteg ti Kristo!

17. Iti ania a nagduduma a pamay-an a makitayo a maan-annurot ti linteg ti Kristo iti kongregasionyo?

¹⁷ Maan-annurot ti linteg ti Kristo iti kongregasion Kristiano. Inaldaw a makitatay dayta​—no sigagagar nga iranud dagiti pada a Saksi ti naimbag a damag, no aglilinniwanliwa ken agpipinnaregtada, no makidangadangda nga agserbi ken Jehova iti laksid dagiti karirigatan a parikut, no ikagumaan dagiti nagannak a padakkelen dagiti annakda tapno ayatenda ni Jehova buyogen ti naragsak a puso, no mangisuro dagiti manangaywan iti Sao ti Dios buyogen ti ayat ken kinabara, a tignayenda ti arban a maaddaan iti nasged a regta nga agserbi ken Jehova iti agnanayon. (Mateo 28:19, 20; 1 Tesalonica 5:11, 14) No datayo kas indibidual iyaplikartayo ti linteg ti Kristo iti mismo a biagtayo, anian a ragsak ti puso ni Jehova! (Proverbio 23:15) Kayatna nga agbiag nga agnanayon amin dagidiay mangipateg iti perpekto a lintegna. Iti um-umayen a Paraiso, makitatayto ti tiempo inton ti sangatauan ket perpekto, tiempo nga awanen dagiti manangsalungasing iti linteg, ken ti tiempo inton ti amin a pagannayasan ti pusotayo ket makontrol. Anian a nagdayag a gunggona ti panagbiag maitunos iti linteg ti Kristo!

[Footnote]

Aniat’ Panagkunayo?

◻ Apay a di natarusan ti Kakristianuan ti kaipapanan ti linteg ti Kristo?

◻ Kasanotay a maannurot ti linteg ti Kristo iti pamilia?

◻ Tapno maiyaplikar ti linteg ti Kristo iti kongregasion, aniat’ masapul a liklikantayo, ken aniat’ masapul nga aramidentayo?

◻ Kasano a matungpal dagiti panglakayen ti linteg ti Kristo iti pannakilangenda iti kongregasion?

[Ladawan iti panid 23]

Kasapulan unay ti anakyo ti ayat

[Ladawan iti panid 24]

Anian a makapabang-ar dagiti manangipateg a papastortayo!