Addaankay Kadi ti “Siit iti Lasag”?
1 Tarigagayantay unay nga itungpal ti annongentayo a mangikasaba iti naimbag a damag iti amin a kabaelantayo. Nupay kasta, adu kadagiti kakabsattayo ti marigatan a makiraman a naan-anay gapu ta addaanda kadagiti grabe a sakit wenno an-annayen, a mangparigat kadakuada a mangaramid iti kayatda. Kadakuada, nalabit maysa a karit ti panangsaranget iti pannakaupay, nangnangruna no makitkitada dagiti dadduma nga aktibo unay iti ministerio.—1 Cor. 9:16.
2 Ehemplo a Tuladen: Kasapulan idi a makidangadang ni apostol Pablo iti “siit iti lasag.” Namitlo nga indawatna ken Jehova nga ikkatenna ti makatuok a tubeng, a dineskribirna kas “maysa nga anghel ni Satanas” a mangtungtungpa kenkuana. Ngem iti laksid dayta, nagibtur ni Pablo ken intultuloyna ti ministeriona. Dina inay-ay ti bagina wenno di nagbalin a managreklamo. Inaramidna amin a kabaelanna. Naballigi ti pannakidangadangna gapu iti daytoy a pammasiguro ti Dios: “Umdasen kenka ti di kaikarian a kinamanangaasik; ta ti pannakabalinko mapagbalin a naan-anay iti kinakapuy.” Ti kinakapuy ni Pablo nagbalin a pigsa idi nasursurona nga awaten ti kasasaadna ken nasursurona ti agpannuray ken Jehova ken iti nasantuan nga espiritu tapno makapagibtur.—2 Cor. 12:7-10.
3 No Kasanokayo a Makapagibtur: Limitado kadi ti serbisioyo iti Dios gapu iti natauan a depekto? No kasta, tuladenyo ti panirigan ni Pablo. Uray awan permanente a pangagas iti sakit wenno an-annayenyo iti daytoy a sistema ti bambanag, mabalinyo ti agtalek a naan-anay ken Jehova, a makatarus kadagiti kasapulanyo ket ipaayna “ti pannakabalin a nalablabes ngem ti gagangay.” (2 Cor. 4:7) Gundawayanyo ti tulong a mabalinyo a gun-oden iti kongregasion, a dikay suminsina. (Prov. 18:1) No marigatankayo a makiraman iti trabaho a panagbalaybalay, padasenyo dagiti praktikal a wagas ti panangasaba a di pormal wenno panangasaba iti telepono.
4 Nupay limitado ti maaramidanyo iti ministerio gapu iti siit iti lasag, diyo panunoten nga awan magapuananyo. Kas ken Pablo, mabalinyo met ti ‘naan-anay a mangipaay iti pangsaksi iti naimbag a damag ti di kaikarian a kinamanangaasi ti Dios,’ nga aramidenyo ti ipalubos ti pigsa ken sirkumstansiayo. (Ara. 20:24) Bayat nga ikagumaanyo nga itungpal ti ministerioyo, ammoyo a maragsakan unay ni Jehova.—Heb. 6:10.