Agdaldaliasat a Manangaywan—Sagut a Tattao
“Idi isu immuli sadi ngato impanawna dagiti nakayawan; nangted kadagiti sagut a tattao.”—EFESO 4:8.
1. Ania a kabbaro a trabaho ti nayanunsio iti daytoy a magasin idi 1894?
NASUROK a maysa a siglon, inyanunsio ti Watch Tower ti maysa a baro a banag. Nadeskribir kas “Sabali a Sanga ti Trabaho.” Aniat’ sinaklaw daytoy kabbaro a trabaho? Isut’ moderno nga aldaw nga inagurasion ti trabaho dagiti agdaldaliasat a manangaywan. Inlawlawag ti Setiembre 1, 1894, a ruar daytoy a magasin a nanipud idin adda dagiti kualipikado a kakabsat a lallaki a bumisita kadagiti grupo dagiti Estudiante ti Biblia ‘tapno mapabilegda iti kinapudno.’
2. Aniat’ annong dagiti manangaywan ti sirkito ken distrito?
2 Idi umuna a siglo K.P., dagiti kongregasion Kristiano ti binisita ti kakasta a manangaywan a kas kada Pablo ken Bernabe. Dagitoy a matalek a lallaki rantada a ‘pabilgen’ dagiti kongregasion. (2 Corinto 10:8) Itatta, naparaburantayo iti rinibu a lallaki a mangar-aramid iti kastoy iti sistematiko a wagas. Ti Bagi a Manarawidwid dagiti Saksi ni Jehova dinutokanna ida kas manangaywan ti sirkito ken distrito. Ti manangaywan ti sirkito pagserbianna ti agarup 20 a kongregasion iti makalawas tunggal maysa agarup maminduat’ makatawen, nga usigenna dagiti rekord, agpalawag, ken makiraman iti ministerio idiay tay-ak a kaduana dagiti lokal nga agibumbunannag iti Pagarian. Ti manangaywan ti distrito isut’ tserman ti tunggal tinawen nga asamblea sirkito ti sumagmamano a sirkito, a makiraman iti ministerio idiay tay-ak a kaduana ti agsangaili a kongregasion, ken mangparegta babaen kadagiti palawag a naibatay iti Biblia.
Kinamanagsakripisioda
3. Apay a kasapulan dagiti agdaldaliasat a manangaywan ti kinamanagsakripisio?
3 Kanayon nga agbibiahe dagiti agdaldaliasat a manangaywan. Kasapulan ti kinamanagsakripisio iti daytoy a mismo. Ti panagakar-akar kadagiti kongregasion masansan a narikut, ngem dagitoy a lallaki ken dagiti assawada sirarag-o nga aramidenda dayta. Kinuna ti maysa a manangaywan ti sirkito: “Ni baketko manangsuporta ken di reklamador . . . Mapadayawan unay gapu iti kinamanagsakripisiona.” Adda dagiti manangaywan ti sirkito nga agbiahe iti nasurok a 1,000 a kilometro tapno dumanon iti maysa a kongregasion. Adu dagiti nakakotse, ngem ti dadduma agbiaheda babaen iti lugan a pangpubliko, bisikleta, kabalio, wenno magmagnada. Maysa nga Africano a manangaywan ti sirkito kasapulan a ballasiwenna ti karayan a sallabayenna ni baketna tapno makagtengda iti maysa a kongregasion. Kadagiti panagbiahena kas misionero, inibturan ni apostol Pablo ti pudot ken lammin, bisin ken waw, panagpuyat, nagduduma a peggad, ken naranggas a pannakaidadanes. Napasaranna met ti “pannakaringgor a maipaay iti isuamin a kongregasion”—kapadasan a kadawyan itatta kadagiti agdaldaliasat a manangaywan.—2 Corinto 11:23-29.
4. Aniat’ epekto ti panagsaksakit no iti kabibiag dagiti agdaldaliasat a manangaywan ken dagiti assawada?
4 Kas ken Timoteo a kadua ni Pablo, no dadduma agsakit dagiti agdaldaliasat a manangaywan ken ti babbaketda. (1 Timoteo 5:23) Kanayonan pay a dadagsen daytoy kadakuada. Ilawlawag ti asawa ti maysa a manangaywan ti sirkito: “Narikut ti naynay a pannakikadua kadagiti kakabsat no daytay madi ti marikriknak. Ita ta mangrugiak nga ag-menopause, nakarkaro ti rigatko. Dayta la agimpake kadagiti arwatenmi iti kada lawas sakami umakar talaga a karit. Kadarato, agsardengak ket agkararagak ken Jehova nga ikkannak ti kired tapno makapagtultuloyak.”
5. Nupay aduandat’ suot, ania a kababalin ti imparang dagiti agdaldaliasat a manangaywan ken dagiti assawada?
5 Nupay adda panagsakit ken dadduma pay a suot, dagiti agdaldaliasat a manangaywan ken dagiti babbaketda tagiragsakenda ti serbisioda ket iparangarangda ti ayat a managsakripisio. Daddumat’ nangirisgo ti biagda tapno itedda ti naespirituan a tulong no tiempo ti pannakaidadanes wenno gubat. No bisitaenda dagiti kongregasion, imparangarangda ti rikna nga umarngi ken Pablo, a nagkuna kadagiti Kristiano sadi Tesalonica: “Nagbalinkami a naalumamay iti tengngayo, a kas met laeng no ti agtagtagibi nga ina taripatuenna dagiti bukodna nga annak. Gapuna, yantangay adda nadungngo a panagayatmi kadakayo, naay-ayokami unay a mangiburay kadakayo, saan laeng a ti naimbag a damag ti Dios, no di ket kasta met dagiti bukodmi a kararua, agsipud ta nagbalinkayo a dungdunguenmi.”—1 Tesalonica 2:7, 8.
6, 7. Ania a positibo nga impluensia ti maipaay dagiti nagaget nga agdaldaliasat a manangaywan?
6 Kas kadagiti dadduma a panglakayen iti kongregasion Kristiano, dagiti agdaldaliasat a manangaywan “agtrabaho[da] a sipipinget iti panagsao ken panangisuro.” Amin a kakasta a panglakayen “maibilangda koma a maikari iti mamindua a dayaw.” (1 Timoteo 5:17) Makagunggona ti ehemploda no, ‘bayat nga ut-utobentay ti pagbanagan ti kababalinda, tuladentay ti pammatida.’—Hebreo 13:7.
7 Ania ti impluensia ti dadduma nga agdaldaliasat a panglakayen kadagiti sabali? “Anian a nakaskasdaaw nga impluensia ni Kabsat P—— iti biagko!” insurat ti maysa a Saksi ni Jehova. “Isut’ agdaldaliasat a manangaywan ti Mexico nanipud pay 1960. Idi ubingak pay, pinadpadaanak dagiti ibibisitana a buyogen ti segga ken rag-o. Idi sangapulo ti tawenko, kinunana kaniak, ‘Agbalinkanto met a manangaywan ti sirkito.’ Kadagidi narikut a tawenko kas tin-edyer, kadarato a birokek tangay kanayon nga adda itukonna a sasao ti kinasirib. Impangrunana ti nangipastor iti arban! Ita ta maysaakon a manangaywan ti sirkito, kanayon nga adda tiempo nga ipamaysak kadagiti agtutubo ket ikabilko dagiti nateokratikuan a kalat iti sanguananda a kas inaramidna idi kaniak. Uray idi tartaraudin ti biagna, nupay adda sakitna iti puso, ni Kabsat P——, kanayon nga adda makapabileg nga ibagana. Maysa la nga aldaw sakbay ti ipapatayna idi Pebrero 1995, kinuyognak iti maysa nga aldaw ti espesial nga asamblea ket indatagna dagiti nagsayaat a kalat iti maysa a kabsat nga arkitekto. Dagus a nangisubmite ti kabsat iti aplikasion nga agserbi idiay Bethel.”
Maapresiarda
8. Asinoda dagiti “sagut a tattao” a nadeskribir iti Efeso kapitulo 4, ken kasano a magunggonaan ti kongregasion kadakuada?
8 Dagiti agdaldaliasat a manangaywan ken dadduma a panglakayen a naparaburan kadagiti akem iti serbisio babaen ti di magatadan a kinamanangngaasi ti Dios maaw-awaganda a “sagut a tattao.” Kas pannakabagi ni Jehova ken Ulo ti kongregasion, impaay ni Jesus dagitoy a naespirituan a lallaki tapno mapabilegtayo kas indibidual ken maragpattay ti kinanataengan. (Efeso 4:8-15) Aniaman a sagut ti maikari a maapresiar. Nangruna no dayta a sagut ket pakirdennatayo nga agserbi ken Jehova. Gapuna, kasanotay nga iparang ti apresasiontayo iti trabaho dagiti agdaldaliasat a manangaywan? Kasanotay a maipakita a “maipatpateg dagiti kasta a kita ti tattao”?—Filipos 2:29.
9. Kadagiti ania a wagas a maipakitatay ti apresasiontayo kadagiti agdaldaliasat a manangaywan?
9 No mayanunsion ti ibibisita ti manangaywan ti sirkito, irugitayon nga iplano ti naan-anay a pannakiraman kadagiti aktibidad ti kongregasion iti dayta a lawas. Nalabit makailatangtayo ti ekstra a tiempo a mangsuporta iti urnos a panagserbi iti tay-ak bayat ti bisita. Mabalintay ti ag-auxiliary pioneer iti dayta a bulan. Sigurado a kayattay nga ipakat dagiti singasing ti manangaywan ti sirkito tapno maparang-ay ti ministeriotayo. Ti kasta a natulok a rikna gunggonaannatayo ken mangipanamnama kenkuana a ti ibibisitana ket makatulong. Wen, dagiti agdaldaliasat a manangaywan bisitaenda ti kongregasion tapno pabilgendatayo, ngem isuda masapulda met ti naespirituan a pammabileg. Adda dagidi tiempo a kasapulan ni Pablo ti pammaregta, ket masansan a dinawatna kadagiti padana a Kristiano nga ikararaganda. (Aramid 28:15; Roma 15:30-32; 2 Corinto 1:11; Colosas 4:2, 3; 1 Tesalonica 5:25) Dagiti agdaldaliasat a manangaywan itatta masapulda met dagiti kararag ken pammaregtatayo.
10. Kasanotay a makatulong a mangparagsak iti trabaho ti agdaldaliasat a manangaywan?
10 Imbagatay kadin iti manangaywan ti sirkito ken iti baketna nga apresiarentay unay ti ibibisitada? Agyamyamantay kadi kadagiti makatulong a pammalakadna kadatayo? Ipakpakaammotay kadi kenkuana no dagidiay singasingna iti tay-ak ti serbisio nangnayonda iti rag-otayo iti ministerio? No kastat’ aramidentayo, tumulongto daytoy a mangparagsak iti aramidna. (Hebreo 13:17) Adda manangaywan ti sirkito idiay España a partikular a kinomentuanna ti panangipatpategda ken baketna kadagiti surat ti panagyaman nga inawatda kalpasan ti ibibisitada kadagiti kongregasion. “Iduldulinmi dagitoy a kard sakamto basaen ida no daytay maup-upaykami,” kunana. “Gubuayan dagitoy ti pudpudno a pammaregta.”
11. Apay a rumbeng nga ipakaammotayo kadagiti assawa dagiti manangaywan ti sirkito ken distrito nga ay-ayaten ken ap-apresiarentay ida?
11 Ti asawa ti agdaldaliasat a manangaywan sigurado a magunggonaan kadagiti komendasion. Adut’ panagsakripisiona tapno badanganna ni lakayna iti daytoy a tay-ak ti serbisio. Dagitoy a matalek a babbai inwalindan ti gagangay a gagar a maaddaan ti bukodda a pagtaengan ken, kaaduan a kaso, ti kaadda koma ti annakda. Ti balasang ni Jefte ket maysa kadagiti adipen ni Jehova a situtulok a nangiwaksi iti gundawayna a makiasawa ken agpamilia gaput’ sapata nga inaramid ni amana. (Oc-ocom 11:30-39) Kasanoda a minatmatan ti panagsakripisiona? Kuna ti Oc-ocom 11:40 (NW): “Iti tinawen-tawen dagiti annak a babbai ti Israel mapanda itden ti komendasion iti anak a babai ni Jefte a Galaadita, uppat nga aldaw iti makatawen.” Nagsayaat ketdin no ikagumaantay nga ibaga kadagiti assawa dagiti manangaywan ti sirkito ken distrito nga ay-ayaten ken ap-apresiarentay ida!
“Dikay Lipatan ti Kinamanagpadagus”
12, 13. (a) Ania ti Nainkasuratan a pagibasaran a masapul a managpadagustayo kadagiti agdaldaliasat a manangaywan ken dagiti assawada? (b) Iladawanyo no kasano a ti kasta a kinamanagpadagus makagunggona iti agsinnumbangir.
12 Ti kinamanagpadagus sabali pay a wagas a pakakitaan ti ayat ken apresasion kadagidiay adda iti Nakristianuan a panagdaliasat a trabaho. (Hebreo 13:2) Kinomendaran ni apostol Juan ni Gayo gaput’ panangpadagusna kadagidiay mangbisbisita iti kongregasion kas agdaldaliasat a misionero. Insurat ni Juan: “Dungdunguen, ar-aramidem ti matalek a trabaho iti aniaman nga aramidem a maipaay kadagiti kakabsat, ken kasta pay met kadagiti ganggannaet, a nangsaksi iti ayatmo iti sanguanan ti kongregasion. Pakaay-aywamto nga ibaon dagitoy iti pamay-an a maikari iti Dios. Ta napanda maigapu iti naganna, a dida nangala iti aniaman manipud kadagiti tattao iti nasnasion. Ngarud, pagrebbengantayo nga awaten dagiti kakasta a tattao buyogen ti kinamanagpadagus, tapno agbalintayo a katrabahuan iti kinapudno.” (3 Juan 5-8) Itatta, mapalawatayo ti trabaho a pannakaikasaba ti Pagarian babaen ti kasta met laeng a panangpasangbaytayo kadagiti agdaldaliasat a manangaywan ken dagiti assawada. Siempre, dagiti lokal a panglakayen siguraduenda koma a dagiti pagdagusan ket kalalainganna, ngem kinuna ti maysa a manangaywan ti distrito: “Ti pannakainaigmi kadagiti kakabsat di mabalin nga agpannuray kadagidiay adda maitulongna kadakami. Dikam kayat nga uray kasta la koma ti ipapanda. Situtulokkami koma nga umawat iti kinamanagpadagus ti uray asino a kabsat, nabaknang wenno napanglaw.”
13 Ti kinamanagpadagus makagunggona iti agsinnumbangir a dasig. “Iti pamiliak, ugalimi a pasangbayen dagiti agdaldaliasat a manangaywan,” malagip ni Jorge, dati a manangaywan ti sirkito nga agserserbi itan idiay Bethel. “Nariknak a dagitoy a panagbisita natulongannak nga ad-adda ngem ti impagarupko. Idi agbaroak, addaanak kadagiti naespirituan a problema. Madanagan idi ni nanang maipuon kadagitoy ngem dina ammo ti eksakto a panangtulong kaniak ket iti kasta kiniddawna iti manangaywan ti sirkito a kasaritanak. Idi damo liniklikak, tangay agamakak a madillaw. Ngem gapu ta mannakigayyem naallukoynak nga agsao. Inawisnak a makipangan kenkuana iti maysa a Lunes, ket impeksak ti adda iti pusok ta siguradok a matarusannak. Dimngeg a naimbag. Talaga nga epektibo dagiti praktikal a singasingna, ket nangrugiak a rimmang-ay iti naespirituan.”
14. Apay a manangapresiartay koma kadagiti agdaldaliasat a panglakayen imbes a managdillaw?
14 Ti agdaldaliasat a manangaywan ikagumaanna a tulongan iti naespirituan agpada dagiti agtutubo ken nataengan. Rumbeng, ngarud, nga apresiarentay koma dagiti bannogna. Ngem, ania ngay no dillawentayo gapu kadagidiay pagkapuyanna wenno siuuyaw nga idiligtayo kadagidiay bimmisbisitan iti kongregasion? Sigurado, makapaupay daytoy. Saan a nakapabileg ken Pablo idi nadamagnat’ panangdildillawda iti trabahona. Siguro, adda dagidi Kristiano a taga-Corinto a linaisda ti itsura ken ti klaset’ panagpalpalawagna. Inadawna a mismo dagita a manangdillaw a kunkunana: “Dagiti suratna nadagsen ken napuersada, ngem ti kaaddana a mismo nakapuy ket ti panagsasaona maum-umsi.” (2 Corinto 10:10) Makaparagsak, ketdi, ta dagiti agdaldaliasat a manangaywan masansan a makangngegda iti sasao ti naayat a panangapresiar.
15, 16. Kasano a dagiti agdaldaliasat a manangaywan ken dagiti assawada maapektaranda babaen iti ayat ken kinaregta dagiti kapammatianda?
15 Adda manangaywan ti sirkito idiay Latin America nga agmalmalem a lasatenna dagiti napitak a desdes tapno mabisitana dagiti naespirituan a kakabsatna nga agnanaed iti lugar a sakup dagiti gerilia. “Makatukay puso ti wagas a panangipakita dagiti kakabsat ti panangapresiarda iti ibibisitak,” insuratna. “Nupay adut’ rigatko a dumanon sadiay, a sarangtek dagiti peggad ken tuok, masupapakan amin dagitoy gaput’ ayat ken regta nga iparang dagiti kakabsat.”
16 Insurat ti maysa a manangaywan ti sirkito idiay Africa: “Gaput’ panagayat dagiti kakabsat kadakami, kaay-ayomi unay ti teritoria ti Tanzania! Sidadaan nga agsursuro kadakami dagiti kakabsat, ket maragsakanda a mangpasangbay kadakami.” Adda ti naayat ken naragsak a relasion ni apostol Pablo ken dagiti Kristiano nga agassawa nga Aquila ken Prisca idi umuna a siglo. Kinapudnona, kinuna ni Pablo maipapan kadakuada: “Idanonyo dagiti kablaawko kada Prisca ken Aquila a katrabahuak ken Kristo Jesus, a nangirisgo kadagiti bukodda a tengnged maipaay iti kararuak, a kadakuada saan laeng a siak no di ket kasta met dagiti amin a kongregasion dagiti nasion ipaayda ti panagyaman.” (Roma 16:3, 4) Agyaman dagiti agdaldaliasat a manangaywan ken dagiti babbaketda ta adda dagiti gagayyemda itatta a moderno nga Aquila ken Prisca a naisangsangayan ti panangikagumaanda a mangipakita ti kinamanagpadagus ken pannakikadkadua.
Pabilgenda Dagiti Kongregasion
17. Apay a makuna a nainsiriban ti urnos maipapan kadagiti agdaldaliasat a manangaywan, ket paggapuan ti instruksionda?
17 Kinuna ni Jesus: “Ti kinasirib mapaneknekan a nalinteg babaen iti ar-aramidna.” (Mateo 11:19) Ti kinasirib daytoy urnos maipapan kadagiti agdaldaliasat a manangaywan agminar gapu iti itutulongna a mangpabileg kadagiti kongregasion ti ili ti Dios. Idi maikadua a biahe ni Pablo kas misionero, isuda ken Silas sibaballigi a ‘linasatda ti Siria ken Cilicia, a pinabpabilegda dagiti kongregasion.’ Saritaen kadatayo ti libro Dagiti Aramid: “Bayat ti panagdaliasatda kadagiti siudad iyaw-awatda kadagiti adda sadiay dagiti bilin a napagtitinongan dagiti apostol ken dagiti lallakay nga adda idiay Jerusalem tapno salimetmetanda. Gapuna, iti kinapudnona, dagiti kongregasion nagtultuloyda a napatibker iti pammati ken immadu iti bilang iti inaldaw-aldaw.” (Aramid 15:40, 41; 16:4, 5) Dagiti agdama nga agdaldaliasat a manangaywan awatenda dagiti naespirituan nga instruksion babaen kadagiti Kasuratan ken dagiti publikasion “ti matalek ken masirib nga adipen,” a kas met la kadagiti isuamin a Kristiano.—Mateo 24:45.
18. Kasano a dagiti agdaldaliasat a manangaywan pabilgenda dagiti kongregasion?
18 Wen, dagiti agdaldaliasat a panglakayen masapul nga itultuloyda ti mangan manipud naespirituan a lamisaan ni Jehova. Masapul a kabisadoda a naimbag dagiti metodo ken giya a sursuroten ti organisasion ti Dios. Ta no kasta dagita a lallaki talaga a bendision kadagiti sabali. Babaen ti mapagulidanan a kinaregtada idiay tay-ak ti serbisio, matulonganda dagiti kapammatianda a rumang-ay iti Nakristianuan a ministerio. Dagiti naibatay iti Biblia a palawag dagitoy a bumisbisita a panglakayen mapabilegda iti naespirituan dagiti dumdumngeg. Babaen ti panangtulongda kadagiti sabali a mangyaplikar kadagiti balakad ti Sao ti Dios, panagserbida a situtunos a kadua ti ili ni Jehova iti intero a lubong, ken panangipakatda kadagiti naespirituan a probision nga inaramid ti Dios baeten ti ‘matalek nga adipen,’ mapabileg dagiti agdaldaliasat a manangaywan dagiti kongregasion a pribilehioda a bisitaen.
19. Aniada pay a saludsod ti mausig?
19 Idi inyussuat ti organisasion ni Jehova ti trabaho dagiti agdaldaliasat a panglakayen manipud kadagiti Estudiante ti Biblia agarup sangagasut a tawenen ti napalabas, kinuna daytoy a magasin: “Siputantayo dagiti resulta agraman ti kanayonan pay a panangiwanwan ti Apo.” Nalawag a naiparangarang ti panangiwanwan ni Jehova. Gaput’ pamendisionna ken panangaywan ti Bagi a Manarawidwid, daytoy a trabaho ti napalawa ken napalanas iti las-ud dagiti tawen. Kas nagbanaganna, dagiti kongregasion dagiti Saksi ni Jehova iti intero a daga napakiredda iti pammati ket umad-adu ti bilangda iti inaldaw-aldaw. Nabatad, bembendisionan ni Jehova ti kinamanagsakripisio dagitoy a sagut a tattao. Ngem kasano a sibaballigi nga iringpas dagiti agdaldaliasat a manangaywan ti trabahoda? Ania dagiti kalatda? Kasanoda a maragpat ti ad-adda a pagimbagan [ti kongregasion]?
Kasanoyo a Sungbatan?
◻ Aniat’ sumagmamano nga annong dagiti manangaywan ti sirkito ken distrito?
◻ Apay a ti kinamanagsakripisio kasapulan dagiti agdaldaliasat a manangaywan?
◻ Kasano a maipakita ti apresasion iti trabaho dagiti agdaldaliasat a manangaywan ken dagiti assawada?
◻ Aniat’ mabalin nga aramiden dagiti agdaldaliasat a manangaywan tapno tumibker ti pammati dagiti kongregasion?
[Ladawan iti panid 10]
Ti naynay a panagakar-akar kasapulanna ti kinamanagsakripisio
[Ladawan iti panid 13]
Pinadagusyo kadin dagiti agdaldaliasat a manangaywan ken dagiti assawada?