Ti Kinakapuy ti Tao Itan-okna ti Pannakabalin ni Jehova

“Pagarup ti amin a naragsak ken naganaygayak nga amin-tiempo a ministro. Kanayon a siak ti tumultulong kadagiti sabsabali no adda parikutda. Ngem mariknak a kasla napaksuyanakon. Maburibor ken mariribukak. Umik-ikayakon kadagiti tattao. Kayatko ti agpupok lattan a nakaidda idiay balay. No mano a bulan nga indawdawatko ken Jehova a bay-annak a matayen.”​—Vanessa.

KAS iti kasasaad a nadakamat iti ngato, gagangay laeng a marikna no dadduma dagiti adipen ni Jehova ti epekto ti panagbiag kadagitoy “napeggad a tiempo a narigat a pakilangenan.” (2 Timoteo 3:1) Nalabit maupay payen ti dadduma. (Filipos 2:25-27) No agpaut, mabalin a pakapsutennatayo ti pannakaupay, ta kuna ti Biblia: “No kumapsutka iti aldaw ti pagpaglan, ti pigsam bassit.” (Proverbio 24:10) Wen, no maupaytayo, kasapulantayo ti pigsa​—nalabit uray ti inawagan ni apostol Pablo a “pannakabalin a nalablabes ngem ti gagangay.”​—2 Corinto 4:7.

Ni Jehova a Dios ti gubuayan ti di maibus a pannakabalin. Nabatad daytoy no sukimatentayo dagiti banag a pinarsuana. (Roma 1:20) Usigenyo ti init, kas ehemplo. Agtultuloy nga umaw-awat ti daga iti agarup 240 trilion a horsepower manipud iti init. Kaskasdi, daytoy a bilang ket agarup kagudua laeng ti maysa a bilion a kapaset ti enerhia nga aggapu iti init. Ket bassit ti init no idilig kadagiti bituen a maaw-awagan supergiant. Mairaman kadagitoy ti Rigel, maysa a bituen iti konstelasion nga Orion a mamin-50 a dakdakkel ngem iti inittayo ken mamin-150,000 nga ad-adu ti enerhia nga ibulbulosna!

Addaan la ketdi iti “nawadwad a dinamiko nga enerhia” ti Namarsua kadagita a planta ti enerhia iti law-ang. (Isaias 40:26, NW; Salmo 8:3, 4) Kinapudnona, kinuna ni propeta Isaias a ni Jehova “saan a kumapuy, ket di met mabannog.” Ket madadaan ti Dios a mangibinglay iti bilegna iti siasinoman a mautoyan gapu iti natauan a pagkapuyan. (Isaias 40:28, 29) Iladawan ti napasamak ken Kristiano nga apostol Pablo no kasanona nga aramiden daytoy.

Panangsango Kadagiti Pakasuotan

Imbaga ni Pablo kadagiti taga Corinto ti maipapan iti maysa a tubeng a nasken nga ibturanna. Inawaganna dayta a “siit iti lasag.” (2 Corinto 12:7) Mabalin a maysa nga an-annayen daytoy a “siit,” nalabit diperensia iti panagkita. (Galacia 4:15; 6:11) Wenno mabalin a tuktukoyen ni Pablo dagiti sinsinan-apostol ken dadduma pay a manangriribuk a nangkarit iti kinaapostol ken trabahona. (2 Corinto 11:5, 6, 12-15; Galacia 1:6-9; 5:12) Aniaman daydi, nariribuk unay ni Pablo gapu iti daytoy a “siit iti lasag,” ket inkarkararagna a maikkat koma.​—2 Corinto 12:8.

Nupay kasta, saan a pinatgan ni Jehova ti kiddaw ni Pablo. Kinunana ketdi ken Pablo: “Umdasen kenka ti di kaikarian a kinamanangaasik.” (2 Corinto 12:9) Ania ti kayat a sawen ni Jehova? Bueno, no usigentayo ti panangidadanes idi ni Pablo kadagiti Kristiano, gapu laeng iti naayat a kinamanangngaasi a mabalinna ti makilangen iti Dios​—malaksid pay iti panagserbina kas apostol!a (Idiligyo ti Zacarias 2:8; Apocalipsis 16:5, 6.) Mabalin nga ibagbaga idi ni Jehova ken Pablo nga “umdasen” ti pribilehiona nga agbalin nga adalan. Saan a mapakuyogan daytoy iti datdatlag a pannakaikkat dagiti personal a parikut iti biag. Kinapudnona, mabalin a sumangbay pay ketdi dagiti pakarigatan gapu kadagiti kanayonan a pribilehio. (2 Corinto 11:24-27; 2 Timoteo 3:12) Aniaman ti kasasaad, masapul nga ibturan latta ni Pablo ti “siit iti lasag[na].”

Nupay kasta, saan a pulos nga awanan asi a binaybay-an ni Jehova ni Pablo. Kinunana ketdi kenkuana: “Ti pannakabalinko mapagbalin a naan-anay iti kinakapuy.” (2 Corinto 12:9) Wen, siaayat nga inikkan ni Jehova ni Pablo iti bileg tapno madaeranna ti kasasaadna. No kasta, ti “siit iti lasag” ni Pablo ket maysa a leksion. Dayta ti nangisuro kenkuana nga agpannuray iti bileg ni Jehova imbes nga iti bukodna. Nabatad a nasursuro a naimbag ni Pablo daytoy a leksion, ta sumagmamano a tawen kalpasanna, insuratna kadagiti taga Filipos: “Kadagiti aniaman a kasasaad a yanko, naadalko ti mapnek. Ta kadagiti amin a bambanag addaanak iti bileg gapu iti daydiay mangted kaniak iti pannakabalin.”​—Filipos 4:11, 13.

Dakayo ngay? Adda kadi ib-ibturanyo a “siit iti lasag,” nalabit sakit wenno kasasaad iti biag a mamagdanag unay kadakayo? No kasta, pakirdenyo ti nakemyo. Nupay mabalin a saan a namilagruan nga ikkaten ni Jehova ti parikut, maikkannakayo iti sirib ken kired a mangsango iti dayta bayat nga iyun-unayo iti biagyo ti intereses ti Pagarian.​—Mateo 6:33.

No lapdannakayo ti sakit wenno kinalakay a mangaramid iti kayatyo nga aramiden iti Nakristianuan nga aktibidad, dikay maupay. Imbes nga ibilangyo ti suot a mapaspasaranyo a lapped iti panagserbi ken Jehova, ibilangyo dayta kas gundaway a mangparayray iti panagpannurayyo kenkuana. Laglagipenyo met a marukod ti pateg ti maysa a Kristiano, saan nga iti kaadu ti magapuananna, no di ket iti pammati ken kapasnek ti ayatna. (Idiligyo ti Marcos 12:41-44.) Ti panagayat ken Jehova iti amin a kararuayo kaipapananna ti panagserbi kenkuana iti amin a kabaelanyo​—saan nga iti sabali.​—Mateo 22:37; Galacia 6:4, 5.

No ti “siit iti lasag[yo]” ket mainaig iti makapaleddaang a kasasaad iti biag, kas ti ipapatay ti patpatgenyo, surotenyo ti balakad ti Biblia: “Iyallatiwmo ta awitmo ken Jehova, ket saranayennakanto: dinanto ipalubos a magaraw ti nalinteg.” (Salmo 55:22) Kasta ti inaramid ti maysa a Kristiano a babai nga agnagan Sylvia. Iti las-ud ti sumagmamano laeng a tawen, natay ni lakayna kalpasan ti 50 a tawen a panagdennada kas agassawa ken kasta met ti siam a dadduma pay a miembro ti pamilia​—a pakairamanan ti dua nga ubbing nga appokona. “No saan a gapu ken Jehova,” kuna ni Sylvia, “diak koma magawidan ti lidayko. Ngem ti panagkararag dakkel a liwliwa kaniak. Awan sarday ti pannakisarsaritak ken Jehova. Ammok nga itdenna kaniak ti kired tapno makapagibturak.”

Anian a makaliwliwa a maammuan a “ti Dios ti amin a liwliwa” maikkanna iti bileg dagidiay agladladingit tapno makapagibturda! (2 Corinto 1:3; 1 Tesalonica 4:13) Iti pannakaammotayo iti daytoy, maawatantayo ti konklusion ni Pablo iti daytoy a banag. Insuratna: “Pagragsakak dagiti kinakapuy, dagiti pannakainsulto, dagiti kaso ti panagkasapulan, dagiti pannakaidadanes ken pakarigatan, maipaay ken Kristo. Ta inton nakapuyak, iti kasta nabilegak.”​—2 Corinto 12:10.

Panangparmek Kadagiti Pagkapuyan

Natawidtay amin ti kinaimperpekto kadagiti immuna a nagannak kadatayo. (Roma 5:12) Kas bungana, makidangdangadangtayo kadagiti tarigagay ti managbasol a lasag. Anian a makapaupay a matakuatan a napigpigsa ti panangtengngel kadatayo dagiti kababalin ti “daan a personalidad” ngem iti impagaruptayo! (Efeso 4:22-24) Kadagita a kanito, mabalin a mariknatayo ti kas iti narikna ni apostol Pablo idi insuratna: “Pudno a pagragsakak ti linteg ti Dios maitunos iti kinatao nga adda iti unegko, ngem makitak iti kamkamengko ti sabali a linteg a makibakbakal maibusor iti linteg ti panunotko ket iturturongnak a sikakayaw iti linteg ti basol nga adda iti kamkamengko.”​—Roma 7:22, 23.

Iti daytoy a banag, makagun-odtay met iti bileg nga aggapu ken Jehova. No adda personal a pagkapuyan a parparmekenyo, pulos a dikay sumardeng nga agpannuray kenkuana iti kararag, a sipapasnek a dumawat iti pammakawanna uray kasano kasansan nga iyadaniyo kenkuana ti isu met laeng a parikut. Gapu iti naayat a kinamanangngaasina, ni Jehova, a “gantingenna dagiti puspuso” ken makakita iti kauneg ti kinapasnekyo, ikkannakayo iti nadalus a konsiensia. (Proverbio 21:2) Babaen ti nasantuan nga espirituna, ni Jehova maipaayannakayo iti bileg tapno maituloyyo a parmeken dagiti nailasagan a pagkapuyan.​—Lucas 11:13.

Kasapulantay met ti bileg nga aggapu ken Jehova iti panangsango iti pagkurkurangan dagiti sabsabali. Kas pagarigan, mabalin nga agsao kadatayo ti padatayo a Kristiano “a sidadarasudos a kas kadagiti panagduyok ti kampilan.” (Proverbio 12:18) Mabalin a masairtayo iti kasta unay, aglalo no maysa a tao nga ipagaruptayo a mas manakem ti nangaramid iti dayta. Mabalin a mariribukantayo unay. Inusar pay ketdi dagiti dadduma dagita a babak kas pambar iti panangtallikudda ken Jehova​—ti kadakkelan a kamali!

Nupay kasta, ti natimbeng a kababalin tulongannatayo a maaddaan iti umiso a panangmatmat kadagiti pagkapuyan dagiti sabsabali. Saantay a namnamaen ti perpeksion kadagiti imperpekto a tattao. “Awan ti tao a di makabasol,” ipalagip kadatayo ti masirib a tao a ni Solomon. (1 Ar-ari 8:46) Kinuna ni Arthur, maysa a napulotan a Kristiano nga agarup pito a dekadan a sisusungdo nga agserserbi ken Jehova: “Ti pagkapkapuyan dagiti padatayo nga adipen ikkandatayo iti gundaway a mangipaneknek iti kinatarnawtayo, a subokenda ti Nakristianuan a kababalintayo. No palubosantayo ti sao wenno aramid dagiti tattao a manglapped iti panagserbitayo ken Jehova, tattao ti pagserserbiantayo. Maysa pay, dagiti kakabsattayo sigurado nga ay-ayatenda met ni Jehova. No ti naimbag a kababalinda ti kitaenyo, mabigbigtayo inton agangay a saanda a dakes.”

Ti Bileg a Mangasaba

Sakbay a nagpalangit, kinuna ni Jesus kadagiti adalanna: “Umawatkayto iti pannakabalin inton dumteng kadakayo ti nasantuan nga espiritu, ket dakayto dagiti saksik agpadpada idiay Jerusalem ken iti intero a Judea ken Samaria ken agingga iti kaadaywan a paset ti daga.”​—Aramid 1:8.

Kas kinuna ni Jesus, ar-aramiden ita dagiti Saksi ni Jehova daytoy a trabaho iti 233 a pagilian iti aglikmut ti lubong. No dagupen, nasurok a maysa a bilion nga oras ti us-usarenda iti tinawen iti panangtulong kadagiti sabsabali a mangammo ken Jehova. Saan a kanayon a nalaka nga aramiden daytoy a trabaho. Iti dadduma a daga, maiparit wenno nakedngan ti trabaho a panangikasaba iti Pagarian. Panunotenyo met no siasino ti mangar-aramid iti daytoy a trabaho​—dagiti nalap-it, imperpekto a tattao, a tunggal maysa kadakuada adda parparikut ken pakaringgoranna. Ngem agtultuloy latta ti trabaho, ket kas bungana, iti napalabas a tallo a tawen, nasurok a maysa a milion a tattao ti nangidedikar iti biagda ken Jehova ken nangisimbolo iti dedikasionda babaen ti panagpabautisar iti danum. (Mateo 28:18-20) Pudno unay, maar-aramid daytoy a trabaho gapu laeng iti bileg nga aggapu iti Dios. Kinuna ni Jehova babaen ken propeta Zacarias: “Saan a maipuon iti kinamaingel, wenno iti pannakabalin, no di ket babaen ti espirituk.”​—Zacarias 4:6.

No maysakayo nga agibumbunannag iti naimbag a damag, adda pasetyo​—uray kasano kabassit​—iti dayta a naindaklan a gapuanan. Aniaman ‘dagiti siit’ a masapul nga anduranyo, makainanamakayo a saan a lipaten ni Jehova ti “aramidyo ken ti ayat nga impakitayo iti naganna.” (Hebreo 6:10) Isu nga itultuloyyo ti agpannuray iti Gubuayan ti amin a dinamiko nga enerhia. Laglagipenyo, babaen laeng ti bileg ni Jehova a makaibturtayo; maan-anay ti pannakabalinna kadagiti pagkapuyantayo.

[Footnote]

[Ladawan iti panid 26]

Maitungtungpal ti trabaho a panangasaba gapu laeng iti pannakabalin ni Jehova