Panagserbi kas Mensahero ti Nadiosan a Talna

“Anian a nagimnas kadagiti bantay dagiti saka . . . daydiay mangiwarnak iti talna.”​—ISAIAS 52:7, NW.

1, 2. (a) Kas naipadto iti Isaias 52:7, ania a naimbag a damag ti masapul a maiwaragawag? (b) Ania ti kaipapanan dagiti naimpadtuan a sasao ni Isaias iti kaso ti nagkauna nga Israel?

ADDA naimbag a damag a maiwaragawag! Damag maipapan iti talna​—pudpudno a talna. Maysa a mensahe ti pannakaisalakan a mainaig iti Pagarian ti Dios. Idi ugma, nagsurat ni mammadto Isaias maipapan iti dayta, ket ti sasaona naitalimeng nga agpaay kadatayo iti Isaias 52:7, a sadiay mabasatayo: “Naglibnosen kadagiti bantay dagiti saka daydiay mangyeg iti naimbag a damag, daydiay mangiwarnak iti talna, daydiay mangyeg iti naimbag a damag maipapan iti banag a nasaysayaat, daydiay mangiwaragawag iti pannakaisalakan, daydiay agkuna iti Sion: ‘Ti Diosmo nagbalinen 4nga Ari!’”

² Pinaltiingan ni Jehova ti mammadtona a ni Isaias a mangisurat iti dayta a mensahe a pakagunggonaan ti nagkauna nga Israel ken pakagunggonaantay ita. Ania ti kaipapanan dayta? Idi insurat ni Isaias dagita a sasao, mabalin a kinayawan idin dagiti Asirio ti makin-amianan a pagarian ti Israel. Iti saan a nagbayag, makayawan met a maipan idiay Babilonia dagiti agnanaed iti makin-abagatan a pagarian ti Juda. Panawen dagidi ti ladingit ken riribuk iti nasion agsipud ta saan a nagtulnog dagiti tao ken Jehova ket iti kasta awan kadakuada ti talna ti Dios. Kas imbaga ni Jehova kadakuada, nangpataud iti panagsisinada ken iti Diosda gapu iti dakes nga aramidda. (Isaias 42:24; 59:2-4) Ngem, babaen ken Isaias, impakauna ni Jehova nga iti naikeddeng a tiempo mawangwanganto dagiti ruangan ti Babilonia. Nawayanto ti ili ti Dios nga agsubli iti dagada, tapno ibangonda manen sadiay ti templo ni Jehova. Mapabaronto ti Sion, ket mapagdaydayawanto manen ti pudno a Dios idiay Jerusalem.​—Isaias 44:28; 52:1, 2.

3. Kasano a ti kari maipapan iti pannakaisubli ti Israel ket maysa met a padto maipapan iti talna?

³ Maysa met a padto maipapan iti talna daytoy a kari ti pannakaisalakan. Ti pannakaisubli iti daga nga inted ni Jehova kadagiti Israelita ket pammaneknek ti asi ti Dios ken ti panagbabawida. Dayta ti mangipakita a naikappiada iti Dios.​—Isaias 14:1; 48:17, 18.

“Ti Diosmo Nagbalinen nga Ari!”

4. (a) Iti ania nga anag a maikuna nga idi 537 K.K.P. ‘ni Jehova nagbalinen nga ari’? (b) Kasano nga immaniobra ni Jehova ti bambanag iti pakagunggonaan ti ilina kadagidi simmaganad a tawtawen?

⁴ Idi inaramid ni Jehova daytoy a panangisalakan idi 537 K.K.P., mayanatup a maibunannag iti Sion: “Ti Diosmo nagbalinen nga ari!” Pudno, ni Jehova ti “Ari ti kinaagnanayon.” (Apocalipsis 15:3) Ngem kanayonan a pammaneknek ti kinasoberanona daytoy a pannakaisalakan ti ilina. Nalawag nga imparangarangna ti kinatan-ok ti bilegna ngem iti kabibilgan nga imperio ti tao agingga iti daydi a tiempo. (Jeremias 51:56, 57) Gapu iti panagtignay ti espiritu ni Jehova, napaay dagiti dadduma pay a nagkukumplot a bimmusor iti ilina. (Ester 9:24, 25) Maulit-ulit a nakibiang ni Jehova iti nadumaduma a pamay-an tapno matignay dagiti ari ti Medo-Persia a tumulong iti pannakaibanag ti soberano a pagayatanna. (Zacarias 4:6) Dagiti nakaskasdaaw a pasamak kadagidi nga aldaw nailanadda nga agpaay kadatayo kadagiti libro ti Biblia nga Esdras, Nehemias, Ester, Haggeo, ken Zacarias. Ket anian a makapabileg pammati no repasuentay ida!

5. Ania dagiti napateg a pasamak a nadakamat iti Isaias 52:13–53:12?

⁵ Nupay kasta, pangrugian laeng ti napasamak idi 537 K.K.P. ken kalpasanna. Kalpasan la unay ti padto maipapan iti pannakaisubli iti kapitulo 52, insurat ni Isaias ti maipapan iti iyaay ti Mesias. (Isaias 52:13–53:12) Babaen iti Mesias, a napaneknekan a ni Jesu-Kristo, mangipaay ni Jehova iti mensahe ti pannakaisalakan ken talna a napatpateg nga amang ngem iti napasamak idi 537 K.K.P.

Ti Katan-okan a Mensahero ti Talna nga Imbaon ni Jehova

6. Siasino ti katan-okan a mensahero ti talna nga imbaon ni Jehova, ket ania nga annongen ti inyaplikarna iti bagina?

⁶ Ni Jesu-Kristo ti katan-okan a mensahero ti talna nga imbaon ni Jehova. Isu ti Sao ti Dios, ti mismo a personal a Pannakangiwat ni Jehova. (Juan 1:14) Maitunos itoy, di nagbayag kalpasan a nabautisaran idiay Karayan Jordan, nagtakder ni Jesus iti sinagoga idiay Nazaret ket binasana iti napigsa ti annongenna iti Isaias kapitulo 61. Pinagbatad dayta nga annongen a ti nakaibaonanna nga ikasaba ramanenna ti “pannakaluk-at” ken “pannakaisubli,” kasta met ti gundaway a gumun-od iti pabor ni Jehova. Ngem, saan la a mangiwaragawag iti mensahe ti talna ti inaramid ni Jesus. Imbaon met ti Dios a mangipaay iti pangibatayan iti manayon a talna.​—Lucas 4:16-21.

7. Ania dagiti bunga ti pannakikappia iti Dios a nagbalin a posible babaen ken Jesu-Kristo?

⁷ Idi nayanak ni Jesus, nagparang dagiti anghel kadagiti pastor iti asideg ti Betlehem, nga indaydayawda ti Dios a kunkunada: “Dayag iti Dios kadagiti kangatuan, ket iti daga talna kadagiti tattao nga addaan naimbag a nakem.” (Lucas 2:8, 13, 14) Wen, maaddanto ti talna kadagidiay pangipakitaan ti Dios iti naimbag a nakem gapu ta inalagadda ti pammati iti probision nga ar-aramidenna babaen iti Anakna. Aniat’ kaipapanan dayta? Kaipapananna a dagiti tattao, nupay nayanakda iti basol, mabalinda ti maaddaan iti nadalus a takder iti imatang ti Dios, naanamongan a pannakirelasion kenkuana. (Roma 5:1) Matagiragsakda ti kinatalinaay, talna, a saan a magun-odan iti sabali a pamay-an. Iti naikeddeng a tiempo ti Dios, addanto pannakaruk-at iti amin nga epekto ti basol a natawid ken Adan, agraman sakit ken ipapatay. Awanton dagiti tao a bulsek wenno tuleng wenno lugpi. Agnanayonton a maikkat ti makapaupay a pagkapuyan ken dagiti makapaladingit a parikut iti panunot. Posiblenton a tagiragsaken ti perpekto a biag iti agnanayon.​—Isaias 33:24; Mateo 9:35; Juan 3:16.

8. Siasino ti nakaitukonan ti nadiosan a talna?

⁸ Siasino ti nakaitukonan ti nadiosan a talna? Naitukon kadagiti amin a mangalagad iti pammati ken Jesu-Kristo. Insurat ni apostol Pablo a ‘ti Dios nakitana a nasayaat . . . nga ikappiana manen iti bagina babaen ken Kristo dagiti isuamin a sabsabali pay a bambanag babaen ti panangikappiana baeten ti dara nga imparukpok ni Jesus iti kayo a pagtutuokan.’ Innayon ti apostol a ramanen daytoy a pannakaikappia “dagiti bambanag iti langlangit”​—kayatna a sawen, dagidiay makipagtawid ken Kristo idiay langit. Ramanenna met “dagiti bambanag iti rabaw ti daga”​—kayatna a sawen, dagidiay maparaburan iti gundaway nga agbiag nga agnanayon ditoy daga inton naan-anay nga agbalin a Paraiso. (Colosas 1:19, 20) Gapu iti panangaprobetsarda iti pateg ti daton ni Jesus ken gapu iti naimpusuan a panagtulnogda iti Dios, matagiragsak amin dagitoy ti nabara a pannakigayyem iti Dios.​—Idiligyo ti Santiago 2:22, 23.

9. (a) Ti pannakikappia iti Dios adda epektona iti ania a sabsabali pay a relasion? (b) Tapno maipasdek ti manayon a talna iti amin a lugar, ania nga autoridad ti inted ni Jehova iti Anakna?

⁹ Anian a nagpateg ti kasta a pannakikappia iti Dios! No awan ti pannakikappia iti Dios, awan ti manayon wenno napaypayso a talna iti aniaman a sabali a relasion. Ti pannakikappia ken Jehova isu ti pundasion ti pudno a talna ditoy daga. (Isaias 57:19-21) Maikanatad unay, ni Jesu-Kristo ti Prinsipe ti Kappia. (Isaias 9:6) Ginaladan met ni Jehova iti autoridad a mangituray, a babaen kenkuana, maikappia dagiti tattao iti Dios. (Daniel 7:13, 14) Ket maipanggep kadagiti resulta ti panangituray ni Jesus iti sangatauan, ikari ni Jehova: “Ti kappia awanto ti inggana.”​—Isaias 9:7; Salmo 72:7.

10. Kasano a nangipakita ni Jesus iti ulidan iti panangibunannag iti mensahe ti Dios maipapan iti talna?

¹⁰ Kasapulan ti intero a sangatauan ti mensahe ti Dios maipapan iti talna. Nangipasdek a mismo ni Jesus iti ulidan iti naregta a panangikasaba iti dayta. Inaramidna dayta iti templo idiay Jerusalem, sidiran ti bantay, iti dalan, iti maysa a Samaritana iti abay ti bubon, ken iti pagtaengan dagiti tattao. Iti sadinoman nga adda tao, ginundawayan ni Jesus nga ikasaba ti talna ken ti Pagarian ti Dios.​—Mateo 4:18, 19; 5:1, 2; 9:9; 26:55; Marcos 6:34; Lucas 19:1-10; Juan 4:5-26.

Nasanay a Sumurot Kadagiti Addang ni Kristo

11. Agpaay iti ania a trabaho a sinanay ni Jesus dagiti adalanna?

¹¹ Insuro ni Jesus dagiti adalanna a mangikasaba iti mensahe ti Dios maipapan iti talna. Nabigbigda a kas ken Jesus a “matalek ken pudno a saksi” ni Jehova, addaanda met iti responsabilidad a mangasaba. (Apocalipsis 3:14; Isaias 43:10-12) Kimmitada ken Kristo kas Panguloda.

12. Kasano nga impakita ni Pablo ti kinapateg ti trabaho a panangasaba?

¹² Inlawlawag ni apostol Pablo ti kinapateg ti trabaho a panangasaba, a kunana: “Ti Kasuratan kunana: ‘Awan asinoman a mangisaad iti pammatina kenkuana ti maupayto.’” Kayatna a sawen, dinto maupay ti siasinoman a mangalagad iti pammati ken Jesu-Kristo kas Kangrunaan nga Ahente ni Jehova a mangisalakan. Ken saan a lapped ti puli, ta innayon ni Pablo: “Awan ti pagdumaan ti Judio ken Griego, ta adda ti isu met laeng nga Apo a mangringbaw iti isuamin, isu a nabaknang kadagidiay amin nga umaw-awag kenkuana. Ta ‘tunggal maysa nga umawag iti nagan ni Jehova maisalakanto.’” (Roma 10:11-13) Ngem kasano a maammuan dagiti tattao ti maipapan iti dayta a gundaway?

13. Aniat’ kasapulan tapno mangngeg dagiti tao ti naimbag a damag, ken kasano a nagtignay dagiti Kristiano idi umuna a siglo iti dayta a panagkasapulan?

¹³ Inlawlawag ni Pablo dayta a panagkasapulan babaen ti panangidatagna kadagiti saludsod a rumbeng nga usigen ti tunggal adipen ni Jehova. Insaludsod ti apostol: “Kasano ti panangawagdanto iti daydiay a kenkuana saanda a naaddaan iti pammati? Kalpasanna, kasano a maaddaandanto iti pammati iti daydiay dida nangngeg? Kalpasanna, kasano a mangngegdanto no awan ti mangasaba? Kalpasanna, kasano ti panangasabadanto malaksid no naibaonda?” (Roma 10:14, 15) Ti pakasaritaan ti nagkauna a Kinakristiano addaan nagsayaat a pammaneknek a tinulad dagiti lallaki ken babbai, agtutubo ken nataengan, ti ulidan nga intuyang ni Kristo ken dagiti apostolna. Nagbalinda a nareregta a manangiwaragawag iti naimbag a damag. Kas panangtulad ken Jesus, kinasabaanda dagiti tattao iti sadinoman a pakasarakanda kadakuada. Gapu ta saanda a kayat a maliwayan ti asinoman, nangasabada agpadpada kadagiti publiko a lugar ken iti binalaybalay.​—Aramid 17:17; 20:20.

14. Kasano a napaneknekan a pudno a “nagimnas ti saksaka” dagidiay mangiwaragawag iti naimbag a damag?

¹⁴ Siempre, adda dagiti saan a nangawat a siaayat kadagiti Kristiano a manangaskasaba. Nupay kasta, napaneknekan a pudno ti inadaw ni Pablo iti Isaias 52:7. Kalpasan ti panangisaludsodna, ‘Kasano ti panangasabadanto malaksid no naibaonda?’ innayonna: “Kas adda a naisurat: ‘Anian a nagimnas ti saksaka dagidiay mangideklara ti naimbag a damag dagiti naimbag a bambanag!’” Saan nga ipagarup ti kaaduan kadatayo a naimnas, wenno nalibnos, dagiti sakatayo. Ania ngarud ti kayat a sawen daytoy? Dagiti saka ti gagangay nga usaren ti maysa a tao a mapan mangasaba kadagiti sabsabali. Kinapudnona, dagita a saka itakderanda ti tao a mismo. Ket masiguradotayo a kadagiti adu a nakangngeg iti naimbag a damag kadagiti apostol ken dadduma pay nga adalan ni Jesu-Kristo idi umuna a siglo, pudno a makaay-ayo a kitaen dagitoy a nagkauna a Kristiano. (Aramid 16:13-15) Saan la a dayta, napategda iti imatang ti Dios.

15, 16. (a) Kasano nga impakita dagiti immuna a Kristiano a pudpudno a mensaheroda ti talna? (b) Aniat’ makatulong kadatayo a mangitungpal iti ministeriotayo kas iti inaramid dagiti Kristiano idi umuna a siglo?

¹⁵ Maipapan iti talna ti mensahe dagiti pasurot ni Jesus, ket natalna ti panangipakaammoda iti dayta. Inted ni Jesus kadagiti adalanna dagitoy a pammilin: “Sadinoman a balay a serkanyo kunaenyo nga umuna, ‘Maadda koma ti talna iti daytoy a balay.’ Ket no adda idiay ti maysa a gayyem ti talna, ti talnayo agtalinaedto kenkuana. Ngem no awan, agsublinto dayta kadakayo.” (Lucas 10:5, 6) Ugali dagiti Judio ti mangikablaaw iti Sha·lohmʹ, wenno “talna.” Ngem saan la a daytoy ti nairaman iti bilin ni Jesus. Kas “embahador a mangibagi ken Kristo,” indagadag dagiti napulotan nga adalanna kadagiti tattao: “Makikappiakayo iti Dios.” (2 Corinto 5:20) Maitunos kadagiti bilin ni Jesus, kinasaritada dagiti tattao maipapan iti Pagarian ti Dios ken iti mabalin a kaipapananna kadakuada kas indibidual. Naparaburan dagidiay nangipangag; naikapis dagidiay nangilaksid iti mensahe.

¹⁶ Kasta met laeng ti pamay-an ita dagiti Saksi ni Jehova a mangitungpal iti ministerioda. Saan a naggapu kadakuada ti naimbag a damag nga idanonda; naggapu iti Daydiay nangibaon kadakuada. Pagrebbenganda nga ipakaammo dayta. No awaten dagiti tattao, maikarida nga umawat kadagiti nakaskasdaaw a bendision. No saanda nga awaten, saanda a kayat ti maikappia ken Jehova a Dios ken iti Anakna, ni Jesu-Kristo.​—Lucas 10:16.

Natalna iti Nariribuk a Lubong

17. Uray maipasangotayo kadagiti abusado a tattao, kasanot’ rumbeng a panagtignaytayo, ken apay?

¹⁷ Aniaman ti reaksion dagiti tattao, napateg a laglagipen a kanayon dagiti adipen ni Jehova a mensaheroda ti nadiosan a talna. Mabalin a sipupungtot a makisupiat ken pagsasawan wenno bugkawan dagiti tattao iti lubong dagidiay mangrurod kadakuada. Nalabit a kasta idi ti dadduma kadatayo. Nupay kasta, no inkawestayon ti baro a personalidad ken saantayon a paset ti lubong, saantay a tuladen dagiti wagasda. (Efeso 4:23, 24, 31; Santiago 1:19, 20) Uray kasanot’ panagtignay dagiti sabsabali, surotentayo ti balakad a: “No mabalin, sigun iti panagpannurayna kadakayo, makikappiakayo iti isuamin a tattao.”​—Roma 12:18.

18. Kasanot’ rumbeng a panagtignaytayo no ti maysa nga opisial ti gobierno ket naulpit kadatayo, ken apay?

¹⁸ Mabalin a maisaklangtayo no dadduma kadagiti opisial ti gobierno gapu iti ministeriotayo. Kas agtuturay, mabalin a ‘kalikagumandatayo’ a mangilawlawag no apay nga ar-aramidentayo ti sumagmamano a bambanag wenno no apay a ditay makiramraman iti dadduma nga aktibidad. Mabalin a kayatda a maammuan no apay nga ikaskasabatayo ti mensahe nga idandanontayo​—maysa a mensahe a mangibutaktak iti ulbod a relihion ken mangipakaammo iti panagpatingga ti agdama a sistema ti bambanag. Ti panagraemtayo iti pagwadan nga intuyang ni Kristo tignayennatayo a mangiparangarang iti naalumamay a karirikna ken nauneg a panagraem. (1 Pedro 2:23; 3:15) Masansan a dagita nga opisial ket durogan dagiti klero wenno dagiti mismo a superiorda. Ti naalumamay a sungbat mabalin a tumulong kadakuada a makabigbig a saan a pangta kadakuada wenno iti talna ti kagimongan ti ar-aramidentayo. Ti kasta a sungbat patanorenna ti espiritu ti panagraem, kooperasion, ken talna kadagidiay umawat iti dayta.​—Tito 3:1, 2.

19. Kadagiti ania nga aramid a saan a pulos a makiraman dagiti Saksi ni Jehova?

¹⁹ Agdindinamag dagiti Saksi ni Jehova iti intero a daga kas tattao a saan a makiramraman iti susik ti lubong. Saanda a makiraman kadagiti dangadang ti lubong gapu iti puli, relihion, wenno politika. (Juan 17:14) Tangay bilinennatayo ti Sao ti Dios nga “agpasakop kadagiti nangatngato nga agtuturay,” ditay man la koma panunoten ti makiraman kadagiti aramid a mangriribuk kas panagprotesta kadagiti paglintegan ti gobierno. (Roma 13:1) Saan a pulos a nakiraman dagiti Saksi ni Jehova iti aniaman a tignay a mangituang iti gobierno. Gapu kadagiti pagalagadan nga impasdek ni Jehova para kadagiti Kristiano nga adipenna, dida pulos makipaset iti panangibuyat iti dara wenno iti aniaman a kinaranggas! Saan a basta pagsasaritaan dagiti pudno a Kristiano ti talna; agbibiagda a maitunos iti ikaskasabada.

20. No maipanggep iti talna, aniat’ pakasarsaritaan ti Babilonia a Dakkel?

²⁰ Maisupadi kadagiti pudno a Kristiano, saan a napaneknekan a mensahero ti talna dagidiay pannakabagi dagiti relihioso nga organisasion ti Kakristianuan. Dagiti relihion ti Babilonia a Dakkel​—agpadpada dagiti iglesia ti Kakristianuan ken dagiti di Kristiano a relihion​—pinanuynoyan, sinuportaran, wenno indauloda dagiti gubat dagiti nasion. Isuda met ti nangisungsong iti pannakaidadanes ken pannakapapatay pay ketdi dagiti matalek nga adipen ni Jehova. Gapuna, maipapan iti Babilonia a Dakkel, kuna ti Apocalipsis 18:24: “Nasarakan kenkuana ti dara dagiti mammadto ken dagiti sasanto ken amin dagidiay napapatay ditoy daga.”

21. Kasanot’ panagtignay ti adu a nasingpet-panagpuspusona a tattao no makitada ti nakaidumaan kadagiti kababalin ti ili ni Jehova kadagidiay mangal-alagad iti ulbod a relihion?

²¹ Saan a kas kadagiti relihon ti Kakristianuan ken iti dadduma iti Babilonia a Dakkel, ti pudno a relihion ket mamagkaykaysa a puersa. Kinuna ni Jesu-Kristo kadagiti pudno a pasurotna: “Babaen iti daytoy maammuanto ti isuamin a dakayo dagiti adalak, no addaankayo iti ayat iti maysa ken maysa.” (Juan 13:35) Maysa dayta nga ayat a mangrimbaw kadagiti pagbeddengan gapu iti nasion, kasasaad iti kagimongan, kabibiag, ken puli a nangbingaybingay ita iti sangatauan. Gapu ta napaliiwda daytoy, riniwriw a tattao iti intero a lubong ti agkunkuna kadagiti napulotan nga adipen ni Jehova: “Dakami kumuyogkaminto kenka, ta nangngegmi a ti Dios adda kenka.”​—Zacarias 8:23.

22. Kasanot’ panangmatmattayo iti trabaho a panangasaba a kasapulan pay a maaramid?

²² Kas ili ni Jehova, pagrag-oantay unay ti maar-aramid, ngem saan pay a nalpas ti trabaho. No nakaitukit ken nasukaynan ti talonna, saan a sumardeng ti maysa a mannalon. Itultuloyna ti agtrabaho, nangnangruna iti katibuk ti panagani. No tiempo ti panagani kasapulan ti agtultuloy, naganetget a panagtrabaho. Ket umad-adu ita dagiti maan-ani nga agdaydayaw iti pudno a Dios ngem idi. Tiempo daytoy ti panagrag-o. (Isaias 9:3) Pudno, maipasangotayo iti ibubusor ken kinaaleng-aleng. Kas indibidual, mabalin nga ikagkagumaantay a sarangten ti nakaro a sakit, narigat a kasasaad iti pamilia, wenno narigat a panagbiag. Ngem ti panagayat ken Jehova tignayennatayo nga agtultuloy nga agregget. Masapul a mangngeg dagiti tattao ti mensahe nga intalek ti Dios kadatayo. Maysa dayta a mensahe ti talna. Wen, dayta ti mensahe nga inkaskasaba a mismo ni Jesus​—ti naimbag a damag ti Pagarian ti Dios.

Aniat’ Sungbatyo?

◻ Kasano a natungpal ti Isaias 52:7 iti nagkauna nga Israel?

◻ Kasano a napaneknekan a ni Jesus ti katan-okan a mensahero ti talna?

◻ Kasano nga innaig ni apostol Pablo ti Isaias 52:7 iti trabaho a pakiramramanan dagiti Kristiano?

◻ Aniat’ ramanen iti panagbalin a mensahero ti talna iti kaaldawantayo?

[Dagiti Ladawan iti panid 13]

Kas ken Jesus, dagiti Saksi ni Jehova ket mensahero ti nadiosan a talna

[Dagiti Ladawan iti panid 15]

Agtalinaed a natalna dagiti Saksi ni Jehova aniaman ti reaksion dagiti tao iti mensahe ti Pagarian